Agsaksi ken Jehova ket Dika Mabannog

“Panunotenyo ngarud daydiay nagsagaba iti kasta a panangsupring dagiti managbasol . . . tapno dikay koma mabannog ket agkapuykayo kadagiti kararuayo.”​—HEBREO 12:3.

1, 2. Ania a makakumbinsir a pammaneknek ti inted ni Jesus kadagiti adalanna nga isut’ napagungaren?

“NAKITAK ti Apo!” Babaen kadagidiay makakellaat a sasao, impakaammo ni Maria Magdalena ti damag maipapan ti panagungar ni Jesus. (² Juan 20:18) Daytoy ti nangtanda ti pangrugian ti 40 nga aldaw a napunno kadagiti nakaay-ayat a pasamak kadagiti adalan ni Kristo, nga iti immuna napaladingitanda iti ipapatayna.

² Di kayat ni Jesus nga agduadua ti is-isip dagiti adalanna nga isut’ aktual a sibibiag. Gapuna, kas insalaysay ni Lucas: “Kadakuada nagparang met a sibibiag [ni Jesus] idi kalpasan ti panagsagabana, gapu kadagiti adu a pammaneknek ket nagparparang kadakuada bayat ti uppatapulo nga aldaw.” (Aramid 1:3) Kinapudnona, iti maysa nga okasion “nagparang kadagiti nasurok a lima gasut a kakabsat iti namimpinsan.” (1 Corinto 15:6) Pudno unay, awan itan ti lugar maipaay iti panagduadua. Sibibiagen ni Jesus!

 3. Ania a saludsod maipapan iti Pagarian ti impasango dagiti adalan ni Jesus kenkuana, ken apay a ti sungbatna ti nangkellaat kadakuada?

³ Ti pampanunoten laeng idi dagiti adalan ni Jesus isu ti naindagaan a “pagarian ti Dios,” daydiay maisublinto iti Israel. (Lucas 19:11; 24:21) Gapuna sinaludsodanda ni Jesus: “Apo, itan ti panangbangonmo manen ti pagarian iti Israel?” Awan duadua a ti sungbatna ti nangkellaat kadakuada, ta kinunana: “Saan a maibatang kadakayo ti panangammo kadagiti aldaw wenno kadagiti tiempo nga intalimeng ti Ama iti pannakabalinna a bukbukod; ngem umawatkayto ti pannakabalin inton umay kadakayo ti nasantuan nga espiritu, ket dakayto ti saksik sadi Jerusalem ken iti isuamin a Judea ken Samaria ken agingga iti ungto ti daga.” (Aramid 1:6-8) Anian a karit ti naipasango itan kadagiti adalan! Ken anian a responsabilidad! Kasanodanto ngata a mairingpas ti kasta a trabaho? Ti sungbat immay a di nagbayag iti makakellaat a pamay-an.

Panangawat iti Karit

 4. Isalaysay no aniat’ napasamak idi aldaw ti Pentecostes.

⁴ Insalaysay ni Lucas: “Ket idi madama ti aldaw ti Pentecostes addada amin a naurnong iti maysa a disso, ket iti apagdarikmat immay manipud langit ti maysa a daranudor a kasla panagpuyupoy ti napigsa unay nga angin, ket pinunnona ti amin a balay a yanda nga agtutugaw. Ket nagparang kadakuada dagiti kasla dildila nga apuy a naibunong, ket nagdisso iti tunggal maysa kadakuada, ket napnoda amin iti nasantuan nga espiritu ket rinugianda ti nagsasao kadagiti sabsabali a pagsasao, a kas inted ti espiritu kadakuada a pagsasao.” Nagpigsa unay ti daranudor a daytat’ nangatrakar ti atension dagiti umariwekwek a Judio nga adda idiay Jerusalem gapu iti piesta. Nagsiddaawda a makangngeg ‘iti pagsasaoda maipapan kadagiti nakaskasdaaw nga aramid ti Dios.’​—Aramid 2:1-11.

 5. Iti ania a kasaknap a ti padles ni Jesus idiay Aramid 1:8 matungpalen iti mabiit?

⁵ Saan a nagtaktak ni Pedro a nangted ti dinamiko a palawag, a pinaneknekanna nga awan duadua a ni “Jesus a Nazareno,” nga inlansada, ket isu ti “Apo” nga impadto ni David kadagiti sasao a: “Kinuna ni Jehova iti Apok: ‘Agtugawka iti makanawanko, agingga iti mapagbalinko dagiti kabusormo a pagbatayam.’” Naduyok iti puso, dagiti managdengngeg ni Pedro ti nangisaludsod: “Lallaki, a kakabsat, ania ti aramidenmi?” Kas sungbat inggunamgunam ni Pedro kadakuada: “Agbabawikayo, ken mabautisaran ti tunggal maysa kadakayo iti nagan ni Jesu-Kristo a maipaay iti pannakaikkat dagiti basbasolyo.” Ti resultana? Tallo ribo ti nabautisaran! (Aramid 2:14-41) Maipapaayen ti pammaneknek idiay Jerusalem. Iti kamaudiananna, daytat’ limmawa ingganat’ amin a Judea, sa idiay Samaria, ket iti kamaudiananna “agingga iti ungto ti daga.” Nakaparpartak la unay ti panagsaknap ti trabaho a panangikaskasaba ti Pagarian ta idi agarup 60 K.P. maikunan apostol Pablo a ti naimbag a damag ti “naikaskasaba iti amin a parsua iti baba ti langit.”​—Colosas 1:23.

Panagsaknap ti Pagarian ken ti Pannakaidadanes

6, 7. (a) Kasano a ti panagsaknap ti Pagarian ken ti pannakaidadanes dagiti Kristiano naggigiddan idi umuna a siglo? (b) Ania a naganat a pagkasapulan ti rimsua kadagiti Kristiano idiay Jerusalem, ket kasano a napunnuan daytoy a pagkasapulan?

⁶ Di nagbayag kalpasan ti Pentecostes 33 K.P., adda rason dagiti adalan ni Jesus a manglagip kadagiti sasaona: “Saan a dakdakkel ti adipen ngem ti apona. No indadanesdak, idadanesdakayto met.” (Juan 15:20) Nakaluksaw dagiti papangulo a Judio idi a “rimmangrang-ay ti sao ti Dios, ket ti bilang dagiti agsursuro umadu unay sadi Jerusalem.” Kadagiti ulbod a darum, inuborda ni adalan nga Esteban agingga ken patay. Nagparang dayta a senial kadagiti adu nga ur-urayenda, ta “kadagidi nga aldaw naaramid ti maysa a dakkel a pannakaidadanes ti kongregasion nga adda idi sadi Jerusalem; ket naiwarawarada amin kadagiti dagdaga ti Judea ken Samaria malaksid dagidi apostol.”​—Aramid 6:7; 7:58-60; 8:1.

⁷ Ti pannakaidadanes nagkalma iti apagbiit. Ngem di nagbayag kalpasanna, ni Herodes Agrippa I pinapatayna ni apostol Santiago. Naibalud ni Pedro ngem winayawayaan ti anghel. Kamaudiananna dagiti kakabsat idiay Jerusalem pimmanglawda iti namaterialan, ket kasapulan ti pannakaipatulod ti tulong kadakuada babaen kadagiti kapammatian iti dadduma a luglugar. (Aramid 9:31; 12:1-11; 1 Corinto 16:1-3) Bayat ti ibibisita ni apostol Pablo idiay Jerusalem, nakabatbatad ti narelihiusuan a kinapanatiko idi nga impukkaw dagiti umariwekwek: “Ikkatem ditoy daga ti kastoy a tao, ta saan a maipaay nga agbiag!” (Aramid 22:22) Pudno unay, dagidiay Kristiano nga aggigian idiay Jerusalem ken Judea kasapulanda ti adu a pammaregta tapno makapagtalinaedda a matalek a mangikaskasaba iti Pagarian. Inkari ni Jesus kadagiti adalanna a “ti nasantuan nga espiritu, nga ibaonto ni Ama iti naganko,” agtignayto kas “katulongan.” (Juan 14:26) Ngem kasano itat’ panangipaay ti Ama iti dayta kasapulan a tulong wenno mangliwliwa? Ti sungbat, iti pasetna, ket babaen ken apostol Pablo.

Ti Surat ni Pablo kadagiti Hebreo

 8. (a) Aniat’ nangtignay ken Pablo a suratan dagiti Hebreo? (b) Iti ania a paset ti suratna ti pangipamaysaantay ti atensiontayo, ken apay?

⁸ Idi agarup 61 K.P., naibalud ni Pablo idiay Roma, ngem pagaammonat’ mapaspasamak kadagiti kakabsatna idiay Jerusalem. Gapuna, iti sidong ti panangiturong ti espiritu ni Jehova, nangipatulod ti naintiempuan a surat kadagiti Hebreo. Daytat’ napunno ti naayat a pannakaseknan kadagiti kakabsatna a lallaki ken babbai a Hebreo. Ammo ni Pablo no aniat’ kasapulanda tapno mapabileg ti pammati ken panagtalekda ken Jehova kas Tulongda. Iti kasta mabalinda ti ‘agtaray a siaanus iti tarayen a naikabil iti sanguananda’ ken sitatalek a maikunada: “Ni Jehova ti tumulong kaniak; diakto agbuteng. Ania ti mabalin nga aramiden ti tao kaniak?” (Hebreo 12:1; 13:6) Daytoy nga aspeto ti surat ni Pablo kadagiti Hebreo (kapitulo 11-13) ti kayattayo a pangiturongan ita ti atensiontayo. Apay? Ngamin ta ti situasion a sinango dagidiay immuna a Kristiano ket isu met laeng ti sangsanguen dagiti Saksi ni Jehova itatta.

 9. Ania nga isyu a naipasango kadagiti Kristiano idi umuna a siglo ti naipasango kadagiti Kristiano itatta, ken kasano laeng a masaranget dayta?

⁹ Iti las-ud ti kaputotantayo, umariwekwek ti nangabrasa a sipopositibo iti mensahe ti Pagarian babaen ti panangidedikardat’ bagida ken Jehova ken panagbautisarda kas dagiti Saksina. Nupay kasta, naikuyog iti daytoy a panagsaknap ti pudno a panagdayaw immay met ti narungsot a pannakaidadanes, adu kadagiti Kristiano ti nakapukaw pay ti biagda kas ken Esteban, Santiago, ken dadduma pay a matalek a saksi idi umuna a siglo. Ngarud, ti isyu ket isu met laeng ita kas idi: Asinodat’ makabael nga agtakder iti suot ti kinatarnawda iti imatang ti dumakdakkel nga ibubusor iti mensahe ti Pagarian? Mainayon pay, asinodat’ makabael a sumango iti aglaplapusanan a paspasamak kas ti awan kapadpadana a “dakkel a rigat” a dandanin agtinnag iti daytoy agdama a kaputotan? (Mateo 24:21) Ti sungbat ket, dagidiay nakasagana a “makirupak iti nasayaat a pannakidangadang ti pammati,” dagidiay “nabileg iti pammati.” Dagitoy dagidiay makapagkunanto iti kamaudianan: “Daytoy ti panagballigi a pangparukma iti lubong, isu ti pammatitayo.”​—1 Timoteo 6:12; 1 Pedro 5:9; 1 Juan 5:4.

Pannakagunggona Manipud kadagiti Matalek nga Ulidan

10. (a) Ania ti pammati? (b) Kasanot’ panagrikna ti Dios maipapan kadagiti lallaki ken babbai ti pammati idi ugma?

¹⁰ Ania ti pammati? Sumungbat ni Pablo: “Ti pammati isu ti natalged a panangpadpadaaan iti bambanag nga in-inanamaen, ti nabatad a panangipakita kadagiti kinaagpayso nupay di pay nakita. Ta babaen iti daytoy dagiti tattao kadagiti immuna a tiempo nagun-odanda ti pammaneknek kadakuada.” (Hebreo 11:1, 2) Kalpasanna suportaran ni Pablo ti depinasionna ti pammati babaen ti panangipakita ti ar-aramid ti pammati. Ginupgopna dagiti tampok kadagiti kabibiag ti sumagmamano a “lallaki idi ugma,” agraman babbai kas kada Sara ken Rahab. Anian a makaparegta a ti “Dios saanna ida nga ibain, nga isu awaganda a Diosda”! (Hebreo 11:16) Maikuna met aya ti Dios ti kasta kadatayo gaput’ pammatitayo? Sapay koma ta isut’ ditay ik-ikkan ti panggapuanan a mangibain kadatayo bayat nga agpatingga ti tunggal aldaw.

11. Kasanotay a magunggonaan itatta manipud ti “ulep dagiti saksi a manglawlaw kadatayo”?

¹¹ Kalpasan ti salaysay dagitoy matalek a lallaki ken babbai, kuna ni Pablo: “Gapuna, datayo met idinto nga adda iti aglawlaw kadatayo ti kasta unay kadakkel nga ulep dagiti saksi, iwagsaktayo ti amin a pakadagsenan ken ti basol a manglawlaw a silalaka kadatayo, ket tarayentayo koma a siaanus ti tarayen a naikabil iti sanguanantayo.” (Hebreo 12:1) Nupay addada a matmaturog itan idiay tanem, sibibiag kadi iti is-isiptayo dagitoy mapagulidanan a matalek a saksi? Am-ammoyo aya ida a naimbag ken ti kapkapadasanda tapno makasungbat ti wen? Daytoy ti maysa kadagiti adu a gunggona ti regular a panagadal ti Biblia, nga usaren amin dagiti sentidotayo tapno biagentay manen dagiti nakaay-ayat a kapkapadasan daytoy nga “ulep dagiti saksi.” Pudno unay, ti panangipapuso iti matalek nga ulidanda dakkel ti maitulongna kadatayo a mangparukma ti aniaman a kinakurang ti pammati. Kalpasanna, daytoy ti mangtulong kadatayo a mangted ti maingel ken awan butengna a pammaneknek iti kinapudno iti uray ania a sirkumstansia.​—Roma 15:4.

Di Mabannog

12. (a) Kasano a ti ulidan ni Jesus tulongannatayo a ‘di mabannog ken agkapuy iti karkararuatayo’? (b) Aniada ti sumagmamano nga agdama a pangarigan dagidiay di nabannog?

¹² Ti naindaklan nga ulidantay ti pammati isu ni Jesus. Inggunamgunam ni Pablo: “Tarayentayo koma a siaanus ti tarayen a naikabil iti sanguanan a kitkitaentayo a sipapasnek ni Jesus a Kangrunaan nga Ahente ken Mangtungpal ti pammati. . . . Panunotenyo a sisisinged ngarud daydiay a nagsagaba iti kasta a panangsupring dagiti managbasol a bimmusor kenkuana, tapno dikay koma mabannog nga agkapuykayo kadagiti kararuayo.” (Hebreo 12:1-3) Kasano ‘kasinged’ ti panangpampanunotyo iti ulidan ni Jesus? Kasano ‘kapasnek’ ti panangmatmatmatyo kenkuana? (1 Pedro 2:21) Kayat ni Satanas a ‘mabannogtayo ken agkapuytay iti karkararuatayo.’ Kayatnatay a pasardengen iti panangaskasabatayo. Kasanot’ panangaramidna iti daytoy? No maminsan babaen iti direkta nga ibubusor manipud kadagiti narelihiusuan ken nailubongan nga agtuturay, kas idi umuna a siglo. Idi napan a tawen, ti panangikaskasaba ti Pagarian ket maiparparit iti agarup 40 a pagilian. Ngem dayta aya ti nangpabannog kadagiti kakabsattayo? Saan! Ti matalek a trabahoda nangibunga iti 17,000 ken ad-adu pay a nabautisaran kadagidiay a dagdaga idi 1988. Anian a pammaregta daytoy kadagidiay amin nga agnanaed kadagiti pagilian nga adda laeng limitado a wayawaya! Ditay koma mabannog iti panangikaskasaba ti naimbag a damag ti Pagarian!

13. (a) Aniada ti sumagmamano kadagiti nasikap a bambanag a mangpakapuy kadatayo iti panangaskasabatayo? (b) Ania ‘ti rag-o a naipasango ken Jesus,’ ken kasanotayo a magun-odan ti isu met laeng a naragsak a kababalin?

¹³ Nupay kasta, addada pay dadduma a nasikap a bambanag a mabalin mangbannog kadatayo. Ramanen daytoy ti ibubusor iti nabingaybingay a sangakabbalayan, pannakariribuk ti isip, parparikut iti salun-at, panangparigat dagiti kapatadan, pannakaupay gaput’ kinakurang dagiti positibo a resulta iti panangaskasabatayo, wenno nalabit ti di makaan-anus a rikna gapu ta ti panungpalan daytoy a sistema ti bambanag ket di pay immay. Bueno, aniat’ nakatulong ken Jesus a nangibtor iti panagsagsagaba iti isip ken bagi? Isu “ti rag-o a naikabil iti sanguananna.” (Hebreo 12:2) Nasustiner ni Jesus babaen iti rag-o a mangparagsak ti puso ni Amana babaen ti panangalangon Kenkuana ken panangnamnama iti ragsak ti masanguanan a lak-amennanto iti panangiburayna kadagiti nakaskasdaaw a bendision ti Mesianiko a Pagarian. (Salmo 2:6-8; 40:9, 10; Proverbio 27:11) Mabalinantay pay kadi a suroten a napaspasnek daytoy naragsak a kababalin ni Jesus? Ken laglagipenyo ti pammasiguro ni Pedro idiay 1 Pedro 5:9: “Dagiti kastoy a sagsagabaen madamada a mapasamak iti intero nga asosasion dagiti kakabsatyo nga adda ditoy lubong.” Pagaammo a ni Jehova maaw-awatanna, ti pannakarikna ti kinabara ti sangalubongan a panagkakabsat, ken panangipamaysa ti matmatatayo kadagiti rag-o iti masanguanantayo iti sidong ti turay ti Pagarian​—amin dagitoy ti makatulong kadatayo a di mabannog iti panagserserbi ken Jehova iti pammati ken iti panangaskasaba itan a ti panungpalan ket nakaas-asideg unayen.

Apay Mangdisiplina ni Jehova

14. Aniada a gunggona ti mabalin nga ibunga dagiti suot ken panagsagaba a masapul nga ibturantayo?

¹⁴ Ilawlawag ita ni Pablo ti rason no apay nga agibturtayo kadagiti pakasuotan ken panagsagsagaba. Isingasingna a matmatantay dagita kas maysa a porma ti disiplina. Inrason ni Pablo: “Anakko, saanmo nga umsien ti panangdisiplina ni Jehova, ket dika met agkapuy no babalawennaka; ta ni Jehova dusaenna ti ayatenna.” (Hebreo 12:5, 6) Uray ni Jesus “naadalna ti panagtulnog gapu kadagiti bambanag a linak-amna.” (Hebreo 5:8) Pudno unay, kasapulan met a maadaltay ti panagtulnog. Kitaenyo dagiti makagunggona nga epekto iti panangipalubos ti disiplina a mangsukog kadatayo. Kuna ni Pablo: “Ngem kalpasanna pataudenna ti natalna a bunga ti kinalinteg, a maipaay kadagiti nairuam iti daytoy.” Anian a makaparegta dayta!​—Hebreo 12:11.

15. Kasanotay a maiyaplikar ti balakad ni Pablo a ‘palintegen dagiti dandana kadagiti saksakatayo’?

¹⁵ No akseptarentayo ti “disiplina ken Jehova” iti daytoy a lawag, ipapusotay met ti positibo a balakad ni Pablo: “Gapuna itayagyo dagiti im-ima a nalpay ket patibkerenyo dagiti tumtumeng nga aglukay, ket palintegenyo dagiti dandana a maipaay kadagiti saksakayo.” (Hebreo 12:12, 13) No maminsan naglaka ti maisiasi manipud ‘akikid a dalan a mangiturong iti biag.’ (Mateo 7:14) Ni apostol Pedro ken dagiti dadduma idiay Antioquia naminsan a nakabasolda iti daytoy. Apay? Ngamin ta “dida magmagna a sililinteg kas iti kinapudno ti naimbag a damag.” (Galacia 2:14) Ita, rebbeng nga itultuloytay nga ipangag ti Naindaklan a Namarsuatayo, ni Jehova a Dios. Masapul nga usarentay a naan-anay dagiti tulong a naipaay babaen “ti matalek ken naannad nga adipen.” Daytoy ti mangipasiguro ti ‘nalinteg a dandana’ para iti saksakatayo.​—Mateo 24:45-47; Isaias 30:20, 21.

16. (a) Kasano a mabalin kumpet ti “ramut ti pait” iti kongregasion? (b) Apay nga innaig ni Pablo ti imoralidad iti kinakurang ti panangapresiar ti nasantuan a bambanag, ket kasanotay a saluadan ti bagbagitayo kontra kadagita a peggad?

¹⁶ Sumaganad a mamakdaar ni Pablo a rebbengtay a “kitaen a siaannad di la ket ta adda siasinoman a tao a mayadayo iti di kaikarian a kinamanangaasi ti Dios; di la ket ta ti aniaman a ramut ti pait tumubtubo ket pagsikorennakayo ken gapu kenkuana adu ti matulawan.” (Hebreo 12:15) No makaungettayo, nga awan pannakapnekna, nga agsapsapul ti biddut iti wagas a pannakaar-aramid dagiti bambanag iti kongregasion arigna ti “ramut ti pait” a daras nga agsaknap ken mangsabidong ti makaay-ayo a pampanunot dagiti tattao iti kongregasion. Mabalintay a parmeken ti kakasta a negatibo a pampanunot babaen ti panaglaglagip kadagiti di mabilangen a bembendision nga inyeg ti kinapudno iti biagtayo. (Salmo 40:5) Ti sabali pay a peggad isut’ kaadda dagiti imoral a pagannayasan wenno ‘kinakurang ti panangapresiar kadagiti nasantuan a bambanag, kas ken Esau.’ (Hebreo 12:16) Pinagnaig ni Pablo dagitoy dua a peggad, gapu ta ti maysa naglaka a mangiturong iti daydiay maysa. Awan Kristiano ti matnag kadagita nga inaagum a tartarigagay no iyaplikarna ti sasao ni Pedro: “Isu [ti Diablo], sarangtenyo ngarud babaen iti nabileg a pammati.”​—1 Pedro 5:9.

“Kinaagpayso Nupay Di Pay Nakita”

17. Idiligyo ti nakabutbuteng a pasamak idiay Bantay Sinai kadagidiay naipasango kadagiti Kristiano itatta.

¹⁷ Ti pammatitayo agpannuray kadagiti “kinaagpayso nupay di pay nakita.” (Hebreo 11:1) Dadduma kadagitoy di pay nakita a kinaagpayso ti ituloy a salaysayen ni Pablo idiay Hebreo 12:18-27. Insalaysayna ti mangnibinibi a paspasamak idiay Bantay Sinai idi nagsao a direkta ti Dios iti Israel ken idi a kinuna ni Moises: “Makigtotak unay ken agtaytayegtegak.” Kalpasanna innayon ti apostol: “Ngem immasidegkayo iti Bantay Sion ken iti siudad ti Dios a sibibiag, ti Jerusalem a nailangitan, ken kadagiti di mabilang a buybuyot dagiti anghel.” Iti kaso dagiti Israelita idi ugma idiay Bantay Sinai, pinagkintayeg ti timek ti Dios ti daga, kuna ni Pablo, ngem itan inkarina, a kunkunana: “Pagkintayegek pay maminsan saan laeng a ti daga, no di ket ti langit pay.” Nupay dagitoy a sasao ti nangnangruna a naiturong kadagiti napulotan a Kristiano, mabalin met nga ipapuso daytoy ti “dakkel nga umariwekwek” ti sabsabali a karnero. (Apocalipsis 7:9) Apresiarenyo aya a naan-anay ti ibagbaga ni Pablo? Agtaktakdertayo iti sanguanan ti taripnong dagiti pinulpullo a ribo nga anghel. Siempre, agtaktakdertayo met iti saklang ni Jehova. Iti makanawanna adda idiay ni Jesu-Kristo. Wen, addatayo iti nakaay-ayat a kasasaad ken iti sidong ti dakdakkel a responsabilidad ngem kadagidi kadaanan a Hebreo idiay Bantay Sinai! Ken laglagipenyo, ti panangkintayeg iti um-umayen a gubat ti Armagedon ikisapnanto ti agdama a dakes a langit ken daga. Pudno unay a saanen a panawen itatta nga “agpambar” manipud panagimdeng iti Sao ti Dios ken agtulnog iti dayta!

18. Kasanotay laeng a makapagtultuloy a mangaskasaba agpaay ken Jehova, a di mabannog?

¹⁸ Ngarud, pudno, nga agbibiagtayon iti nakaay-ayat a panawen iti natauan a historia. Kas dagiti Saksi ni Jehova, naibaontayo agingga iti ungto ti daga a mangikaskasaba ti naimbag a damag ti naipasdeken a Pagarian ti Dios. Tapno maaramidan dayta, masapul nga addaantay ti pammati a di makintayeg, pammati a di mabannog, pammati a mamagbalin kadatayo a mangakseptar ti disiplina ni Jehova. No addaantay ti kasta a pammati, masarakantayto a mairaman kadagidiay “agtultuloy a maaddaan ti di kaikarian a kinamanangaasi, ket gapu itoy mangipaaytayo ti sagrado a serbisio iti Dios a buyogen ti panagraem ken buteng.” (Hebreo 12:28) Wen, ken agtultuloytayo nga agsaksi ken Jehova ket di mabannog.

Kasanot’ Panangsungbatyo?

◻ Apay a ti surat ni Pablo kadagiti Hebreo makagunggona kadatayo?

◻ Ania nga isyu ti masapul a sanguen dagiti Kristiano itatta?

◻ Kasanotay a magunggonaan manipud kadagiti matalek a saksi idi ugma?

◻ Apay a ni Jehova disiplinaenna dagidiay ay-ayatenna?

◻ Aniat’ tulbek wenno palimed iti panangaskasaba a di mabannog?