“Agbutengkay iti Dios ket Isu Dayawenyo”

“Agbutengkay iti Dios ket isu dayawenyo.”​—APOCALIPSIS 14:7.

 1. Asinot’ rebbeng a pagbutngantayo, ken aniat’ rebbeng a ditay pagbutngan?

ASINOT’ REBBENG A PAGBUTNGANTAYO? Siempre saan a ti nalabaga a dragon, a ni Satanas, ken dagiti demonio a buybuyotna! Dagitoy ti intapuaken ni Kristo Jesus manipud langit kalpasan ti pannakaipasngay ti Pagarian idi 1914. Ngem dagiti sirmata iti Apocalipsis sumaganad nga ipanayagda ti organisasion nga us-usaren ni Satanas ditoy daga iti maudi a panagreggetna a manglapped kadagiti pangpanggep ti Dios. Kangrunaan iti daytoy a panangiladawan isuda dagiti dua a narurungsot nga atap nga an-animal ken ti maysa a nabartek a balangkantis​—ti Babilonia a Dakkel. Rebbeng aya nga agbutengtay kadagitoy? Adayo iti dayta! Imbes ketdi, rebbeng nga agbutengtayo ken Jehova ken ti Kristona, a ti Pagarianda ti nangiyegen iti dakes a lubong ni Satanas iti maudin a pannakaukomna.​—Proverbio 1:7; Mateo 10:28; Apocalipsis 12:9-12.

Dagiti An-animal ti Tabbaaw

 2. Ania nga atap nga animal ti agparang iti maikawalo a sirmata, ket aniat’ irepresentar dayta?

² Bayat a maibukbuksilan ti maikawalo a sirmata ti Apocalipsis, rumkuas ti atap nga animal manipud nariribuk a baybay ti sangatauan. Daytat’ addaan pito nga ulo ken sangapulo a sara nga addaan sangapulo a korona, a mangipampamatmat ti naarian nga autoridad nga inted ni Satanas iti dayta. Daytat’ mangtabtabbaaw ken ni Jehova, a mangsakmal kadagiti ad-adipenna kas iti maysa a leopardo, maysa nga uso, wenno maysa a leon; ngem ti kinaturayna ket apagbiit laeng, ta naalana dayta manipud iti dragon, a ni Satanas, a daytat’ kaas-aspingna la unay. Iti nasapsapa insalaysay ni mammadto a Daniel dagiti naindagaan a napolitikaan a gobierno kas an-animal, ket dagiti gobierno mismo ti masansan nangpili kadagiti parparsua nga atap kas nasional a simboloda, kas iti leon dagiti Briton ken agila dagiti Americano. (Daniel 8:5-8, 20-22) Ngem, itatta, makitatayo ti napamaysa nga animal, a mangabrasa amin kadagiti napolitikaan a pannakabalin iti historia ti Biblia a masansan mangirurrurumen kadagiti pudno nga ad-adipen ti Dios ditoy daga. Kangrunaan kadagitoy nga “ulo” isuda ti Egipto, Asiria, Babilonia, Medo-Persia, Grecia, Roma, ken kamaudiananna isu ti Anglo-Americano a Nagkadua a Pannakabalin ti Lubong.​—Apocalipsis 13:1, 2; 12:3, 7-9.

 3. (a) Kasano a ti maysa kadagiti ulo ti atap nga animal “nasugatan iti kampilan”? (b) Kasano a ti dua ti sarana nga atap nga animal indaulona ti panangaramid ti ladawan ti immuna nga atap nga animal? (c) Aniat’ nagan ti immuna nga atap nga animal ken ti pateg dayta a nagan?

³ Bayat ti gubat sangalubongan ti 1914-18, ti Gran Britania, kas ti maikapito a pannakabalin ti lubong, ti nakaawat iti “sugat ti kampilan” nga isu komat’ makapapatay. Ngem immay ti Estados Unidos ti America a nangispal kenkuana. Nanipud idin, ti America ken Britania nagtintinnulongda a dua kas nagtipon a pannakabalin ti lubong, nga isut’ intuloy ni Juan a dineskribir kas atap nga animal a dua ti sarana, a rimmuar manipud naipasdeken a natauan a sosiedad, “ti daga.” Daytoy duat’ sarana nga animal ti mangidadaulo a mangar-aramid iti ladawan iti umuna nga atap nga animal ken mangmangted anges iti dayta, a mangiladladawan no kasano a ti Anglo-Americano a Pannakabalin ti Lubong nagbalin a kangrunaan a manangsuportar ken manangted-biag agpadpada iti Liga de Naciones ken ti kasunona, nga isu ti Naciones Unidas. Ti umuna nga atap nga animal ket addaan bilang a naganna, 666. Ti innem ket maysa nga imperpekto a bilang​—agkurang iti daydiay perpekto a pito iti Biblia​—gapuna a ti tallo nga innem isingsingasingna ti nakaayay-ay a kinaimperpekto dagiti natauan nga agtuturay itatta. Nupay pagraraeman dagiti Saksi ni Jehova ti gobierno ken mapagulidananda maipapan iti panagtulnog kadagiti linlinteg ti daga a pagtataenganda, situtured a pagkitakitanda ti panagdayaw “iti atap nga animal” wenno ti ladawanna.​—Apocalipsis 13:3-18; Roma 13:1-7.

Agbutengkay iti Dios​—Apay?

 4. (a) Asino dagiti nakita a sitatakder iti nailangitan a Bantay Sion, ken asinot’ iladladawan dagiti 24 a panglakayen nga adda iti sanguanan ti trono ti Dios? (b) Aniat’ paggidiatan ti “baro a kanta” a kinanta dagiti napulotan ken ti “baro a kanta” a kinanta ti dakkel nga umariwekwek?

⁴ Iti agdama, huston ti panangdakamat kadagidiay nga an-animal! Iti makapabang-ar a panaggidiat, ti maikasiam a sirmata ti mangisentro iti Kordero. Isut’ sitatakder idiay Bantay Sion, a kaduana dagiti 144,000 a sinubbotna kas umuna a bungbunga manipud sangatauan. Nupay dadduma kadagitoy ti adda pay nga agserserbi ditoy daga, iti naespirituan a kaipapananna amin dagiti 144,000 “immasideg[da] iti Bantay Sion ken. . . ti Jerusalem a nailangitan.” (Hebreo 12:22) Maiyanatup met, dagiti 24 a panglakayen ti nakita met ditoy iti sanguanan ti trono ti Dios, ta iladladawanda ti isu met laeng a napulotan a grupo manipud naiduma a panangmatmat​—kas napagungaren ken naipatugawen nga ar-ari ken papadi. Ti 144,000 ket agkankantada ti “baro a kanta.” Nagtaud dayta manipud iti naisalsalumina a kapadasanda a nasubbot manipud iti daga tapno agbalinda nga agtawid ti Pagarian. Ti dakkel nga umariwekwek met ti “agkankanta ken Jehova ti maysa a baro a kanta,” ngem daytoy ti naigiddiat gapu ta agkankantada iti pananginanama a maragpatda ti biag nga agnanayon iti naindagaan a sakop ti Pagarian.​—Apocalipsis 7:9; 14:1-5; Salmo 96:1-10; Mateo 25:31-34.

 5. (a) Ania a damag ti iwarwaragawag ti anghel nga agtaytayab iti nagtatangatangan, ken apay a daytat’ agnanayon? (b) Ania a bilin ti inted ti anghel iti natbag a timek, ken apay a daytat’ maiyanatup unay?

⁵ Itan lumawan ti sirmata. Makakita ni Juan ti sabali manen nga anghel nga agtaytayab iti nagtatangatangan. Ket anian a naragsak a damdamag ti adda nga iwaragawagna! Dayta ti agnanayon a naimbag a damag, ta kaipapanan dayta ti biag nga awan inggana kadagidiay adda iti tunggal nasion ken tribo ken pagsasao ken il-ili nga agtulnog iti Dios iti daytoy oras ti panangukomna. Maigiddiat kadagiti nakabutbuteng nga an-animal a kaisalsalaysay ni Juan, apay ketdin a daytoy nakaskasdaaw a Dios saan koma a maidaydayaw, wen, pagrukbaban? Isu Daydiay namarsua ti langit ken daga. Isut’ Gubuayan dagiti isuamin nga adda, sibibiag ken awan-biagna. Adda napigsa a rason, ngarud, nga ibilin ti anghel iti napigsa unay a tono: “AGBUTENGKAY ITI DIOS KET ISU DAYAWENYO”! Ti timek ti anghel ti nangngegan iti aglawlaw ti lubong, ket ikalkallangogan dagiti Saksi ni Jehova daytoy makatignay nga imbitasion iti intero a sangatauan iti 200 a pagsasao.​—Apocalipsis 14:6, 7; Isaias 45:11, 12, 18.

Pannakarba ti Dakkel a Babilonia

 6. Ania a makapakellaat a damag ti inwaragawag ti sabali pay nga anghel?

⁶ Sabali manen nga anghel ti agparang. Pudno a makapakellaat ti mensahe nga inwaragawagna: “Narba! Narba ti Dakkel a Babilonia, isu a nangpainum kadagiti isuamin a nasnasion iti arak ti pungtot gapu iti pannakikamalalana!” (Apocalipsis 14:8) Asino ti Babilonia a Dakkel, a mabalinna pay a gargarien ti nasnasion ken mangbartek kadakuada?

 7. Ania ti Babilonia a Dakkel, ken kasanot’ itatanor dayta?

⁷ Ti kadaanan a Babilonia ket isut’ ubbog ti ulbod a relihion, a nagsaknap iti intero a daga tapno agbalin a nademoniuan a sangalubongan nga imperio, a maiyanatup pannakamarkana a “Babilonia a Dakkel.” Iti pannagna ti panawen, nagbalin ti Roma a prominente iti dayta a narelihiusuan nga imperio, ta iti sidong idi ti Roma a timpuar ti apostata a Kinakristiano. Ti Roma ket nagtultuloy kas ti sangalubongan a sentro ti Binababilonia a relihion. Nakabatbatad daytoy idi 1986 idi dagiti narelihiusuan a papangulo ti lubong sinungbatanda ti ayab ti papa ti Roma babaen ti pannakitaripnongda kenkuana idiay Assisi, nga asideg ti Roma, tapno agkararagda a maipaay iti Internasional a Tawen ti Talna nga inwaragawag ti Naciones Unidas.

 8. (a) Kasano a ti Babilonia a Dakkel nagsagaba ti dakkel a pannakarba, ken nanipud pay kaano a mapaneknekan daytoy? (b) Aniat’ mangipakpakita a ti karkararag dagiti narelihiusuan a papangulo a maipaay ti talna ket saan a nasungbatan?

⁸ Nupay kasta, nagsagaba ti Babilonia a Dakkel ti dakkel a pannakarba! Daytoy ti napaneknekan nanipud pay 1919 babaen iti agpabpababa a pannakasuportar ti ulbod a relihion iti sangalubongan. Ti ateistiko a komunismo itan ti mangiturturay iti dadakkel a paset ti daga. Dagiti agtutubo itatta ti masursuruanen iti ebolusion, a mangsuppiat iti Sao ti Dios. Idiay Protestante nga Europa mammano a tattao ti mapmapanen iti simbaan, ket ti managdaliasat a papa ti makidangdangadang tapno di masinasina ti imperiona a Katoliko. Dagiti karkararag kadagiti nagadu a didios dagiti relihion ti lubong ti nalawag a saan a masungsungbatan. Ni Ruth L. Sivard ti nagkuna: “Idi 1987 duapulo ket dua a gubat ti mapaspasamak, ad-adu a gubat ngem iti aniaman a napalabas a tawen iti naikor-iten a historia. Ti dagup dagiti natnatayen kadagitoy a gubgubat agingga ita ket saanen a nakurkurang ngem 2,200,000​—ken napardas pay ti panagpangpangatona.”a Anian a napaneknekan ti kinaawan-mamaayna dagiti karkararag idiay Assisi! Ken kaskasdi a tinandaan ti papa ti 1987 nga anibersario dayta a panagtataripnong babaen ti panangaramidna ti medalia a yan ti ladawanna iti maysa a bangirna ken simbolo ti panagtataripnong ti kararag iti sabali a bangir. Kanayon a “kunada, ‘Talna! Talna!’ idinto nga awan ti talna.”​—Jeremias 6:14.

Naibutaktak ti Kinabalangkantis ti Babilonia

 9. Dagiti klero ti Babilonia a Dakkel nagbalinda nga agdindinamag gapu kadagiti ania nga imoral a pamay-an?

⁹ Ti Apocalipsis 14:8 ipakpakitana a ti Babilonia a Dakkel ket maysa a mannakikamalala a babai. Dagiti klerona ket nagdinamag ti kinadakesda kadagiti imoral nga ar-aramidda. Dagiti manag-ebanghelio iti TV ti nanglalat kadagiti arbanda iti ginasgasut a million a doliar, a bayat iti dayta agar-aramidda met iti nakalatlatak nga imoralidad. Ti kinapadi a Katoliko ket mapagduaduaan met ti dakkel, kas ipamatmat ti sumaganad a report idiay The Beacon Journal ti Philadelphia, Pennsylvania, Enero 3, 1988: “Ginasut nga ub-ubbing a minolmolestia dagiti padi a Katoliko idiay Estados Unidos bayat ti napalabas a lima a tawen ti nagsagsagaba kadagiti nakaro unay nga emosional a pannakasugat, kuna dagiti nagannak, sikologo, opisiales ti polisia ken kadagiti abogado a nairaman kadagiti kaskaso.” Ti seksual nga imoralidad ti nangmulit ti reputasion ti adu kadagiti klero ti Babilonia a Dakkel.

10. (a) Idiay Apocalipsis 18:3, aniat’ ipampamatmat ti “pannakikamalala” ti Babilonia a Dakkel? (b) Kas naipakita idiay Apocalipsis 18:24, apay a dagiti klero ti Babilonia a Dakkel nairamanda iti nadagsen a panagbasol iti dara?

¹⁰ “Ti arak ti pungtot gapu iti pannakikamalalana,” nupay kasta, tuktukoyenna a nangnangruna ti panangar-arem ti ulbod a relihion kadagiti agtuturay, a supsuportaran dagiti napolitikaan a kamkampaniada ken gubgubatda, ken pilpilitenna dagiti tattao a mangdayaw ti sumagmamano a nasionalistiko a paset ti atap nga animal. Masansan a masarsarakan dagiti politiko ti relihion kas nausar a kaduada iti pananggun-od kadagiti kaykayatda, kas makita iti concordat wenno pannakitulag ni Hitler iti Vaticano idi 1933 ken ti Guerra Sibil Español idi 1936-39. Bayat ti Gubat Sangalubongan II, nagtignay dagiti klero a Katoliko, Protestante, Buddhist, ken dadduma pay a relihion iti agsumbangir a dasig nagtignayda kas nabartek babaen iti nasionalistiko a kinabarada iti gubat. Makiramanda iti nadagsen a panagbasol kontra iti dara gapu kadagiti pinulpullo a milion a soldado ken sibilian a natnatay iti gubat nanipud 1914. Dagiti klero a nangsuportar kadagiti Fascista ken Nazista ket sibabasolda met iti dara gapu kadagiti Saksi ni Jehova, ken dadduma pay, a napappapatay wenno natnatay kadagiti kampo konsentrasion.​—Jeremias 2:34; Apocalipsis 18:3, 24.

11. (a) Aniat’ nagkitakitan dagiti napulotan a Kristiano ken ti dakkel nga umariwekwek a dayawen? (b) Ania a grande a panginanamaan ti mangted napigsa a rason a pagbutngan ti Dios ken panangted dayaw kenkuana?

¹¹ Bayat ti napalabas a 74 a tawen, dagiti nasungdo a napulotan a Kristiano, agraman ti rumangrang-ay a bilang ti dakkel nga umariwekwek, agtultuloyda nga AGBUTENG ITI DIOS KEN ISU TI DAYAWENDA. Sipipinget ti panagkitakittayo a mangidayaw ti aniaman a nasionalistiko a paset ti atap nga animal. Nagmaditayo a mangidayaw iti ladawan ti animal​—ti Liga de Naciones ken ti NU​—ta nalasintayo a “ti pagarian ni Apotayo [a ni Jehova] ken ni Kristona” laeng ti makaiyeg ti pudpudno a talna ken talged. Determinadotayo a mangsalimetmet “kadagiti bilbilin ti Dios ken ti pammati ni Jesus.” Dayta a panagibtur ti magunggonaan! Dagiti napulotan a Kristiano “a matay iti Apo” ket naibilangda a naragsak, “ta dagiti aramidda sumursurotda kadakuada.” No maipapan ti asinoman iti dakkel nga umariwekwek a mabalin a matay gaput’ pannakaidadanes, manipud sakit, wenno kadagiti aksidente, ti pannakigayyem a tinartaripatoda iti Dios ti mangipasigurado kadakuada iti nasapsapa a panagungar iti dayta “baro a daga” a sosiedad. Dagitoy grande a panginanamaan ti mangted pudno a napigsa a rason nga AGBUTENG ITI DIOS KEN ISU TI DAYAWEN.​—Apocalipsis 11:15, 17; 12:10; 14:9-13; 21:1.

12. Ania a dua a panagani ti mapasamak, ken kaano?

¹² Bayat nga agtultuloy ti panangukom, immawag dagiti anghel iti dua a panagani. Ti immuna nga Agani ket nalawag nga isu ni Jesus, a naitrono iti dayag ti Pagarian nanipud pay 1914, ta isut’ nagsakay iti ulep a puraw, nakoronaan, ken “arigna kas anak ti tao.” Itan, iti aldaw ti Apo, apitennan ti daga, umuna kadagiti napulotan a natda a Kristiano ken kalpasanna ti minilmilion kadagiti dakkel nga umariwekwek. (Idiligyo ti Mateo 25:31-34; Juan 15:1, 5, 16.) Maigiddiat iti dayta, ti maikadua a panagani ket isut’ maipapan “iti ubas ti daga,” a daytat’ maipisok “iti pagpespesan, daydi dakkel a pagdapilan ti pungtot ti Dios.” Isu daytoy ti dusa a maibanag inton Har–Magedon, inton ti managdakdakes, nakagulgulo a natauan a sosiedad ket maparut ken ti nasabidong a bungana ti naibaddebaddekto agingga a dumapo. Sapay koma ta ni Jehova maipadayag iti panangdalusna ti daga iti daytoy makasabidong nga ubas!​—Apocalipsis 14:14-20; 16:14, 16.

“Ni Jehova. . . Nalinteg ken Napudno

13. (a) Iti maikasangapulo a sirmata, ania a kanta ti kankantaen dagiti napagungaren a napulotan, ken ania dagiti sasaona? (b) Kasano a silalawag a naiyebkas dagiti nalinteg a panangukom ti Dios iti daytoy a sirmata?

¹³ Iti maikasangapulo a sirmata ti Apocalipsis, makitatayo manen dagiti nailangitan a paspasamak iti sanguanan ti trono ti Dios. Anian a panagragsak ti maipakuyog iti kaaddana! Dagiti napagungaren a napulotan​—a nagballigida gaput’ PANAGBUTENGDA ITI DIOS KEN PANAGDAYAWDA KENKUANA​—ikankantada ‘ti kanta ni Moises ken ti Kordero’: “Dadakkel ken nakaskasdaawda dagiti ar-aramidmo, O Jehova a Dios, a Mannakabalin-amin. Nalinteg ken napudno dagiti daldalanmo, Sika Ari kadagiti pampannawen. Siasino ti agbutengto kenka, O Jehova, ken saan a mangidaydayawto iti naganmo, ta siksika laeng ti santo? Ta isuamin dagiti nasnasion umaydanto ket agdayawdanto iti sanguanam, ta dagiti ar-aramidmo a nalinteg naiparangarangda.” Pudno a dagiti panangukom ti Dios ket nalinteg ken napudnoda, kas nakalawlawag a naiyebkas iti intero daytoy a sirmata! Dagiti anghel ti nangibuyat ti pito a malukong ti pungtot ti Dios, a nangiturong ti panangurnong ti amin a nasnasion idiay Har–Magedon ken panangipalagip a “ti Babilonia a Dakkel naipalagip iti sanguanan ti Dios”! Pudno a naintiempuan ti ayab nga AGBUTENGKAYO ITI DIOS KEN ISU TI DAYAWENYO.​—Apocalipsis 15:1–16:21.

14. Kadagiti sirmata 11 ken 12, aniat’ prominente a paset ti aramiden ti Babilonia a Dakkel, ken apay a panawenen nga agtalaw kenkuana?

¹⁴ Ti Babilonia a Dakkel umay manen a maipaay iti maulit a pannakadakamat idiay Apocalipsis. Isu manen ti makitatayo kas kangrunaan a pigura kadagiti sirmata 11 ken 12. Isu ti “nagtugaw iti rabaw dagiti adu a dandanum,” a mangiturturay kadagiti tattao ken binartekna ida kadagiti makasabidong, mangulbod a doktrina. Isu a mismo ti nabartek “iti dara dagiti sasanto,” a pinapatayna kadagiti panangidadanes, ket isut’ nagbasol iti dara maipapan “dagiti isuamin a napapatay ditoy daga,” gapu iti tinatraidor a panangkiwkiwkiwna iti gubat. Ti pannakisussusiona kadagiti dadakkel a negosio ken ti panangpespesna ti kuarta kadagiti tattao ti nangiyeg kenkuana kadagiti dakkel nga inaguman a kinabaknang. Ti naalas a pakadamdamaganna isut’ napolitikaan a pannakikamkamalalana, agingga pay iti punto a panangimammaniobrana maipaay iti kinaprominente iti panagsakayna iti animal ti talna ken talged​—ti NU. Ngem dagiti namilitaran a sara dayta met laeng nga animal ti nakasaganan a mamagwalwalang ken mangdadael kenkuana. Tiempo itan nga isut’ panawan dagiti isuamin nga AGBUTENG ITI DIOS KEN MANGIDAYDAYAW KENKUANA, “ta dagiti basbasolna nakagtengda sadi langit, ket ti Dios linagipna dagiti kinadangkesna.”​—Apocalipsis 17:1–18:24.

15. Ti pannakadadael ti dakkel a balangkantis ti mangiturong kadagiti ania a kanta ti panagdaydayaw ken mapasarunuan iti ania pay a naragsak a pasamak?

¹⁵ Ngarud ti pannakadadael ti Babilonia a Dakkel umay kas maysa a nalinteg a panangukom manipud ken Jehova. Kas panangapresiar iti daytoy, umaweng dagiti ‘Aleluia,’ idiay langit ken ditoy daga, nga ipabpabiang ti pannakaisalakan, ti dayag, ken pannakabalin ken Jehova. Dagitoy a koro nga “Idaydayawyo ni Jah, dakayo a tattao!” ti mangiyeb-ebkas ti dakkel a rag-o iti agnanayonen a pannakadadael ti dakkel a balangkantis. Anian ti pannakaigiddiat ti pannakadadaelna iti kararagsakan a pasamak idiay langit​—ti boda ti Kordero, a ni Kristo Jesus, ken ti nobiana, ti 144,000 a matalek a managballigina! Maysa a gumluong a kanta ti panagdayaw ti agpangatonto ken “Jehova a Diostayo, ti Mannakabalin-amin,” wen, “agragrag-otayo ken agbibatayo, ket agdaydayawtayo kenkuana, ta dimteng ti panagboda ti Kordero ket ti asawaenna nakasaganan”!​—Apocalipsis 19:1-10.

16. Sigun iti sirmata 13, ania nga isyu ti maibanagton iti kamaudianan, ken kasano?

¹⁶ Nupay kasta, sakbay a maaramid dayta nailangitan a boda, ipakpakita ti sirmata 13 no kasano a maibanag ti isyu maipapan ti kinasoberano ni Jehova. Ti Ari dagiti ar-arina ken Apo dagiti ap-apona, a ni Jesus, a kinuyog dagiti buybuyot nga anghel, “maipuon iti kinalinteg mangukom ken agaramid iti gubat,” payatennanto ti pagpespesan ti kinaunget ti pungtot ti Dios a Mannakabalin-amin. Amin a matda a paset ti naindagaan a sistema ni Satanas ti marumekrumekto, mapatapukda! (Apocalipsis 19:11-21) Bayat ti panangmatmattayo iti napartak ti idadatengna a panagballigi babaen kadagiti sirmata iti Apocalipsis, pudno nga addaantay amin a rason nga AGBUTENG ITI DIOS KEN ISUT’ DAYAWEN.

Panangidayaw iti Dios iti Agnanayon

17. Aniat’ ipalgak ti sirmata 14 ken 15 maipapan iti naragsak a pagtungpalan amin dagidiay agbuteng iti Dios ken mangidayaw kenkuana?

¹⁷ Dagiti sirmata 14 ken 15 ti Apocalipsis ipalgakna ti naragsak a pagtungpalan amin dagidiay AGBUTENG ITI DIOS KEN AGDAYAW KENKUANA. Itan ta ni Satanas ken dagiti demoniona ket naigarangugongdan iti abut a mangliwengliweng iti sangaribo a tawen, ti nailangitan a boda ti Kordero ken ti nobiana ti maibanagen, ken dagitoy 144,001 nga ar-ari ken papadi agturaydanto iti sangaribo a tawen bayat nga iyegdanton ti sangatauan iti kinaperpekto. Kalpasan ti maudi a pannakasuot, dagidiay agtultuloy nga AGBUTENG ITI DIOS KEN AGDAYAW KENKUANA agballigidanton ken maanamongandanton a maipaay iti biag nga awan inggana. Dagitoy ramanennanto dagiti binilbilion a mapagungar a natnatay, “ti dadakkel ken babassit,” a ti nagnaganda maikarinto a maisurat iti libro ti biag. “Ti maysa a langit a baro ken maysa a daga a baro” ti mangyegton kadagiti di mabilang a bendision iti sangatauan, bembendision a naipasiguro, ta ti Nangaramid “kadagiti isuamin a bambanag a baro,” a ni Jehova kunana: “Isuratmo, ta dagitoy a sasao papatien ken napudnoda.”​—Apocalipsis 20:1–21:8.

18. Sigun iti sirmata 16, aniat’ tampok ti libro ti Apocalipsis?

¹⁸ Ti sirmata 16 iparangna ti tampok ti Apocalipsis. Ania dayta? Daytat’ sirmata ti maysa a siudad. Daytoy a siudad, ti Baro a Jerusalem, ti adayo a naiduma manipud aniaman nga impatakder pay laeng ti tao ditoy daga​—adayo a naiduma manipud Babilonia a Dakkel, ti siudad a ti apostasiana, narugit a moralna, ken napolitikaan a kinabalang-kantisna ti nangibabain iti Dios. Ti nasantuan a siudad ket awan mulitna, nadalus, nasudi. Isut’ nobia ti Kordero, ti katulonganna a mangipaay ti biag nga agnanayon iti lubong ti sangatauan. (Juan 3:16) Isu met laeng a ti ayab a rummuar manipud iti bugos a siudad, ti Babilonia a Dakkel, ti nakapigpigsa, nakalawlawag!​—Apocalipsis 18:4; 21:9–22:5.

19. (a) Ania nga awis ti maipapaay babaen iti klase nobia, ken kasanot’ panangsungbat dagidi naemma? (b) Ti panangtedtayo ti positibo a sungbat iti bilin nga “Agbutengkayo iti Dios ken isu ti dayawenyo” ti mangibunganto ti ania?

¹⁹ Ti dinamiko nga espiritu ni Jehova itednanto babaen ti klase nobia ti napigsa nga awis: “Umaykayo!” Wen, aminyo a naemma nga agtarigagay ti biag nga awan inggana iti sangalubongan a paraiso, umaykayo iti “karayan ti danum ti biag,” nga awatenyo amin a sagana ni Jehova babaen ken Kristo ken ti nobiana a maipaay iti pananggun-od ti biag nga agnanayon! Anian a nakaskasdaaw a namnama​—natauan a biag iti kinaperpekto iti paraiso a daga! Daytanto ti gunggona kadagiti adu a mangted ti positibo a sungbat iti bilin nga: “AGBUTENGKAYO ITI DIOS KEN ISU TI DAYAWENYO”!​—Apocalipsis 22:6-21.

[Dagiti Footnote]

KASANOT’ PANANGSUNGBATYO?

□ Ania a naitiempuan a bilin ti adda para kadatayo idiay sirmata dagiti dua nga atap nga an-animal?

□ Kasanot’ rebbeng a panangsungbattayo iti proklamasion ti anghel nga agtaytayab iti nagtatangatangan?

□ Kasano a ti Babilonia a Dakkel nairaman iti pannakikamalala, ken kasanot’ panangikuenta daytoy dagidiay agbuteng iti Dios?

□ Kasano a ti daga maani bayat ti aldaw ti Apo?

□ Ania a naragsak a paspasamak ti mangserra ti Apocalipsis, ken kasanot’ mabalin a pannakiraman ti ili ti Dios iti dayta?

[Ladawan iti panid 23]

Daytoy medalion a bronse ti nairuar idi Oktubre 1987 iti anibersaryo ti Kararag Maipaay iti Talna idiay Assisi. Iti maysa a rupana isut’ ladawan ti “Santo Papa” nga iti aglawlawna adda a naisurat ti: “John Paul II Pontifex Maximus” ken ti petsa. Iti sabali a rupana ni “Saint Francis” umaw-awag ti “Talna ti Sagut ti Dios” idiay Assisi Prayer for Peace Meeting