‘Ti Dios Turposenna ti Panagsanayyo’

TI ATLETA nga agsagsagana a maipaay iti napateg a pakisalipanna agsanay a naimbag. Kayatna a maisagana ti bagina tapno inton dakkel nga aldaw, maipaaynanto ti kasasayaatan a mabalin a pannakisalipna. Kasta met dagiti Kristiano, agsanayda a naimbag a maipaay iti naiduma a kalat. Kuna ni apostol Pablo: “Ket agwatwatka a maipaay iti nadiosan a debosion kas kalatmo.”​—1 Timoteo 4:7.

Gapuna, kasapulan a salimetmetan ti Kristiano ti bagina a sisasayaat iti naespirituan. No kasano a ti atleta pabilgenna ti bagina, pabilgen met ti Kristiano ti naespirituan a pigsa ken panagandorna. Aramidenna daytoy babaen iti panagadal ti Sao ti Dios ti Biblia, babaen iti kararag, babaen ti regular a pannakitimpuyogna kadagiti padana a Kristiano, ken iti panangiyebkas iti publiko ti pammatina.

Masansan ti maysa nga atleta adda managsanayna, ket dagiti Kristiano met, addaanda ti managsanay. Asino? Awan sabali no di ni Jehova a Dios mismo! Intudo ni apostol Pedro ti pannakaseknan ni Jehova iti programa ti Nakristianuan a panagsanay, nga insuratna: “Ket ti Dios ti amin a di kaikarian a kinamanangngaasi . . . isu met laeng turposenna ti panagsanayyo, patibkerennakayto, papigsaennakayto.” (1 Pedro 5:10) Ania a panagsanay ti ipaay ni Jehova kadatayo? Adu a klase, ket naskenda amin no kayattayo ti agtalinaed a napigsa kas Kristiano.

Direkta a Panangdisiplina

Ni Pedro a mismo immawat ti panagsanay manipud ken ni Jehova. Adu ti maadaltayo manipud iti kapadasanna. No maminsan nasakit ti panagsanay ni Pedro. Pampanunotenyo laengen no kasano ti panagrikna ni Pedro idi padpadasenna a paayen ni Jesus a lasaten iti pinanggep ti Dios kenkuana ket sisasaem a simmungbat ni Jesus: “Pumanawka iti sanguanak, Satanas! Sika ti pakaitibkolak, ta dika pampanunoten dagiti maipapan iti Dios, no di ket kadagiti maipapan kadagiti tattao.” (Mateo 16:23) Pampanunotenyo met, no kasanot’ panagriknana adu a tawen iti kamaudiananna idi a ti panagbuteng iti tao ti nangiturong kenkuana a nagtignay a di nainsiriban. Ni apostol Pablo ti nangipakat iti disiplina ni Jehova iti dayta nga okasion: “Ngem idi immay ni Cefas [ni Pedro] idiay Antioquia, sinuppiatko a rupanrupa, ta rimsua a nakabiddut.”​—Galacia 2:11-14.

Nupay kasta, iti agpadpada nga okasion ni Jehova ti mangsansanay ken ni Pedro. Naadalna nga “awan ti dusa nga ita maipagarup a pagragsakan, no di ket pagladingitan; ngem kalpasanna pataudenna ti natalna a bunga ti kinalinteg.” (Hebreo 12:11) Ti panangawat kadagidiay napigsa a pannubngar kas disiplina a naggapu ken ni Jehova ti nakatulong ken ni Pedro a naaddaan iti umiso a panangmatmat kadagiti bambanag ket dayta ti nangsanay kenkuana kadagiti nasken a Nakristianuan a kualidad iti kinaemma ken kinapakumbaba.​—Proverbio 3:34; 15:33.

Panangtaming kadagiti Adda a Kasasaad

Mabalinnatay met a sanayen ni Jehova babaen ti panangipalubosna kadagiti kasasaad a rumsua a narigat a tamingen​—no maminsan dagitoy ket iti uneg pay ti Nakristianuan a kongregasion. Datayo a Kristiano dumakkeltayo bayat nga ikarkararagtayo ti panangiwanwanna, nga iyaplikartayo dagiti prinsipio ti Biblia a naadaltayo, ken makita no kasano a ti panangiyaplikar kadagidiay a prinsipio ket kanayon nga iti kasayaatan a pamay-an.

Nairaman ni Pedro kadagiti panagsusuppiat iti personalidad a rimsua iti nagbabaetan dagiti apostoles ni Jesus. No basaentayo dagiti salaysay daytoy, makapainteres a makita no kasanot’ panangusar ni Jesus kadagitoy a sussusik​—a ti kinapudnona bunga ti kinaimperpekto ken kinakurang iti kapadasan​—kas dagiti gundaway a panagsanay kadagiti paspasurotna kadagiti nasken a Nakristianuan a kualidad ti ayat, kinapakumbaba, ken kinamanagpakawan.​—Mateo 18:15-17, 21, 22; Lucas 22:24-27.

Naim-imatangan met ni Pablo dagiti panagsususik gapu iti personalidad. (Aramid 15:36-40; Filipos 4:2) Inlawlawagna no kasano a dagita a parikut nangted kadagiti Kristiano iti gundaway nga umawat iti pannakasanay: “Nga agiinnanuskayo ket agpipinnakawankayo no ti asinoman adda pangidarumanna iti sabali. Kas iti pammakawan ni Jehova kadakayo, kastakayo met. Ket, kangrunaan kadagitoy a bambanag, agkaweskayo iti ayat, isu ti naan-anay a singgalut ti panagkaykaysa.”​—Colosas 3:13, 14.

Idi umuna a siglo, ti ad-adda pay a nakabutbuteng a peggad ti nagparang kadagiti Kristiano. Namakdaar ni Pedro maipapan iti dayta: “Addanto dagiti saan a pudno a mannursuro iti tengngayo. Dagitoy ti mangiserrekto a sililimed kadagiti nakillo ken makadadael a pammati ket paglikudandanto uray ti makinkukua a nanubbot kadakuada, ket ikuyogda met laeng kadakuada ti napardas a pannakapukawda. Ket adunto dagiti sumurot kadagiti naderrep nga ar-aramidda, ket gapu kadakuada ti dana ti kinapudno matabbaawanto.” (2 Pedro 2:1, 2) Daytoy a kapadasan mangibunganto ti pannakadadael dagiti awan panagbabbabawida nga “ulbod a mannursuro.” (2 Pedro 2:3) Ngem dagidiay ngay nagtalinaed a matalek?

Ti kapadasan ti mangsanayto kadakuada a ‘parayrayen ti nalawag a panagpampanunotda.’ (2 Pedro 3:1) Ti kinaalistoda nga agalibtak maibusor iti iseserrek dagiti ulbod a pannursuro tignayenna ida a mangrepaso kadagiti rason a maipaay iti pammatida. Bayat a makitkitada dagiti dakes a bunga iti ar-aramid dagiti “ulbod a mannursuro,” ti panagtalekda iti Nakristianuan a kinapudno ti agbalinto a napigpigsa.​—2 Pedro 3:3-7.

Kas pangarigan, iti maysa a kongregasion ni lakayen nga apostol Juan ti sinuppiat ti maysa nga agnagan Diotrefes, maysa a lalaki nga ambisiuso nga awanan ti panagraem iti autoridad ni Juan ket saan laeng a di nangawat kadagiti mensahero nga imbaon ni Juan ngem nalabit pinadpadasna pay a laksiden dagidiay addaan panagraem. Nalabit a daytoy ti nakasaksakit kadagiti amin a napasnek a Kristiano idiay kongregasion a kadua ni Diotrefes. Ngem daytat’ nangted gundaway kadakuada a mangipakita a saanda a ‘tumutulad iti dakes’ ket iti kasta umawat iti adelantado a pannakasanay iti kinasungdo ken ni Jehova ken iti apostoliko nga autoridad.​—3 Juan 9-12.

Ti Pannakilangen kadagiti Di Kristiano

Kuna ni Jesus a dagiti paspasurotna ket saanda a paset ti lubong. (Juan 17:16) Ti umuna a kinasungdo ti Kristiano ket agpaay ken ni Jehova ken ti Pagarianna. Pagreggetanna a salimetmetan dagiti moral a pagalagadan ti Dios, tapno dagiti kangrunaan nga intereses ken pakaseknanna ti naidumada manipud kadagiti taga lubong. Nupay kasta, ti Kristiano ket kasapulan nga agnaed iti lubong, ket daytoy ti di agangay mangpataud kadagiti panagdandanag.

Ni Pedro, kabayatan ti naunday a ministeriona, ti nalabit nakakita kadagiti adu nga okasion a dagiti Kristiano kasapulan nga agaramidda kadagiti nainget wenno narikut a desision, a timbengen dagiti panagkalikagum ti lubong kadagiti adda nga idiktar ti konsiensiada. Iti umuna a surat ni Pedro, isut’ nangted iti nagsayaat, praktikal a pammalakad no kasano ti panangaramid iti daytoy tapno dagiti Kristiano ket “masalimetmetanda ti nadalus a konsiensia.”​—1 Pedro 2:13-20; 3:1-6, 16.

Siempre, datayo a Kristiano kumitkitatayo iti masanguanan inton saantayonton a pampanunoten dagiti kalkalikagum daytoy a sistema dagiti bambanag. Ngem kabayatanna masansanaytayo iti panagibtur ken mapalubosan a mangidemonstra iti kinasungdotayo iti imatang dagiti pakasulisogan ken dakes nga impluensia. Bayat a makagun-odtayo ti kapadasan iti panangiyaplikar kadagiti prinsipio iti Biblia kadagiti nadumaduma a kasasaad, ken simamaingel nga agtignay iti pamay-an nga ammotayo a kayat ni Jehova a panagtignaytayo masanaytayo met iti praktikal a kinasirib ken kinatured. Panunotenyo laengen no kasano ti ad-adda pay a pannakasanaytayo amin gapu iti panagbibiagtayo iti daytoy a sistema ken sibaballigi a tinamingtayo dagiti adu a naririkut a problema!

Iti Sidong ti Pannakaidadanes

Idi nagsao ni Pedro maipapan iti panangsanay ti Dios kadatayo, nangnangruna a tuktukoyenna ti pannakaidadanes. Impakitana a dagiti Kristiano rebbeng a namnamaenda ti pannakaidadanes, nga insuratna: “Agparbengkayo, agsalukagkayo. Ti Diablo a kabusoryo, kasla leon a ngumerngernger, a magmagna iti sibayyo nga agsapsapul iti alun-onenna.”​—1 Pedro 5:8; kitaenyo met ti 2 Timoteo 3:12.

Kualipikado ni Pedro nga agsao maipapan iti daytoy agsipud ta personal a nagsagaba iti pannakaidadanes. Kadagiti pangrugian nga al-aldaw ti kongregasion Kristiano, isu ken dagiti dadduma nga apostoles nababaotda ken nabilinda nga isardeng ti panangasabada. Ti panagtignayda? Isuda “pimmanawda a siraragsak iti sanguanan ti Sanhedrin, agsipud ta naibilangda a maikari a nagsagaba iti nakababain gapu iti naganna.”​—Aramid 5:41.

Gapuna, nagsao ni Pedro manipud kapadasan, agraman iti sidong ti pannakaipaltiing, idi a kinunana: “No di ket agragsakkayo, gapu ta mairamankayo kadagiti panagsagaba ni Kristo, tapno iti pannakaiparangarang ti dayagna, agrag-okayo met iti rag-o a nagdanonan. No maumsikayo gapu iti nagan ni Kristo, naragsakkayo, ta ti espiritu ti dayag, uray pay ti espiritu ti Dios, agtaeng kadakayo.”​—1 Pedro 4:13, 14.

Wen, ti direkta a pannakaidadanes agserbi met kas maysa a langa ti pannakasanay. Iti sidong dayta, maadal ti Kristiano ti agpannuray nga ad-adda pay iti espiritu ti Dios. Ti pammatina ti makapatanor iti “nasuoten a kualidad.” (1 Pedro 1:7) Isut’ masanay iti kinamaingel a naibatay iti pannakabalin ni Jehova. (2 Timoteo 1:7) Mapatanornanto ti naanus a panagibtur, ket kas ken ni Jesus, ‘maadalna ti panagtulnog gapu kadagiti bambanag a linak-amna.’​—Hebreo 5:8; 1 Pedro 2:23, 24.

Ni Jehova Turposenna ti Panagsanaytayo

Siempre, dagiti naririkut a problema agraman pannakaidadanes, nga ibturan ti maysa a Kristiano saanda nga aggapu iti Dios. Imbalakad ni Santiago: “No masusuot, saan koma a sawen ti siasinoman: ‘Masulisugak iti biang ti Dios.’ Ta ti Dios saan a mabalin a sulisugen kadagiti bambanag a dakes ket isu awan met ti sulisugenna.” (Santiago 1:13) Mabalin a rumsua dagiti parikut manipud adu a gubuayan, agraman ti panagbiddut dagiti tattao wenno agaramidda iti dakes a kabukbukodanda a nakem. Nupay kasta, yantangay dagita a bambanag mapasamakda, us-usaren ni Jehova ida a mangsanay kadagiti ad-adipenna babaen iti nasken a Nakristianuan a kualidad.

Ni Job, Jeremias, Pedro, Pablo, ken amin dagiti adipen ti Dios idi panawen ti Biblia nasanayda iti daytoy a pamay-an. Datayo met bayat a maipasangotayo kadagiti nadumaduma a naririkut a kasasaad, rebbeng a matmatantay ida kas gubuayan ti pannakasanay nga impalubos ni Jehova. Babaen ti pannakaipasangotay kadakuada iti bileg ni Jehova, masanaytayo iti kinatulnog, kinasirib, kinapakumbaba, kinamaingel, ayat, panangpabus-oy, ken adu pay a dadduma a kualidad.​—Idiligyo iti Santiago 1:2-4.

Maparegtatayo met, babaen ti pannakaammo a daytoy a tukad ti pannakasanaytayo ket malpaston iti maysa nga aldaw. Gapuna, liniwliwa ni Pedro dagiti padana a Kristiano, a kunkunana: “Ket ti Dios iti amin a di kaikarian a kinamanangngaasi, a nangawis kadakayo iti agnanayon a gloriana ken Kristo, iti kalpasan ti panagsagabayo iti bassit nga aldaw, isu met laeng turposennanto ti pannakasanayyo, patibkerennakayto, papigsaennakayto.” (1 Pedro 5:10) Dagitoy a sasao ti agaplikar nga addaan isu met laeng a puersa iti “dakkel a bunggoy” a kumitkita iti biag nga agnanayon iti Paraiso a daga.

Dayta a kapanunotan a mismo ti rebbeng a mangtulong kadatayo nga agpasakop a siaanus kadagitoy a pakasanayan a kapadasan, nga agbalin a determinado a di makikompromiso. Gapuna, lak-amentayto ti kinapudo dagiti makaparegta a sasao ni Pablo: “Ditay ngarud mabannog iti panagaramid iti naimbag, ta inton tiempona agapittayto no ditay maupay.”​—Galacia 6:9.