Agtalekkayo iti Naimpadtuan a Sao ti Dios!

“Addaankami iti naimpadtuan a sao a napagbalin nga ad-adda a sigurado.”​—2 PEDRO 1:19.

 1, 2. Ania ti kaunaan a padto a nailanad, ket ania ti maysa kadagiti saludsod a pinataudna?

NI Jehova ti Gubuayan ti kaunaan a padto a nailanad. Idi nagbasol da Adan ken Eva, kinuna ti Dios iti serpiente: “Pagginnuraenkayto iti babai, ken ti kaputotam ken ti kaputotanna [“bin-ina,” NW]: daytoy sugatennanto ta ulom, ket sika sugatemto ti mukodna.” (Genesis 3:1-7, 14, 15) Adu a siglo ti naglabas sakbay a naibuksilan dayta a padto.

² Nangipaay ti kaunaan a padto iti napaypayso a namnama iti managbasol a sangatauan. Idi agangay, impalgak dagiti Kasuratan a ni Satanas a Diablo ti “kadaanan a serpiente.” (Apocalipsis 12:9) Ngem siasino ti Bin-i nga inkari ti Dios?

Panangammo iti Bin-i

 3. Kasano nga impakita ni Abel ti pammatina iti kaunaan a padto?

³ Saan a kas ken amana, namati ni managbuteng-Dios nga Abel iti kaunaan a padto. Mabalin a naawatan ni Abel a masapul a maibukbok ti dara tapno maabbongan ti basol. Ti ngarud pammati ti nangtignay kenkuana a mangidatag iti daton nga animal a makaay-ayo iti Dios. (Genesis 4:2-4) Nupay kasta, nagtalinaed a misterio ti kinasiasino ti naikari a Bin-i.

 4. Ania ti inkari ti Dios ken Abraham, ket ania ti impasimudaag dayta maipapan iti naikari a Bin-i?

⁴ Agarup 2,000 a tawen kalpasan ti kaaldawan ni Abel, inted ni Jehova ken patriarka nga Abraham daytoy a naimpadtuan a kari: ‘Bendisionankanto, ket paaduekto ti putotmo [“bin-im,” NW] kas kadagiti bitbituen ti langit . . . Ket iti putotmo mabendisionanto isuamin dagiti nasnasion ti daga.’ (Genesis 22:17, 18) Ipakita dagita a balikas nga adda pakainaigan ni Abraham iti pannakatungpal ti kaunaan a padto. Ipasimudaagda nga agtaud iti kaputotan ni Abraham ti Bin-i a mangpukaw kadagiti aramid ni Satanas. (1 Juan 3:8) “Gapu iti kari ti Dios . . . di nagpangpangadua [ni Abraham] iti kinakurang ti pammati” ken uray dagiti dadduma pay a saksi ni Jehova sakbay ti panawen dagiti Kristiano a ‘di nakagun-od iti kaitungpalan ti kari.’ (Roma 4:20, 21; Hebreo 11:39) Imbes ketdi, nagtultuloyda a nagtalek iti naimpadtuan a sao ti Dios.

 5. Siasino ti nakatungpalan ti Bin-i nga inkari ti Dios, ket apay a kasta ti sungbatyo?

⁵ Impalgak ni apostol Pablo no asino ti Bin-i nga inkari ti Dios idi insuratna: “Dagiti kari naisaoda ken Abraham ken iti bin-ina. Dina kuna: ‘Ken kadagiti bin-i,’ a kasla iti kasasaad ti adu a kakasta, no di ket kas iti kasasaad ti maymaysa: ‘Ken iti bin-im,’ nga isu ni Kristo.” (Galacia 3:16) Saan a dagiti amin a kaputotan ni Abraham ti mangbukel iti Bin-i a pakabendisionan dagiti nasion. Saan a pakabendisionan ti sangatauan dagiti kaputotan ni Ismael nga anakna ken dagiti putotna ken Ketura. Ni Isaac nga anakna ken ni Jacob nga apokona ti pagtaudan ti Bin-i a mangyeg iti bendision. (Genesis 21:12; 25:23, 31-34; 27:18-29, 37; 28:14) Impakita ni Jacob nga agtulnogto “dagiti il-ili” iti Silo nga agtaud iti tribu ni Juda, ngem iti kamaudiananna agtaud ti Bin-i iti kapuonan laeng ni David. (Genesis 49:10; 2 Samuel 7:12-16) Idi umuna a siglo, pinadpadaanan dagiti Judio ti maysa a tao nga umay kas Mesias, wenno Kristo. (Juan 7:41, 42) Ket ti padto ti Dios maipapan iti Bin-i natungpal ken Jesu-Kristo nga Anakna.

Agparang ti Mesias!

 6. (a) Ania ti pannakatarustayo iti padto maipapan iti 70 a lawas? (b) Kaano ken kasano a ‘pinagpatingga [ni Jesus] ti basol’?

⁶ Adda inlanad ni propeta Daniel a napateg a padto maipapan iti Mesias. Iti umuna a tawen ti panagturay ni Dario a Medo, ammo ni Daniel nga asideg idin nga agpatingga ti 70 a tawen a pannakalangalang ti Jerusalem. (Jeremias 29:10; Daniel 9:1-4) Bayat nga agkarkararag ni Daniel, immay ni anghel Gabriel ket impalgakna a ‘pitopulo a lawas ti naikeddeng a panamagpatingga iti basol.’ Mapapatay ti Mesias iti ngalay ti maika-70 a lawas. Nangrugi ti “pitopulo a lawas dagiti tawen” idi 455 K.K.P. idi a ni Artaxerxes I nga ari ti Persia ‘inruarna ti bilin a mangbangon manen iti Jerusalem.’ (Daniel 9:20-27; Moffatt; Nehemias 2:1-8) Umay ti Mesias kalpasan ti 7 a lawas ken 62 a lawas. Nangrugi dagitoy 483 a tawen idi 455 K.K.P. ket nagpatinggada idi 29 K.P., idi nabautisaran ni Jesus ken pinulotan ti Dios kas Mesias, wenno Kristo. (Lucas 3:21, 22) ‘Pinagpatingga [ni Jesus] ti basol’ babaen ti panangipaayna iti biagna kas subbot idi 33 K.P. (Marcos 10:45) Anian a nagsayaat a rason iti panamati iti naimpadtuan a sao ti Dios!a

 7. Ipakitayo babaen ti panangusaryo iti Kasuratan no kasano a natungpal ken Jesus ti padto maipapan iti Mesias.

⁷ Mailasintayo ti kinasiasino ti Mesias no adda pammatitayo iti naimpadtuan a sao ti Dios. Kadagiti naruay a padto iti Hebreo a Kasuratan maipapan iti Mesias, adu ti direkta a natungpal ken Jesus, kas impakita dagiti mannurat ti Kristiano a Griego a Kasuratan. Kas pagarigan: Maysa a birhen idiay Betlehem ti mangyanak ken Jesus. (Isaias 7:14; Mikias 5:2; Mateo 1:18-23; Lucas 2:4-11) Naayaban manipud Egipto, ken napapatay dagiti maladaga kalpasan ti pannakayanakna. (Jeremias 31:15; Oseas 11:1; Mateo 2:13-18) Imbaklay ni Jesus dagiti sakittayo. (Isaias 53:4; Mateo 8:16, 17) Kas naipadto, simrek iti Jerusalem a nakasakay iti urbon ti asno. (Zacarias 9:9; Juan 12:12-15) Natungpal ti sasao ti salmista kalpasan ti pannakailansa ni Jesus, idi pinagbibingayan dagiti soldado ti pagan-anayna ken pinagbibinnunotanda ti makin-uneg a kawesna. (Salmo 22:18; Juan 19:23, 24) Kaitungpalan met ti padto ti banag nga awan ti natukkol a tulang ni Jesus ken ti pannakaduyokna. (Salmo 34:20; Zacarias 12:10; Juan 19:33-37) Sumagmamano laeng dagitoy a pagarigan dagiti padto maipapan iti Mesias a natungpal ken Jesus, kas impakita dagiti mannurat ti Biblia a pinaltiingan ti Dios.b

Itan-okyo ti Mesianiko nga Ari!

 8. Siasino ti Dati a Lakay, ket kasano a natungpal ti padto a nailanad iti Daniel 7:9-14?

⁸ Idi umuna a tawen ni Belsasar kas ari ti Babilonia, inikkan ni Jehova ni propetana a Daniel iti tagtagainep ken kadagiti karkarna a sirmata. Uppat a dadakkel nga animal ti immuna a nakita ti propeta. Sigun iti anghel ti Dios, dagitoy dagiti “uppat nga ari.” No kasta, irepresentarda dagiti agsasaganad a pannakabalin ti lubong. (Daniel 7:1-8, 17) Kalpasanna, nakita ni Daniel ni Jehova, daydi ‘Dati a Lakay,’ a sidadayag a nakatugaw iti trono. Kas nainget a panangukomna kadagiti animal, inikkatna ti turayda ket dinadaelna ti maikapat nga animal. Naited iti “maysa a kasla anak ti tao” ti napaut a panangituray kadagiti “il-ili, nasnasion, ken pagsasao.” (Daniel 7:9-14) Anian a naisangsangayan a padto maipapan iti pannakaisaad ti “Anak ti tao,” ni Jesu-Kristo, kas ari idiay langit idi tawen 1914!​—Mateo 16:13.

9, 10. (a) Ania ti kaipapanan ti nadumaduma a paset ti ladawan iti tagtagainep? (b) Kasanoyo nga ilawlawag ti kaitungpalan ti Daniel 2:44?

⁹ Ammo ni Daniel a ti Dios ti “mangikkat ken mangisaad kadagiti ar-ari.” (Daniel 2:21) Buyogen ti pammati ken Jehova, a “mangipalgak kadagiti palimed,” impalawag ti propeta ti kaipapanan ti dakkel a ladawan a natagtagainep ni Nabucodonosor nga ari ti Babilonia. Impasimudaag dagiti nadumaduma a paset ti ladawan ti panagballigi ken pannakaparmek dagiti pannakabalin ti lubong kas iti Babilonia, Medo-Persia, Grecia, ken Roma. Inusar met ti Dios ni Daniel a mangipalgak kadagiti mapasamak iti lubong agingga iti tiempotayo ken iti masanguanan.​—Daniel 2:24-30.

¹⁰ Kinuna ti padto: “Kadagiti al-aldaw dagita nga ar-ari, ti Dios ti langit mamangonto iti maysa a pagarian a kaanoman dinto madadael ket ti panagturayna dinto met maited iti sabali nga ili; ngem burakennanto ken ibusennanto amin dagitoy a pagpagarian, ket isu agtalinaedto iti agnanayon.” (Daniel 2:44) Idi nagpatingga ti “naituding a pampanawen dagiti nasion” idi 1914, impasdek ti Dios ti nailangitan a Pagarian iti sidong ni Kristo. (Lucas 21:24; Apocalipsis 12:1-5) Babaen ti pannakabalin ti Dios, natikap ti “bato” a mangiladladawan iti Mesianiko a Pagarian manipud iti “bantay” ti sapasap a kinasoberano ni Jehova. Inton Armagedon, tupakanto dayta a bato ti ladawan sananto rumeken. Kas arig bantay a gobierno a mangituray iti “intero a daga,” agpautto nga agnanayon ti Mesianiko a Pagarian.​—Daniel 2:35, 45, NW; Apocalipsis 16:14, 16.c

11. Ania ti impakpakauna ti panagbalbaliw ti langa ni Jesus, ket ania ti epekto dayta a sirmata ken Pedro?

¹¹ Sipapanunot iti turay ti Pagarianna idi kinuna ni Jesus kadagiti adalanna: “Addada sumagmamano kadagidiay sitatakder ditoy a didanto pulos maramanan ni patay agingga nga umuna pay a makitada ti Anak ti tao nga um-umay iti pagarianna.” (Mateo 16:28) Innem nga aldaw kalpasanna, inkuyog ni Jesus da Pedro, Santiago, ken Juan a simmang-at iti nangato a bantay, ket nagbaliw sadiay ti langana iti imatangda. Bayat a nasalukoban dagiti apostol iti naraniag nga ulep, kinuna ti Dios: “Daytoy ti Anakko, ti dungdungnguen, isu nga inanamongak; agimdengkayo kenkuana.” (Mateo 17:1-9; Marcos 9:1-9) Anian a pakpakauna ti kinadayag ti Pagarian ni Kristo! Di pakasdaawan a tinukoy ni Pedro dayta a naraniag a sirmata ket kinunana: “Gapu itoy addaankami iti naimpadtuan a sao a napagbalin nga ad-adda a sigurado.”​—2 Pedro 1:16-19.d

12. Apay a nangnangruna nga itan ti tiempo nga ipakitatayo ti pammati iti naimpadtuan a sao ti Dios?

¹² Nabatad a saan laeng a dagiti padto maipapan iti Mesias a nailanad iti Hebreo a Kasuratan ti saklawen ti “naimpadtuan a sao” no di pay ket ti imbaga ni Jesus nga umayto “agraman pannakabalin ken dakkel a dayag.” (Mateo 24:30) Ti panagbalbaliw ti langa ni Kristo pinasingkedanna ti padto maipapan iti nadayag nga iyaayna nga addaan pannakabalin kas ari ti Pagarian. Iti saanen a mabayag, ti nadayag a pannakaipanayagna kaipapanannanto ti pannakadadael dagiti awanan pammati ken bendision kadagidiay addaan pammati. (2 Tesalonica 1:6-10) Paneknekan ti kaitungpalan ti padto ti Biblia a dagitoyen ti “maudi nga al-aldaw.” (2 Timoteo 3:1-5, 16, 17; Mateo 24:3-14) Kas Kangrunaan a Para-dusa a dinutokan ni Jehova, nakasagana ni Miguel, nga awan sabali no di ni Jesu-Kristo, a mamagpatingga iti daytoy dakes a sistema ti bambanag inton “dakkel a rigat.” (Mateo 24:21; Daniel 12:1) Ita ngaruden ti tiempo a paneknekantayo nga adda pammatitayo iti naimpadtuan a sao ti Dios.

Salimetmetanyo ti Pammatiyo iti Naimpadtuan a Sao ti Dios

13. Ania ti makatulong kadatayo a mangsalimetmet iti ayattayo iti Dios ken mangtaginayon iti pammatitayo iti saona?

¹³ Sigurado a naragsakantayo idi damo a naammuantayo ti maipapan iti pannakatungpal ti naimpadtuan a sao ti Dios. Ngem kimmapuy kadin ti pammatitayo ken bimmaawen ti ayattayo? Pulos a ditay koma agbalin a kas kadagiti Kristiano sadi Efeso a ‘nangpanaw iti ayat nga adda kadakuada idi damo.’ (Apocalipsis 2:1-4) Uray no kasano kabayagen nga agserserbitayo ken Jehova, mabalin a mapasamak dayta kadatayo malaksid no ‘itultuloytayo a sapulen nga umuna ti pagarian ken ti kinalintegna’ tapno makaurnongtayo iti kinabaknang idiay langit. (Mateo 6:19-21, 31-33) Ti naanep a panagadal iti Biblia, regular a pannakipaset kadagiti Nakristianuan a gimong, ken ti naregta a panangikasaba iti Pagarian tulongannatayo a mangsalimetmet iti ayattayo ken Jehova, iti Anakna, ken dagiti Kasuratan. (Salmo 119:105; Marcos 13:10; Hebreo 10:24, 25) Iti kasta, mataginayon ti pammatitayo iti sao ti Dios.​—Salmo 106:12.

14. Gapu iti pammatida iti naimpadtuan a sao ni Jehova, kasano a magunggonaan dagiti napulotan a Kristiano?

¹⁴ No kasano a natungpal ti naimpadtuan a sao ti Dios iti napalabas, makapagtalektayo met kadagiti naipadto a mapasamak iti masanguanan. Kas pagarigan, pimmayson ti nadayag a kaadda ni Kristo iti Pagarian, ken natungpalen kadagiti napulotan a Kristiano a matalek agingga ken patay daytoy a naimpadtuan a kari: “Kenkuana nga agballigi palubosakto a mangan iti kayo ti biag, nga adda iti paraiso ti Dios.” (Apocalipsis 2:7, 10; 1 Tesalonica 4:14-17) Ited ni Jesus kadagitoy a nagballigi a Kristiano ti pribilehio a “mangan iti kayo ti biag” iti nailangitan a “paraiso ti Dios.” Iti panagungarda ken babaen ken Jesu-Kristo, tagiragsakenda ti imortalidad ken di panagrupsa nga ipaay ni Jehova, ti “Ari ti kinaagnanayon, di agrupsa, di makita, ti maymaysa a Dios.” (1 Timoteo 1:17; 1 Corinto 15:50-54; 2 Timoteo 1:10) Anian a naindaklan a gunggona gapu iti di agbalbaliw nga ayatda iti Dios ken di maisin a pammatida iti naimpadtuan a saona!

15. Kadagiti siasino a naipasdek ti pundasion ti “baro a daga,” ket siasino dagiti kakaduada?

¹⁵ Di nagbayag kalpasan ti pannakapagungar dagiti matalek a natayen a napulotan iti nailangitan a “paraiso ti Dios,” dagiti natda iti naespirituan nga Israel ditoy daga nawayawayaanda iti “Babilonia a Dakkel,” ti sangalubongan nga imperio ti palso a relihion. (Apocalipsis 14:8; Galacia 6:16) Naipasdek kadakuada ti pundasion ti “baro a daga.” (Apocalipsis 21:1) Naipasngay ngarud ti “maysa a daga,” ket nagbalin dayta a naespirituan a paraiso nga agsaksaknap ita iti intero a daga. (Isaias 66:8) Umariwekwek nga arig karnero a kakadua ti naespirituan nga Israel ti agturturong iti dayta iti tiempotayo, kadagitoy “maud-udi nga al-aldaw.”​—Isaias 2:2-4; Zacarias 8:23; Juan 10:16; Apocalipsis 7:9.

Naipakpakauna ti Masakbayan ti Sangatauan iti Naimpadtuan a Sao ti Dios

16. Ania dagiti namnamaen dagiti nasungdo a mangsupsuportar kadagiti napulotan?

¹⁶ Ania dagiti namnamaen dagiti nasungdo a mangsupsuportar kadagiti napulotan? Adda met pammatida iti naimpadtuan a sao ti Dios, ket mangnamnamada a sumrek iti Paraiso a daga. (Lucas 23:39-43) Uminumdanto sadiay iti makapasalun-at a “karayan ti danum ti biag” ket paimbagento ida “dagiti bulong dagiti kayo” a naimula iti igid ti karayan. (Apocalipsis 22:1, 2) No addaankayo iti kasta a nakaskasdaaw a namnama, sapay koma ta itultuloyyo nga ipakita ti nauneg a panagayat ken Jehova ken pammati iti naimpadtuan a saona. Maibilangkayto koma kadagidiay mangtagiragsak iti di aggibus a rag-o nga itden ti panagbiag nga agnanayon iti Paraiso a daga.

17. Aniada a bendision ti ramanen ti panagbiag iti Paraiso a daga?

¹⁷ Saan a mailadawan a naan-anay dagiti imperpekto a tattao ti kasasaad ti biag iti um-umay a Paraiso a daga, ngem ti naimpadtuan a sao ti Dios ikkannatayo iti nalawlawa a pannakaawat kadagiti bendision nga agur-uray iti natulnog a sangatauan. Awanto ti bumusor iti turay ti Pagarian ti Dios ket maaramidto ti pagayatanna ditoy daga a kas sadi langit. Awanto dagiti narungsot a tattao​—uray animal​—a “mangranggas wenno mangdadael.” (Isaias 11:9; Mateo 6:9, 10) Dagiti naemma agnaeddanto iti daga, ket “maay-ayatandanto iti kinaruay ti talna.” (Salmo 37:11) Awanton dagiti mabisin a tattao, ta “addanto kinaruay ti bukel iti daga iti tapaw dagiti bambantay.” (Salmo 72:16) Awanton ti agarubos a lua gapu iti liday. Awanton ti sakit, ken uray ni patay. (Isaias 33:24; Apocalipsis 21:4) Agasenyo​—awanton dagiti doktor, agas, ospital wenno dagiti institusion para kadagiti adda sakit ti panunotda, ken puneraria. Anian a nagsayaat a namnama!

18. (a) Ania ti naipanamnama ken Daniel? (b) Anianto ti ‘bingay’ ni Daniel?

¹⁸ Awanton ti nagyan uray ti tanem ti sangatauan ta agungarto dagiti natay. Addaan idi ni nalinteg a Job iti kasta a namnama. (Job 14:14, 15) Kasta met ti namnama ni propeta Daniel, ta kastoy ti makaliwliwa nga impatalged kenkuana ti anghel ni Jehova: “Ngem sika inka iti dalanmo agingga iti panungpalan; ta aginanakanto, ken agtakderkanto iti bingaymo iti panungpalan dagiti al-aldaw.” (Daniel 12:13) Simamatalek a nagserbi ni Daniel iti Dios agingga iti ipapatayna. Agin-inana ita ken patay, ngem ‘agtakderto’ inton “panagungar dagiti nalinteg” kabayatan ti Sangaribu a Tawen a Panagturay ni Kristo. (Lucas 14:14) Anianto ti ‘bingay’ ni Daniel? Bueno, ipasimudaag ti padto ni Ezequiel nga iti Paraiso addanto disso nga agpaay iti amin a tattao ni Jehova. Padapada ken naurnos a pagbibingayandanto ti daga. (Ezequiel 47:13–​48:35) No kasta, addanto disso nga agpaay ken Daniel iti Paraiso, ngem saanto la a daga ti bingayna. Addanto lugarna iti panggep ni Jehova.

19. Ania ti masapul nga aramidenyo tapno agbiagkayto iti Paraiso a daga?

¹⁹ Dakayo met ngay ken ti bingayyo? No adda pammatiyo iti Sao ti Dios, ti Biblia, mabalin a tarigagayanyo ti agbiag iti Paraiso a daga. Nalabit ar-arapaapenyo payen nga addakayon sadiay, a mangsagsagrap iti aglaplapusanan a bendision, mangay-aywan iti daga, ken siraragsak a mangab-abrasa kadagiti napagungar. Wen, agpaay ngamin ti Paraiso iti sangatauan. Pinarsua ti Dios ti immuna a pagassawaan tapno agnaedda iti kasta a disso. (Genesis 2:7-9) Ket kayatna nga agbiag nga agnanayon iti Paraiso dagiti natulnog a tattao. Agtignaykayo kadi a mayannurot iti Kasuratan tapno maibilangkayto kadagiti binilion nga agnaed iti Paraiso a daga? Mabalin nga addakayto sadiay no pudpudno nga ay-ayatenyo ti nailangitan nga Amatayo a ni Jehova, ken salimetmetanyo ti pammatiyo iti naimpadtuan a sao ti Dios.

[Footnotes]

Kasanoyo a Sungbatan?

• Ania ti kaunaan a padto, ket siasino ti naikari a Bin-i?

• Ania ti sumagmamano a padto maipapan iti Mesias a natungpal ken Jesus?

• Kasanonto a matungpal ti Daniel 2:44, 45?

• Ania a masakbayan para iti natulnog a sangatauan ti ipakpakauna ti naimpadtuan a sao ti Dios?

[Ladawan iti panid 18]

Namnamaenyo kadi ti agbiag iti Paraiso a daga?