Ti Sao ni Jehova Nabiag

Dagiti Tampok iti Libro nga Apocalipsis​—II

ANIA ti masakbayan dagidiay agdaydayaw ken saan nga agdaydayaw ken Jehova a Dios? Ania ti mapasamakto kenni Satanas ken kadagiti demoniona? Ania dagiti bendision a tagiragsakento ti natulnog a sangatauan bayat ti Sangaribu a Tawen a Panagturay ni Kristo? Dagiti sungbat kadagitoy ken iti dadduma pay a napateg a salsaludsod ket naipalgak iti Apocalipsis 13:1–22:21.a Masarakan kadagitoy a kapitulo ti maudi a 9 kadagiti 16 a nasirmata ni apostol Juan idi arinunos ti umuna a siglo K.P.

Insurat ni Juan: “Naragsak daydiay mangbasa a sipipigsa ken dagidiay dumngeg iti sasao daytoy a padto, ken mangtungpal iti bambanag a naisurat iti dayta.” (Apoc. 1:3; 22:7) Ti panangbasa ken panangyaplikar kadagiti maadaltayo iti libro nga Apocalipsis impluensiaanna ti pusotayo, pabilgenna ti pammatitayo iti Dios ken iti Anakna a ni Jesu-Kristo, ken ipaayannatayo iti naraniag a namnama iti masanguanan.b​—Heb. 4:12.

MAIBUKBOK TI PITO A MALUKONG TI PUNGTOT TI DIOS

(Apoc. 13:1–16:21)

“Nagpungtot dagiti nasion,” kuna ti Apocalipsis 11:18, ‘ket dimteng ti bukod a pungtot ti Dios, ken ti naituding a tiempo tapno dadaelenna dagidiay mangdaddadael iti daga.’ Tapno maawatantayo no apay, ti maikawalo a sirmata ipakitana ti aktibidad ti “atap nga animal . . . [nga] addaan sangapulo a sara ken pito nga ulo.”​—Apoc. 13:1.

Iti maikasiam a sirmata, nakita ni Juan “ti Kordero nga agtaktakder iti Bantay Sion” a kaduana ti “sangagasut uppat a pulo ket uppat a ribu . . . Nagatang dagitoy manipud iti sangatauan.” (Apoc. 14:1, 4) Kalpasanna, simmaruno ti pakaammo dagiti anghel. Iti simmaganad a sirmata, nakita ni Juan ti “pito nga anghel nga addaan pito a pannaplit.” Nabatad a ni Jehova a mismo ti nangbilin kadagitoy nga anghel nga ibukbokda “ti pito a malukong ti unget ti Dios” iti nadumaduma a paset ti lubong ni Satanas. Naglaon dagiti malukong kadagiti waragawag ken pakdaar mainaig iti panangukom nga iwayat ti Dios. (Apoc. 15:1; 16:1) Daytoy dua a sirmata mangtedda kadagiti detalye maipapan kadagiti kanayonan a panangukom ti Pagarian mainaig iti maikatlo nga ay-ay ken iti pannakapuyot ti maikapito a trumpeta.​—Apoc. 11:14, 15.

Sungbat Kadagiti Nainkasuratan a Saludsod:

13:8​—Ania ti “lukot ti biag ti Kordero”? Piguratibo daytoy a lukot a naglaon laeng iti nagan dagidiay makipagturay ken Jesu-Kristo iti nailangitan a Pagarianna. Karaman iti dayta ti nagan dagiti napulotan a Kristiano nga adda pay laeng ditoy daga, a mangnamnama iti nailangitan a biag.

13:11-13​—Kasano a ti atap nga animal nga addan iti dua a sara ket agtigtignay a kas dragon ken pababaenna ti apuy manipud langit? Ti kasla dragon a panagsao ti dua ti sarana nga atap nga animal​—ti Anglo-Americano a Kabilgan a Turay ti Lubong​—ipamatmatna nga agusar daytoy iti pamutbuteng, panangpilit, ken kinaranggas tapno awaten dagiti tattao ti turayna. Pagtinnagenna ti apuy manipud langit, iti kasta, agpammarang a kasla propeta a nangparmek kadagiti puersa ti kinadakes iti dua a gubat sangalubongan a napasamak iti maika-20 a siglo ken nagballigi maibusor iti Komunismo.

16:17​—Ania ti “angin” a nakaibukbokan ti maikapito a malukong? Ti “angin” isimbolona ti sataniko a panagpampanunot, “ti espiritu [pagannayasan ti panunot] nga agtigtignay ita iti annak ti kinasukir.” Daytoy a makasabidong nga angin ti ang-angsen ti intero a dakes a sistema ti bambanag ni Satanas.​—Efe. 2:2.

Dagiti Masursurotayo:

13:1-4, 18. “Maysa nga atap nga animal,” a mangisimbolo kadagiti gobierno ti tao, ti rimkuas “manipud iti baybay,” ti nariribuk a kagimongan ti tao. (Isa. 17:12, 13; Dan. 7:2-8, 17) Daytoy nga atap nga animal, a pinataud ken inikkan ni Satanas iti pannakabalin, ket addaan iti numero nga 666, a mangipaganetget iti nakaro a kinaimperpekto. Makatulong ti pannakaammotayo no ania daytoy nga atap nga animal tapno ditay suroten buyogen ti panagamanga wenno dayawen a kas iti ar-aramiden ti kaaduan a tattao.​—Juan 12:31; 15:19.

13:16, 17. Iti laksid dagiti pakarigatan nga itden dagiti inaldaw nga aktibidadtayo, kas iti ‘panaggatang wenno panaglako,’ ditay koma itulok a ti atap nga animal ti mangkontrol iti biagtayo. Ti ‘panagpamarka iti atap nga animal iti ima wenno mugingtayo’ kaipapananna nga ipalpalubostayo nga isu ti mangkontrol kadagiti tignay wenno pampanunottayo.

14:6, 7. Ti pakaammo ti anghel isurona kadatayo a masapul a sigaganat nga iwaragawagtayo ti naimbag a damag ti naipasdek a Pagarian ti Dios. Nasken a tulongantayo dagiti iyad-adalantayo iti Biblia a mangpatanor iti nadayaw a panagbuteng iti Dios ken mangipadayag kenni Jehova.

14:14-20. Inton naan-anay a maburas “ti anien iti daga,” wenno dagidiay maisalakan, tiempon tapno ti anghel ipuruakna dagiti naburas nga “ubas ti daga” iti “dakkel a pagpespesan iti ubas ti unget ti Dios.” Dayta nga ubas​—ti rinuker a sistema ti gobierno ni Satanas a mangiturturay iti sangatauan agraman “dagiti raay” ti dakes a bungana​—ket madadaelto iti agnanayon. Masapul a determinadotayo a di agpaimpluensia iti ubas ti daga.

16:13-16. Dagiti “narugit a naipaltiing nga ebkas” isimboloda dagiti sataniko a propaganda a nairanta tapno dagiti ar-ari ditoy daga ket agtalinaed a bumusor ken Jehova inton maibukbok ti pito a malukong ti pungtot ti Dios.​—Mat. 24:42, 44.

16:21. Bayat nga umad-adani ti panungpalan daytoy a lubong, ti pannakaiwaragawag ti panangukom ni Jehova maibusor iti dakes a sistema ni Satanas ket mabalin a naglaon kadagiti agkakadagsen a berbal nga ebkas ti panangukom ti Dios, a nalabit iladawan dagiti uraro. Kaskasdi, kaaduan a tattao itultuloyda a tabbaawan ti Dios.

AGTURAY TI NAGBALLIGI NGA ARI

(Apoc. 17:1–22:21)

Ti “Babilonia a Dakkel,” ti sangalubongan nga imperio ti palso a relihion, ket makarimon a paset ti dakes a lubong ni Satanas. Nailadawan daytoy iti maika-11 a sirmata kas “dakkel a balangkantis”​—maysa nga imoral a babai​—“a situtugaw iti eskarlata ti marisna nga atap nga animal.” Isu ket naan-anayto a dadaelen “ti sangapulo a sara” ti mismo nga atap nga animal a nagsakayanna. (Apoc. 17:1, 3, 5, 16) Nayarig met daytoy a balangkantis iti maysa a “nabileg a siudad,” ket sigun iti sumaruno a sirmata, marpuogto dayta isu a masapul a sigaganat a ‘rummuar kenkuana’ ti ili ti Dios. Adu ti mangdung-aw iti pannakadadael dayta a dakkel a siudad. Ngem agragsakda idiay langit gapu iti “panagkasar ti Kordero.” (Apoc. 18:4, 9, 10, 15-19; 19:7) Iti maika-13 a sirmata, ti nakasakay iti “maysa a puraw a kabalio” ti mapan makigubat kadagiti nasion ket talipuposenna ti dakes a lubong ni Satanas.​—Apoc. 19:11-16.

Ania ti mapasamak iti “kadaanan a serpiente, nga isu ti Diablo ken Satanas”? Kaanonto a ‘maitapuak iti danaw nga apuy’? Dayta ti maysa kadagiti salaysayen ti maika-14 a sirmata. (Apoc. 20:2, 10) Ti dua a maudi a sirmata mangtedda iti panirpatan no anianto ti kasasaad ti biag bayat ti Milenio. Kadagiti maudi a paset ti “palgaak,” nakita ni Juan ti ‘maysa a karayan ti danum ti biag nga agay-ayus nga agpababa iti tengnga ti akaba a dalan,’ ket maitukon ti maysa a nagsayaat nga awis iti “asinoman a mawaw.”​—Apoc. 1:1; 22:1, 2, 17.

Sungbat Kadagiti Nainkasuratan a Saludsod:

17:16; 18:9, 10​—Apay a “ti ar-ari ti daga” dung-awanda ti arig dakkel a siudad nga isuda a mismo ti nangdadael? Ti panagdung-awda ket maigapu iti managimbubukodan nga interesda. Kalpasan ti pannakadadael ti Babilonia a Dakkel, nabatad a mabigbigto dagiti ar-ari ditoy daga no kasano kadakkel ti naitulongna kadakuada. Pinagparangna ngamin a kasla naimbag dagiti mangirurumen nga aramidda. Ti Babilonia a Dakkel ti timmulong met kadakuada a mangguyugoy kadagiti agtutubo a makigubat. Kanayonanna, dakkel ti naaramidanna tapno agtultuloy nga agpasakup kadakuada dagiti tattao.

19:12​—Kasano a ni laeng Jesus ti makaammo iti saan a nadakamat a naganna? Daytoy a nagan ket agparang a mangirepresentar kadagiti saad ken akem kas kadagidiay nadakamat iti Isaias 9:6, a tinagiragsak ni Jesus bayat ti aldaw ti Apo. Isu laeng ti makaammo iti dayta a nagan iti anag a naisangsangayan dagita nga akem ken isu laeng ti makatarus no kasano ti agsaad iti kasta a nangato a posision. Nupay kasta, iranud met ni Jesus ti dadduma kadagita nga akem kadagiti kameng ti klase nobiana, nga arigna ‘insuratna kadakuada ti baro a naganna.’​—Apoc. 3:12.

19:14​—Siasino ‘dagiti buyot sadi langit’ a kadua ni Jesus a rumaut inton Armagedon? Karaman kadagita dagiti anghel ken dagiti napulotan nga immawaten iti nailangitan a gunggonada.​—Mat. 25:31, 32; Apoc. 2:26, 27.

20:11-15​—Makinnagan kadagiti maisurat iti “lukot [wenno, “libro”] ti biag”? Daytoy a lukot ket naglaon kadagiti nagan ti amin nga umawat iti biag nga agnanayon​—dagiti napulotan a Kristiano, dagiti kameng ti dakkel a bunggoy, ken dagiti matalek nga adipen ti Dios a mangtagiragsakto iti ‘panagungar dagiti nalinteg.’ (Ara. 24:15; Apoc. 2:10; 7:9) Ngem no kadagidiay karaman iti ‘panagungar dagiti nakillo,’ maisuratto ti naganda iti “lukot ti biag” no agtignayda maitunos kadagiti “banag a naisurat kadagiti lukot” ti bilbilin a maluktan bayat ti Milenio. Nupay kasta, saan a permanente ti pannakaisurat dagiti naganda. Agbalin laeng a permanente ti pannakaisurat ti nagan dagiti napulotan kalpasan a mapaneknekanda a matalekda agingga ken patay. (Apoc. 3:5) Permanentento a maisurat ti nagan dagidiay agbiag ditoy daga kalpasan a mapagballigianda ti maudi a pannubok iti ngudo ti sangaribu a tawen.​—Apoc. 20:7, 8.

Dagiti Masursurotayo:

17:3, 5, 7, 16. “Ti sirib manipud ngato” ti tumulong kadatayo a mangtarus iti “misterio ti babai ken ti [kolor eskarlata nga] atap nga animal a mangaw-awit kenkuana.” (Sant. 3:17) Daytoy a simboliko nga atap nga animal ket nangrugi kas Liga de Naciones ken naibangon manen kas United Nations. Saantayo kadi a matignay iti pannakaipalgak daytoy a misterio tapno sireregta nga ikasabatayo ti naimbag a damag ti Pagarian ti Dios ken ipakaammo ti aldaw ti panangukom ni Jehova?

21:1-6. Masiguradotayo a matungpal dagiti naipadto a bendision iti sidong ti turay ti Pagarian. Apay? Naikuna ngamin maipapan kadagita: “Napasamakdan!”

22:1, 17. Ti “karayan ti danum ti biag” irepresentarna dagiti probision ni Jehova a mangwayawaya kadagiti natulnog a tattao manipud iti basol ken ipapatay. Magun-odanen ita ti dadduma kadagitoy a danum. Saantayo la koma a siyayaman a patgan ti awis ‘nga awaten ti danum ti biag nga awan bayadna’ no di ket sigagagar nga iranudtayo dayta kadagiti sabsabali!

[Footnotes]

[Ladawan iti panid 5]

Anian nga agkakaimbag a bendision ti sagrapento ti natulnog a sangatauan iti sidong ti turay ti Pagarian!