No Ania ti Ibutaktak ti Aldaw ni Jehova

“Ti aldaw ni Jehova umayto a kasla mannanakaw, . . . ket ti daga ken ti ar-aramid nga adda iti dayta matakuatanto.”​—2 PED. 3:10.

1, 2. (a) Kasano nga agpatingga ti agdama a dakes a sistema? (b) Ania a salsaludsod ti usigentayo?

TI AGDAMA a dakes a sistema ti bambanag ket nabuangay iti daytoy a dakkel a kinaulbod: kabaelan kano ti tao nga iturayan ti daga nga awan ti tulong ni Jehova. (Sal. 2:2, 3) Makapagtakder kadi nga agnanayon ti aniaman a nabuangay iti kinaulbod? Saan a pulos! Ngem saan a masapul nga urayentayo a manungpal a bukbukodna ti lubong ni Satanas. Imbes ketdi, ti Dios ti mangdadael iti dayta iti intudingna a tiempo ken pamay-an. Naan-anay a mayanninaw ti kinahustisia ken ayat ti Dios iti panangdadaelna iti daytoy dakes a lubong.​—Sal. 92:7; Prov. 2:21, 22.

² “Ti aldaw ni Jehova,” insurat ni apostol Pedro, “umayto a kasla mannanakaw, nga iti dayta aglabasto ti langlangit buyogen ti sumayetset a daranudor, ngem marunawto dagiti elemento yantangay nakapudpudotda unay, ket ti daga ken ti ar-aramid nga adda iti dayta matakuatanto.” (2 Ped. 3:10) Ania “ti langlangit” ken “ti daga” a nadakamat ditoy? Ania “dagiti elemento” a marunawto? Ken ania ti kayat a sawen ni Pedro iti kinunana a “matakuatanto” ti “daga ken ti ar-aramid nga adda iti dayta”? Ti pannakaammotayo iti sungbat kadagita a saludsod tulongannatayo nga agsagana mainaig kadagiti nakaam-amak a mapasamak iti asidegen a masanguanan.

Ti Langlangit ken ti Daga nga Aglabasto

 3. Ania “ti langlangit” a nadakamat iti 2 Pedro 3:10, ken kasano nga aglabas dagitoy?

³ Iti Biblia, ti termino a “langlangit” ket masansan a simboliko a tumukoy kadagiti agtuturay, a natantan-ok ngem kadagiti iturayanda. (Isa. 14:13, 14; Apoc. 21:1, 2) ‘Ti langlangit nga aglabasto’ iladawanna ti panangituray ti tao iti dakes a kagimongan. Ti panaglabasda buyogen ti “sumayetset a daranudor” mabalin nga ipasimudaagna ti napartak a pannakadadael dagitoy a langlangit.

 4. Ania ti “daga,” ken kasano a madadael dayta?

⁴ Ti “daga” iladawanna ti lubong ti sangatauan a naisina iti Dios. Kasta ti lubong idi kaaldawan ni Noe ngem nadadael idi Layus kas imbilin ti Dios. “Babaen iti isu met laeng a sao naidulin ti langlangit ken ti daga nga adda ita maipaay iti apuy ket maisagsaganada iti aldaw ti panangukom ken ti pannakadadael dagiti di nadiosan a tattao.” (2 Ped. 3:7) Ti Layus namimpinsan a tinalipuposna ti amin a nadangkes, ngem ti umad-adani a pannakadadael ket in-inut a mapasamak bayat ti “dakkel a rigat.” (Apoc. 7:14) Iti umuna a paset dayta a rigat, tignayen ti Dios dagiti napolitikaan nga agtuturay iti daytoy a lubong a mangdadael iti “Babilonia a Dakkel,” a mangipakita iti pungtotna iti dayta a narelihiosuan a balangkantis. (Apoc. 17:5, 16; 18:8) Sa inton gubat ti Armagedon, ti maudi a paset ti dakkel a rigat, ni Jehova a mismo ti mangtalipupos iti amin a nabatbati a paset ti lubong ni Satanas.​—Apoc. 16:14, 16; 19:19-21.

“Marunawto Dagiti Elemento”

 5. Ania ti ramanen dagiti piguratibo nga elemento?

⁵ Ania “dagiti elemento” a “marunawto”? Maysa a diksionario iti Biblia ti mangdepinar iti “elemento” kas “kangrunaan a paset,” wenno “kangrunaan a ramen.” Gapuna, “dagiti elemento” a dinakamat ni Pedro tuktukoyenna dagiti kangrunaan a bambanag a mangyanninaw kadagiti di nadiosan a galad, kababalin, pamay-an, ken kalat ti lubong. “Dagiti elemento” ramanenna “ti espiritu ti lubong” nga ‘agtigtignay iti annak ti kinasukir.’ (1 Cor. 2:12; basaen ti Efeso 2:1-3.) Dayta nga espiritu wenno “angin” ket nasaknap iti lubong ni Satanas. Gutugotenna dagiti tattao nga agpanunot, agplano, agsao, ken agtignay kadagiti pamay-an a mangyanninaw iti panunot ni Satanas, ti natangsit ken nasukir nga “agturay iti autoridad ti angin.”

 6. Kasano a maiparparangarang ita ti espiritu ti lubong?

⁶ Gapuna, ammoda man wenno saan, dagidiay naimpluensiaan iti espiritu ti lubong impalubosda a sukogen ni Satanas ti panunot ken pusoda, isu nga iparparangarangda ti panunot ken kababalinna. Kas resultana, aramidenda ti kaykayatda a dida ikabilangan ti pagayatan ti Dios. Natangsit wenno bagida laeng ti pampanunotenda, rebeliosoda kadagiti addaan iti autoridad, ken tumulokda iti “derrep ti lasag ken ti derrep dagiti mata.”​—Basaen ti 1 Juan 2:15-17.a

 7. Apay a masapul a ‘saluadantayo ti pusotayo’?

⁷ Gapuna, anian a nagpateg a ‘saluadantayo ti pusotayo’ babaen ti panangpili kadagiti gagayyem, babasaen, paglinglingayan, ken Web site a maitunos kadagiti pagannurotan ti Dios! (Prov. 4:23) Insurat ni apostol Pablo: “Agaluadkayo: amangan no adda asinoman a mangkayawto kadakayo kas naanupanna babaen iti pilosopia ken ubbaw a panangallilaw maitunos iti tradision dagiti tattao, maitunos iti pagdamdamuan a bambanag ti lubong ket saan a maitunos ken Kristo.” (Col. 2:8) Ad-adda pay a naganat dayta a bilin bayat nga umad-adani ti aldaw ni Jehova, ta ti nakaro a ‘pudot’ runawenna ti amin nga “elemento” ti sistema ni Satanas, a mangibutaktak iti naan-anay a nakapuy a pakabuklanna. Ipalagipna kadatayo ti sasao iti Malakias 4:1: “Ti aldaw a sumsumged a kas iti urno, ket amin dagidiay nadursok ken amin dagidiay agar-aramid iti kinadangkes agbalindanto a kas punget. Ket sigurado nga alun-onento ida ti aldaw nga um-umay.”

“Ti Daga ken ti Ar-aramid nga Adda iti Dayta Matakuatanto”

 8. Kasano a “matakuatanto” ti daga ken ti ar-aramid nga adda iti dayta?

⁸ Ania ti kayat a sawen ni Pedro idi insuratna a “ti daga ken ti ar-aramid nga adda iti dayta matakuatanto”? Ti sao a ‘matakuatan’ ket mabalin met a maipatarus kas “masukalan” wenno “maibutaktak.” No kasta, ibagbaga ni Pedro a bayat ti dakkel a rigat, ibutaktak ni Jehova a ti lubong ni Satanas ket maibusor Kenkuana ken iti Pagarianna isu a maikari iti pannakadadael. Impadto ti Isaias 26:21 no ania ti mapasamak iti dayta a tiempo: “Ni Jehova rumrummuar manipud iti lugarna tapno isingirna kenkuana ti biddut ti agnanaed iti daga, ket ti daga pudno unay nga ipanayagnanto ti panagibukbokna iti dara ket saannanton nga abbongan dagidiay napapatay a tattaona.”

 9. (a) Ania dagiti masapul nga ilaksidtayo, ken apay? (b) Ania ti masapul a patanorentayo, ken apay?

⁹ Bayat ti aldaw ni Jehova, dagidiay nagpasukog iti lubong ken iti dakes nga espirituna ipakitadanto ti pudno a kinasiasinoda, nga uray la agpipinnatayda. Kinapudnona, mabalin a ti adu a kita ti naranggas a paglinglingayan a nasaknap ita ket mangikonkondision iti isip ti adu agpaay iti tiempo inton ti ima ti tunggal maysa ‘itag-ayna maibusor iti ima ti kaduana.’ (Zac. 14:13) Gapuna, anian a nagpateg a laksidentayo ti aniaman​—pelikula, libro, video game, ken dadduma pay​—a mabalin a mangpatanor kadatayo kadagiti kababalin a karimon ti Dios, kas iti kinatangsit ken panagayat iti kinaranggas! (2 Sam. 22:28; Sal. 11:5) Imbes ketdi, patanorentayo koma ti bunga ti nasantuan nga espiritu ti Dios, ta dagita a galad ti mangtulong kadatayo a makalasat iti gumilgil-ayab a pungtot ni Jehova.​—Gal. 5:22, 23.

Ti “Baro a Langlangit ken Baro a Daga”

10, 11. Ania ti “baro a langlangit” ken “baro a daga”?

¹⁰ Basaen ti 2 Pedro 3:13. Ti “baro a langlangit” ket ti nailangitan a Pagarian ti Dios a naipasdek idi 1914, idi nagpatingga ti “naituding a pampanawen dagiti nasion.” (Luc. 21:24) Daytoy a naarian a gobierno ket buklen ni Kristo Jesus ken ti 144,000 a kakaduana nga agturay, a kaaduan kadakuada ti immawaten iti nailangitan a gunggonada. Iti libro nga Apocalipsis, dagitoy a napili nailadawanda kas ‘ti nasantuan a siudad, ti Baro a Jerusalem, a bumabbaba nga aggapu idiay langit manipud iti Dios ken naisagana kas maysa a nobia a naarkosan maipaay iti asawana.’ (Apoc. 21:1, 2, 22-24) No kasano a ti naindagaan a Jerusalem ti sentro ti gobierno iti nagkauna nga Israel, ti Baro a Jerusalem ken ti Nobiona ti mangbukel iti gobierno ti baro a sistema ti bambanag. Daytoy a nailangitan a siudad ket ‘bumaba manipud langit’ babaen ti panangiturongna iti atensionna ditoy daga.

¹¹ Ti “baro a daga” tukoyenna ti baro a naindagaan a kagimongan dagiti tattao a nangpaneknek iti kinatulokda nga agpasakup iti Pagarian ti Dios. Ti naespirituan a paraiso a tagtagiragsaken itan ti ili ti Dios ket naan-anayto a matagiragsakda iti dayta a napintas a “mapagnaedan a daga nga umay.” (Heb. 2:5) Kasanotayo nga agbalin a paset dayta a baro a sistema ti bambanag?

Agsagana Maipaay iti Naindaklan nga Aldaw ni Jehova

12. Apay a napalalo ti pannakaklaat ti lubong inton dumteng ti aldaw ni Jehova?

¹² Agpada nga impadto da Pablo ken Pedro a ti aldaw ni Jehova ket umay a “kas iti mannanakaw”​—di madmadlaw ken di ninamnama. (Basaen ti 1 Tesalonica 5:1, 2.) Uray dagiti pudno a Kristiano a mangsegsegga iti dayta nga aldaw masdaawda iti kinapartak ti idadatengna. (Mat. 24:44) Ngem ti lubong napalalonto ti pannakaklaatna iti dayta. Kuna ni Pablo: “Inton [dagiti naisina ken Jehova] sasawenda: ‘Talna ken talged!’ iti kasta giddato a dumteng kadakuada ti kellaat a pannakadadael kas iti ut-ot ti panagrigat a dumteng iti masikog a babai; ket saandanto a pulos makalisi.”​—1 Tes. 5:3.

13. Kasano a maliklikantayo ti maallilaw inton ipukkawda ti “Talna ken talged!”?

¹³ Ti panangipukkaw iti “Talna ken talged!” ket maysa laeng a kinaulbod manipud kadagiti demonio. Ngem saan nga agpaallilaw iti dayta dagiti adipen ni Jehova. “Awankayo iti sipnget,” insurat ni Pablo, “tapno kellaatennakayo dayta nga aldaw a kas kadagiti mannanakaw, ta dakayo amin ket annak ti lawag ken annak ti aldaw.” (1 Tes. 5:4, 5) Gapuna, agtalinaedtayo iti lawag, nga adayo iti nasipnget a lubong ni Satanas. Insurat ni Pedro: “Dungdungnguen, nga addaan iti daytoy naipakpakauna a pannakaammo, agaluadkayo tapno saankayo a mayadayo a maikanunong kadakuada [dagiti ulbod a mannursuro iti uneg ti kongregasion Kristiano] babaen iti biddut dagiti managsalungasing-linteg a tattao ket matnagkayo manipud bukodyo a kinatibker.”​—2 Ped. 3:17.

14, 15. (a) Kasano nga inikkannatayo ni Jehova iti dignidad? (b) Ania a naipaltiing a sasao ti masapul nga ipapusotayo?

¹⁴ Imutektekantayo ta saan laeng nga ibagbaga ni Jehova nga ‘agaluadtayo.’ Imbes ketdi, inikkannatayo iti dignidad babaen ti siaayat a panangipaayna iti “naipakpakauna a pannakaammo,” nga inlawlawagna kadatayo no ania ti mapasamakto iti masanguanan.

¹⁵ Ngem nakalkaldaang ta dadduma ti saan a maseknan wenno negatiboda pay ketdi kadagiti pammalagip a masapul nga agtalinaedtayo a siririing. Nalabit a kunaenda, ‘Nabayagen a mangmangngegantayo dagita a pammalagip.’ Ngem laglagipen koma dagita nga indibidual a ti kasta a komentoda ket kinapudnona panangkuestionar ken ni Jehova ken iti Anakna, saan laeng nga iti klase matalek nga adipen. “Agtultuloyka a manginanama,” kinuna ni Jehova. (Hab. 2:3) Umasping iti dayta, kinuna ni Jesus: “Agtultuloykayo nga agbantay . . . agsipud ta saanyo nga ammo no ania nga aldaw nga umay ti Apoyo.” (Mat. 24:42) Kanayonanna, insurat ni Pedro: “Anian a kita ti tattao ti rebbeng a pagbalinanyo kadagiti nasantuan a panagbibiag ken ar-aramid ti nadiosan a debosion, nga ur-urayenyo ken agtaltalinaedkayo a silalagip unay iti kaadda ti aldaw ni Jehova!” (2 Ped. 3:11, 12) Pulos a saan a tagilag-anen ti klase matalek nga adipen ken ti Bagi a Manarawidwidna dagita a serioso a sasao!

16. Ania a kababalin ti masapul a liklikantayo, ken apay?

¹⁶ Kinapudnona, ti “dakes nga adipen” ti mangibagbaga nga agtaktak ti Apo. (Mat. 24:48) Karaman dayta a dakes nga adipen iti grupo a nailadawan iti 2 Pedro 3:3, 4. “Kadagiti maudi nga aldaw,” insurat ni Pedro, “umayto dagiti managuy-uyaw,” a “maitunos iti bukodda a tartarigagay” laisenda dagidiay silalagip iti aldaw ni Jehova. Wen, imbes nga ipamaysada ti atensionda kadagiti interes ti Pagarian, ti bagi ken tarigagayda la ti pampanunotenda. Ditay koma pulos patanoren ti kasta a nasukir ken napeggad a kababalin! Imbes ketdi, ‘ibilangtayo ti kinaanus ti Apotayo kas pannakaisalakan’ babaen ti panagbalin nga okupado iti panangasaba ken panangaramid iti adalan ken saantay unay a pakaringgoran ti eksakto a pannakapasamak dagiti bambanag a ni Jehova a Dios laeng ti makaammo.​—2 Ped. 3:15; basaen ti Aramid 1:6, 7.

Agtalek iti Dios ti Pannakaisalakan

17. Kasano nga impangag dagiti matalek a Kristiano ti bilin ni Jesus a pumanawda iti Jerusalem, ken apay?

¹⁷ Kalpasan a ti buyot ti Roma rinautna ti Judea idi 66 K.P., impangag dagiti matalek a Kristiano ti bilin ni Jesus a panawanda a dagus ti siudad ti Jerusalem. (Luc. 21:20-23) Apay a determinadoda a pimmanaw a dagus? Awan duadua a silalagipda iti pakdaar ni Jesus. Sigurado nga ammoda nga agrigatda kas resulta ti panagtignayda, ken impakpakauna dayta ni Kristo. Ngem ammoda met a di pulos baybay-an ni Jehova dagiti nasungdo kenkuana.​—Sal. 55:22.

18. Kasano a dagiti sasao ni Jesus iti Lucas 21:25-28 apektaranna ti panangmatmatyo iti um-umay a dakkel a rigat?

¹⁸ Masapul a naan-anay nga agtalektayo met ken Jehova, gapu ta isu laeng ti makabael a mangisalakan kadatayo inton ti agdama a sistema ket agpasar iti karirigatan a pasamak iti intero a historia. Kalpasan a mangrugi ti dakkel a rigat ken sakbay nga iwayat ni Jehova ti panangdadaelna iti nabatbati a paset ti lubong, ‘matalimudawto dagiti tattao gapu iti buteng ken panangpadpadaan iti bambanag nga um-umay iti mapagnaedan a daga.’ Ngem bayat nga agpigpigerger iti buteng dagiti kabusor ti Dios, awan pagbutngan dagiti nasungdo nga adipen ni Jehova. Imbes ketdi, agrag-odanto gapu ta ammoda nga asidegen ti pannakaisalakanda.​—Basaen ti Lucas 21:25-28.

19. Ania ti usigentayo iti sumaganad nga artikulo?

¹⁹ Wen, anian a makapagagar a masanguanan ti agur-uray kadagidiay agtalinaed a naisina iti lubong ken kadagiti ‘elementona’! Ngem kas ilawlawag ti sumaganad nga artikulo, masapul a saantayo laeng a liklikan ti dakes no kayattayo a magun-odan ti biag. Nasken a patanorentayo dagiti galad a makaay-ayo ken ni Jehova ken aramidentayo ti bambanag a mangparagsak kenkuana.​—2 Ped. 3:11.

[Footnote]

Mailawlawagyo Kadi?

• Ania ti iladawan . . .

ti agdama a ‘langlangit ken daga’?

“dagiti elemento”?

ti “baro a langlangit ken baro a daga”?

• Apay a naan-anay nga agtalektayo iti Dios?

[Ladawan iti panid 5]

Kasano a ‘masaluadanyo ti pusoyo’ ken makapagtalinaedkayo a naisina iti lubong?

[Ladawan iti panid 6]

Kasanotayo a maipakita nga ‘ibilangtayo a pannakaisalakan ti kinaanus ti Apotayo’?