Imdenganyo ti Naimpadtuan a Sao

¹ “Addaankami iti naimpadtuan a sao a napagbalin nga ad-adda a sigurado.” (2 Ped. 1:19) Apay ngata nga imbaga ni Pedro daytoy? Napatalgedan ngaminen, wenno “napagbalin nga ad-adda a sigurado,” dagiti padto ti Pagarian nga adda iti Hebreo a Kasuratan kasta met dagidiay mismo nga impadto ni Jesu-Kristo, a naimatangan ken nangngeg ni Pedro ken dagiti dua pay nga adalan iti daydi panagbalbaliw ti langa a napasamak agarup 32 a tawtawen sakbayna. Impanamnama daytoy napintas a sirmata kadakuada nga agturayto ni Jesu-Kristo iti Pagarian nga addaan iti naan-anay a suporta ni Amana. Dagiti Kristiano idi umuna a siglo ket ‘naimbag ti ar-aramidenda iti inda panangimdeng iti dayta kas iti pagsilawan nga agsilsilnag.’ Ti yiimdeng iti naimpadtuan a sao pagtalinaedenna ida nga alerto agingga iti baro nga aldaw, intono ti “baggak,” a ni Kristo agsilnagto iti dayag ti Pagarian.​—2 Ped. 1:16-19; Mat. 17:1-9.

² Awantay idi a kadua ni Pedro a nakaimatang iti nadayag a panagbalbaliw ti langa. Kaskasdi, dagiti Kristiano iti daytoy a kaputotan a nagimdeng iti naimpadtuan a sao ti addaan iti pribilehio a makakita iti aglaplapusanan nga ebidensia a pudpudno nga agturturayen ti nadayag nga Ari! Iti kada tawen manipud 1914, napagbalin nga ad-addan a sigurado ti naimpadtuan a sao bayat a saksiantay ti kaitungpalan dagiti adu a paset ti “pagilasinan” nga inted ni Jesus maipapan iti naarian a “kaaddana.” Ti napateg a paset dayta a pagilasinan isu daydiay pannakayanunsio ti gobiernona iti amin a nasion sakbay a dadaelen ti Ari daytoy a sistema ti bambanag. Ti trabaho a panangikasaba iti Pagarian ket maar-aramid itan iti 231 a dagdaga, iti sidong ti panangiwanwan ni Kristo. (Mat. 24:3-14) Mainayon pay, bayat nga umadani ti “dakkel a rigat,” ur-urnongenen ti naitrono nga Ari ti “dakkel a bunggoy” a mabigbig met iti kaaddana.​—Apoc. 7:9, 10, 14.

³ Tangay limgaken ti “baggak,” a kaipapananna nga agturturayen ni Kristo iti Pagarian, adda pay kadi makagapu no apay nga imdengan ti naimpadtuan a sao? Wen adda! Inikkan ni naipadayag nga Jesu-Kristo ni apostol Juan iti agsasaruno a sirmata a mangbukel iti libro ti Apocalipsis. Adda naisangsangayan a pateg dagitoy kadatayo nga agbibiag iti “aldaw ti Apo.” (Apoc. 1:10) Daytat’ gapuna nga iti di mabayag adalento manen dagiti tattao ni Jehova ti libro nga Apocalipsis.

⁴ “Naragsak daydiay mangbasa a sipipigsa ken dagidiay dumngeg kadagiti sasao daytoy a padto, ken dagidiay mangtungpal kadagiti bambanag a naisurat iti dayta; ta ti naituding a tiempo asidegen.” (Apoc. 1:3) Tapno naragsaktayo, masapul a magun-odtay ti anagna, wen ti pudno a pannakaawat, kadagitoy naimpadtuan a sirmata. Aniat’ dawaten daytoy? Kasapulan ti panangulit tapno agarinsaed iti pusotayo ti kaipapanan ti salaysay ti Apocalipsis. Nabigbig ni apostol Pedro, kameng ti umuna a siglo a bagi a manarawidwid, ti pateg ti panangulit kadagiti pamunganayan a kinapudno tapno ‘maparayrayna’ iti naespirituan dagiti kakabsatna. (2 Ped. 1:12, 13) Kasta met a tultulongannatayo ti moderno-aldaw a “matalek ken masirib nga adipen” babaen iti maulit-ulit a panangiturongna ti atensiontayo iti naimpadtuan a sao.​—Mat. 24:45-47.

⁵ Kasanot’ Yiimdeng: Ania a kitat’ panangtaming ti maikari iti naimpadtuan a sao ti Apocalipsis? Palagipannatay ni apostol Pablo a ti Dios saan a nakisarita kadagiti Kristiano babaen iti anghel wenno propeta a kas ti inaramidna idi kasakbayan ni Kristo. Imbes ketdi, nakisarita ni Jehova kadatayo babaen iti dungdunguenna nga Anak, nga isut’ dinutokanna nga “agtawid iti isuamin a bambanag.” (Heb. 1:1, 2) “Dayta ti makagapu a rebbengtayo nga ipaayan ti ad-adda ngem iti gagangay a panangipangag dagiti bambanag a nangngegtayo, tapno ditay pulos maiyayus.” (Heb. 2:1) Wen, masapul nga umimdengtayo nangruna iti naimpadtuan a sao a maipadalan ken Jesu-Kristo. Kasanotay a maikkan ti espesial nga atension ti panagadaltay ti Apocalipsis?

⁶ Umuna, nasken nga addatay a linawas iti Panagadal ti Libro iti Kongregasion. Pudno, nga adu kadatayo ti maikatlonton nga adalenna ti libro nga Apocalipsis. Ngarud, mabalin a laglag-anen ti dadduma ti panangmatmatda ti itatabuno iti panagadal ti libro, nga ibilangda nga uray mangliwatda a makiadal, pamiliardan iti material. Nupay kasta, kada tawen nga aglabas, ad-adda nga agbalin daytoy naimpadtuan nga impormasion a naintiempuan ngem idi 1989 idi damo nga inadaltay ti libro nga Apocalipsis. Masapul nga agalertotay amin kadagiti agdama a pasamak a sipapardas nga agturturong iti pannakatungpal dagiti padto iti Apocalipsis. No mabalin, aramidenyo a personal a kalat ti di pannakaikapis iti uray maysa a panagadal ti libro, kabayatan daytoy napateg a pannakataming ti Apocalipsis.

⁷ Maikadua, isaganayo a naimbag ti leksionyo. Basaenyo dagiti naisitar a kasuratan ken kitaenyo no kasano a suportaranda ti pannakailawlawag dagiti bersikulo ti Apocalipsis a maad-adal. Iti daytoy a wagas saanto laeng a sungbat dagiti saludsod ti magun-odanyo. Dikay koma ikagumaan laeng a gun-oden ti pannakaammo no di ket gun-oden ti kinasirib ken pannakaawat. (Prov. 4:7) Maikatlo, aggagetkay a makiraman iti panagkomento ken panagbasa kadagiti kasuratan. Aramidenyo a kalat ti sumungbat iti uray maminsan laeng ken no mabalin mamin-adu tunggal panagadal. No aramidenyo ti kasta, matulongankayto a mangipamaysa iti panunotyo iti adalen.

⁸ Ad-adu pay ti saklawen ti panangipaay ti ad-adda ngem iti gagangay a panagimdeng iti naimpadtuan a sao ngem ti panagsagana, itatabuno, ken pannakiraman. Kaipapananna met nga uray kalpasan ti adal, itultuloytay nga ‘utoben dagitoy a bambanag, a maipamaysatay kadakuada.’ (1 Tim. 4:15) No kayattay nga agraniag a kas silaw ti naimpadtuan a sao iti puspusotayo, masapul a sarutenna ti makin-uneg a kinataotayo​—dagiti panunot, tarigagay, emosion, tignay, ken kalattayo. (2 Ped. 1:19) Ngarud, saludsodantay ti bagbagitayo: Aniat’ personal a kaipapanan daytoy nga impormasion kaniak? Aniat’ naadalko maipapan ken Jehova ken ti Anakna, a ni Jesu-Kristo? Maipappapusok met laeng kadi ti anag ti naadal? Kasanok a mayaplikar dagitoy a kinapudno iti biagko? Iti pamiliak? Iti kongregasion? No praktikal nga yaplikar ti naadaltayo, mabalintay a kunaen ti insao ti salmista: “Ti saom pagsilawan kadagiti saksakak, ken silaw iti danak.”​—Sal. 119:105; Job 29:3, 4.

⁹ Agsalukagkay iti Napeggad a Pampanawen: Idi tawen 33 K.P., pinakdaaran ni Jesus dagiti adalanna maipapan iti sumungsungad a pannakadadael ti Jerusalem ken ti pagilasinan no kaanonto ti panagkamangda iti natalged a lugar. (Luc. 19:41-44; 21:7-21) Kalpasanna, naglabas ti nasurok a 30 a tawen. Kasla ti panagkuna dagiti dadduma a Judio a Kristiano a bassitto ti pagbaliwanna iti masanguanan. Anian a naintiempuan ti pammagbaga ni apostol Pedro iti maikadua a suratna, a naisurat idi agarup 64 K.P., nga ‘umimdengda iti naimpadtuan a sao’! (2 Ped. 1:19) Di nagbayag kalpasanna, idi 66 K.P., nilakub dagiti soldado a Romano ti Jerusalem. Idi pimmanaw a di ammot’ gapuna ti buyot ti Roma, tinungpal dagiti naalibtak a Kristiano a Judio ti bilin ni Jesus ket pimmanawda. Kalpasanna, idi 70 K.P., nagsubli ti buyot ti Roma ket dinadaelda nga inkisap ti Jerusalem. Nalabit anian a ragsak dagidiay a Kristiano ta impangagda a naimbag ti naimpadtuan a sao ni Jesus!

¹⁰ Aniat’ masapul a siputantayo a Kristiano iti moderno nga aldaw? Kadagiti sirmata iti Apocalipsis, binallaaganna dagiti Kristiano nga agbibiag iti aldaw ti Apo nga adunto dagiti mapasamak iti mabiit. Bayat ti napalabas a 80 a tawen, natungpalen ti sumagmamano kadagitoy a pasamak: ti pannakaipasngay ti Pagarian; ti gubat idiay langit, a sinaruno ti pannakaipupuk ni Satanas ken dagiti demoniona iti kaparanget ti daga; ti pannakatnag ti Babilonia a Dakkel; ken ti panaglatak ti nalabaga nga atap nga animal, ti maikawalo a turay ti lubong. Ti kaitungpalan dagitoy a paset ti naimpadtuan a sao iti Apocalipsis ad-adda a siguraduenna nga iti mabiit maimatangantayton dagitoy nabatbati a dramatiko a pasamak: ti pannakamarka ti maudi a kameng ti 144,000, ti pannakalpas ti panangurnong iti dakkel a bunggoy, ti pannakadadael ti Babilonia a Dakkel, ti gubat ti Armagedon, ti pannakaigarangugong ni Satanas, ken ti Milenio a Panagturay ti Kristo. Anian a nagpateg nga imdengantay ti pakdaar ni Jesus: “Adtoy! Umayak a kas maysa a mannanakaw. Naragsak daydiay agtalinaed a siririing ket igagana dagiti makinruar a kawesna.”​—Apoc. 16:15.

¹¹ Naridamtay kadi? Kasanot’ kaganetget ti panangibilangtay iti naimpadtuan a sao? Uray pay no 5 wenno 50 a tawenen nga indedikartay ti bibiagtayo ken Jehova, maitutop nga agaplikar kadatayo ti sasao ni Pablo kadagiti Kristiano a taga Roma: “Ammoyo ti panawen, nga orasen tapno agriingkayo manipud iti turog, ta ita ti pannakaisalakantayo as-asidegen ngem idi tiempo a nagbalintayo a manamati. Ti rabii lumabasen; ti aldaw immasidegen.” Kalpasanna binalakadan ni Pablo dagiti Kristiano nga ‘ikkatenda ngarud dagiti ar-aramid a kukua ti kinasipnget’ ket ‘magnada koma a sitatakneng.’ (Roma 13:11-13) Agbibiagtay iti lubong a ti moralna ket nasipngetan unay. Dagiti kababalin a nakaar-ariek idi 30 wenno 40 a tawen laeng ket gagangayen iti adu a taga lubong iti daytoy maudi a dekada ti maika-20 a siglo. Agannadkayo kakabsat, a dikay pulos baybay-an ti bagiyo a mayaw-awan iti kinasipnget ti lubong ken agsugel iti moral. No pabus-oyanyo ti bagiyo a mangyaleng-aleng iti nakababain a wagas ti panagbiag ti lubong, diyonto makita dagiti dadakkel nga isyu a ngangnganin maibanag iti agnanayon: ti pannakaalangon ti kinasoberano ni Jehova ken ti pannakasantipikar ti naganna. Pagpeggaden ti naespirituan a panagsugel ti pannakaisalakantayo, nga asideg unayen.

¹² Patanuren ti Naimpusuan a Panangipateg iti Naimpadtuan a Sao: Interesado unay dagiti Hebreo a propeta idi ugma iti pannakatungpal dagiti padtoda maipapan iti Mesias. ‘Sigaganetget a nagsukimat ken siaannad a nagsirarakda’ no maipapan iti pannakatungpal ti panggep ti Dios. (1 Ped. 1:10, 11) Kasta met, bayat a tamtamingenyo ti naimpadtuan a sao iti libro ti Apocalipsis, tumarubonto ti apresasionyo kadagiti naespirituan a bambanag. Dumegdegto ti panaggustoyo iti naespirituan, isu a matignaykayto a mangkutkot kadagiti “nauuneg a bambanag ti Dios.” (1 Cor. 2:10) Bayat a punnuenyo dagiti pusoyo iti apresasion iti naimpadtuan a sao, saanto a kasapulan ti mangdagdag kadakayo a tumabuno iti gimgimong; matignaykayto a regular a tumabuno ken makiraman. (Luc. 6:45) Ket no ‘ti sao adda iti pusoyo,’ matignaykayto a “mangaramid iti publiko a deklarasion maipaay iti pannakaisalakan.”​—Roma 10:8-10.

¹³ Bayat nga umun-unegtay iti panawen ti panungpalan, ad-adda a laisendatay dagiti mananguyaw gapu iti panangirupirtay ti pammatitayo iti naimpadtuan a sao ti Dios. (2 Ped. 3:3, 4) Kaskasdi, agridamtay iti naimpadtuan a sao. Ipakita ti silnag ti Sao ti Dios kadatayo no sadino ti ayantayon iti agus ti panawen. Siraraniag nga irimatna ti kinapudno nga addatayon iti maudi nga al-aldaw daytoy nasipngetan a lubong. Limgaken ti baggak! Nagturayen iti Pagarian ni Kristo! Makitkitatayon ti sumingsingising a baro nga aldaw iti pagbannawagan. Sapay koma ta agtultuloy a pudno kadatayo ti inkari ti Dios a baro a lubong a kas ti Pagarian idi kadagidi tallo nga apostol a naaddaan ti pribilehio a makaimatang iti pakpakauna a buyana iti daydi namilagroan a sirmata ti panagbalbaliw ti langa ni Jesus!