3. Kasano a tultuladen dagiti Saksi ni Jehova ti ayat ni Jesus?

Kasta unay ti panagayat ni Jesus kadagiti adalanna ken imbilangna ida a kapamiliana. (Basaen ti Marcos 3:35.) Kasta met laeng dagiti Saksi ni Jehova iti intero a lubong. Agkaykaysada ken kaslada maysa a pamilia. Isu nga aw-awaganmi ti maysa ken maysa a kabsat. (Filemon 1, 2) Sursurotenmi met daytoy a bilin: “Ayatenyo ti amin a kakabsatyo.” (1 Pedro 2:17) Ipakpakita dagiti Saksi ni Jehova daytoy nga ayat iti adu a pamay-an kas iti panangtulongmi kadagiti kapammatianmi iti intero a lubong no agkasapulanda.

6. Agbalintayo a paset ti pamilia ni Jehova no agpabautisartayo

No agpabautisartayo, agbalintayo a paset ti agkaykaysa a sangalubongan a pamilia. Uray no nagduduma ti naggapuan, kasasaad ti biag, wenno napalabastayo, agpapada ti patpatien ken estandarte iti moral a sursurotentayo. Basaen ti Salmo 25:14 ken 1 Pedro 2:17, sa pagsaritaan daytoy a saludsod:

• Ania ti epekto ti panagpabautisar ti maysa iti relasionna ken Jehova ken iti dadduma nga agdaydayaw Kenkuana?

No kaduatayo dagiti kapammatiantayo, mariknatayo ti kas iti imbaga ni Ari David: “Anian a nagsayaat ken anian a makaay-ayo ti sangsangkatunos a panagkakadua dagiti agkakabsat!” (Salmo 133:1) Saan nga automatiko ti panagkaykaysatayo. Amintayo ket masapul nga adda aramidenna tapno agtultuloy dayta.

1. Ania ti naidumduma iti ili ti Dios?

No umatenderka iti gimong iti sabali a lugar, baka saanmo a maawatan ti lengguaheda, ngem komportableka latta ken mariknam ti ayatda. Apay? Ngamin, agpapada ti us-usarentayo a publikasion a mangadal iti Biblia sadinoman ti ayantayo. Ken ikagkagumaantayo nga ipakita ti ayat iti maysa ken maysa. Sadinoman ti paggigianantayo, ‘umaw-awagtayo amin iti nagan ni Jehova, ket agdaydayawtayo kenkuana a sangsangkamaysa.’​—Sofonias 3:9, footnote.

2. Ania ti maitulongmo tapno agtalinaed ti panagkaykaysa?

“Sipapasnek ken naimpusuan nga agiinnayatkayo.” (1 Pedro 1:22) Kasanom a maaramid daytoy a balakad? Imbes nga agpokuska kadagiti pagkapuyan ti dadduma, agpokuska kadagiti nasayaat a kababalinda. Saan laeng a dagiti kapadam iti interes ti pakikaduaam. Padasem met nga am-ammuen dagiti kakabsat a naiduma kenka. Masapul nga ikagumaantayo met nga ikkaten ti aniaman a panangidumduma a mabalin nga adda iti pusotayo.​—Basaen ti 1 Pedro 2:17.a

3. Ania ti aramidem no adda diyo pagkinnaawatan iti maysa a kabsat?

Agpayso nga agkaykaysatayo, ngem imperpektotayo. No dadduma, madismaya wenno masaktantayo ti maysa ken maysa. Isu nga ibagbaga kadatayo ti Sao ti Dios nga ‘itultuloytayo ti agpipinnakawan. Kas iti situtulok a panangpakawan kadatayo ni Jehova, kasta met ti aramidentayo.’ (Basaen ti Colosas 3:13.) Kanayontayo a masaksaktan ni Jehova, ngem pakpakawanennatayo latta. Isu a kayatna a pakawanentayo dagiti kakabsattayo. No iti panagkunam ket adda nasaktam, sika koma ti umuna nga umasideg tapno makikappia.​—Basaen ti Mateo 5:23, 24.b

AMMUEM TI AD-ADU PAY

4. Labanam ti panangidumduma

Kayattayo nga ayaten ti amin a kakabsattayo. Ngem mabalin a narigat nga aramiden dayta no kasla naidumada kadatayo. Ania ti makatulong? Basaen ti Aramid 10:34, 35, sa pagsaritaan dagitoy a saludsod:

• Awaten ni Jehova kas Saksina ti amin a kita ti tattao. Kasano nga apektaran dayta ti panangmatmatmo kadagiti tattao a naiduma kenka?

• Ania a kita ti panangidumduma a normal iti lugaryo ti dimo kayat nga aramiden?

Basaen ti 2 Corinto 6:11-13, sa pagsaritaan daytoy a saludsod:

• Panagkunam, kasanoka nga agbalin a nadekdekket kadagiti kakabsat a naiduma kenka?

5. Mangpakawanka a situtulok ken makikappiaka

Saan a kasapulan ni Jehova ti pammakawantayo ngem situtulok a pakpakawanennatayo. Basaen ti Salmo 86:5, sa pagsaritaan dagitoy a saludsod:

• Kasano kadakkel ti pammakawan ni Jehova?

• Apay nga agyamyamanka iti panangpakpakawanna kenka?

• Ania dagiti situasion a mabalin a marigatantayo a makikappia iti dadduma?

Kasanotayo a matulad ni Jehova tapno agtalinaed ti panagkaykaysatayo nga agkakabsat? Basaen ti Proverbio 19:11, sa pagsaritaan daytoy a saludsod:

• No nasuron wenno nasaktanka gapu iti inaramid ti maysa a kabsat, ania ti mabalinmo nga aramiden tapno sumayaat ti situasion?

No maminsan, masaktantayo ti dadduma. Ania ti masapul nga aramidentayo no mapasamak dayta? I-play ti VIDEO, sa pagsaritaan ti sumaruno a saludsod.

VIDEO: Ti Pannakikappia Mangyeg Kadagiti Bendision (6:01)

• Iti video, ania ti inaramid ti sister tapno makikappia?

6. Birokem dagiti nasayaat a kababalin dagiti kakabsat

No mas maam-ammotayo dagiti kakabsat, maammuantayo met dagiti nagsasayaat a kualidadda ken uray dagiti pagkapuyanda. Ngem kasanotayo a makapagpokus kadagiti nasayaat a kababalinda? I-play ti VIDEO, sa pagsaritaan ti sumaruno a saludsod.

VIDEO: Agbalin a Nasaysayaat a Kristiano! (5:10)

• Ania ti makatulong kenka tapno makitam dagiti positibo a kababalin dagiti kakabsat?

Dagiti nasayaat a kababalintayo ti kitkitaen ni Jehova. Basaen ti 2 Cronicas 16:9a, sa pagsaritaan daytoy a saludsod:

• Ania ti mariknam ta naammuam a dagiti nasayaat a kababalinmo ti kitkitaen ni Jehova?

SUMARIO

No mangpakawanka ken ipakitam ti ayat iti amin a kakabsat, makatulongka tapno agtalinaed ti panagkaykaysa ti kongregasion.

Rebiu

• Kasanom a malabanan ti panangidumduma?

• Ania ti aramidem no adda diyo pagkinnaawatan iti maysa a kabsat?

• Apay a kayatmo a tuladen ti panangpakawan ni Jehova iti dadduma?

AGDISKOBREKA PAY

Kitaem no kasano a makatulong ti maysa nga ilustrasion ni Jesus tapno saanmo a mahusgaran ti dadduma.

Ikkatem ti Pasanggir (6:56)

Masapul kadi nga agpadispensartayo uray no panagkunatayo ket awan ti naaramidtayo a kamali?

“Panagpadispensar​—Tulbek iti Pannakikappia” (Ti Pagwanawanan, Nobiembre 1, 2002)

Kitaem no kasano a nasursuro ti dadduma ti saan a mangidumduma.

Saan a Mangukom Maibatay iti Makinruar a Langa (5:06)

Ammuem no kasanom a masolbar dagiti di pagkikinnaawatan sakbay pay a madadaelna ti talna ti kongregasion.

“Solbaren Dagiti Di Pagkikinnaawatan Babaen ti Ayat” (Ti Pagwanawanan, Mayo 2016)