PANANGPADPADAKES

Daytoy ti patarus ti Griego a termino a ka·ta·la·li·aʹ. Ti nainaig a berbo a ka·ta·la·leʹo ket literal a kaipapananna ti “agsao maibusor,” a maaramid dayta nga awan nainkalintegan a rason ken gagangay nga iti wagas a makadangran wenno bumusbusor. (1Pe 2:12; 3:16) Innaig daytoy ni adalan a Santiago iti di umiso a panangukom wenno panangkondenar, tuktukoyenna ngarud ti di nainkalintegan a panangbabalaw.​—San 4:11; idiligyo ti Sal 50:20.

Dagiti manangpadpadakes wenno dagiti agsasao iti makadangran a banag iti likudan ti sabali a tattao ket karaman kadagidiay pagpaayan ti pungtot ni Jehova, ken ipakita ti Saona nga amin dagidiay agtultuloy a mangaramid iti kasta maikarida iti ipapatay. (Ro 1:18, 28-30, 32) Inyebkas ni apostol Pablo ti kasta unay a pannakaseknanna, malaksid iti sabsabali pay a dakes nga aramid, amangan no adda masarakanna a manangpadpadakes a kameng ti kongregasion idiay Corinto. (2Co 12:20) Tapno ti Sao ti Dios wenno ti mensahe naan-anay nga agepekto kadagiti kabbaro nga adalan ni Jesu-Kristo, masapul nga ikkatenda ti kababalin a panangpadpadakes ken amin a sabsabali pay a kita ti kinadakes. No aramidenda ti kasta, dumakkelda nga agturong iti pannakaisalakan babaen ti “gatas a kukua ti sao,” dagiti Nainkasuratan a kinapudno a mayataday iti kasapulanda.​—1Pe 2:1, 2.