Agpaiturongka ken Jehova iti Pudno a Wayawaya

“[Sukimatem ti] perpekto a linteg a kukua ti wayawaya.”​—SANT. 1:25.

MAILAWLAWAGMO KADI?

Ania a linteg ti mangyeg iti pudno a wayawaya, ken siasino dagiti magunggonaan iti dayta a linteg?

Ania ti rumbeng nga aramidentayo tapno magun-od ti pudno a wayawaya?

Ania a wayawaya ti sagrapento dagidiay agtultuloy nga agtulnog ken Jehova?

1, 2. (a) Ania ti mapaspasamak iti wayawaya ti sangatauan, ken apay? (b) Ania a wayawaya ti namnamaen dagiti adipen ni Jehova?

AGBIBIAGTAYO iti tiempo a kumarkaro ti kinaagum, kinakillo, ken kinaranggas. (2 Tim. 3:1-5) Gapu iti dayta, umad-adu ti linteg nga ar-aramiden dagiti gobierno, pappapigsaenda ti puersa ti polisia, ken agar-aramatda iti surveillance camera. Iti dadduma a pagilian, ikagkagumaan dagiti umili a pasayaaten ti seguridadda babaen ti alarm system, kasta met iti ekstra a kandado ken de koriente pay ketdi nga alad iti pagtaenganda. Adu met ti maamak a rummuar iti rabii wenno mangpalubos kadagiti annakda nga agay-ayam iti ruar nga is-isuda. Nalawag a mapukpukawen ti wayawaya ti tao, ket kasla kumarkaronto pay dayta.

² Idiay hardin ti Eden, imbaga ni Satanas a maaddaan laeng ti tao iti pudno a wayawaya no sumina ken Jehova. Nakaro a kinaulbod dayta! Kinapudnona, no di ikabilangan ti tao ti moral ken naespirituan a paglintegan ti Dios, ad-adda met nga agsagaba ti sangatauan. Daytoy a kumarkaro a kasasaad apektaranna met uray dagiti adipen ni Jehova. Ngem adda namnamatayo a makaruk-at ti sangatauan iti panangadipen ti basol ken panagrupsa ken maaddaan iti aw-awagan ti Biblia a “nadayag a wayawaya ti annak ti Dios.” (Roma 8:21) Kinapudnona, isagsaganan ni Jehova dagiti adipenna para iti dayta a wayawaya. Kasano?

 3. Ania a linteg ti impaay ni Jehova kadagiti pasurot ni Kristo, ken ania dagiti saludsod nga usigentayo?

³ Ti sungbat ket nainaig iti dinakamat ti mannurat ti Biblia a ni Santiago a “perpekto a linteg a kukua ti wayawaya.” (Basaen ti Santiago 1:25.) Iti dadduma a bersion ti Biblia, naipatarus dayta kas “naan-anay a linteg a mangwayawaya iti tao” (Ti Baro a Naimbag a Damag Biblia) ken “linteg a naan-anay nga isu ti linteg ti wayawaya” (Ti Biblia). Kadawyanna a no linteg ti pagsasaritaan, restriksion ti dagus a mapanunot ti kaaduan a tattao imbes a wayawaya. Ania ngarud ti “perpekto a linteg a kukua ti wayawaya”? Ken kasano a maruk-atannatayo dayta a linteg?

TI LINTEG A MANGWAYAWAYA

 4. Ania ti “perpekto a linteg a kukua ti wayawaya,” ken siasino dagiti mabenepisiaran?

⁴ Ti “perpekto a linteg a kukua ti wayawaya” ket saan a ti Mosaiko a Linteg. Inted ni Jehova ti Linteg tapno maiparangarang ti salungasing dagiti Israelita, ket ni Kristo ti namagpatingga iti dayta. (Mat. 5:17; Gal. 3:19) Ania ngarud a linteg ti tuktukoyen ni Santiago? Isu ti “linteg ti Kristo,” a naawagan met iti “linteg ti pammati” ken “linteg ti siwayawaya nga ili.” (Gal. 6:2; Roma 3:27; Sant. 2:12) No kasta, ti “perpekto a linteg” saklawenna ti amin a kalikaguman kadatayo ni Jehova. Agpada a mabenepisiaran iti dayta dagiti napulotan a Kristiano ken ti “sabsabali a karnero.”​—Juan 10:16.

 5. Apay a saan a makapadagsen ti linteg ti wayawaya?

⁵ No idilig iti linlinteg ti adu a pagilian, saan a komplikado wenno makapadagsen ti “perpekto a linteg” no di ket naglaon iti simple a bilbilin ken pamunganayan a prinsipio. (1 Juan 5:3) “Ti sangolko nalanay ken ti awitko nalag-an,” kinuna ni Jesus. (Mat. 11:29, 30) Kanayonanna, ti “perpekto a linteg” ket awanan iti atiddog a listaan dagiti maiparit, wenno pannusa, ta naibatay dayta iti ayat ken naikitikit iti panunot ken puso, saan nga iti taptapi a bato.​—Basaen ti Hebreo 8:6, 10.

WAYAWAYAANNATAYO TI “PERPEKTO A LINTEG”

6, 7. Ania ti makunatayo kadagiti pagalagadan ni Jehova, ken apay a pagimbagantayo ti linteg ti wayawaya?

⁶ Mabenepisiaran ken masalakniban dagiti masirib a parsua ni Jehova no surotenda dagiti lintegna. Kas pagarigan, usigentayo dagiti pisikal a linteg mainaig iti enerhia ken materia. Saan a marikna dagiti tattao a makedkedngan ti wayawayada gapu kadagitoy a linteg. Agyaman ken bigbigenda ketdi ta pagimbaganda dagita. Umasping iti dayta, pagimbagan ti tao dagiti moral ken naespirituan a pagalagadan a sagudayen ti “perpekto a linteg” ti Kristo.

⁷ Saannatay laeng a salakniban ti linteg ti wayawaya no di ket penkenna pay ti amin nga umiso a tarigagaytayo nga awan ibungana a pagdaksan kadatayo ken awan masalungasingtayo a kalintegan ken wayawaya ti sabsabali. Ti ngarud sekreto ti pudno a wayawaya ket ti panangpatanor iti umiso a tarigagay maitunos iti personalidad ken pagalagadan ni Jehova. Kaipapananna a masapul a sursuruentayo nga ayaten ti bambanag nga ayaten ni Jehova ken guraen ti bambanag a kagurana. Maaramidantayo dayta iti tulong ti linteg ti wayawaya.​—Amos 5:15.

8, 9. Ania ti magunggona dagidiay mangsurot iti linteg ti wayawaya? Mangted iti pagarigan.

⁸ Masapul a labanantayo dagiti di umiso a tarigagay a bunga ti kinaimperpektotayo. Nupay kasta, magunggonaantayo iti linteg ti wayawaya uray itan no situtuloktayo nga agtulnog iti dayta. Kas pagarigan: Ni Jay ket adikto iti sigarilio idi damo a mayadalan iti Biblia. Ania ti inaramidna idi naammuanna a di makaay-ayo iti Dios ti bisiona​—intultuloyna ngata ti nagpaadipen iti lasagna wenno nagpasakup ken Jehova? Nainsiriban a pinilina ti agserbi iti Dios uray no nikotina ti birbiroken ti bagina. Ania ti nariknana idi naparmekna ti bisiona? Kunana: “Mariknak ti nagpaiduma a wayawaya ken ragsak.”

⁹ Nabigbig ni Jay a mangadipen ti wayawaya ti lubong (“panangpampanunot iti lasag”) idinto ta mangwayawaya ken mangiturong iti “biag ken talna” dagiti wayawaya nga ipaay ni Jehova (“panangpampanunot iti espiritu”). (Roma 8:5, 6) Nangalaan ni Jay iti bilegna a nangparmek iti mangadipen a bisiona? Saan a nagtaud kenkuana no di ket iti Dios. Kunana: “Regular nga inadalko ti Biblia, inkararagko ti nasantuan nga espiritu, ken inawatko ti naayat a tulong manipud iti kongregasion Kristiano.” Makatulong met dagita a probision iti pananggun-odtayo iti pudno a wayawaya. Kitaentayo no kasano.

SUKIMATEN TI SAO TI DIOS

10. Ania ti kaipapanan ti ‘panangsukimat’ iti linteg ti Dios?

¹⁰ Kuna ti Santiago 1:25: “Ti mangsukimat iti perpekto a linteg a kukua ti wayawaya ken agtultuloy iti dayta . . . naragsakto iti panangaramidna iti dayta.” Ti orihinal a Griego a sao a naipatarus a “sukimaten” kaipapananna ti “agrukob a mangmingming,” a mangipasimudaag iti panangimutektek iti maysa a banag. Wen, no kayattayo a ti linteg ti wayawaya ti mangigiya iti panunot ken pusotayo, masapul a sipapasnek nga adalentayo ti Biblia ken mennamennaentayo ti basbasaentayo.​—1 Tim. 4:15.

11, 12. (a) Kasano nga impaganetget ni Jesus a napateg ti panagbiag maitunos iti kinapudno? (b) Kas ipakita ti maysa a kapadasan, ania koma ti liklikan nangnangruna dagiti agtutubo?

¹¹ Kanayonanna, masapul nga “agtultuloy,” wenno agreggettayo a mangyaplikar iti Sao ti Dios tapno makapagbiagtayo maitunos iti kinapudno. Kasta ti kayat a sawen ni Jesus idi kinunana kadagiti namati kenkuana: “No agtalinaedkayo iti saok, pudno a dakayo dagiti adalak, ket maammuanyonto ti kinapudno, ket ti kinapudno wayawayaannakayto.” (Juan 8:31, 32) Sigun iti maysa a reperensia, ti sao nga ‘ammuen’ kaipapananna met ti panangapresiar gapu ta ti “banag a ‘naammuan’ ket napateg iti daydiay makaammo iti dayta.” Ngarud, naan-anay nga ‘ammotayo’ ti kinapudno no agbibiagtayo maitunos iti dayta. Iti kasta, maibagatayo nga “agtigtignay” kadatayo ti “sao ti Dios,” a bay-antayo a masukogtayo maitunos iti personalidad ti nailangitan nga Amatayo.​—1 Tes. 2:13.

¹² Saludsodam ta bagim, ‘Talaga kadi nga ammok ti kinapudno? Agbibiagak kadi maitunos iti dayta? Wenno tartarigagayak pay laeng ti dadduma a “wayawaya” ti lubong?’ Maysa a kabsat a babai a dimmakkel iti Kristiano a pamilia ti nagkuna: “No dimmakkelka iti kinapudno, natural a mamatika ken Jehova. Ngem iti biangko, diak talaga naam-ammo Isuna. Diak pulos nasursuro a guraen ti bambanag a kagurana. Diak patien a maapektaran iti ar-aramidek. Ken diak met nasursuro ti umadani kenkuana no adda parikutko. Nagtalekak iti bukodko a pannakaawat, ngem mabigbigko itan a minamaag dayta gapu ta awan met a talaga ti ammok.” Naimbag laengen ta nabigbig daytoy a kabsat a di umiso ti kapanunotanna ket nagbalbaliw. Agserserbi pay ketdi itan kas regular pioneer.

TI NASANTUAN NGA ESPIRITU MATULONGANNAKA A MAWAYAWAYAAN

13. Kasano a matulongannatayo ti nasantuan nga espiritu ti Dios a maaddaan iti wayawaya?

¹³ Kuna ti 2 Corinto 3:17: “No sadino ti ayan ti espiritu ni Jehova, adda wayawaya.” Kasano a makatulong ti nasantuan nga espiritu tapno mawayawayaantayo? Patanorenna kadatayo dagiti kualidad a kas iti “ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel.” (Gal. 5:22, 23) No awan dagitoy, nangnangruna ti ayat, saan a maaddaan dagiti tattao iti pudpudno a wayawaya, kas ipakita ti kasasaad ti lubong ita. Makapainteres ta kalpasan a dinakamat ni apostol Pablo ti bunga ti espiritu, innayonna: “Awan linteg a maibusor kadagita a bambanag.” Ania ti kayatna a sawen? Awan ti aniaman a linteg a makalapped iti irarayray ti bunga ti espiritu ti Dios. (Gal. 5:18) Wen, kayat ni Jehova nga agtultuloy a patanorentayo dagiti kualidad ni Kristo ken agnanayon nga iparangarangtayo dagita.

14. Kadagiti ania a pamay-an nga ad-adipenen ti espiritu ti lubong dagidiay agpapaituray iti dayta?

¹⁴ Dagidiay nakullaapan iti espiritu ti lubong ken agpappapas iti nainlasagan a tarigagayda mabalin nga ipapanda a siwayawayada. (Basaen ti 2 Pedro 2:18, 19.) Ngem kinapudnona, ad-adipenen ida dagita a tarigagay. Kasapulan ti ginabgabsuon a linteg ken pagalagadan tapno makontrol ti panaggartem ken dakes a kababalinda. Kuna ni Pablo: “Ti linteg maipaalagad, saan a maipaay iti tao a nalinteg, no di ket maipaay kadagiti tattao a nakillo ken nagulo.” (1 Tim. 1:9, 10) Ad-adipen met ida ti basol ta mapilitanda a mangaramid iti “bambanag a nagayatan ti lasag,” a maysa a naulpit nga apo. (Efe. 2:1-3) Kayariganda dagiti insekto nga agkarayam a mapan iti nakamalukong a diro, a sada la agbalaw inton nailumlomdan gapu iti panaggartemda.​—Sant. 1:14, 15.

WAYAWAYA NGA ITDEN TI KONGREGASION KRISTIANO

15, 16. Kasano kapateg ti pannakilangentayo kadagiti kakabsat iti kongregasion, ken ania ti mapaspasarantayo a wayawaya?

¹⁵ Idi inrugim ti makitimpuyog iti kongregasion Kristiano, saanka a naikameng iti aniaman a natauan nga asosasion. Imbes ketdi, nagbalinka a kameng ti kongregasion ta inyasidegnaka ni Jehova iti dayta. (Juan 6:44) Apay nga inaramidna dayta? Gapu kadi ta nakitana a nalintegka ken agbutengka kenkuana? “Siempre saan!” mabalin a kunam. Ania ngarud ti nakita ti Dios? Nakitana ti pusom a sidadaan nga agtulnog iti lintegna ken agpaituray iti naasi a panangidalanna. Iti kongregasion, ay-aywanan ni Jehova ti pusom babaen ti panangtaraonna kenka iti naespirituan. Winayawayaannaka iti ulbod a narelihiosuan a sursuro ken an-anito ken sinuruannaka a mangpatanor iti personalidad ni Kristo. (Basaen ti Efeso 4:22-24.) Ngarud, naaddaanka iti pribilehio nga agbalin a paset ti kakaisuna a grupo ti tattao iti intero a lubong a pudpudno a maawagan iti “siwayawaya nga ili.”​—Sant. 2:12.

¹⁶ Panunotem daytoy: Maamakka kadi bayat a kaduam dagidiay naimpusuan a mangay-ayat ken Jehova? Palpaliiwem kadi a kanayon dagiti garawda? Bayat a kasarsaritam ida idiay Kingdom Hall, kanayon kadi nga ig-iggamam ti bagmo amangan no mapukaw? Saan! Natalged ti riknam ken saanka a madanagan. Kasta kadi ti riknam no sabali a tattao ti kakaduam? Siempre saan! Ngem ti kinatalged a mapaspasaram ita iti ili ti Dios ket pakpakauna laeng iti wayawaya a masagrapmonto iti masanguanan.

“NADAYAG A WAYAWAYA TI ANNAK TI DIOS”

17. Kasano a ti “pannakaipanayag ti annak ti Dios” magunggonaanna ti sangatauan?

¹⁷ Kuna ni Pablo idi inlawlawagna ti wayawaya nga ipaayto ni Jehova kadagiti adipenna ditoy daga: “Ti sigagagar a panagsegga ti sangaparsuaan ket agur-uray iti pannakaipanayag ti annak ti Dios.” Sa intuloyna a kinuna: “Ti mismo a sangaparsuaan met mawayawayaanto iti pannakaadipen iti panagrupsa ken maaddaan iti nadayag a wayawaya ti annak ti Dios.” (Roma 8:19-21) Ti sao a “sangaparsuaan” tukoyenna dagiti tattao nga addaan namnama nga agbiag nga agnanayon ditoy daga ken mabenepisiaran iti “pannakaipanayag” dagiti napulotan iti espiritu nga annak ti Dios. Mangrugi dayta a pannakaipanayag inton dagitoy nga “annak,” a napagungar kas espiritu, makitinnulongda ken Kristo a mangikkat iti kinadakes ditoy daga ken mangispal iti “dakkel a bunggoy” nga agbiag iti baro a sistema ti bambanag.​—Apoc. 7:9, 14.

18. Kasanonto a mawayawayaan ti natulnog a sangatauan, ken anianto a wayawaya ti sagrapenda kamaudiananna?

¹⁸ Mapasaranton ti nasubbot a sangatauan ti naan-anay a baro a wayawaya ​—wayawaya manipud iti impluensia ni Satanas ken dagiti demoniona. (Apoc. 20:1-3) Anian a makapabang-ar dayta! Kalpasanna, ti 144,000 a kadua ni Kristo kas ar-ari ken papadi itultuloyda a wayawayaan ti sangatauan babaen ti daton a subbot agingga a naan-anay a mapunas ti basol ken kinaimperpekto nga impatawid ni Adan. (Apoc. 5:9, 10) Dagiti tattao nga agmatalek iti pannakasuot magun-odandanto ti naan-anay a wayawaya nga insagana kadakuada ni Jehova​—ti “nadayag a wayawaya ti annak ti Dios.” Agasem! Saankanton a marigatan a mangaramid iti umiso iti imatang ti Dios, ta agbalinton a perpekto ti intero a bagim ken naan-anayton a maiparangarangmo dagiti kualidad ti Dios.

19. Ania koma ti itultuloytayo nga aramiden tapno makapagtalinaedtayo iti pudno a wayawaya?

¹⁹ Tartarigagayam kadi ti “nadayag a wayawaya ti annak ti Dios”? No kasta, bay-am a ti “perpekto a linteg a kukua ti wayawaya” ti mangimpluensia iti panunot ken pusom. Wen, sipapasnek nga adalem ti Kasuratan. Agbiagka maitunos iti kinapudno. Ikararagmo ti nasantuan nga espiritu. Aprobetsarem ti makikadua iti kongregasion Kristiano ken ti naespirituan a taraon nga ipapaay ni Jehova. Saanka nga agpaallilaw ken Satanas, kas iti panangallilawna ken Eva, a pampanunotem a nainget unay dagiti pagalagadan ti Dios. Agannadka ta nakasiksikap ti Diablo. Ngem kas makitatayo iti sumaruno nga artikulo, adda maaramidantayo tapno “saannatayo a magundawayan ni Satanas, ta saantayo nga ignorante kadagiti gakatna.”​—2 Cor. 2:11.

[Dagiti Ladawan iti panid 9]

Tartarigagayak pay la kadi “dagiti wayawaya” ti lubong?

[Dagiti Ladawan iti panid 9]

Talaga kadi nga agbibiagak maitunos iti kinapudno?