Saluadannatayo ni Jehova Agpaay iti Pannakaisalakan

“Dakayo [ket] salsaluadan ti pannakabalin ti Dios babaen ti pammati maipaay iti pannakaisalakan a sisasagana a maipanayag iti kamaudianan a las-ud ti tiempo.”​—1 PED. 1:4, 5.

ANIA TI SUNGBATMO?

Kasanonatayo nga inyadani ni Jehova iti pudno a panagdayaw?

Kasanotayo nga agpapaiwanwan ken Jehova babaen iti balakadna?

Kasanonatayo nga ipapaayan ni Jehova iti pammaregta?

1, 2. (a) Kasanotayo a masigurado a tulongannatayo ti Dios nga agtalinaed a natarnaw? (b) Kasano kauneg ti pannakaammo ni Jehova iti tunggal maysa kadatayo?

“TI NAKAPAGIBTUR agingga iti panungpalan isunto ti maisalakan.” (Mat. 24:13) Nalawag nga ipakita dagita a sasao ni Jesus a masapul nga agtalinaedtayo a matalek agingga iti panungpalan tapno maisalakantayo inton ukomen ti Dios ti lubong ni Satanas. Ngem dina kayat a sawen a namnamaen ni Jehova a makapagibturtayo iti bukodtayo a sirib wenno pigsa. Ipasigurado kadatayo ti Biblia: “Ti Dios matalek, ket saannanto nga ipalubos a masulisogkayo iti labes ti kabaelanyo nga itured, no di ket maigiddan iti pannakasulisog aramidennanto met ti dalan a pagruaran tapno mabalinanyo nga ibturan dayta.” (1 Cor. 10:13) Ania ti ipakita dagita a sasao?

² Tapno masigurado ni Jehova a saantayo a masuot iti labes ti kabaelantayo, masapul nga ammona ti amin maipapan kadatayo, agraman dagiti problematayo, kinataotayo, ken ti kabaelantayo nga ibturan. Talaga kadi a kasta kauneg ti pannakaammo ti Dios kadatayo? Wen. Ibaga ti Kasuratan nga am-ammo unay ni Jehova ti tunggal maysa kadatayo. Kabesadona ti inaldaw a rutina ken ar-aramidentayo. Ammona pay ti linaon ti isip ken pusotayo.​—Basaen ti Salmo 139:1-6.

3, 4. (a) Kasano nga ipakita ti kapadasan ni David nga interesado ni Jehova iti tunggal indibidual? (b) Ania a naisangsangayan a trabaho ti itungtungpal ita ni Jehova?

³ Narigat kadi a patien nga interesado unay ti Dios kadagiti nanumo a tattao? Pinampanunot ni salmista David dayta a saludsod isu a naikunana ken Jehova: “No makitak ti langlangitmo, dagiti aramid ti ramramaymo, ti bulan ken dagiti bituen nga insaganam, ania ti mortal a tao tapno sipapanunotka kenkuana?” (Sal. 8:3, 4) Nalabit insaludsod dayta ni David gapu iti personal a kapadasanna. Nupay isu ti inaudi nga anak ni Jesse, imbilang ni Jehova kas “maysa a lalaki a naanamongan iti pusona” ken innalana ‘manipud panangsaruno iti arban tapno agbalin a panguluen’ ti Israel. (1 Sam. 13:14; 2 Sam. 7:8) Panunotem ti narikna ni David idi naamirisna nga ammo ti Namarsua iti uniberso ti linaon ti panunot ken pusona, uray maysa laeng idi nga ubing a pastor!

⁴ Nakaskasdaaw met a panunoten ti naisangsangayan a personal nga interes nga ipakpakita kadatayo ni Jehova. Um-ummongenna iti pudno a panagdayaw “dagiti matarigagayan a banag dagiti amin a nasion.” (Hag. 2:7) Tultulonganna pay dagiti adipenna nga agtalinaed a natarnaw. Tapno ad-adda a matarusantayo no kasano nga ar-aramiden dayta ni Jehova, usigentayo no kasanona nga iyasideg dagiti tattao iti pudno a panagdayaw.

INYASIDEG TI DIOS

 5. Kasano nga iyasideg ni Jehova iti Anakna dagiti tattao? Iyilustrarmo.

⁵ Kinuna ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.” (Juan 6:44) Ipakita dagita a sasao a kasapulantayo ti tulong ti Dios tapno agbalintayo nga adalan ni Kristo. Kasano nga iyasideg ni Jehova iti Anakna dagiti marakarnero a tattao? Babaen ti panangikasaba iti naimbag a damag ken ti panagtignay ti nasantuan nga espiritu. Kas pagarigan, idi adda da Pablo ken ti kakaduana a misionero idiay Filipos, nakasaritada ti babai nga agnagan iti Lidia ket inranudda kenkuana ti naimbag a damag. Kuna ti Biblia: “Ti pusona linuktan a silalawa ni Jehova tapno imdenganna ti bambanag a sasawen ni Pablo.” Wen, impaay ti Dios ti espirituna tapno matarusan ni Lidia ti mensahe. Kas resultana, isu ken ti intero a pamiliana ket nabautisaran.​—Ara. 16:13-15.

 6. Kasano nga inyasidegnatayo amin ti Dios iti pudno a panagdayaw?

⁶ Ni laeng kadi Lidia ti addaan iti kasta a kapadasan? Saan. No maysaka a dedikado a Kristiano, inyasidegnaka met ti Dios iti pudno a panagdayaw. No kasano nga adda napateg a banag a nakita ti nailangitan nga Amatayo iti puso ni Lidia, adda met nakitana a naimbag a banag kenka. Idi dimngegka iti naimbag a damag, tinulongannaka ni Jehova a mangtarus iti dayta babaen ti panangipaayna iti nasantuan nga espirituna. (1 Cor. 2:11, 12) Idi inkagumaam nga inyaplikar dagiti naadalmo, binendisionanna ti panagreggetmo a mangaramid iti pagayatanna. Idi indedikarmo ti biagmo kenkuana, naragsakan ti pusona. Kinapudnona, manipud idi inrugim ti magna iti dalan ti biag, tultulongannakan ni Jehova iti tunggal addangmo.

 7. Kasanotayo nga ammo a tulongannatayo ti Dios nga agtalinaed a matalek?

⁷ Gapu ta tinulongannatayo ni Jehova idi nangrugitayo a makipagna kenkuana, masiguradotayo nga itultuloynatayo a tulongan nga agtalinaed a matalek. Ammona a ditay natarusan ti kinapudno a bukbukodtayo isu a ditay met makapagtalinaed iti kinapudno a bukbukodtayo. Insurat ni apostol Pedro kadagiti napulotan a Kristiano: “Dakayo [ket] salsaluadan ti pannakabalin ti Dios babaen ti pammati maipaay iti pannakaisalakan a sisasagana a maipanayag iti kamaudianan a las-ud ti tiempo.” (1 Ped. 1:4, 5) Agaplikar ti prinsipio dayta a teksto iti amin a Kristiano ken rumbeng a paginteresan ti tunggal maysa kadatayo ita. Apay? Gapu ta kasapulantayo amin ti tulong ti Dios tapno makapagtalinaedtayo a matalek kenkuana.

MALAPDAN NGA AGARAMID ITI DI UMISO NGA ADDANG

 8. Apay a posible a makaaramidtayo iti di umiso nga addang?

⁸ Gapu kadagiti parikut iti biag ken iti kinaimperpektotayo, mabalin a masinga ti panangipamaysatayo iti naespirituan ken posible a makaaramidtayo iti di umiso nga addang a ditay pay ketdi madmadlaw. (Basaen ti Galacia 6:1.) Kasta ti napasamak ken David.

9, 10. Kasano a linapdan ni Jehova a makaaramid ni David iti di umiso nga addang, ken ania ti ar-aramidenna para kadatayo ita?

⁹ Napigsa ti panagteppel ni David idi isu ket birbiroken ni Ari Saul tapno papatayenna. Uray idi naikkan iti gundaway, saan a nagibales ken Saul. (1 Sam. 24:2-7) Ngem di nagbayag, saan a nakapagteppel ni David. Idi agkasapulanda kadagiti buyotna iti taraon, sidadayaw a nagkiddawda iti tulong iti padada nga Israelita a ni Nabal. Ngem ininsultona ida isu a nakapungtot ni David ket inkeddengna a balsen ni Nabal ken ti amin a lallaki iti sangakabbalayanna. Saan a napanunot ni David a manungsungbat iti Dios no papatayenna dagiti inosente a tattao. Ti laeng naintiempuan nga ibaballaet ti asawa ni Nabal a ni Abigail ti nanglapped ken David a mangaramid iti dakkel a kamali. Gapu ta nabigbig ni David ti akem ni Jehova iti dayta a banag, kinunana ken Abigail: “Bendito koma ni Jehova a Dios ti Israel, a nangibaon kenka itoy nga aldaw a sumabet kaniak! Ket mabendisionan koma ti kinasimbengmo, ken mabendisionanka koma sika a nangpawil kaniak itoy nga aldaw a sumrek iti panagbasol iti dara ken mangusar iti bukodko nga ima a pakaisalakanak.”​—1 Sam. 25:9-13, 21, 22, 32, 33.

¹⁰ Ania ti maadaltayo iti dayta a salaysay? Ni Jehova inusarna ni Abigail a manglapped ken David nga agaramid iti di umiso nga addang. Kasta met laeng ti ar-aramidenna kadatayo ita. Siempre, ditay namnamaen a mangibaon ni Jehova iti manglapped kadatayo tunggal agpeggadtayo nga agaramid iti di umiso. Ditay met ammo no kasano ti panagtignay ti Dios iti aniaman a situasion wenno no ania ti ipalubosna a mapasamak tapno matungpal ti panggepna. (Ecl. 11:5) Ngem makapagtalektayo a kanayon nga ammo ni Jehova ti kasasaadtayo ken tulongannatayo nga agtalinaed a matalek kenkuana. Impanamnamana kadatayo: “Pagbalinenkanto nga addaan iti pannakatarus ket isuroka iti dalan a rebbeng a papanam. Mangipaayakto iti balakad a ti matak situturong kenka.” (Sal. 32:8) Kasano nga ipapaayannatayo ni Jehova iti balakad? Kasanotayo a magunggonaan iti dayta? Apay a masiguradotayo nga iwanwanwan ni Jehova ti ilina ita? Kitaem no kasano a masungbatan dagita a saludsod iti libro nga Apocalipsis.

MASALUADANTAYO BABAEN TI BALAKAD

11. Kasano kauneg ti pannakaammo ni Jehova iti mapaspasamak kadagiti kongregasion iti ilina?

¹¹ Iti sirmata iti Apocalipsis kapitulo 2 ken 3, suksukimaten ti naipadayag a ni Jesu-Kristo ti pito a kongregasion ti Asia Menor. Ipalgak ti sirmata a saan laeng a ti ar-aramiden ti kaaduan ti makitkita ni Kristo no di pay ket dagiti espesipiko a situasion ken nangdakamat pay kadagiti indibidual. Nangted pay iti maitutop a komendasion wenno balakad a kasapulan ti tunggal kongregasion. Ania ti ipasimudaag dayta? Iti kaitungpalan ti sirmata, ti pito a kongregasion irepresentarna dagiti napulotan a Kristiano kalpasan ti 1914, ken ti balakad a naited kadakuada ket agaplikar iti amin a kongregasion ti ili ti Dios ita ditoy daga. Gapuna, maikunatayo nga us-usaren ni Jehova ti Anakna a mangiwanwan iti ilina. Kasanotayo a magunggonaan iti dayta a panangiwanwan?

12. Kasanotayo nga agpaiwanwan ken Jehova?

¹² Ti maysa a pamay-an a magunggonaantayo iti naayat a panangiwanwan ni Jehova ket babaen ti personal a panagadal. Babaen kadagiti publikasion ti klase matalek ken masirib nga adipen, mangipapaay ni Jehova iti nawadwad a balakad manipud iti Biblia. (Mat. 24:45) Ngem tapno magunggonaantayo iti dayta, masapul nga iwayaantayo nga adalen dagita ken iyaplikartayo ti naadaltayo. Ti personal a panagadal ti maysa a pamay-an a masalaknibannatayo ni Jehova iti “pannakaitibkol.” (Jud. 24) Adda kadin naadalmo kadagiti literaturatayo a kasla apagpag-isu a naisurat para kenka? Masapul nga awatem ti balakad kas naggapu ken Jehova. No kasano a ti maysa a gayyem tapikenna ti abagatayo no adda kayatna nga ipakita kadatayo, usaren met ni Jehova ti espirituna tapno ipakitana no ania ti masapul a parang-ayentayo iti kondukta wenno personalidadtayo. Agpapaiwanwantayo ken Jehova no awatentayo ti panangiwanwan ti nasantuan nga espiritu. (Basaen ti Salmo 139:23, 24.) Pagsasaritaantayo ngarud ti kalidad ti panagadaltayo.

13. Apay a nainsiriban nga usigentayo ti kalidad ti panagadaltayo?

¹³ Ti nalabes a tiempotayo nga aglinglingay ibusenna ti tiempotayo para iti personal a panagadal. Napaliiw ti maysa a kabsat: “Naglaka a maliwayan ti personal a panagadal. Ad-adu itan ti paglinglingayan, ken nalaklakan dagita. Magun-odan dayta iti TV, kompiuter, ken selpon. Napalikmutantayo kadagita.” No ditay naannad, in-inut a maibus ti tiempotayo para iti nauneg a personal a panagadal. (Efe. 5:15-17) Nasayaat nga isaludsod ti tunggal maysa kadatayo: ‘Kasano kasansan nga iwaywayaak ti nauneg a panagadalko iti Sao ti Dios? No laeng kadi agisaganaak iti palawag wenno adda pasetko iti gimong?’ No wen, nainsiriban nga usarentayo ti tiempo a nairanta para iti panagdaydayaw ti pamilia wenno personal a panagadal nga arigna mangkalitayo iti naespirituan a sirib nga ipapaay ni Jehova a mangsaluad kadatayo agpaay iti pannakaisalakan.​—Prov. 2:1-5.

MAKAPAGIBTURTAYO BABAEN TI PAMMAREGTA

14. Kasano nga ipakita ti Kasuratan nga ammo ni Jehova ti rikriknatayo?

¹⁴ Adu a narigat a kasasaad ti napasaran ni David. (1 Sam. 30:3-6) Ipalgak ti naipaltiing a sasao ni David nga ammo ni Jehova ti rikriknana. (Basaen ti Salmo 34:18; 56:8.) Ammo met ti Dios ti rikriknatayo. Umadani kadatayo no ‘nadunor ti pusotayo’ wenno ‘naidagel ti espiritutayo.’ Makaliwliwa dayta kadatayo, kas ken David a nangikanta: “Agrag-oakto ken agragsakak iti naayat a kinamanangngaasim, ta nakitam ti pannakaparigatko; naammuam ti maipapan kadagiti tuok ti kararuak.” (Sal. 31:7) Saan laeng a makitkita ni Jehova dagiti pakarigatantayo. Ipapaayannatayo pay iti liwliwa ken pammaregta tapno makapagibturtayo. Ti maysa a pamay-an nga ar-aramidenna dayta ket babaen kadagiti Nakristianuan a gimong.

15. Ania ti maadaltayo iti kapadasan ni Asaf?

¹⁵ Ipakita ti kapadasan ni Asaf ti maysa a pagimbagan ti itatabuno kadagiti gimong. Gapu ta kanayon a pampanunoten ni Asaf dagiti kinaawan hustisia, pinagduaduaanna ti kinapateg ti panagserbi iti Dios isu a naupay. Kastoy ti panangiladawanna iti riknana: “Ti pusok immalsem ket kadagiti bekkelko naaddaanak iti nakaro nga ut-ot.” Kas resultana, dandani insardengna ti nagserbi ken Jehova. Ania ti nakatulong kenkuana a mangilinteg iti pampanunotna? “Simrekak iti naindaklan a santuario ti Dios,” kinunana. Nailintegna ti panangmatmatna babaen ti pannakilangenna kadagiti agdaydayaw ken Jehova. Nakitana a temporario laeng ti balligi dagiti nadangkes ken sigurado nga ilintegto ni Jehova dagiti bambanag. (Sal. 73:2, 13-22) Kasta met kadatayo ita. Mabalin met a ma-stress ken maupaytayo no makitatayo ti kinaawan hustisia iti lubong ni Satanas. Ngem mabang-aran ken mataginayon ti rag-otayo nga agserbi ken Jehova no makigimongtayo a kadua dagiti kakabsat.

16. Kasano a makatulong kadatayo ti ulidan ni Anna?

¹⁶ Ngem kasanon no gapu iti maysa a pasamak iti kongregasion, marigatanka a tumabuno kadagiti gimong? Nalabit mabainka gapu ta inlusulosmo ti pribilehiom iti kongregasion, wenno adda diyo nagkinnaawatan iti maysa a kabsat. No kasta ti kasasaadmo, makatulong kenka ti ulidan ni Anna. (Basaen ti 1 Samuel 1:4-8.) Mariribukan unay iti kasasaad ti pamiliada gapu ken ni Penina, ti karibalna ken lakayna. Kumaro ti kasasaad iti kada tawen no mapan ti pamiliada idiay Silo tapno agidatonda ken Jehova. Napalalo ti liday ni Anna nga uray la “agsangit ken saan a mangan.” Ngem dina impalubos a dayta ti mangpasardeng kenkuana a mapan iti lugar a pagdayawan ken Jehova. Nakita ni Jehova ti kinamatalek ni Anna isu a binendisionanna.​—1 Sam. 1:11, 20.

17, 18. (a) Kadagiti ania a pamay-an a maparegtatayo kadagiti gimong iti kongregasion? (b) Ania ti mariknatayo iti naayat a pannakaseknan kadatayo ni Jehova tapno maisalakantayo?

¹⁷ Rumbeng a tuladentayo ti ulidan ni Anna. Masapul a regulartayo a makigimong. Kas napaneknekantayon, dagiti gimong ket gubuayan ti dakkel a pammaregta. (Heb. 10:24, 25) Maliwliwatayo gapu iti nabara a pannakilangentayo kadagiti kakabsat. Mabalin a matukay ti pusotayo iti maysa a palawag wenno komento. Mabalin nga umimdeng wenno mangipaay iti makaliwliwa a sasao ti maysa a kapammatian bayat ti pannakipatangtayo sakbay wenno kalpasan ti gimong. (Prov. 15:23; 17:17) Maparegta ken maragsakantayo met bayat ti pannakiramantayo iti kanta para ken Jehova. Nangruna a kasapulantayo ti pammaregta manipud kadagiti gimong no ‘marirriribuk ti panunottayo’ gapu ta sadiay a ‘liwliwaennatayo’ a mismo ni Jehova ken tulongannatayo nga agtalinaed a matalek.​—Sal. 94:18, 19.

¹⁸ Natalgedtayo gapu iti naayat a pannakaseknan kadatayo ni Jehova ken mariknatayo ti inkanta ni salmista Asaf: “Tinengngelmo ti makannawan nga imak. Babaen iti pammatigmaanmo idalannakto.” (Sal. 73:23, 24) Anian a yamantayo ta salsaluadannatayo ni Jehova agpaay iti pannakaisalakan!

[Ladawan iti panid 28]

Inyadaninaka met ni Jehova

[Ladawan iti panid 30]

Masaluadantayo babaen ti panangyaplikartayo iti balakad ti Dios

[Ladawan iti panid 31]

Makapagibturtayo gapu iti maaw-awattayo a pammaregta