Kapitulo 24

Nadayag a Panagballigi ti Panggep ni Jehova

 1, 2. (a) Aniat’ panggep ni Jehova maipapan kadagiti intelihente a parparsuana? (b) Asino dagiti nairaman iti nagkaykaysa a pamilia dagiti managdaydayaw ti Dios? (c) Maipapan iti daytoy, ania a personal a saludsod ti maikari ti panangusig?

AMIN nga intelihente a parsua nagkaykaysan iti pudpudno a panagdaydayaw ken aminda tagtagiragsakendan ti nadayag a wayawaya dagiti annak ti Dios​—dayta ti masirib ken naayat a panggep ni Jehova. Isu met dayta ti napasnek a tarigagay amin a managayat ti kinalinteg.

² Rinugian ni Jehova a tungpalen daytoy engrande a panggepna idi rinugianna met ti ar-aramidna ti panamarsua. Ti immuna a panangparsuana ket isu ti Anakna, “nga isu ti raniag ti dayagna ken ti napaypayso a ladawan ti kinadiosna.” (Heb. 1:1-3) Daytoy a maysa ti naisalsalumina, ta isut’ pinarsua ti Dios nga agmaymaysana. Babaen kenkuana dagiti dadduma nga annak ti napaaddada metten​—umuna, dagiti anghel idiay langit, kalpasanna ti tao ditoy daga. (Job 38:7; Luc. 3:38) Amin dagitoy nga annak ti nangbukel ti maymaysa a sapasap a pamilia. Kadakuada amin ni Jehova ti Diosda, ti maymaysa laeng a pagdayawanda. Isu ti Sapasap a Soberano. Isu met ti naayat nga Amada. Isu met aya ti Amayo, ken maysakay met aya kadagiti annakna? Anian a nagpateg a pannakirelasion dayta!

 3. (a) Apay nga awan kadatayo ti annak ti Dios idi maiyanak? (b) Ngem aniat’ naayat a sagana ti inaramid ni Jehova agpaay kadagiti annak ni Adan?

³ Nupay kasta, masapul a sanguentayo ti kinapudno nga idi nakondenar ken patay dagiti immuna a natauan a nagannaktayo kas sipapakinakem a managbasol, naparuarda manipud Eden ket linaksid ida ti Dios. Nagsardengdan a paset ti sapasap a pamilia ni Jehova. (Gen. 3:22-24; idiligyo iti Deuteronomio 32:4, 5.) Amintayo, agsipud ta putotnatayo amin ni managbasol nga Adan, naipasngaytay amin nga addaan pagannayasan ti basol. Yantangay datayo ket annak dagiti nagannak a naparuar manipud pamilia ti Dios, saantayon a maikuna nga annaknatayo ti Dios gapu laeng iti natauan a pannakaiyanaktayo. Ngem ammo ni Jehova a dadduma kadagiti kaputotan ni Adan ti agayatto ti kinalinteg, ket siaayat a nangaramid ti probision tapno maragpat dagitoy ti nadayag a wayawaya dagiti annak ti Dios.​—Roma 8:20, 21.

Ti Naparaburan a Saad ti Israel

 4. (a) Maibatay iti ania a dagiti Israelitas ket “annak” ida ti Dios? (b) Aniat’ di kaipapanan daytoy?

⁴ Agarup 2,500 a tawtawen kalpasan ti pannakaparsua ni Adan, indanon manen ni Jehova kadagiti dadduma a tattao ti pribilehio a maaddaan ti pannakirelasion kenkuana kas dagiti annakna. Maitunos iti tulagna ken Abraham, pinili ni Jehova ti Israel kas agbalin nga ilina. Gapuna, ken Paraon iti Egipto, inayabanna ti Israel kas “annakko.” (Ex. 4:22, 23; Gen. 12:1, 2) Iti kamaudiananna intedna iti Israel ti Lintegna idiay Bantay Sinai, binnuangayna daytoy nga ili kas maysa a nasion ket inusarna ida maipapan iti panggepna. Manipud nasional a pannakaawat, agsipud ta isuda ti “naisalsalumina a kukua” ni Jehova, gapuna masasaoda kas “annak” ti Dios. (Deut. 14:1, 2; Isa. 43:1) Kasta met, gaput’ naisangsangayan a pannakilangenlangenna kadagiti sumagmamano nga indibidual dayta a nasion, sasawen ni Jehova ida kas annakna. (1 Cron. 22:9, 10) Daytoy a takderda ti naibatay iti pannakitulagda iti Dios. Ngem, saanna kayat a sawen, a tinagiragsakda ti nadayag a wayawaya nga adda idi ken Adan kas anak ti Dios. Kaskasdi a nakayawanda pay laeng iti basol ken ipapatay.

 5. Kasano a napukaw ti Israel ti naisangsangayan a takderna iti Dios?

⁵ Nupay kasta, kas annak addaanda ti naparaburan a kasasaad iti Dios. Addaanda met iti responsabilidad a pagraeman ti Amada ken agtrabaho a maitunos iti panggepna. Impaganetget ni Jesus ti kinapateg ti panangtungpalda iti dayta nga obligasion​—saan laeng a babaen ti panagkunada iti Dios kas Amada, no di ket ‘paneknekanda ti bagbagida’ kas dagiti annakna. (Mat. 5:43-48; Mal. 1:6) Ngem, dagiti Judio kas maysa a nasion ti napaayda iti daytoy. Gapuna, bayat ti maudi a tawen ti naindagaan a ministerio ni Jesus, idi dagiti Judio a mangisiksikat iti ipapatay ni Jesus ti nagkuna, “Adda maymaysa nga Amami, nga isu ti Dios,” sititibker nga intudo ni Jesus a dagiti tigtignayda ken ti espiritu nga impakitada ti mangilibak iti dayta a panagkunada. (Juan 8:41, 44, 47) Idi 33 K.P. ginupeden ti Dios dayta a Linteg ti tulag, ket ti nakaibatayan dayta espesial a pannakirelasion a tinagiragsak ti Israel ti nagpatinggan. Kaskasdi, saan a nagpatingga ni Jehova a naaddaan iti sangatauan dagidiay aw-awatenna kas annakna.

Pinagkaykaysa ni Jehova ti Ilina

 6. Ania nga “administrasion” ti insalaysay ni Pablo idiay Efeso 1:9, 10, ken ania ti panggepna?

⁶ Kadagiti Kristiano idiay Efeso nagsurat ni apostol Pablo maipapan ti programa ni Jehova a pagkaykaysaen ti ilina​—ti urnos ti Dios a dagidiay addaan pammati agbalinda kas dinungdungngo a kamkameng ti sangakabbalayanna, a kunkunana: “[Ti Dios] impakaammona kadatayo ti palimed ti nakemna. Kas iti pagayatanna pinanggepna kenkuana a maipaay iti pannakaisagana ti maysa nga administrasion [ti pannakaipapagna ti sangakabbalayan] iti pannakatungpal dagiti pannawen, tapno mapagkaykaysa dagiti amin a bambanag ken Kristo, dagiti adda sadi langit ken dagiti met adda iti rabaw ti daga.” (Efe. 1:9, 10) Daytoy nga “administrasion” ti naisentro ken Jesu-Kristo. Babaen kenkuana, maiyeg ti tattao iti naanamongan a kasasaad iti imatang ti Dios​—a dadduma addaan ti namnama a maaddanto met idiay langit; ti dadduma, ditoy daga​—a makipagserbi a sangsangkamaysa a kadua dagiti angheliko nga annak ti Dios a nasungdo ken ni Jehova.

 7. Ania “dagiti amin a bambanag nga adda sadi langit,” ket aniat’ kaipapanan ti pannakaurnongda kadakuada?

⁷ Umuna, nangrugi idi Pentecostes ti 33 K.P., naited ti atension “kadagiti bambanag nga adda sadi langit,” kayatna a sawen, dagidiay makipagtawid ken Kristo iti nailangitan a Pagarian. Gaput’ pammatida iti pateg ti daton ni Jesus, napalintegda iti imatang ti Dios. (Roma 5:1, 2) Kalpasanna “naiyanakda a nabaliwan,” wenno naipasngayda kas annak ti Dios nga addaan namnama ti nailangitan a biag. (Juan 3:3; 1:12, 13) Kadagitoy kas naespirituan a nasion nangaramid ti Dios ti baro a tulag. Idi agangay, nairamanen agpadpada dagiti Judio ken Gentil, ket ti dagupdanto dagitoy ti 144,000.​—Gal. 3:26-29; Apoc. 14:1.

 8. Kasanot’ pannakaidilig ti relasion dagiti agtawid ti Pagarian iti Dios kadagiti Judio nga adda iti sidong ti Linteg ni Moises?

⁸ Nupay addada pay nga imperpekto iti lasag, ti natda dagita nga agtawid iti nailangitan a Pagarian ti mangtagtagiragsak iti maysa a napateg ken nasinged a pannakirelasion iti Ama. Maipapan iti daytoy, nagsurat ni Pablo: “Ket agsipud ta dakay dagiti annak, imbaon ti Dios ti espiritu ti Anakna kadagiti puspusotayo ket impukkawna: ‘Abba, Ama!’ Iti kasta, saanka nga adipenen no di ket anak; ket no anak, agtawid ngarud iti Dios.” (Gal. 4:6, 7) Dayta pagsasao nga Aramaiko nga “Abba” kayatna a sawen “ama,” ngem daytat’ maysa a nalailo unay a langa ti panangawag​—daydiay us-usaren ti bassit nga ubing iti amana. Gapu iti kinatan-ok ti daton ni Jesus ken iti mismo a di kaikarian a kinamanangaasi ti Dios, tagtagiragsaken dagitoy a napulotan ti espiritu a Kristiano ti pannakirelasion iti Dios a nasingsinged pay ngem iti aniaman a posible para kadagiti imperpekto a tattao iti sidong ti Linteg. Nupay kasta, ti adda iti masakbayanda ti ad-adda pay a nakaskasdaaw.

 9. Aniat’ kaipapanan ti naan-anay a pannakaragpatda ti panagbalinda kas annak?

⁹ No agmatalekda agingga ken patay, awatendanto ti naan-anay a kaitungpalan ti panagbalinda kas annak babaen iti pannakapagungarda iti imortal a biag kadagiti langlangit. Sadiay addaandanto ti pribilehio nga agserbi a sangsangkamaysa iti mismo nga presensia ni Jehova a Dios. Adda laengen nagbassit a bilang dagitoy nga annak ti Dios ti adda ditoy daga.​—Roma 8:14, 23; 1 Juan 3:1, 2.

Panangurnong “Dagiti Bambanag nga Adda iti Rabaw ti Daga”

10. (a) Ania “dagiti bambanag nga adda iti rabaw ti daga,” ken nanipud pay kaano ti pannakaurnongda a maipaay iti panagkaykaysa iti panagdaydayaw? (b) Aniat’ relasionda ken ni Jehova?

¹⁰ Ti isu met laeng nga “administrasion” a namagbalin a posible para kadagiti tattao a maurnong iti sangakabbalayan ti Dios nga addaan panggep iti nailangitan a biag ti nangiturong met ti atension “kadagiti amin a bambanag nga adda iti rabaw ti daga.” Nangnangruna nanipud 1935 K.P. a dagiti tattao nga addaan pammati iti daton ni Kristo ti naurnongdan nga addaan namnama ti biag nga agnanayon ditoy daga. Sangsangkamaysa a kadua dagiti natda ti klase napulotan, intantan-okda ti nagan ni Jehova ken kasta met ti panagdaydayaw kenkuana. (Sof. 3:9; Isa. 2:2, 3) Buyogen ti nauneg a panagraem uray dagitoy met, aw-awaganda ni Jehova kas “Ama,” a bigbigbigenda nga isut’ Gubuayan ti biag, ket sipapasnek a pagregreggetanda nga isarsarming dagiti kualidadna kas namnamaenna nga aramiden dagiti annakna. Tagtagiragsakenda ti naanamongan a takder iti sanguananna gaput’ pammatida iti naiparukpok a dara ni Jesus. (Mat. 6:9; Apoc. 7:9, 14) Ngem ammoda a ti ragsak ti naan-anay a pannakabigbigdanton kas annak ti Dios ti adda pay iti masanguanan para kadakuada.

11. (a) Aniat’ salsalimetmetan ti Roma 8:19-21 a kari para iti sangatauan? (b) Ania ti “pannakaiparangarang dagiti annak ti Dios” a sigagagar nga ur-urayenda?

¹¹ Kas naipakita idiay Roma 8:19-21, magagaranda nga ur-urayen “ti pannakaiparangarang dagiti annak ti Dios,” agsipud ta ti panawen umayton inton dagitoy a sangaparsuaan a tattao “maluk-atanto iti pannakaadipen ti panagrupsa.” Dayta a “pannakaiparangarang” ti dumtengto inton dagiti tattao ditoy daga makakitadanto ti ebidensia a dagiti napulotan ti espiritu nga annak ti Dios a naragpatdan ti nailangitan a gunggonada ket agtignaydanton kas katulongan ti naipadayag nga Apoda, a ni Jesu-Kristo. Maiparangarangto daytoy iti pannakadadael ti intero a dakes a sistema dagiti bambanag, a sarunuento dagiti bembendision ti Sangaribo a Tawen a Panagturay ni Kristo inton dagitoy nga “annak ti Dios” makiramandanto kenkuana kas ar-ari ken papadi.​—Apoc. 2:26, 27; 20:6.

12. Kalpasan ti dakkel a rigat, anianto a kanta ti panagdaydayaw ti pakitiponan dagiti naballigi a napulotan iti espiritu nga annak ti Dios, ket aniat’ kaipapanan dayta?

¹² Anian a makaparagsak inton ti dakkel a rigat ket naglabaston ket dagidiay nga annak ti Dios a nakipagkaykaysa ken Kristo itipondanton ti timtimekda nga agdayaw iti Dios, a sirarag-o nga ipukkawdanto: “Dadakkel ken nakaskasdaawda dagiti ar-aramidmo, O Apo Jehova, a Mannakabalin-amin. Nalinteg ken napudno dagiti daldalanmo, Sika Ari kadagiti pampannawen. Siasino ti di agbutengto kenka, O Jehova, ken saan a mangidaydayawto iti naganmo, ta siksika laeng ti nasungdo? Ta isuamin dagiti pagpagarian umaydanto ket agdayawdanto iti sanguanam, ta dagiti ar-aramidmo a nalinteg naiparangarangda”! (Apoc. 15:3, 4) Wen, amin a sangatauan, a buklen amin a tattao manipud amin dagiti dati a nasnasion, agkaykaysadanton iti panagdaydayaw iti pudno a Dios. Uray pay dagidiay adda iti tanem a pakalaglagipan mapagungardanton ket maikkandanto ti gundaway a mangitipon ti timtimekda a pagdaydayaw ken ni Jehova.

13. Ania a nakaskasdaaw a wayawaya ti tagiragsakento nga insigida dagiti makalasat iti dakkel a rigat?

¹³ Ni Satanas a Diablo ket saanton nga isu ti “dios daytoy a sistema dagiti bambanag.” Dagiti managdaydayaw ken Jehova ditoy daga ket saandanton a pakidangadangan ti dakes nga impluensiana. (2 Cor. 4:4; Apoc. 20:1-3) Ti ulbod a relihion ket saannanton a pardayaen ti naayat a Diostayo ken agserbi kas mamagsisina nga impluensia iti natauan a sosiedad. Dagiti ad-adipen ti pudno a Dios ket didanto metten aglak-am ti kinaulpit ken pananggunggundaway manipud im-ima dagiti tattao nga agsasaad iti gobierno. Anian a nakaskasdaaw a wayawaya ti kaipapananto dayta kadagiti makalasat iti dakkel a rigat!

14. Babaen iti ania a pamay-an a mawayawayaandanto manipud basol ken amin dagiti epektona?

¹⁴ Kas ti “Kordero ti Dios a mangikkat ti basol ti lubong,” iyaplikarton ni Jesu-Kristo ti pateg ti datonna tapno maukasen amin a napalpalabas a basbasol ti sangatauan. (Juan 1:29) Ditoy daga, idi inyebkas ni Jesus ti pannakapakawan ti basbasol ti maysa a tao, pinaimbagna met daydiay napakawan kas pammaneknek iti dayta. (Mat. 9:1-7) Umasping iti dayta, manipud langit simimilagro a paimbagennanto metten dagiti bulsek, tuleng, umel, dagidiay pawad, dagiti masaksakit ti isipda ken dagidiay addaan dadduma pay a saksakit. Agin-inut, babaen ti matalek a panangituntunosda ti bagbagida kadagiti nalinteg a daldalan ti Dios, amin dagiti situtulok ken natulnog a tattao ti naan-anayton a maikkat ti pigsa ti “linteg ti basol” kadagiti bagbagida tapno iti amin a tigtignayda, pampanunotda ken tartarigagay ti puspusoda makaay-ayonton agpadpada kadakuada ken kasta met iti Dios. (Roma 7:21-23; idiligyo iti Isaias 25:7, 8 ken Apocalipsis 21:3, 4.) Sakbay ti panagpatingga ti Milenio, natulongandanton a makagteng iti naan-anay a natauan a kinaperpekto. Naan-anay a nawayawayaandanton manipud basol ken amin dagiti nasasaem nga epektona. Isarmingdanto metten a siuumiso ti ‘ladawan ken kaasping ti Dios’ iti tengnga ti naindagaan a Paraiso a mangsaklaw iti intero a globo.​—Gen. 1:26.

15. Iti panagpatingga ti Milenio, ania nga aksion ti alaen ni Kristo, ket ania ti panggepna?

¹⁵ Inton naiyegen ni Kristo ti sangatauan iti kinaperpekto, isublinanto metten ken Amana ti kinaturay a naipataw kenkuana nga agpaay iti daytoy a trabaho. Kas naipadto idiay 1 Corinto 15:28: “Ket inton dagiti isuamin a banag paiturayandan kenkuana [ti Anak], uray ti Anak met laeng paiturayanton iti daydiay nangikabil iti babaen ti panagturayna kadagiti isuamin a banag, tapno ti Dios isu koma amin kadagiti isuamin.”

16. Ania itan ti pakaikabilan amin a naperpekto a sangatauan, ken apay?

¹⁶ Itan ti naperpekton a sangatauan maikkanto metten ti gundaway a mangidemostra a ti di agbalbaliw a pilida ket isut’ agserbi iti daydiay kakaisuna a sibibiag ken pudno a Dios iti agnanayonen. Gapuna, sakbay nga ibilangnanto idan kas annakna babaen ken Jesu-Kristo, ikabilto amin ni Jehova ti naperpekton a sangatauan iti naan-anay, maudi a panangsubok. Maibulosto ni Satanas ken dagiti demoniona manipud abut a mangliwengliweng. Awanto ti ibunga daytoy a manayon a pakadangranan dagidiay pudpudno nga agayat ken Jehova. Ngem asinoman a sisusukir a palubosanda ti bagbagida a paiturong iti panagsukir manen ken ni Jehova isudanto ti madadael iti agnanayonen a kadua ti orihinal nga umaalsa ken dagiti demoniona.​—Apoc. 20:7-10.

17. Kas kaitungpalan ti panggep ni Jehova, anianto manen a kasasaad ti addanto kadagiti amin a nasaririt a sangaparsuaan?

¹⁷ Itan siaayat nga awatenen ni Jehova kas annakna babaen ken Kristo amin a naperpekton a tattao a natakderanda ti maudi, ken naan-anay a suot. Iti kasta makiramandanton a naan-anay iti “nadayag a wayawaya dagiti annak ti Dios.” (Roma 8:21) Iti kamaudiananna nagbalinda met laengen a paset ti nagkaykaysa, sapasap a pamilia ti Dios, a kadakuada amin ni Jehova ti maymaysa a Dios iti agnanayon, ti Sapasap a Soberano, ken ti naayat nga Amada. Kalpasanna amin dagiti nasaririt a sangaparsuaan ni Jehova, idiay langit ken ditoy daga, ti maminsanto manen nagkaykaysadan iti panangidaydayaw iti maymaysa a pudno a Dios.

Repaso a Pagsasaritaan

● Sakbay ti iyaalsa idiay Eden, ania ti adda a pannakirelasion amin dagiti managdaydayaw ken Jehova kenkuana?

● Aniat’ naipabaklay a responsabilidad kadagidiay annak ti Dios?

● Asino itatta dagiti annak ti Dios? Asinonto pay ti agbalin nga annak ti Dios, ket kasano ti pannakainaig daytoy iti panggep ni Jehova maipapan iti nagkaykaysa a panagdaydayaw?