Dagiti Saludsod Manipud Kadagiti Managbasa

◼ Makalasatto aya a sibibiag ti sumagmamano kadagiti napulotan a Kristiano iti “dakkel a rigat” nga agtultuloy a sibibiag ditoy daga idiay baro a lubong sakbay a maipanda idiay langit?

No direkta, saan nga ibaga ti Biblia dayta.

Nabayagen nga interesado dagiti Kristiano kadagiti pribilehio a mabalin nga itden ti Dios kadakuada. (Aramid 1:6) Pudno dayta nangnangruna iti tiempotayo agsipud ta ti Pagarian naipasdeken. (Mateo 24:3, 24, 34) Gapu ta ti panungpalan daytoy dakes a sistema umayen iti tiempotayo, pampanunoten dagiti Kristiano no dadduma kadagiti napulotan iti espiritu ket agbiagda a makalasat “ti gubat ti dakkel nga aldaw ti Dios” ken agserbida ditoy daga iti mabiit sakbay nga awatenda ti nailangitan a gunggonada. (Apocalipsis 16:14) Saan nga ibagbaga ti Biblia a daytoy ket mapasamak, ngem dadduma kadagiti padron ken padpadto naalada a mangipamatmat a mabalin a kasta. Imbes nga agbalin a dogmatiko, mabalintay ti agsiput tapno makita no kasanot’ panangtaming ti Dios kadagiti bambanag.

Dadduma a pasamak ti Biblia addaandat’ katupag kamaudiananna iti ili ti Dios. Kas pangarigan, ammotayo nga adda ni Jonas idiay uneg ti dakkel nga ikan iti tallo nga aldaw ken tallo a rabii. Dadduma a tattao mabalin a matmatanda dayta kas pangarigan laeng ti nadiosan a panangisalakan, ngem kuna ni Jesus a daytat’ naimpadtuan a padron no kasanonto ti kaaddana met iti tanem iti umasping a panawen sakbay ti panagungarna. (Jonas 1:17; Mateo 12:40) Wen, ti kapadasan ni Jonas ket maysa a naimpadtuan a ladawan. Maawatan ngarud, a kimmita dagiti adipen ti Dios kadagiti padto ken espesipiko a salsalaysay ti Biblia tapno makita no dagitoy ti mabalin a mangipamatmat no kasanot’ panangtaming pay ni Jehova kadakuada.

Kas maysa a pangarigan a nakairaman ti padto ti Biblia, sinalaysay ti The Watch Tower ti Disiembre 15, 1928, ti Mikias 5:2-15. Ti libro a Mikias sinalaysayna ti pananglangalang ‘dagiti Asirio’ iti Samaria ken ti panagsubli dagiti Judio manipud pannakakayaw idiay Babilonia. (Mikias 1:1, 5-7; 4:10) Ngem intudo met dayta dagiti maudi a paspasamak, kas ti pannakaiyanak ti Mesias idiay Betlehem. (Mikias 5:2) Impadto ni Mikias a kalpasan ti pannakaispalda manipud “iti Asirio,” “ti tidda ni Jacob” agbalindanto “kas linnaaw nga aggapu ken Jehova” ken “kas maysa a naamo nga urbon a leon kadagiti pangen ti karnero.” (Mikias 5:6-8) Nagkomento ti The Watch Tower: “Mabalin a tarusan daytoy kas mangipamatmat a dadduma kadagiti natda addadanto ditoy daga uray pay kalpasan ti pannakadangadang ti Armagedon ket addanto pay dadduma a trabaho nga aramidenda iti nagan ti Apo ken iti dayaw ken pakaipadayaganna.” Anagenyo ti nanumo, rasonable a sao a nausar a mangipaawat itoy a posibilidad: “Mabalin a tarusan daytoy kas mangipamatmat.”

Ania a salaysay ti Biblia ti mabalin a katupag ti kasta nga ilalasat ditoy daga? Maysa a pangarigan a naipresentar ket maipapan ken Noe ken ti pamiliana. Mamatmatmatan ni Noe kas mangiladladawan ken Jesus iti daytoy a panawen ti panungpalan. (Genesis 6:8-10; Mateo 24:37) Kas ti panangiturong ni Noe iti asawana ken kadagiti tallo nga annakna a lallaki ken mamanugangna a limmasat iti panungpalan dayta kadaanan a sistema, mangted ni Kristo ti panangidaulo iti natda ti klase nobiana ken kadagidiay agbalin nga annakto ti “Agnanayon nga Ama,” a ni Jesus. Nakalasat ti asawa ni Noe iti Layus ket nakiraman iti panangpabaro ti pudno a panagdayaw iti nadalusanen a daga. Ti katupagna mabalin nga isut’ ilalasat ti maysa a natda ti klase nobia nga agturong iti baro a lubong.​—Isaias 9:6, 7; 2 Corinto 11:2; Apocalipsis 21:2, 9.a

Dadduma a salaysay ti Biblia namatmatanda met kas mangisingsingasing a dadduma kadagiti napulotan mabalin nga agbiagda agturong iti baro a lubong. Kas pangarigan, nailasat ni Jeremias ti pannakadadael ti Jerusalem; “ti lalaki” nga addaan pagtinteruan ti sekretario nagbiag a nakakita ti panangikisap sakbay nga isut’ nagsubli a mangted ti reportna.​—Ezequiel 9:4, 8, 11.

Dagiti komento maipapan ti posibilidad a dadduma kadagiti napulotan ti mabalin makalasat nga agturong idiay baro a lubong naaramidda nga addaan naimbag nga intension ken iti lawag dagiti pagwadan ti Biblia gaput’ tarigagay a kayat a maawatan dagiti padto wenno padron a mabalin addanto katupagda iti kamaudianan. No agtungpalto nga awan kadagiti natda ti nabati ditoy daga, awanto ti rason ti pannakaawan pannakapnek. Inawattayon a dagiti bambanag ti Biblia maawatanda a nasaysayaat bayat ti panaglabas ti panawen. Kas pangarigan, Ti Pagwanawanan ti Enero 15, 1982, sinalaysayna manen ti Mikias 5:6-9 ken inlawlawagna a “ti natda kadagiti naespirituan nga Israelita ket saanda nga urayenen aginggat’ kalpasan ti . . . Har–Magedon tapno agbalindanto kas ‘linnaaw’ a pakabang-aran dagiti tattao.” Daytoy a dikusion ti nangitukon manen ti posibilidad a mabalin makalasat ti natda iti dakkel a gubat ti Dios ket iti mabiit “agtultuloyda kas makapabang-ar a ‘linnaaw’ iti ‘dakkel nga umariwekwek’ dagiti ‘sabsabali a karnero.’” Ngem, makitatayo, a ti panaglabas ti tiempo ken ti rimmang-ay a naespirituan a lawag mabalinna a palawaen ken baliwan ti pannakaawattayo iti padto wenno kadagiti drama ti Biblia.​—Proverbio 4:18.

Ammotayo nga inaig ti Biblia ti ‘iyaay ti Anak ti tao’ iti ‘pannakaurnong dagiti napili manipud kadagiti uppat nga angin.’ (Mateo 24:29-31) Kasta met, bayat “ti kaadda ti Apo” iti pannakabalin ti Pagarian, dagiti napulotan a matmaturong ken patay bumangondanto iti biag idiay langit. (1 Tesalonica 4:15, 16) Dagitoy a naseliuan addada sadiay nga agbalin a paset ti asawa ti Kordero. Kaano a mapasamak dayta?

Idiay libro ti Apocalipsis, dagdagus a kalpasan ti panangibaga ni Juan iti panangdadael ti Dios iti narelihiusuan a balangkantis, ti Babilonia a Dakkel, insalaysayna “ti panagboda ti Kordero.” Maysa a narugit, imoral a “babai” ti naikkat iti eksena, ket makitatayo “ti nobia, ti asawa ti Kordero” a ‘nakawesan iti lupot a nalapat ken puraw, nasileng ken natarnaw, nga itaktakderanna dagiti aramid a nalinteg dagiti sasanto.’ (Apocalipsis 18:10; 19:2, 7, 8; 21:9) Ti pannakadadael ti Babilonia a Dakkel ket paset ti dakkel a rigat. (Mateo 24:21; Apocalipsis 7:14) Gapuna mabalin a mairason a dadduma iti klase nobia ti makalasat ti dakkel a rigat kas ebidensia ti anamong ken pannalaknib ni Jehova. (Sofonias 2:3; idiligyo ti Mateo 24:22.) No maitalimengda a kasta ditoy daga, mabalindat’ agtalinaed ditoy aginggat’ panangpili ti Dios nga alaenna idan idiay langit.

Nupay kasta, ti presentasion idiay Apocalipsis ket saan nga iti istrikto nga urnos ti panagsasaganadda. Ken kasla saandanton kasapulan ti bassit a natda dagiti napulotan tapno mairugida ti baro a lubong, ta nakasanaydan kadagiti minilmilion a nasungdo a Kristiano nga agbiagto nga agnanayonen ditoy daga. Gapuna, mabalin nga alaen ti Dios dagiti pinulotanna idiay langit dagdagus kalpasan ti pannakadadael ti Babilonia a Dakkel, a mangisagana ti entablado nga agpaay “ti panagboda ti Kordero.” Iti kasta amin dagiti sasanto mabalindan ti makiraman ken Kristo iti ‘panangipastor kadagiti nasnasion iti sarukod a landok’ iti maudi a paset ti dakkel a rigat. (Apocalipsis 2:26, 27; 19:11-21) No kastat’ panangtaming ti Dios kadagiti bambanag, amin dagiti 144,000 addadanton a kadua ni Jesus nga ‘agturay kas ar-ari a kadua ni Kristo iti intero a sangaribo a tawen.’​—Apocalipsis 20:4.

Pudno a nagsayaat a ti ili ti Dios ket interesadoda unay a sumirip no kasano ti panangiturongna ken pananggunggonana kadagiti ad-adipenna. (Idiligyo ti 1 Pedro 1:12.) Isarsarming daytoy ti talekda a ti pagayatanna ket matungpalto. Nupay ditay mabalin ken rebbengna a ditay agbalin a dogmatiko maipapan kadagiti amin a detalye, aggagartayo a kumita no aniantot’ mapasamak.

[Dagiti Footnote]