Ania ti Rumbeng a Panangmatmattayo Kadagiti Pakasuotan?

PANNUBOK! Pakasuotan! Tunggal maysa nasken a sanguenna dagita. Mabalin a maigapu dagita iti panagduduma ti personalidad, rigat ti biag, nakapuy a salun-at, sulisog, impluensia ti kapatada nga agaramid iti di umiso, pannakaidadanes, dagiti pakarigatan gapu iti neutral wenno maibusor iti idolatria a takdertayo, ken adu pay a banag. Aniaman dagiti pakasuotan a sanguentayo, masansan a mangyegda iti kasta unay a panagdanag. Kasanotayo a mapagballigian dagitoy? Adda kadi aniaman a gunggona nga iyegda kadatayo?

Ti Kasayaatan a Tulong

Ti biag ni Ari David ket napno idi iti pakasuotan, ngem natay a simamatalek. Kasano a nakapagibtur? Impabigbigna ti gubuayan ti bilegna idi kinunana: “Ni Jehova ti Pastorko. Saanakto nga agkurang iti aniaman.” Sana kinuna: “Uray no magnaak iti ginget ti napuskol a kinasipnget, saanak nga agbuteng iti dakes, ta sikukuyogka kaniak; ti baston ken sarukodmo isuda ti bambanag a mangliwliwa kaniak.” (Salmo 23:1, 4) Wen, ni Jehova ti gubuayan ti aglaplapusanan a tulong. Inwanwanna ni David kadagiti tiempo ti pakarigatan, ket nakasagana met a mangiwanwan kadatayo no kasapulan.

Kasanotayo a magun-odan ti tulong ni Jehova? Impaganetget ti Biblia no kasano idi kunana: “Nanamenyo ken kitaenyo a ni Jehova naimbag.” (Salmo 34:8) Naayat nga imbitasion dayta, ngem ania ti kaipapananna? Dayta ket pammaregta tapno agserbitayo ken ni Jehova ken naan-anay nga itunostayo ti biagtayo iti pagayatanna. Ti kasta a panagbiag kaipapananna a mapukawtayo ti dadduma a wayawayatayo, nga agsakripisiotayo. Iti dadduma a kasasaad, mabalin nga agbanag pay dayta kadagiti pakasuotan​—pannakaidadanes ken panagsagaba. Ngem dagiti naimpusuan a mangawat iti imbitasion ni Jehova dida pulos pagbabawyan ti panangaramid iti dayta. Agbalin a naasi ni Jehova kadakuada. Idalan ken aywananna ida iti naespirituan. Alawenna ida kadagiti pakasuotan babaen ti Saona, ti nasantuan nga espirituna, ken ti Nakristianuan a kongregasion. Ken gunggonaannanto ida iti agnanayon a biag.​—Salmo 23:6; 25:9; Isaias 30:21; Roma 15:5.

Dagidiay nangikeddeng a mangbalbaliw iti biagda tapno makapagserbida ken ni Jehova ken nangsalimetmet iti dayta a pangngeddeng makitada a tungtungpalen ni Jehova ti amin a karina. Kasta ti kapadasan dagiti Israelita a simmurot ken ni Josue iti Naikari a Daga. Apaman a naballasiwda ti Jordan, adda dagiti pakasuotan nga ibturanda, gubat a sanguenda, ken napait a leksion a sursuruenda. Ngem napaneknekan nga ad-adda a matalek dayta a kaputotan ngem dagiti ammada, a rimmuar manipud Egipto ken natay iti let-ang. Gapuna, tinulongan ni Jehova dagiti matalek, ket no maipapan iti kasasaadda idi natay ni Josue, kuna ti rekord ti Biblia: “Ni Jehova impaayanna ida iti inana iti intero nga aglikmut, maitunos iti isuamin nga insapatana kadagidi ammada . . . Awan uray maysa a kari a napaay manipud iti isuamin a naimbag a kari nga inaramid ni Jehova iti balay ti Israel; pimmudnoda amin.” (Josue 21:44, 45) Kasta met ti mapasarantayo no naan-anay nga agpannuraytayo ken Jehova bayat ti pakasuotan ken iti amin a gundaway.

Ania ti mabalin a mangpakapuy iti panagtalektayo ken Jehova? Nangdakamat ni Jesus iti maysa a banag idi kinunana: “Awan ti makabalin nga agpaadipen iti dua nga appo . . . Saanyo a mabalin ti agpaadipen iti Dios ken iti Kinabaknang.” (Mateo 6:24) No agtalektayo ken Jehova, ditay sapulen ti kinatalged kadagiti material a banag, ti pagkammatalkan ti kaaduan a tattao ditoy lubong. Binalakadan ni Jesus dagiti pasurotna: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy sabali pay [a nasken a material] a bambanag mainayonto kadakayo.” (Mateo 6:33) Umiso ti pangngeddeng ti maysa a Kristiano no taginayonenna ti natimbeng a panangmatmat iti material a bambanag ket ipangpangrunana iti biagna ti Pagarian ti Dios. (Eclesiastes 7:12) Siempre, mabalin nga adda kasukatna dayta. Nalabit nga adda material a banag nga isakripisiona. Ngem agapit iti adu a gunggona. Ket tumulong ni Jehova kenkuana.​—Isaias 48:17, 18.

Ania ti Masursurotayo Kadagiti Pakasuotan

Siempre, ti ‘panangnanam ken panangkita a ni Jehova naimbag’ saanna nga iliklik ti maysa kadagiti di ninamnama a pasamak iti biag; dinatay met naan-anay a salakniban manipud iti iraraut ni Satanas ken dagiti tattao a pannakabagina. (Eclesiastes 9:11) Kas resultana, mabalin a masubok ti kinapasnek ken determinasion ti maysa a Kristiano. Apay nga ipalpalubos ni Jehova a maipasango dagiti agdaydayaw kenkuana kadagiti kasta a pakasuotan? Nangted ni apostol Pedro iti maysa a makagapu idi insuratna: “Iti apagbiit a kanito iti agdama, no isu ti masapul, napagleddaangkayo babaen iti nadumaduma a pakasuotan, tapno ti nasubok a kualidad ti pammatiyo, a dakdakkel unay ti pategna ngem ti balitok a madadael agpapan pay pannakasubokna babaen iti apuy, masarakan koma a pakaigapuan ti pannakaidayaw ken dayag ken dayaw inton pannakaipanayag ni Jesu-Kristo.” (1 Pedro 1:6, 7) Wen, dagiti pannubok ipaayannatayo iti gundaway a mangipakita iti kualidad ti pammatitayo ken ti ayattayo ken ni Jehova. Tumulong met dagitoy a mangipaay iti sungbat iti panangumsi ken pammabasol ni Satanas a Diablo.​—Proverbio 27:11; Apocalipsis 12:10.

Dagiti pannubok tulongannatayo met a mangpatanor kadagiti Nakristianuan a galad. Kas pagarigan, usigenyo ti sasao ti salmista: “[Ni Jehova] makitana daydiay napakumbaba; ngem daydiay napangato ammona laeng iti adayo.” (Salmo 138:6) Adu kadatayo ti saan a sigud a napakumbaba, ngem matulongannatayo dagiti pakasuotan a mangpatanor iti dayta nagpateg a galad. Lagipenyo ti pasamak idi kaaldawan ni Moises, idi nauma ti dadduma nga Israelita iti kanayon a pannanganda iti manna. Nalawag a dayta ket maysa a pakasuotan kadakuada, numan pay ti manna ket maysa a namilagruan a probision. Ania ti panggep ti pannubok? Kinuna ni Moises kadakuada: “[Ni Jehova] nangtaraon kenka iti manna idiay let-ang . . . tapno pagpakumbabaennaka ken tapno subokennaka.”​—Deuteronomio 8:16.

Masubok met ti kinapakumbabatayo. Kasano? Kas pagarigan, kasano ti reaksiontayo no adda panagbalbaliw iti organisasion? (Isaias 60:17) Naimpusuan kadi a suportarantayo ti trabaho a panangasaba ken panangisuro? (Mateo 24:14; 28:19, 20) Sigagagar kadi nga awatentayo dagiti panangilawlawag ti “matalek ken masirib nga adipen” maipapan iti kinapudno a linaon ti Biblia? (Mateo 24:45-47; Proverbio 4:18) Lablabanantayo kadi ti tarigagay a maaddaan iti kabaruan nga aruaten, kabaruan a kawes, wenno kaudian a modelo ti lugan? Ti napakumbaba a tao sungbatanna dagita a saludsod iti wen.​—1 Pedro 1:14-16; 2 Pedro 3:11.

Tulongannatayo dagiti pakasuotan a mangpatanor iti sabali pay a napateg a galad​—panagibtur. Kinuna ni adalan a Santiago: “Ibilangyo a rag-o amin, kakabsatko, no maipasangokayo iti nadumaduma a pakasuotan, yantangay ammoyo a daytoy nasubok a kualidad ti pammatiyo mangpataud iti panagibtur.” (Santiago 1:2, 3) Babaen ti naballigi a panangibtur kadagiti adu a pannubok buyogen ti naan-anay a panagtalek ken Jehova, mapatanortayo ti kinatibker, kinasimbeng, ken kinasungdo. Pabilgennatayo a mangsaranget kadagiti masanguanan nga ibubusor ni Satanas, ti makapungtot a dios daytoy a lubong.​—1 Pedro 5:8-10; 1 Juan 5:19; Apocalipsis 12:12.

Taginayonen ti Umiso a Panangmatmat Kadagiti Pakasuotan

Ti perpekto nga Anak ti Dios, ni Jesu-Kristo, naipasango iti adu a suot bayat ti kaaddana ditoy daga ket nagapit iti dadakkel a gunggona gapu iti panangibturna kadagitoy. Insurat ni Pablo a ni Jesus “nasursurona ti panagtulnog manipud iti bambanag a sinagabana.” (Hebreo 5:8) Ti kinasungdona agingga ken patay ket nangyeg iti pakaidayawan ti nagan ni Jehova ken namagbalin a posible ken Jesus a mangidaton iti pateg ti perpekto a natauan a biagna kas pangsubbot iti sangatauan. Dayta ti nanglukat iti dalan kadagidiay pudno a namati ken Jesus tapno maaddaanda iti namnama a biag nga agnanayon. (Juan 3:16) Gapu ta nagtalinaed ni Jesus a matalek iti sidong ti pakasuotan, isu itan ti Nangato a Padi ken naitrono nga Aritayo.​—Hebreo 7:26-28; 12:2.

Datayo met ngay? Maaddaantayo met iti dadakkel a bendision no nasungdotayo iti sidong dagiti pakasuotan. Kadagidiay addaan iti nailangitan a namnama, kuna ti Biblia: “Naragsak ti tao nga agtultuloy nga agibtur iti pannakasuot, agsipud ta iti pannakaanamongna awatennanto ti korona ti biag, nga inkari ni Jehova kadagidiay agtultuloy nga agayat kenkuana.” (Santiago 1:12) Manamnama dagidiay addaan iti naindagaan a namnama a tawidendanto ti biag nga agnanayon iti paraiso a daga no simamatalek nga agibturda. (Apocalipsis 21:3-6) Ken napatpateg pay, pakaidayawan ti nagan ni Jehova ti matalek a panagibturda.

Bayat a surotentayo ti addang ni Jesus, makapagtalektayo a mapagballigiantayo ti amin a pannubok a maipasango kadatayo iti daytoy a sistema ti bambanag. (1 Corinto 10:13; 1 Pedro 2:21) Kasano? Babaen ti panagpannuray ken ni Jehova, a mangipapaay iti “pannakabalin a nalablabes ngem ti gagangay” kadagidiay agsadag kenkuana. (2 Corinto 4:7) Ti kombiksiontayo koma ket kas ken ni Job a nupay nagsagaba iti nakas-ang a pakasuotan, pinatalgedanna a sikokompiansa: “Kalpasan a nasuboknak, rummuarakto kas balitok a mismo.”​—Job 23:10.

[Ladawan iti panid 31]

Ti kinasungdo ni Jesus iti sidong ti pannubok nangyeg iti pakaidayawan ti nagan ni Jehova. Maaramidtayo met dayta