Ania ti Babilonia a Dakkel?

Sungbat ti Biblia

Deskribiren ti libro nga Apocalipsis ti “maysa a babai” kas “agdindinamag a balangkantis,” ken ti naganna ket “maysa a misterio: ‘Babilonia a Dakkel.’” (Apocalipsis 17:1, 3, 5) Irepresentar daytoy a babai ti amin nga ulbod a relihion iti intero a lubong. Sinuktan dagitoy a relihion ti kinapudno maipapan iti Dios iti kinaulbod.a (Roma 1:25) Nupay adu ti nagdudumaan dagita a relihion, iyad-adayoda dagiti tattao manipud iti panagdaydayaw iti pudno a Dios a ni Jehova.—Deuteronomio 4:35.

Dagiti pakabigbigan ti Babilonia a Dakkel

1. Ti Babilonia a Dakkel ket maysa a simbolo. Ti libro nga Apocalipsis ket naglaon “kadagiti mangirepresentar a ladawan,” isu a maibagatayo a ti Babilonia a Dakkel ket saan a literal a babai no di ket maysa a simbolo. (Apocalipsis 1:1) Maysa pay, isu ket “nakatugaw iti adu a danum,” a mangirepresentar kadagiti “puli ken bunggoy ken nasion ken lengguahe.” (Apocalipsis 17:​1, 15) Saan a kabaelan nga aramiden dayta ti literal a babai.

2. Ti Babilonia a Dakkel irepresentarna ti maysa nga internasional nga organisasion. Isu ket maawagan “dakkel a siudad nga addaan iti pagarian a mangiturturay kadagiti ari ti daga.” (Apocalipsis 17:18) Ngarud, internasional ti kalawa ti saklawen ken impluensiana.

3. Ti Babilonia a Dakkel ket relihion, saan a politika wenno komersio. Ti nagkauna a Babilonia ket dakkel a narelihiosuan a siudad, a nalatak gapu iti espiritismo nga aramidna kas iti ‘panag-engkanto’ ken ‘panagkulam.’ (Isaias 47:​1, 12, 13; Jeremias 50:​1, 2, 38) Kinapudnona, sadiay ti ayan ti palso a relihion a kumonkontra iti pudno a Dios a ni Jehova. (Genesis 10:​8, 9; 11:​2-4, 8) Sipapangas nga itantan-ok dagiti agtuturay ti Babilonia ti bagbagida iti ngatuen ni Jehova ken iti panagdaydayaw kenkuana. (Isaias 14:​4, 13, 14; Daniel 5:​2-4, 23) Ti Babilonia a Dakkel ket pagaammo met kadagiti ‘aramid a konektado iti espiritismo,’ a mangipakita a dayta ket narelihiosuan nga organisasion.​—Apocalipsis 18:23.

   Saan a napolitikaan nga organisasion ti Babilonia a Dakkel gapu ta agsangit “dagiti ari iti daga” iti pannakadadaelna. (Apocalipsis 17:​1, 2; 18:9) Saan met a nabileg a komersio, agsipud ta isu ket iduma ti Biblia kadagiti “komersiante.”​—Apocalipsis 18:11, 15.

4. 

   Photograph taken by courtesy of the British Museum

   Ti Babilonia a Dakkel ket maibagay iti pannakailadawan ti palso a relihion. Imbes a suruan ti palso a relihion dagiti tattao nga umadani iti pudno a Dios a ni Jehova, iturongna ketdi ida nga agdaydayaw kadagiti didiosen. Awagan ti Biblia daytoy kas ‘panagbalangkantis iti naespirituan’ wenno naespirituan a prostitusion. (Levitico 20:6, ftn.; Exodo 34:15, 16) Ti pammati a kas iti Trinidad ken immortal a kararua ken dagiti aramid a kas iti panagusar kadagiti imahen iti panagdaydayaw ket nangrugi iti nagkauna a Babilonia ken agtultuloy a nagsaknap iti palso a relihion. Paglalaoken met dagitoy a relihion ti panagdaydayawda ken ti panagayat iti lubong. Tukoyen ti Biblia daytoy a kita ti di kinamatalek kas naespirituan a pannakikamalala.—Santiago 4:4.

   Ti kinabaknang ken kinaparammag ti palso a relihion ket kapada ti panangiladawan ti Biblia iti Babilonia a Dakkel, a “nakabado ti babai iti purpura ken nalabaga ken nakaalahas iti balitok, agkakangina a batbato, ken perlas.” (Apocalipsis 17:4) Ti Babilonia a Dakkel ti pagtataudan “ti makarimon a bambanag iti daga,” wenno pannursuro ken ar-aramid a mangibabain iti Dios. (Apocalipsis 17:5) Dagiti miembro ti palso a relihion ket “dagiti puli ken bunggoy ken nasion ken lengguahe” a mangsupsuporta iti Babilonia a Dakkel.—Apocalipsis 17:15.

Ti Babilonia a Dakkel ti manungsungbat iti ipapatay ti “amin a napapatay ditoy daga.” (Apocalipsis 18:24) Iti intero a pakasaritaan, ti palso a relihion saanna laeng a sugsugsogan dagiti gubat ken rubrubroban dagiti aramid ti terorismo, no di ket saanna pay nga isursuro kadagiti tattao ti kinapudno maipapan ken Jehova, ti Dios ti ayat. (1 Juan 4:8) Nagbanag daytoy iti adu a panagibukbok iti dara.

Kasano ti panangmatmat ti Dios iti ulbod a relihion?

Iti panangmatmat ti Dios, ‘nakadanonen idiay langit ti kaadu ti basol’ ti Babilonia a Dakkel. (Apocalipsis 18:4, 5) Kagurgura ti Dios ti ulbod a relihion ta saan nga umiso ti isursurona ken saan a nasayaat ti panangtratona kadagiti pasurotna.

Anianto ti mapasamak iti Babilonia a Dakkel?

Ibaga ti Biblia a “sinentensiaanen ti Dios a madusa” ti Babilonia a Dakkel. (Apocalipsis 18:20) Babaen kadagiti simbolo, impakpakauna ti Biblia a dadaelento ti Dios ti amin nga ulbod a relihion. (Apocalipsis 18:8) Tignayennanto ti maysa a nabileg nga organisasion nga irepresentar ti maysa a nalabaga a narungsot nga animal a mangraut ken interamente a mangdadael iti amin nga ulbod a relihion. (Apocalipsis 17:16, 17) “Kasta ti napardas a pannakaitapuak ti Babilonia a dakkel a siudad, ket pulos a dinto masarakanen.” (Apocalipsis 18:21) Amin ngarud a mayat a mangparagsak iti Dios ket masapul a ‘rummuar iti tengngana’ ket umadayoda iti ulbod a relihion.—2 Corinto 6:14-17.