Ar-aramidenyo Aya ti Amin a Kabaelanyo?

“ARAMIDEK ti amin a kabaelak.” No manon a daras a mapasarunuan dagitoy a sasao iti “ngem” ken nakaad-adu a pambar iti di panangaramid ti maysa ti amin a kabaelanna! Ti met ngay dedikasiontayo ken Jehova? Tungtungpalentay met laeng aya ti karitayo nga ipaay ti amin a kabaelantayo kenkuana?

Ti panagdedikar kaipapanannat’ ‘panangipaay ti bagi a naipamaysa iti panagserbi wenno panagdayaw iti nasantuan wenno iti sagrado a pakausaran.’ Adu ti inaramid ni Jesus tapno ipakita no aniat’ iraman ti dedikasion ken Jehova babaen ti panagkunana: “No sinoman a tao ti mayat nga umay sumurot kaniak, paglikudanna ti bagina ken alaenna ti kayo a pagtutuokanna ket surotennak.” (Mateo 16:24) Ti tao a naglikudanna ti bagina ken indedikarna ti bagina iti Dios ipangpangrunana iti biagna ti panangaramid iti pagayatan ti Dios.

Kas dedikado a tattao, masapul a sukimatentayo ti bagbagitayo tapno makita no agbibiagtay met laeng a maitunos iti dedikasiontayo. Impakita ni Pedro no apay a sukimatentayo ti bagbagitayo idi pinaregtana dagiti napulotan a Kristiano: “Agregtakayo iti ad-adda pay iti panagpatibker ti pannakaawis ken pannakapiliyo; ta no aramidenyo dagitoy a banag dikayto maikulbo.” (2 Pedro 1:10) Wen, no aramidentayo ti amin a kabaelantayo, ditayto matnag iti naespirituan.

Mabalin pay a Parang-ayen ti Amin a Kabaelantayo

Iti nalawlawa a kaipapanan, mainanama nga amin dagiti dedikado nga adipen ti Dios aramidenda ti amin a kabaelanda, wenno kasayaatan, a mangay-ayo ken Jehova. Nupay kasta, maparayraytayo pay ti panagreggettayo a mangaramid iti pagayatan ti Dios. Para iti tallo-tawenna nga ubing a lalaki, ti panangtungpalna iti uray bassit laeng a naipatrabaho kenkuana ti mabalin a kasayaatan a maaramidanna tapno matulonganna ni nanangna, ngem bayat a tumataengan, ad-adu pay ti maaramidanna. Kasta met iti naespirituan a panagrang-aytayo​—ti amin a kabaelantayo idi mabalin a saanen ita. Matignaytayo nga agaramid ti ad-adu pay para ken Jehova.

Ti rumangrang-ay a panangapresiartayo ken Jehova parayrayenna ti kinatuloktayo a mangaramid ti ad-adu pay. Mapatibker ti panangapresiartayo iti naaramidanna agpaay kadatayo babaen ti personal a panagadal iti Saona, ti Biblia. Kas pangarigan, no amirisen ken utobentayo a naimbag ti panangibaon ni Jehova iti Anakna tapno ipaayna ti biagna tapno maluk-atan ti sangatauan manipud basol, matignaytayo nga agserbi iti Nagtaudan ti urnos ti subbot. (Juan 3:16, 17; 1 Juan 4:9-11) Mientras ‘nanamen ken kitaentayo a ni Jehova naimbag,’ ad-adda met a matignay dagiti pusotayo nga agserbi kenkuana.​—Salmo 34:8.

Nabigbig daytoy ti maysa nga amin-tiempo a ministro dagiti Saksi ni Jehova a ni Jetter. Tapno maawatanna a naimbag ti ad-adalenna, nangilasin iti bassit a kuarto iti balayna agpaay iti dayta a panggep. Inyurnosna daytoy tapno maipamaysana ti agsukimat. Addaan iti Watch Tower Publications Indexes kasta met kadagiti bound volume ti Ti Pagwanawanan ken Agriingkayo! a nalaka a magaw-at idiay estante ti libro. “No adda masukisokko a makapainteres nga impormasion,” kunana, “magagaranak a mangiranud kadagiti sabsabali.”

Nupay kasta, no kasano a ti sagpaminsan a pannangan ti nawadwad a taraon dina mapennek ti panagkasapulan ti maysa a tao a mangan nga inaldaw, kasta met a ti napasnek ngem mammaminsan a panagsukisok iti Biblia dina maikkat ti panagkasapulan a mangipauneg ti naespirituan a taraon iti inaldaw. Apresiaren ni Ruth daytoy a kasapulan, ta kas adda a malagipna, basaen ti pamiliana ti Biblia a sangsangkamaysa iti kada bigat ken rabii kalpasan ti pannangan. Itan, iti edad nga 81, nakabusbosen iti nasurok a 60 a tawen iti amin-tiempo a ministerio, regular a basbasaenna pay laeng ti Biblia kalpasan a bumangon iti alas 6:00 t.b. Apaman a maawatna dagiti magasin a Pagwanawanan ken Agriingkayo!, iwayaan ni Ruth a basaen dagitoy. Mamitlo wenno mamimpat a basaenna ti artikulo sakbay a maadal daytoy idiay kongregasion. “Kasapulan ti panangipauneg ti Sao ti Dios tapno agtalinaed a natibker iti pammati,” kunana. Nakatulong met daytoy kenkuana a nangitultuloy iti panagserbina kas misionera iti adu a tawen.

Panangaramid ti Amin a Kabaelantayo iti Panangtulong Kadagiti Sabsabali

Babaen ti napasnek ken regular a panagadal iti Sao ti Dios, rumayray ti regtatayo nga agserbi iti Dios, ken magutugottayo a mangaramid ti ad-adu pay. (Idiligyo ti Jeremias 20:9.) Tinignay ti kasta a regta ni Hirohisa a mangtungpal a naan-anay ti ministeriona. (2 Timoteo 4:5) Nagnaed iti denna ni nanangna ken dagiti uppat nga addina a lallaki ken babbai. Idi agtutubo pay laeng, sinuportaran ni Hirohisa ti pamiliana babaen ti ibabangonna iti alas tres ti parbangon tapno agitonda kadagiti diario. Tinarigagayanna ti agaramid ti ad-adu pay iti panangisarsarita kadagiti sabsabali maipapan ken Jehova, gapuna nagaplikar ni Hirohisa para iti payunir a serbisio, kas awag iti amin-tiempo a ministerio dagiti Saksi ni Jehova. Ubing man idi, tinagiragsakna ti timmulong kadagiti sabsabali a kumadua kenkuana iti panangaramid ti amin a kabaelanda a mangidaydayaw ken Jehova.

Iraman ti panangaramid ti amin a kabaelantayo a tumulong kadagiti sabsabali ti panagbalin nga epektibo iti ministeriotayo. Naminsan pinaregta ni Jesus dagiti adalanna: “No ammoyo dagitoy, nagasatkayo no aramidenyo ida.” (Juan 13:17) Nasayaat nga ulidan ni Naomi iti panangipakat kadagiti singasing nga ipapaay ti organisasion ni Jehova tapno maparang-ay ti ministeriotayo. Marigatan idi a makipatang kadagiti ganggannaet kadagiti balaybalay ken masansan a mailabeg no addan kadagiti ruangan. Indagadag dagiti panglakayen ti kongregasion nga iyaplikarna dagiti singasing a masarakan iti libro a Panakirinnason Manipud kadagiti Kasuratan, iti benneg a “Dagiti Introduksion a Maaramat iti Ministerio idiay Tay-ak.”a Inkabesana dagiti introduksion iti paulo a “Pamilia/Annak” ket inusarna dagitoy iti adu a daras. Kas banagna, nabaelanna ti nakisarsarita iti maysa nga agtagibalay nga agtawen ti nasurok a 30. Saan pay la a simmarungkar ni Naomi, ket timmabunon daytoy a babai idiay Kingdom Hall. Naiyurnos ti panagadal ti Biblia. Itan bautisadon a Kristiano ti babai ken ti asawana, a nannanamendan ti naragsak a biag ti pamilia a kadua dagiti annakda.

Panangaramid ti Amin a Kabaelantayo iti Panangipakita ti Personal nga Interes

Mabalintay met a tuladen ni apostol Pablo, a nangikuna: “Aramidek amin a banag gapu iti naimbag a damag, tapno mairamanak kenkuana.”​—1 Corinto 9:22, 23.

Inyanninaw ni Hatsumi daytoy a kababalin. Bayat nga adda ni Hatsumi iti publiko a ministerio, sidadayaw nga imbaga kenkuana ti maysa a babai iti intercom a dina masango a kapatang. Naalumanay ti tono ti boses ti bumalay, gapuna intultuloy ni Hatsumi a sinarungkaran. Sumungbat laeng ti bumalay babaen ti intercom, a di pulos rummuar tapno kitaenna ni Hatsumi. Nagtultuloy daytoy iti dua ket kagudua a tawen.

Maysa nga aldaw binalbaliwan ni Hatsumi ti oras ti isasarungkarna. Mumalemen idi napan. Awan ti simmungbat. Nupay kasta, idi pumanawen, dinamag ti pamiliar a boses iti likudanna, “Siasinoka?” Kagapgapu ti babai idiay ruar ket agsublin iti pagtaenganna. Apaman a nangngegna ti nagan ni Hatsumi, magagaran a nangikuna, “Ah, sika ti mangsarsarungkar kaniak. Agyamanak iti kankanayon a pannakaseknanmo kaniak.” Gapu ta insardeng ti babai ti pannakipagadalna kadagiti Saksi ni Jehova iti sabali a lugar, mabain unay a manglukat ti ruangan para ken Hatsumi. Nairugi manen ti panagadal ti Biblia, ket nasayaat unay ti panagprogreso ti bumalay. Kasta met aya ti pannakaseknantayo kadagiti maam-ammotayo iti panagbalaybalay a ministerio?

Aramidenyo ti Amin a Kabaelanyo

Apresiaren ni Jehova ti pingettayo nga agserbi kenkuana iti amin a kabaelantayo. Isut’ umasping iti ama a sagutan ti anakna. Iti panaglabas ti panawen, mabalin a nagduduma ti sagut depende iti edad ken kabaelan ti anakna. No kasano a maragsakan ti ama nga umawat iti aniaman a naimpusuan a sagut nga ited ti anakna kenkuana, kasta met a madadaan ni Jehova nga umawat iti amin-puso a serbisiotayo a maiyannurot iti naespirituan a panagrang-aytayo.

Siempre, di rumbeng nga idilig ti kabaelantayo kadagiti sabsabali. Kas kuna ni Pablo, maaddaantayo iti gapu nga agragsak maipuon met la iti bagbagitayo, “saan a maipuon iti sabali a tao.” (Galacia 6:4) Itultuloytay koma nga ipangag ti pammagbaga ni apostol Pedro: “Agawaanyo tapno masarakankay koma a sitatalna nga awan tulaw ket awan pakapilawanyo iti sanguananna.”​—2 Pedro 3:14.

[Dagiti Footnote]

[Ladawan iti panid 29]

Ar-aramidenyo aya ti amin a kabaelanyo a mangiyaplikar kadagiti singasing para iti tay-ak ti ministerio?