Siguraduem nga Iyun-una Dagiti Rebbeng nga Iyun-una!

Adda gimongyo ita a rabii, ngem adda aramidem. Ania ti iyun-unam?

MAYSAKA nga asawa ken ama. Bayat nga agngudo ti napaut, makabannog nga aldaw iti trabaho, nalagipmo nga adda gimong ti kongregasionyo iti karabiyanna. No agawidka a dagus, adda pay panawenmo nga agdigus, agpelles, ken mangrabii iti apagbiit sakbay a mapanka makigimong. Pagammuan, inasitgannaka ti amongmo ket indawatna nga ilaylayonmo ti agtrabaho. Inkarina a suelduannaka iti dakkel. Kasapulam ti kuarta.

Wenno maysaka nga asawa a babai ken ina. Bayat nga isagsaganam ti pangrabii, nakitam dagiti nagabsuon a paplansaen, ket pagpellesto no bigat ti dadduma kadagitoy. Isaludsodmo iti bagim, ‘No makigimongak ita a rabii, kaanonto pay a masangok a plansaen dagitoy?’ Gapu ta nabiitka pay iti amin-tiempo a trabahom, maamirismo no kasano karigat ti panangasikaso kadagiti annongem iti pagtaengan bayat a mangmanggedka.

Wenno maysaka nga estudiante. Iti siledmo, nagabsuon idiay lamisaan dagiti leksionmo. Nabayagen a naited ti kaaduan kadagitoy ngem intungtungkuam, ket itan ti maudi nga aldaw a rebbeng a pannakaileppas ti adu kadagitoy a leksion. Makaibagbagaka kadagiti dadakkelmo a palubosandaka koma a lumangan iti gimong tapno mairingpasmo ti aramidem.

Ania ti iyun-unam: ti ekstra a panangged, ti panagplansa, ti leksion, wenno ti gimong iti kongregasion? Iti naespirituan a pannao, ania ti kayat a sawen ti panangyun-una kadagiti banag a rebbeng nga iyun-una? Ania ti panangmatmat ni Jehova?

Ania ti Rebbeng nga Iyun-una?

Di nagbayag kalpasan a naawat dagiti Israelita ti Sangapulo a Bilin, adda lalaki a nasarakan a mangaykayo iti Sabbath. Siiinget a naiparit daytoy iti Linteg. (Numeros 15:32-34; Deuteronomio 5:12-15) No sika ti mangikeddeng iti dayta a banag, ania ngata ti pangngeddengmo? Pakawanem kadi ti lalaki, nga ikalintegam a total saan nga agob-obra tapno mamantenerna ti nanam-ay a panagbiag no di ket tapno maipaayna dagiti kasapulan ti pamiliana? Irasonmo kadi nga adu ti gundaway iti makatawen a panangngilin iti Sabbath ket ti kasta a maminsan a panagliway, nalabit gapu ta saan a nagplano a nasapsapa ti lalaki, nalaka laeng a mapakawan?

Saan a linaglag-an ni Jehova dayta a banag. Kuna ti Biblia: “Ket ni Jehova kinunana ken Moises, Ti lalaki pudno a mapapatayto.” (Numeros 15:35) Apay a nakapungtot ni Jehova iti inaramid ti lalaki?

Naipaayan dagiti tattao iti innem nga aldaw a mangayo ken mangasikaso kadagiti kasapulanda kas iti taraon, pagan-anay, ken pagtaengan. Ti maikapito nga aldaw ket agpaay kadagiti naespirituan a kasapulanda. Saan a dakes ti mangayo, ngem di umiso nga usaren iti panangayo ti panawen a nailasin a mausar iti panagdayaw ken Jehova. Nupay awan dagiti Kristiano iti sidong ti Linteg Mosaiko, saan kadi nga isurona kadatayo daytoy a pasamak nga ipangrunatayo dagiti rebbeng nga iyun-una?​—Filipos 1:10.

Kalpasan ti 40 a tawen a kaaddada idiay let-ang, nagsagana dagiti Israelita a sumrek iti Naikari a Daga. Nauman dagiti dadduma a mangmangan iti manna nga impaay kadakuada ti Dios idiay let-ang ket awan duadua a ninamnamada ti sabali a taraon. Tapno matulongan ida a mangsalimetmet iti umiso a panangmatmat bayat ti iseserrekda iti daga a “pagayusan ti gatas ken diro,” pinalagipan ida ni Jehova: “Ti tao saan laeng a ti kanen ti pagbiagna, no di ket ti isuamin a rummuar iti ngiwat ni Jehova ti pagbiagan ti tao.”​—Exodo 3:8; Deuteronomio 8:3.

Masapul nga igaed dagiti Israelita ti agtrabaho tapno adda “gatas ken diro[da].” Adda dagiti buyot a parmeken, balbalay a bangonen, taltalon a mulaan. Uray pay kasta, binilin ni Jehova dagiti tattao nga inaldaw a mangilasinda iti panawen a mangmennamenna kadagiti naespirituan a banag. Nasken met nga iwayaanda nga isuro kadagiti annakda dagiti dalan ti Dios. Kinuna ni Jehova: “Isuroyonto [dagiti bilinko] kadagiti annakyo, a dagitoy ti sasawenyo kadakuada no agtugawka iti balaymo, ken no magmagnaka iti dalan, ken no agiddaka ken bumangonka.”​—Deuteronomio 11:19.

Mamitlo iti makatawen a nabilin dagiti amin a lallaki nga Israelita ken proselita nga agparang ken Jehova. Tangay mabigbigda a magunggonaan iti naespirituan ti amin a kameng ti pamilia iti kakasta nga okasion, adu idi dagiti amma a nangikuyog iti asawa ken kadagiti annakda. Ngem siasino ti mangbantay kadagiti pagtaengan ken talonda tapno saan a rauten dagiti kabusor bayat nga awan ti pamilia? Inkari ni Jehova: “Awanto . . . ti agkalikagum iti dagam no umulika nga agparang iti saklang ni Jehova a Diosmo iti mamitlo iti makatawen.” (Exodo 34:24) Nasken nga addaan dagiti Israelita iti pammati a no ipangrunada dagiti naespirituan a banag, saanda a malugi iti material. Tinungpal kadi ni Jehova ti saona? Wen!

Itultuloymo a Biroken nga Umuna ti Pagarian

Insuro ni Jesus kadagiti pasurotna nga iyun-unada dagiti naespirituan a banag. Iti Sermonna iti Bantay, binagbagaanna dagiti agdengdengngeg kenkuana: “Dikay pulos maringgoran ket kunaenyo, ‘Ania ti kanenminto?’ wenno, ‘Ania ti inumenminto?’ wenno, ‘Ania ti pagkawesminto?’ Itultuloyyo . . . a sapulen nga umuna ti pagarian ken ti kinalintegna, ket isuamin dagitoy [nasken a material] a bambanag mainayondanto kadakayo.” (Mateo 6:31, 33) Di nagbayag kalpasan ti ipapatay ni Jesus, dagiti Kristiano a nabiit pay idi a nabautisaran sinurotda dayta a balakad. Adu idi dagiti Judio wenno proselita a Judio a napan idiay Jerusalem tapno rambakanda ti piesta ti Pentecostes idi 33 K.P. Bayat nga addada sadiay, adda di ninamnama a napasamak. Nangngeg ken inawatda ti naimbag a damag maipapan ken Jesu-Kristo. Tangay magagaranda a mangammo iti ad-adu pay maipapan iti baro a pammatida, nagtalinaedda idiay Jerusalem. Bumasbassit idin dagiti abastoda, ngem dagiti material a pagnam-ayan ti sumegsegunda laeng ti pategna. Nasarakanda ti Mesias! Inranud dagiti Kristiano a kakabsatda dagiti material a banag nga adda kadakuada tapno maitultuloy ti amin ‘nga ipamaysa ti bagbagida iti sursuro dagiti apostol ken . . . kadagiti panagkararag.’​—Aramid 2:42.

Idi agangay, nalipatan dagiti dadduma a Kristiano ti kinapateg ti regular a panagtitimpuyogda kadagiti gimong. (Hebreo 10:23-25) Nalabit nagbalinda a materialistiko, a liniwayanda dagiti naespirituan a banag bayat nga ikagkagumaanda a siertuen ti pinansial a kinatalgedda ken dagiti pamiliada. Kalpasan ti panangidagadagna kadagiti kakabsatna a saanda a liwliwayan dagiti gimong, insurat ni apostol Pablo: “Ti wagas ti panagbiagyo siwayawaya koma iti panagayat iti kuarta, bayat a mapnekkayo kadagiti agdama a bambanag. Ta kinunana: ‘Saankanto a pulos panawan ket saankanto a pulos baybay-an.’”​—Hebreo 13:5.

Naintiempuan unay ti balakad ni Pablo. Agarup lima a tawen kalpasan a sinuratan ni Pablo dagiti Hebreo, linakub ti Romano a buyot ni Cestius Gallus ti Jerusalem. Nalagip dagiti matalek a Kristiano ti pakdaar ni Jesus: “Inton makitayo [daytoy] . . . , dagidiay adda idiay Judea rugianda koma ti agkamang kadagiti bambantay. Ti tao nga adda iti tuktok ti balay saan koma a bumaba, wenno sumrek iti uneg tapno mangala iti aniaman a banag manipud iti balayna; ket ti tao nga adda iti talon saan koma nga agsubli kadagiti bambanag iti likudan tapno alaenna ti makinruar a kawesna.” (Marcos 13:14-16) Ammoda nga agpannuray ti pannakaisalakanda, saan nga iti kinatalged ti panggedanda wenno ti pateg dagiti material a sanikuada, no di ket iti panangtungpalda kadagiti bilin ni Jesus. Dagidiay nangipangag iti balakad ni Pablo ken nangyun-una kadagiti naespirituan a banag awan duadua a nalaklakada a pinanawan ti pagtaengan, panggedan, pagan-anay, ken dagiti napateg a personal a sanikuada ken nagkamang iti kabambantayan ngem ti asinoman a naigalut iti panagayat iti kuarta.

No Kasano a Dagiti Dadduma Iyun-unada Dagiti Rebbeng nga Iyun-una Ita

Napateg kadagiti matalek a Kristiano itatta ti regular a pannakitimpuyog kadagiti kakabsatda, ket adu ti agsaksakripisio tapno makatabunoda kadagiti gimong. Iti dadduma a lugar, ti laeng nabatangbatang ti oras a trabaho ti magun-odan. Intukon ti maysa a kabsat a sandianna dagiti katrabahuanna kadagiti rabii ti Sabado, a kadawyanna nga isu ti panawen a panagpalpaliwa ti kaaduan a tattao iti lugarda, no sublatanda met kadagiti rabii nga adda gimong. Dagiti dadduma a kakabsat a nabatangbatang ti oras ti trabahoda tumabunoda kadagiti gimong iti kabangibang a kongregasion no saanda a makatabuno idiay kongregasionda gapu iti trabahoda. Iti kastoy a wagas, gistay awan a pulos ti gimong a malangananda. Naamiris a dagus ti maysa a kabbaro nga interesado idiay Canada ti kinapateg ti Teokratiko nga Eskuelaan ti Panagministro ken ti Gimong ti Serbisio, ngem saan a makatabuno gapu iti eskediul ti trabahona. Gapuna, binayadanna ti maysa a katrabahuanna a mangala iti batangna tapno nawaya a makatabuno kadagitoy napateg a gimong.

Adu dagiti agsagsagaba iti agpaut a sakit a manmano a lumangan iti gimong. Denggenda ti programa idiay balayda babaen ti telepono wenno iti tape recorder no saanda a makapan idiay Kingdom Hall. Ipakpakitada ti makomendaran a panangapresiar kadagiti naespirituan a probision ni Jehova babaen ti “matalek ken masirib nga adipen[na]”! (Mateo 24:45) Dagiti Kristiano a mangay-aywan kadagiti lallakay ken babbaketen a dadakkelda agyamanda unay no agboluntario ti maysa a kabsat a mangbantay iti ama wenno inada tapno makatabuno ti para-aywan iti gimong ti kongregasion.

Antemano nga Agplano!

Dagiti nagannak a sipapanunot kadagiti naespirituan a kasapulanda tulonganda dagiti annakda a mangapresiar kadagiti gimong. Kas sapasap a pagannurotan, namnamaenda a sanguen a dagus dagiti annakda ti leksionda imbes nga itungtungkuada. Kadagiti rabii nga adda gimong, sanguen dagiti annak ti leksionda apaman a makaawidda manipud eskuelaan. Saanda a palubosan dagiti pagpalpaliwaan ken dadduma pay nga aramid a manglapped iti itatabunoda kadagiti gimong ti kongregasion.

Kas maysa nga asawa ken ama, ipangpangrunam met laeng kadi ti pannakigimong? Kas maysa nga asawa a babai ken ina, ikagkagumaam kadi nga iplano dagiti annongem tapno makatabunoka kadagiti gimong? Kas maysa nga agtutubo, napatpateg kadi kenka ti leksionmo ngem dagiti gimong wenno napatpateg dagiti gimong ngem ti leksionmo?

Maysa a naayat a probision ni Jehova ti gimong ti kongregasion. Ikagumaam koma ti makiraman iti dayta nga urnos. Sibabaknang a bendisionannaka ni Jehova no iyun-unam dagiti banag a rebbeng nga iyun-una!