Kapitulo 1

Apocalipsis—Ti Naragsak a Tampokna!

1. Kasanotay nga ammo a kayat ti Dios nga agbalintayo a naragsak?

TI APOCALIPSIS A NAITED KEN JUAN​—daytoy makapagagar a libro ti Biblia ti naragsak a tampok ti nadibinuan a rekord. Apay a makunatayo a “naragsak”? Ngamin, ti Autor ti Biblia ket nadeskribir kas “naragsak a Dios,” a nangitalek iti “nadayag a naimbag a damag” kadagidiay mangay-ayat kenkuana. Kayatna a naragsaktayo met koma. Gapuna, ipanamnama kadatayo ti rugi ti Apocalipsis: “Naragsak daydiay mangbasa . . . iti sasao daytoy a padto.” Iti maudi a kapitulona, kastoy ti kunana: “Naragsak ti asinoman a mangtungtungpal iti sasao ti padto daytoy a lukot.”​—1 Timoteo 1:11; Apocalipsis 1:3; 22:7.

2. Ania ti masapul nga aramidentayo tapno masarakantayo ti ragsak babaen ti libro nga Apocalipsis?

² Kasanotay a masarakan ti ragsak babaen ti libro nga Apocalipsis? Babaen ti panangusigtayo iti kayulogan dagiti nabatad a pagilasinan wenno simbolo a linaonna ken panagtignay a maitunos kadagita. Dandanin dumteng ti kangitingitan ti nariribuk a pakasaritaan ti tao, inton ukomen ti Dios ken ni Jesu-Kristo daytoy agdama a dakes a sistema, ket suktanda dayta iti “maysa a baro a langit ken maysa a baro a daga,” a sadiay ‘awanton uray ni patay.’ (Apocalipsis 21:1, 4) Saan kadi a kayattayo amin ti agbiag iti kasta a baro a lubong, nga adda napaypayso a talna ken talged? Masagraptayo dayta no pabilgentayo ti pammatitayo babaen ti panangadaltayo iti Sao ti Dios, a pakairamanan ti makagutugot iti rikna a padto ti Apocalipsis.

Ania ti Apocalipsis?

3. Ania ti ipagarup ti adu a kaipapanan ti Apocalipsis ken Armagedon?

³ Saan aya a ti Apocalipsis ket maawagan met iti Paltiing? Wen, ta iti Iloko naipatarus met kas “paltiing” ti sao nga a·po·kaʹly·psis a nausar iti Griego a teksto. Adu dagidiay mangipagarup a ti Apocalipsis ket isu ti pannakadadael ti lubong babaen ti nuklear a gubat. “Datayto ti umuna a matalipupos,” kuna idi dagiti relihioso a tattao iti siudad ti Texas, E.U.A., a pakaar-aramidan ti adu a nuklear nga igam. Naipadamag a dagiti klero iti dayta a lugar “kombinsidoda a saan laeng a di maliklikan ti Armagedon no di pay ket asidegen, ket ti ultimo a gubat iti nagbaetan dagiti puersa ti naimbag ken dakes, ti Dios ken ni Satanas, mapasamakto kas gubat a pakausaran dagiti nuklear nga armas.”a

4. Ania a talaga ti kayulogan ti sao nga “apocalipsis,” ket apay a maitutop nga “Apocalipsis” ti paulo ti maudi a libro ti Biblia?

⁴ Ngem ania aya a talaga ti apocalipsis? Nupay nadepinar dayta kadagiti diksionario kas “umad-adani a sapasap a didigra,” ti kangrunaan a kaipapanan ti Griego a sao nga a·po·kaʹly·psis ket “pannakalukais” wenno “pannakaibuksil.” Gapuna, maitutop nga “Apocalipsis” ti paulo ti maudi a libro ti Biblia. Saan a basta mensahe maipapan iti naikeddeng a pannakadadael ti lubong ti masarakantayo ditoy no di ket ti pannakaibuksil dagiti nadibinuan a kinapudno a mangisaad iti pusotayo iti naraniag a namnama ken di maisin a pammati.

5. (a) Siasino ti madadael inton Armagedon, ken siasino ti makalasat? (b) Ania a nadayag a masanguanan ti agur-uray kadagiti makalasat iti Armagedon?

⁵ Pudno nga iti maudi a libro ti Biblia, nadeskribir ti Armagedon kas ti “gubat ti naindaklan nga aldaw ti Dios a Mannakabalin-amin.” (Apocalipsis 16:14, 16) Ngem naiduma unay dayta iti nuklear a gubat! Ti nuklear a gubat mabalin a kaipapananna ti pannakaikisap ti amin a biag ditoy daga. Maisupadi iti dayta, makaparagsak ta ipanamnama kadatayo ti Sao ti Dios a dagitinto laeng nadangkes a bumusbusor iti Dios ti madadael​—babaen kadagiti puersa a kontrolado ti Dios. (Salmo 37:9, 10; 145:20) Adda dakkel a bunggoy dagiti tattao a naggapu iti amin a nasion a makalasat inton dumteng ti kangitingitan ti panangukom ti Dios, inton Armagedon. Ipastoran ken iturongto ida ni Kristo Jesus iti biag nga agnanayon iti paraiso a daga. Kayatmo kadi a maysakanto met koma kadakuada? Makaparagsak ta ipakita ti Apocalipsis a mabalin a maibilangkanto kadakuada!​—Apocalipsis 7:9, 14, 17.

Panangibuksil Kadagiti Nadibinuan a Palimed

6. Iti panaglabas ti panawen, ania dagiti libro nga impablaak dagiti Saksi ni Jehova a nangibuksil iti Apocalipsis?

⁶ Idi 1917, impablaak dagiti Saksi ni Jehova ti libro a The Finished Mystery. Maysa daytoy a bersikulo por bersikulo a komentario iti Ezequiel ken Apocalipsis a libro ti Biblia. Ket gapu iti agtultuloy a panagbalbaliw dagiti kasasaad ditoy lubong kas kaitungpalan dagiti padto ti Biblia, naipablaak ken nairuar idi 1930 ti naintiempuan a libro a napauluan iti Light a buklen ti dua a tomo. Maysa daytoy a napabaro a panangusig iti Apocalipsis. Nagtultuloy a ‘simmilnag ti silaw kadagiti nalinteg,’ isu nga idi 1963 impablaak dagiti Saksi ni Jehova ti 704 ti panidna a libro a “Babylon the Great Has Fallen!” God’s Kingdom Rules! Detalyado ti panangsalaysay daytoy iti itataud ken pannakarba ti Babilonia a Dakkel, ti sangalubongan nga imperio ti palso a relihion, ket ti tampok daytoy isu ti pannakasalaysay dagiti maudi a siam a kapitulo ti Apocalipsis. Bayat a ‘lumawlawag a lumawlawag ti dana dagiti nalinteg,’ nangnangruna no maipapan kadagiti aramid ti kongregasion, simmaruno a naipablaak idi 1969 ti 384 ti panidna a libro a napauluan iti “Then Is Finished the Mystery of God,” a nangsalaysay kadagiti umuna a 13 a kapitulo ti Apocalipsis.​—Salmo 97:11; Proverbio 4:18.

7. (a) Apay nga impablaak dagiti Saksi ni Jehova daytoy a libro maipapan iti Apocalipsis? (b) Aniada a katulongan iti panangisuro ti nairaman iti daytoy a libro a pakagunggonaan dagiti agbasa?

⁷ Apay a naipablaak ken nabaliwan a naimaldit ti sabali manen a libro maipapan iti Apocalipsis iti daytoy a tiempo? Ngamin, detalyado unay ti adu nga impormasion a naipablaaken, ket saan a naipatarus ken naimaldit dagitoy iti adu a lenguahe. Gapuna, maikanatad a maipablaak ti maysa a libro maipapan iti Apocalipsis iti maysa laeng a tomo ken iti porma a nalaka a maimaldit iti adu a lenguahe. Maysa pay, naglaon daytoy a tomo kadagiti katulongan iti panangisuro, a pakairamanan dagiti ilustrasion, tsart, ken sumario, a tumulong kadagiti agbasa a mangtarus a silalawag iti makapagagar a kaipapanan daytoy a naisangsangayan a padto.

8. Ania ti ad-adda pay a makagapu no apay a naipablaak daytoy a libro?

⁸ Ti ad-adda pay a makagapu no apay a naipablaak daytoy a libro ket nasken ngamin a makidanggaytayo iti agdama a kinapudno. Lumawlawag a lumawlawag ti panangibuksil ni Jehova iti kaipapanan ti Saona, ket namnamaentayo a lumawag a lumawag met ti pannakaawattayo iti Apocalipsis, agraman ti dadduma pay a padto, bayat nga umad-adani ti dakkel a rigat. (Mateo 24:21; Apocalipsis 7:14) Nasken a mapakaammuantayo a naimbag. Kas insurat ni apostol Pablo maipapan iti nadibinuan a padto: “Naimbag ti ar-aramidenyo iti panangimdengyo iti dayta kas iti pagsilawan nga agsilsilnag iti nasipnget a disso, agingga nga agbannawag ti aldaw ket lumgak ti baggak, kadagiti pusoyo.”​—2 Pedro 1:19.

9. (a) Kas iti dadduma pay a padto, ania ti ipakita ti Apocalipsis a parsuaento ti Dios? (b) Ania ti baro a lubong, ket kasano a makalasatka nga agturong sadiay?

⁹ Ti padto a linaon ti Apocalipsis ket maysa kadagiti adu a padto ti Biblia a mangipakita a panggep ni Jehova a Dios ti mangparsua iti baro a langlangit ken iti baro a daga. (Isaias 65:17; 66:22; 2 Pedro 3:13; Apocalipsis 21:1-5) Dagiti napulotan a Kristiano, a ginatang ni Jesus babaen ti darana tapno makipagturayda kenkuana iti baro a langlangit, ti kangrunaan a nakaiturongan ti mensahe daytoy a libro. (Apocalipsis 5:9, 10) Nupay kasta, daytoy a naimbag a damag pakirdenna met ti pammati dagiti minilion a mangnamnama iti biag nga agnanayon iti sidong ti Pagarian ni Kristo. Maysaka kadi kadagitoy? No kasta, pabilgen ti Apocalipsis ti namnamam nga agbiag iti Paraiso, kas paset ti baro a daga, a pangtagiragsakam iti naruay a talna, nakaradkad a salun-at, ken di agpatingga nga aglaplapusanan a probision ti Dios. (Salmo 37:11, 29, 34; 72:1, 7, 8, 16) No kayatmo ti makalasat nga agturong iti dayta a baro a lubong, naganetget, wen, masapul, nga imutektekam ti nabiag a panangiladawan ti Apocalipsis iti kapatgan a pasamak a mangyeg iti dakkel a panagbalbaliw, ket asideg unayen dayta.​—Sofonias 2:3; Juan 13:17.

[Footnote]

[Ladawan iti panid 7]