Maymaysanto a Relihion ti Agtalinaed
DAREPDEPENYO man ti kasasaad no nagkaykaysa dagiti amin a tattao ditoy daga iti maysa a relihion, iti maysa a nadalus a panagdayaw iti maymaysa a pudno a Dios. Anian a gubuayan ti panagkaykaysa dayta! Awanen ti narelihiosuan a panagdadangadang, rinnisiris, wenno gubat. Arapaap laeng kadi daytoy? Saan. Ipamatmat ti sirmata ni apostol Juan maipapan iti pannakadadael ti balangkantis, ti sangalubongan nga imperio ti ulbod a relihion, nga agtalinaedto ti maysa a kita ti panagdayaw kalpasan ti pannakadadaelna. Ania dayta?
Mangted ti timek a nangngeg ni Juan manipud langit iti pamalatpatan: “Rummuarkayo kenkuana, tattaok, no dikay kayat ti makiraman kenkuana kadagiti basolna, ken no dikay kayat ti umawat iti paset dagiti saplitna.” (Apocalipsis 18:4) Agminar a ti Dios a mismo ti agsasao ditoy iti ilina. Anagenyo ta dina bilbilinen ti ilina a makikadua iti balangkantis iti ekumenikal a panangikagumaan a mangisalakan kenkuana babaen ti panangtulong kenkuana nga agbalbaliw nga agturong iti desente a panagbiag. Awanen ti pamuspusan kenkuana. Ngarud, bilbilinenna ida a rummuar ken umadayo kenkuana tapno maliklikanda ti mamulitan iti nakaro a kinamanagbasolna ken maliklikanda kamaudiananna ti maukom ken madadael a maikanunong kenkuana.
Ti nailangitan a bilin a “rummuar kenkuana” makatulong met kadagiti napasnek nga agsapsapul iti kinapudno a mangilasin iti ili ti Dios. Nalabit imtuodenda ti bagbagida, “Asino a tattao iti daga ita ti nangipangag itoy a bilin babaen ti panagikkatda iti aniaman a relihion, organisasion, wenno grupo dagiti agdaydayaw a nainaig iti “Babilonia a Dakkel”? (Apocalipsis 18:2) Asino a tattao iti daga ita ti nangpanawen iti amin a Binababilonia a doktrina, kredo, aramid, ken tradision?’ Asino pay koma no di dagiti Saksi ni Jehova? Kadagiti nasurok a 5.2 a milion a Saksi iti nasurok a 230 a dagdaga, amin a nainaig idi iti Binababilonia a relihion, babaen man iti pannakaipasngay wenno pannakakomberte, ti sipapanayag a nagikkat iti dayta—a no dadduma agpapan pay iti isusupiat wenno ibubusor dagiti kabagian, gagayyem, ken panguluen ti relihion.
Maysa a pagarigan isu ni Henry, maysa a lalaki a taga South Africa, a tesorero idi ti iglesiana ken napeklan iti dayta. Ngem agsapsapul iti kinapudno, ket maysa nga aldaw inawatna ti libre a pannakiadal iti Biblia iti pagtaengan kadagiti Saksi ni Jehova. Idi agangay, idi inkeddengna ti agbalin a Saksi, imbagana iti pastorna, a nasinged met a kaarrubana, a kayatna ti agikkat iti iglesia.
Nakigtot ti pastor ket inawisna idi agangay ti mangidadaulo iti simbaan ken ti dadduma a miembro ti iglesia a sumarungkar ken Henry. Inimtuodda no apay a masapul nga agikkat iti iglesia tapno agbalin a miembro ti relihion, a sigun kadakuada, awanan iti nasantuan nga espiritu ti Dios. “Idi damo, mabutengak a sumungbat kadakuada,” kinuna ni Henry, “ta kanayon idi a dakkel ti impluensiada kaniak. Ngem nagkararagak ken Jehova maipaay iti tulong, ket tinulongannak a mangaramid itoy a depensa: ‘Kadagiti amin nga internasional a relihion, asino ti kakaisuna a kanayon a mangus-usar iti nagan ti Dios, a Jehova? Saan aya a dagiti Saksi ni Jehova? Iti panagkunayo, palubosan kadi ti Dios ida a mangusar iti naganna ket saanna nga ited kadakuada ti nasantuan nga espirituna?’” Saan a nabaelan dagiti opisial ti iglesia a sungbatan daytoy a panagrason, ket ita maysan ni Henry kadagiti Saksi ni Jehova.
Gapuna no ibilin ti timek manipud langit: “Rummuarkayo kenkuana,” adda lugar a papanan. (Apocalipsis 18:4) Addada tattao, managdaydayaw iti pudno a Dios, a ni Jehova, a mabalinyo a pagkamangan. Minilion ti nagkamangen. Iti pannakabigbigda kas Saksi ni Jehova, buklenda ti maysa nga internasional a Nakristianuan a panagkakabsat, a naorganisar iti nasurok a 78,600 a kongregasion, ken mapadpadasandan ti kadadakkelan nga irarang-ay iti pakasaritaanda. Nakapabautisardan iti nasurok a 1,200,000 a tattao iti napalabas nga uppat a tawen! Sakbay a nabautisaranda, nakompleton amin dagitoy ti makaparegta iti naespirituan a panagadal iti Biblia, a tumulong kadakuada a mangaramid iti personal, natibker ti pamuonna a pangngeddeng nga agikkat iti amin a pannakaisinggalut iti aniaman a sabali a relihion.—Sofonias 2:2, 3.
No dikay pay nakatabuno iti gimong dagiti Saksi ni Jehova iti maysa kadagiti Kingdom Hall-da, apay a dikay tumabuno itoy a lawas? Mabalin a maay-ayokay a naimbag iti makita ken mangngegyo. Ket no kayatyo a maawatan ti Biblia, apay a dikay kiddawen iti maysa kadagiti Saksi ni Jehova a mangyadal iti dayta kadakayo, kas inaramiden ti minilion a sabsabali? No ikararagyo ti pudno a pannakaawat iti Sao ti Dios agraman ti pamay-an ti panagbiag a maitunos iti dayta a Sao, masarakanyonto ti sungbat ti kararagyo.
[Dagiti ladawan iti panid 9]
Minilion ti agdaydayaw ken Jehova a Dios