Ipalpalubosmo Kadi nga Inaldaw a Makasaritanaka ti Dios?

KASANO kasansan nga agsarmingka? Kaaduan kadatayo ti inaldaw a mangar-aramid iti dayta​—nalabit mamin-adu iti agmalem. Apay? Gapu ta maseknantayo iti langatayo.

Ti panagbasa iti Biblia ket mayarig iti panagsarming. (Santiago 1:23-25) Ti mensahe a nailanad iti Sao ti Dios ket addaan iti bileg a mangtulong kadatayo a mangkita iti pudno a kinataotayo. “Sumalput uray agingga iti paglasinan ti kararua ken espiritu.” (Hebreo 4:12) Iti sabali a pannao, ipakitana ti makinruar ken makin-uneg a kinataotayo. Kas iti sarming, ipakita ti Biblia no ania dagiti masapul a balbaliwantayo.

Malaksid iti dayta, tulongannatayo pay a mangaramid kadagita a panagbalbaliw. Insurat ni apostol Pablo: “Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg.” (2 Timoteo 3:16, 17) Imutektekam ta tallo kadagiti uppat a nadakamat a gunggona​—mangtubngar, mangpalinteg kadagiti bambanag, ken mangdisiplina​—ti agkasapulan iti panangbalbaliw iti kababalin ken tigtignaytayo. No kasapulan a regular nga agsarmingtayo tapno masigurado a makaay-ayo ti langatayo, anian a napatpateg ti regular a panagbasatayo iti Sao ti Dios, ti Biblia!

Idi a ni Jehova a Dios dinutokanna ni Josue a mangidaulo iti nasion ti Israel, kinunana kenkuana: “Daytoy a libro ti linteg saan koma a sumina iti ngiwatmo, ket masapul nga iti nababa a timek agbasaka iti dayta iti aldaw ken rabii, tapno maannadam nga aramiden ti maitunos iti isuamin a naisurat iti dayta; ta iti kasta pagballigiemto ti dalanmo ket iti kasta agtignaykanto a sisisirib.” (Josue 1:8) Wen, tapno agballigi ni Josue, masapul a basaenna ti Sao ti Dios iti “aldaw ken rabii,” kayatna a sawen, regular.

Itampok met ti umuna a salmo dagiti gunggona nga itden ti regular a panagbasa iti Biblia, idi kinunana: “Naragsak ti tao a saan a nagna iti pammatigmaan dagidiay nadangkes, ket iti dalan dagiti managbasol saan a nagtalinaed, ken iti tugaw dagiti managuy-uyaw saan a nagtugaw. Ngem ti pakaragsakanna adda iti linteg ni Jehova, ket iti lintegna agbasa iti nababa a timek iti aldaw ken rabii. Ket sigurado nga agbalinto a kas iti kayo a naimula iti igid dagiti pagayusan ti danum, a mangipaay iti bukodna a bunga iti panawenna ket dagiti bulongna saan a malaylay, ket ti isuamin nga aramidenna agballiginto.” (Salmo 1:1-3) Sigurado a kayattayo ti agbalin a kasta.

Adu ti nangyugali iti inaldaw a panagbasa iti Biblia. Idi napagsaludsodan ti maysa a Kristiano no apay nga inaldaw a basbasaenna ti Biblia, insungbatna: “No mamin-adu nga agkararagak iti Dios bayat ti agmalem ken namnamaek nga ipangagnak, apay koma a saanak nga umimdeng iti Dios babaen ti inaldaw a panangbasak iti Saona? No kayattayo ti agbalin a nasayaat a gayyem, apay a bukodantayo ti saritaan?” Adda puntona. Ti panagbasa iti Biblia ket mayarig iti panagimdeng iti Dios gapu ta babaen iti dayta, maammuantayo ti panangmatmatna kadagiti bambanag.

Nalabit adda eskediulmon nga agbasa iti Biblia. Nabasam kadin ti intero a Biblia? Dayta ti nagsayaat a pamay-an tapno agbalinka a pamiliar kadagiti linaonna. Nupay kasta, dadduma ti namin-adun a nangirugi a mangbasa iti intero a Biblia ngem naisardengda. Kastaka met kadi? Ania ti mabalinmo nga aramiden tapno mabasam ti intero a Biblia? Apay a dimo padasen dagiti dua a singasing?

Iramanmo ti panagbasa iti Biblia iti inaldaw a rutinam. Mangpilika iti kasayaatan nga oras iti kada aldaw a mabalinmo a basaen ti Biblia. Mangikeddengka iti maikadua nga eskediul. No kas pagarigan ta saanmo a mabasa ti Biblia iti pinilim nga oras, aramidem dayta iti maikadua nga inkeddengmo nga oras tapno saan a lumabas ti agmalem a dimo nabasa ti Sao ti Dios. Iti kasta, matuladmo ti ulidan dagiti nagkauna a taga-Berea. No maipapan kadakuada, naibaga kadatayo: “Inawatda ti sao buyogen ti napalalo unay a kinagagar ti panunot, a siaannad a suksukimatenda ti Kasuratan iti inaldaw no agpayso dagitoy a banag.”​—Aramid 17:11.

Adda koma espesipiko a kalatmo. Kas pagarigan, no inaldaw a mangbasaka iti tallo agingga iti lima a kapitulo ti Biblia, mabasam ti intero a Biblia iti makatawen. Ti tsart kadagiti sumaganad a panid ipakitana no kasanom a maaramid dayta. Determinadoka koma a mangsurot iti dayta a programa. Iti baba ti paulo a “Petsa,” iplanom no kaano a basaem ti sumagmamano a kapitulo. Kalpasanna iti kahon, tsekam dagiti benneg apaman a nabasam dagita. Iti kasta, makitam dagiti nabasamon.

No nalpasmon ti intero a Biblia, ulitem manen. Mabalinmo nga usaren ti isu met laeng nga eskediul iti kada tawen, nalabit a mangrugika iti sabali a benneg. Wenno no kayatmo a nabaybayag a maileppas ti panangbasam iti intero a Biblia, mabalinmo a basaen iti dua wenno tallo nga aldaw daydiay nayeskediul a basaem koma iti maysa nga aldaw.

Tunggal basaem ti Biblia, adda latta baro a banag a maammuam nga agaplikar iti biagmo​—bambanag a dimo pay naikabilangan. Apay? “Ti buya daytoy a lubong agbaliwbaliw,” ken kanayon met nga agbalbaliw ti biag ken kasasaadtayo. (1 Corinto 7:31) Ngarud, determinadoka koma nga inaldaw nga “agsarming” iti Sao ti Dios, ti Biblia. Iti kasta, ipalpalubosmo nga inaldaw a makasaritanaka ti Dios.​—Salmo 16:8.