Kapitulo 12

“Itultuloymo a Salimetmetan a Sititibker ti Adda Kenka”

FILADELFIA

 1. Ti maikanem a mensahe ni Jesus ket naiturong iti kongregasion iti ania a siudad, ken ania ti kaipapanan ti nagan dayta a siudad?

NAINKABSATAN A PANAGAYAT—anian a makaay-ayo a kualidad! Awan duadua a daytoy ti adda iti panunot ni Jesus idi idatagna ti maikanem a mensahena, a naiturong iti kongregasion idiay Filadelfia, ta “Nainkabsatan a Panagayat” ti kaipapanan dayta a nagan. Malaglagip pay laeng ni lakayen a Juan daydi pasamak, nasurok nga 60 a tawen sakbayna, idi a namitlo a daras nga inyunay-unay ni Pedro ken Jesus nga ay-ayatenna unay ti Apona. (Juan 21:15-17) No iti biang dagiti Kristiano sadi Filadelfia, ipakpakitada kadi ti nainkabsatan a panagayat? Wen!

 2. Ania a kita a siudad ti Filadelfia, ania a kita a kongregasion ti masarakan sadiay, ken ania ti kinuna ni Jesus iti anghel iti daytoy a kongregasion?

² Ti Filadelfia ket masarakan iti agarup 48 a kilometro iti abagatan a daya ti Sardis (nga ayan ti agdama a siudad ti Alasehir sadi Turkey). Maysa dayta a narang-ay a siudad idi kaaldawan ni Juan. Nupay kasta, ti ad-adda a naisangsangayan sadiay isu ti kinarang-ay ti kongregasion Kristiano. Ania ket ngatan a rag-oda a nangpasangbay iti ministro a simmarungkar kadakuada, a nalabit naggapu idiay Sardis! Addaan makatukay a balakad ti mensahe nga indanonna kadakuada. Ngem umuna pay nga inturongna ti atension iti autoridad daydiay nadaeg a Naggapuan dayta a mensahe. Kunana: “Ket iti anghel ti kongregasion idiay Filadelfia isuratmo: Dagitoy ti bambanag a kuna daydiay nasantuan, a napudno, nga addaan iti tulbek ni David, a manglukat tapno awan ti makairikep, ken mangirikep tapno awan ti makailukat.”—Apocalipsis 3:7.

 3. Apay a maitutop a maawagan ni Jesus iti “nasantuan,” ken apay a makuna nga isu ket “napudno”?

³ Nangngeg idi ni Juan ti kinuna ni Pedro ken ni Jesu-Kristo: “Addaanka iti sasao ti agnanayon a biag; ket namatikami ken naammuanmi a sika Daydiay Santo ti Dios.” (Juan 6:68, 69) Yantangay ni Jehova a Dios ti personipikasion ti kinasanto, “nasantuan” met ngarud ti bugbugtong nga Anakna. (Apocalipsis 4:8) “Napudno” met ni Jesus. Ti Griego a sao a nausar ditoy (a·le·thi·nosʹ) ipasimudaagna ti kinapudno. Kaipapananna a ni Jesus ti pudno a silaw ken ti pudno a tinapay a naggapu idiay langit. (Juan 1:9; 6:32) Isu ti pudno a puon ti ubas. (Juan 15:1) Pudno met ni Jesus gapu ta mapagtalkan. Kanayon nga agsasao iti pudno. (Kitaem ti Juan 8:14, 17, 26.) Talaga a maikari daytoy nga Anak ti Dios nga agserbi kas Ari ken Ukom.—Apocalipsis 19:11, 16.

Ti “Tulbek ni David”

4, 5. Nainaig iti ania a tulag ti “tulbek ni David”?

⁴ Adda ken Jesus ti “tulbek ni David.” No usarenna dayta, isu ket “manglukat tapno awan ti makairikep, ken mangirikep tapno awan ti makailukat.” Ania aya daytoy “tulbek ni David”?

⁵ Ni David nga ari ti Israel ti nakitulagan idi ni Jehova maipaay iti agnanayon a pagarian. (Salmo 89:1-4, 34-37) Nagturay ti sangakabbalayan ni David iti trono ni Jehova idiay Jerusalem manipud 1070 agingga idi 607 K.K.P., ngem kalpasan dayta dinusa ti Dios dayta a pagarian gapu ta naigamer iti kinadakes. Gapuna nangrugi a tinungpal ni Jehova ti padtona iti Ezequiel 21:27: “Rebbek, rebbek, rebbek ti pangaramidakto iti dayta [ti naindagaan a Jerusalem]. No maipapan met iti daytoy, sigurado nga awanto ti agtagikua iti dayta [ti setro ti kinaari iti linia ni David] agingga nga umay daydiay addaan iti legal a kalintegan, ket itedkonto dayta kenkuana.’’

6, 7. Kaano ken kasano nga agparang daydiay addaan iti “legal a kalintegan”?

⁶ Kaano ken kasano nga agparang daytoy addaan iti “legal a kalintegan”? Kasano a maited kenkuana ti setro ti pagarian ni David?

⁷ Agarup 600 a tawen kalpasanna, maysa a balasang a Judio nga agnagan iti Maria, a kaputotan ni Ari David, ti nagsikog babaen ti nasantuan nga espiritu. Imbaon ti Dios ni anghel Gabriel tapno pakaammuanna ni Maria a maaddaanto iti anak a lalaki, a mapanaganan iti Jesus. Kinuna pay ni Gabriel: “Daytoy ket naindaklanto ken maawaganto iti Anak ti Kangatuan; ket ni Jehova a Dios itednanto kenkuana ti trono ni David nga amana, ket agturayto kas ari iti balay ni Jacob iti agnanayon, ket awanto ti panungpalan ti pagarianna.”—Lucas 1:31-33.

 8. Kasano a pinaneknekan ni Jesus nga isu ket kualipikado nga agtawid iti kinaari ni David?

⁸ Idi nabautisaran ni Jesus ken napulotan iti nasantuan nga espiritu idiay Karayan Jordan idi 29 K.P., isu ket Nadutokan nga Ari iti kapuonan ni David. Impakitana ti mapagulidanan a kinaregta iti panangikasaba iti naimbag a damag ti Pagarian ken binilinna met dagiti adalanna a mangasaba. (Mateo 4:23; 10:7, 11) Nagpakumbaba ni Jesus, agingga iti ipapatay iti kayo a pagtutuokan, a pinaneknekanna nga isu ket naan-anay a kualipikado nga agtawid iti kinaari ni David. Ni Jehova pinagungarna ni Jesus kas imortal nga espiritu ket intan-okna iti mismo a makanawanna sadi langit. Sadiay a tinawidna ti amin a kalintegan iti pagarian ni David. Idi dimteng ti naituding a tiempo, inusar ni Jesus ti kalinteganna a ‘mangparukma iti tengnga dagiti kabusorna.’—Salmo 110:1, 2; Filipos 2:8, 9; Hebreo 10:13, 14.

 9. Kasano nga usaren ni Jesus ti tulbek ni David a manglukat ken mangirikep?

⁹ Kabayatanna, usaren ni Jesus ti tulbek ni David a manglukat kadagiti oportunidad ken pribilehio a nainaig iti Pagarian ti Dios. Babaen ken Jesus, wayawayaan ni Jehova dagiti napulotan a Kristiano ditoy daga “manipud iti autoridad ti sipnget” ket iyegna ida “iti pagarian ti Anak ti ayatna.” (Colosas 1:13, 14) Mausar met ti tulbek tapno malapdan a gumun-od kadagita a pribilehio ti asinoman a di matalek. (2 Timoteo 2:12, 13) Gapu ta supsuportaran ni Jehova daytoy a permanente nga agtawid iti pagarian ni David, awan ti asinoman a parsua a makalapped kenkuana a mangitungpal kadagita nga annongen.—Idiligmo ti Mateo 28:18-20.

10. Ania a pammaregta ti impaay ni Jesus iti kongregasion idiay Filadelfia?

¹⁰ Gapu ta nagtaud iti maysa nga addaan autoridad, sigurado a makaliwliwa unay dagiti sao ni Jesus kadagiti Kristiano sadi Filadelfia! Kinomendaranna ida, a kunkunana: “Ammok dagiti aramidmo—adtoy! nangikabilak iti sanguanam iti ruangan a naluktan, nga awan ti makairikep—nga addaanka iti bassit a pannakabalin, ket tinaginayonmo ti saok ken saanmo a naglibakan ti naganko.” (Apocalipsis 3:8) Naregta idi dayta a kongregasion ket naluktan ti maysa a ruangan kadakuada—awan duadua a maysa a silulukat a gundaway nga agserbi iti tay-ak ti ministerio. (Idiligmo ti 1 Corinto 16:9; 2 Corinto 2:12.) Gapuna, pinaregta ni Jesus ti kongregasion nga aprobetsarenda ti gundaway a mangasaba. Nakapagibturda ken impakitada nga addaanda iti umdas a bileg, iti tulong ti espiritu ti Dios, tapno maitultuloyda ti kanayonan pay nga ‘aramidda’ iti panagserbida ken Jehova. (2 Corinto 12:10; Zacarias 4:6) Tinungpalda dagiti bilin ni Jesus ken saanda nga inlibak ni Kristo, iti sao man wenno aramid.

‘Agruknoydanto Kenka’

11. Ania a bendision ti inkari ni Jesus kadagiti Kristiano, ket kasano a natungpal daytoy?

¹¹ Gapuna, inkari ni Jesus dagiti nasayaat a bunga ti panagbannogda: “Adtoy! Itdekto dagidiay kameng ti sinagoga ni Satanas nga agkunkuna a Judioda, ket kaskasdi a saanda a kasta no di ket agul-ulbodda—adtoy! paumayekto ida ket agruknoyda iti sanguanan dagiti sakam ket ipakaammok kadakuada nga inay-ayatka.” (Apocalipsis 3:9) Kas idiay Smirna, nalabit nga adda dagiti parikut a naipasango iti kongregasion gapu kadagiti Judio nga agnanaed idiay Filadelfia. Inawagan ni Jesus dagitoy a “ti sinagoga ni Satanas.” Nupay kasta, maamiristo ti dadduma kadagitoy a Judio a pudno ti ikaskasaba dagiti Kristiano maipapan ken ni Jesus. Ti ‘panagruknoyda’ ket nalabit kas iti wagas a dineskribir ni Pablo iti 1 Corinto 14:24, 25, a mangiturong iti panagbabawida ken iti panagbalinda a Kristiano gapu ta naan-anay a mabigbigda ti naindaklan nga ayat ni Jesus babaen ti panangisakripisiona iti biagna maipuon kadagiti adalanna.—Juan 15:12, 13.

12. Apay a mabalin a maklaat dagiti miembro ti sinagoga dagiti Judio sadi Filadelfia no maammuanda a ti dadduma kadakuada ket ‘agruknoy’ kadagiti Kristiano sadiay?

¹² Mabalin a maklaat dagiti miembro ti sinagoga dagiti Judio idiay Filadelfia no maammuanda a ti dadduma kadakuada ket ‘agruknoy’ kadagiti Kristiano sadiay. Gapu ta adu dagiti saan a Judio nga adda iti dayta a kongregasion, namnamaenda a ti mismo a kasunganina ti mapasamak. Apay? Agsipud ta impadto ni Isaias: “Ti [saan a Judio nga] ar-ari agbalindanto nga agay-aywan maipaay kenka [dagiti umili ti Israel], ken dagiti prinsesada agtagtagibi a babbai maipaay kenka. Agruknoydanto kenka a dagiti rupada dumanon iti daga.” (Isaias 49:23; 45:14; 60:14) Umarngi iti dayta, napaltiingan ni Zacarias a nangisurat: “Mapasamakto kadagidiay nga aldaw a sangapulo a lallaki [dagiti saan a Judio] manipud kadagiti amin a pagsasao ti nasnasion kumpetdanto, wen, pudno a kumpetdanto iti pandiling ti maysa a lalaki a Judio, a kunkunada: ‘Kumuyogkaminto kadakayo, ta nangngegmi a ti Dios adda kadakayo.’” (Zacarias 8:23) Wen, dagiti saan a Judio ti agruknoy kadagiti Judio, saan ket a ti kasunganina!

13. Siasino dagiti Judio a pakatungpalan dagiti padto a naiturong iti nagkauna nga Israel?

¹³ Naiturong dagita a padto iti ili a pinili ti Dios. Idi naisawangda, adda ti natural nga Israel iti kasta a nadayaw a kasasaad. Ngem idi linaksid dagiti Judio ti Mesias, linaksid met idan ni Jehova. (Mateo 15:3-9; 21:42, 43; Lucas 12:32; Juan 1:10, 11) Idi Pentecostes ti 33 K.P., pinilina a kas kasukatda ti pudpudno nga Israel ti Dios, ti kongregasion Kristiano. Dagiti kamengna ket isu dagiti naespirituan a Judio a pudpudno a nakugit ti pusoda. (Aramid 2:1-4, 41, 42; Roma 2:28, 29; Galacia 6:16) Sipud idin, ti kakaisuna a pamay-an tapno maisubli dagiti indibidual a natural a Judio ti naanamongan a relasionda ken ni Jehova isu ti panamatida ken Jesus kas Mesias. (Mateo 23:37-39) Nabatad a daytoy idi ti mapaspasungad a mapasaran dagiti sumagmamano nga indibidual sadi Filadelfia.a

14. Kasano a naaddaan iti naisangsangayan a kaitungpalan ti Isaias 49:23 ken Zacarias 8:23 iti moderno a panawen?

¹⁴ Iti moderno a panawen, naaddaan iti naisangsangayan unay a kaitungpalan dagiti padto a kas iti Isaias 49:23 ken Zacarias 8:23. Kas resulta ti panangaskasaba ti klase Juan, umariwekwek dagiti simrek iti silulukat a ruangan tapno agserbida iti Pagarian.b Kaaduan kadagitoy ti rimmuar kadagiti relihion ti Kakristianuan a mangak-aklon kas naespirituan nga Israel idinto ta saan met. (Idiligmo ti Roma 9:6.) Kas maysa a dakkel a bunggoy, binugguanda dagiti pagan-anayda ket pinapudawda babaen ti panangipakitada iti pammati iti naidaton a dara ni Jesus. (Apocalipsis 7:9, 10, 14) Gapu ta agpaspasakupda iti turay ti Pagarian ni Kristo, inanamaenda a tawiden dagiti bendision nga iyeg dayta a Pagarian ditoy daga. Iti naespirituan nga anag, umadanida kadagiti napulotan a kakabsat ni Jesus ket “agruknoyda” kadakuada, agsipud ta ‘nangngegda a ti Dios adda kadakuada.’ Agserserbida kadagitoy a napulotan, a naikaykaysada kadakuada iti sangalubongan a timpuyog dagiti agkakabsat.—Mateo 25:34-40; 1 Pedro 5:9.

“Oras ti Pannakasubok”

15. (a) Ania ti inkari ni Jesus kadagiti Kristiano sadi Filadelfia, ken ania ti naiparegta nga aramidenda? (b) Ania a ‘korona’ ti ninamnama nga awaten dagiti Kristiano?

¹⁵ Kinuna pay ni Jesus: “Agsipud ta tinaginayonmo ti sao maipapan iti panagibturko, taginayonenkanto met iti oras ti pannakasubok, nga umay iti intero a mapagnaedan a daga, tapno suboken dagidiay agnanaed iti daga. Umayak a sidadaras. Itultuloymo a salimetmetan a sititibker ti adda kenka, tapno awan ti mangala iti koronam.” (Apocalipsis 3:10, 11) Nupay awan kadagiti Kristiano idi panawen ni Juan ti sibibiag pay laeng iti aldaw ti Apo (a nangrugi idi 1914), ti panagtalekda iti iyaay ni Jesus ti mangpabileg kadakuada nga agtultuloy a mangasaba. (Apocalipsis 1:10; 2 Timoteo 4:2) Ti ‘korona,’ wenno ti gunggona a biag nga agnanayon, ti agur-uray kadakuada sadi langit. (Santiago 1:12; Apocalipsis 11:18) No agtalinaedda a matalek agingga ken patay, awan ti asinoman a makaipaidam kadakuada iti dayta a gunggona.—Apocalipsis 2:10.

16, 17. (a) Ania ti “oras ti pannakasubok, nga umay iti intero a mapagnaedan a daga”? (b) Ania ti kasasaad dagiti napulotan idi rugrugi “ti oras ti pannakasubok”?

¹⁶ Ngem ania ti “oras ti pannakasubok”? Awan duadua a dagiti Kristiano idiay Asia masapul a daeranda ti ad-adda pay a pannakaidadanes manipud iti imperio ti Roma.c Nupay kasta, ti kangrunaan a kaitungpalanna ket ti panawen ti pannakasagat ken pannakaukom a dimteng iti aldaw ti Apo, a ti kangitingitanna ket nangrugi idi 1918 nga agpatpatuloy. Babaen ti pannakasubok, maikeddeng no ti maysa ket adda iti dasig ti naipasdeken a Pagarian ti Dios wenno iti lubong ni Satanas. Mapasamak daytoy iti ababa laeng a kanito, iti maysa nga “oras,” ngem di pay nalpas dayta. Agingga a di pay nalpas, ditay koma liplipatan nga agbibiagtayo iti “oras ti pannakasubok.”—Lucas 21:34-36.

¹⁷ Idi 1918, ti klase Juan a buklen dagiti napulotan a Kristiano—kas iti natibker a kongregasion sadi Filadelfia—ket naipasango iti ibubusor manipud iti “sinagoga ni Satanas” iti moderno a panawen. Dagiti narelihiosuan a lider ti Kakristianuan, a nangibilang iti bagbagida kas naespirituan a Judio, sisisikap nga immaniobrada dagiti agtuturay tapno mapasardengda dagiti pudno a Kristiano. Nupay kasta, inkagumaan dagitoy a ‘salimetmetan ti sao maipapan ti panagibtur ni Jesus.’ Gapuna, babaen ti naespirituan a tulong, ti piguratibo a “bassit a pannakabalin,” nakalasat ken naparegtada a sumrek iti ruangan a nakalukat iti sanguananda. Iti ania a wagas?

‘Silulukat a Ruangan’

18. Ania a panangdutok ti inaramid ni Jesus idi 1919, ken kasano a daydiay dinutokanna ket nagbalin a kas iti matalek a mayordomo ni Ezekias?

¹⁸ Idi 1919, tinungpal ni Jesus ti karina ket binigbigna ti bassit a grupo dagiti napudno a napulotan a Kristiano kas ti ‘matalek ken masirib nga adipenna.’ (Mateo 24:45-47) Immawat dagitoy iti pribilehio a kas iti tinagiragsak ti matalek a mayordomo a ni Eliakim idi panawen ni Ari Ezekias.d Kinuna ni Jehova maipapan ken Eliakim: “Ikabilkonto iti rabaw ti abagana ti tulbek ti balay ni David, ket luktannanto a saan nga irikep ti asinoman, ket irikepnanto a saan nga ilukat ti asinoman.” Imbaklay ni Eliakim dagiti nadagsen a responsabilidad para ken Ezekias, ti naarian nga anak ni David. Kasta met ita, “ti tulbek iti balay ni David” ket naipabaklay iti napulotan a klase Juan gapu ta naitalek iti dayta dagiti naindagaan nga interes ti Mesianiko a Pagarian. Pinabileg ni Jehova dagiti adipenna para iti daytoy a pribilehio, a pinagbalinna a dinamiko a bileg ti dati a bassit a pannakabalinda tapno mairingpasda ti sangalubongan a panangasaba.—Isaias 22:20, 22; 40:29.

19. Kasano nga intungpal ti klase Juan dagiti responsabilidad nga inted ni Jesus kenkuana idi 1919, ken ania ti resultana?

¹⁹ Manipud idi 1919, nangyussuat dagiti napulotan a natda iti naganetget a kampania a panangipaduyakyak iti naimbag a damag ti Pagarian kas panangsurot iti ulidan ni Jesus. (Mateo 4:17; Roma 10:18) Kas resultana, ti dadduma iti moderno a sinagoga ni Satanas, ti Kakristianuan, immadanida kadagiti napulotan a natda, nagbabawi ken ‘nagruknoyda,’ kas panangbigbigda iti autoridad dayta nga adipen. Nangrugida metten nga agserbi ken ni Jehova a naikaykaysa kadagiti lallakayen a kameng ti klase Juan. Nagtultuloy daytoy agingga a naurnong ti kompleto a bilang dagiti napulotan a kakabsat ni Jesus. Kalpasan daytoy, “maysa a dakkel a bunggoy . . . manipud kadagiti amin a nasion” ti immay ‘nagruknoy’ iti napulotan nga adipen. (Apocalipsis 7:3, 4, 9) Ti adipen ken daytoy a dakkel a bunggoy ket sangsangkamaysada nga agserserbi kas maymaysa nga arban dagiti Saksi ni Jehova.

20. Apay a dagiti Saksi ni Jehova ita ket masapul a nabileg iti pammati ken aktiboda nga agserserbi iti Dios?

²⁰ Kas kadagidi Kristiano sadi Filadelfia a nagkaykaysa iti singgalut ti pudpudno a nainkabsatan a panagayat, ammo dagiti Saksi ni Jehova ita a masapul a mairingpas a sigaganetget ti trabahoda a panangasaba. Din agbayag, gibusanton ti dakkel a rigat ti dakes a lubong ni Satanas. Sapay koma ta iti dayta a tiempo, tunggal maysa kadatayo ket nabileg iti pammati ken aktibo nga agserserbi ti Dios, tapno dinto mapunas ti nagantayo iti libro ti biag a kukua ni Jehova. (Apocalipsis 7:14) Ipapusotay koma ti pammatigmaan ni Jesus iti kongregasion idiay Filadelfia tapno masalimetmetantayo a sititibker dagiti pribilehiotayo iti serbisio ken magun-odtayo ti gunggona a biag nga agnanayon.

Dagiti Bendision nga Agpaay Kadagiti Agballigi

21. Kasano a dagiti napulotan a Kristiano ita ‘tinaginayonda ti sao maipapan iti panagibtur ni Jesus,’ ken ania a namnama ti agur-uray kadakuada?

²¹ Ti klase Juan ita ‘tinaginayonda ti sao maipapan iti panagibtur ni Jesus,’ kayatna a sawen, sinurotda ti ulidanna ken nagibturda. (Hebreo 12:2, 3; 1 Pedro 2:21) Naparegtada unay kadagiti simmaganad a sasao ni Jesus iti kongregasion idiay Filadelfia: “Daydiay agballigi—pagbalinekto nga adigi iti templo ti Diosko, ket saanton a pulos rummuar manipud iti dayta.”—Apocalipsis 3:12a.

22. (a) Ania ti templo ti Dios ni Jesus? (b) Kasano a dagiti napulotan a Kristiano nga agballigi ket agbalinto nga ad-adigi daytoy a templo?

²² Anian a naisangsangayan a pribilehio ti agbalin nga adigi iti templo ni Jehova! Iti nagkauna a Jerusalem, ti literal a templo ti sentro a pagdaydayawan ken Jehova. Iti uneg ti templo, maysa nga aldaw iti kada tawen nga idatag ti nangato a padi ti dara dagiti daton nga animal iti sanguanan ti datdatlag a lawag a mangirepresentar iti kaadda ni Jehova iti “Kasasantuan.” (Hebreo 9:1-7) Idi nabautisaran ni Jesus, timmaud ti sabali pay a templo, ti naindaklan a naespirituan nga arig templo nga urnos iti panagdayaw ken Jehova. Ti kasasantuan a templo ket adda idiay langit, a sadiay nagparang ni Jesus “iti sanguanan a mismo ti Dios.” (Hebreo 9:24) Ni Jesus ti Nangato a Padi, ken adda maymaysa laeng a daton a naan-anay a mangabbong kadagiti basol: ti naibukbok a dara ti perpekto a tao a ni Jesus. (Hebreo 7:26, 27; 9:25-28; 10:1-5, 12-14) No la ket ta agtalinaedda a matalek, dagiti napulotan a Kristiano ditoy daga agserbida kas papadi nga adda iti babaen ni Jesus iti naindagaan a paraangan daytoy a templo. (1 Pedro 2:9) Ngem apaman a nagballigida, sumrekda metten iti dayta nailangitan a kasasantuan a disso ken agbalinda a natitibker a sadiri, kasla ad-adigi, iti dayta arig templo nga urnos iti panagdayaw. (Hebreo 10:19; Apocalipsis 20:6) Awanen ti peggad a ‘rummuardanto pay sadiay.’

23. (a) Ania ti simmaruno nga inkari ni Jesus kadagiti napulotan a Kristiano nga agballigi? (b) Ania dagiti resulta ti pannakaisurat ti nagan ni Jehova ken ti nagan ti baro a Jerusalem kadagiti Kristiano nga agballigi?

²³ Intuloy a kinuna ni Jesus: “Ket isuratkonto kenkuana ti nagan ti Diosko ken ti nagan ti siudad ti Diosko, ti baro a Jerusalem a bumaba manipud langit nga aggapu iti Diosko, ken dayta baro a naganko.” (Apocalipsis 3:12b) Wen, naisurat kadagitoy nga agballigi ti nagan ni Jehova—ti Diosda ken ti Dios ni Jesus. Nabatad nga ipakita daytoy a ni Jehova ken ni Jesus ket dua a nagduma a persona, saan ket a dua a paset ti nagkatlo a Dios, wenno Trinidad. (Juan 14:28; 20:17) Masapul a makita ti intero a sangaparsuaan a dagitoy a napulotan ket kukua ni Jehova. Isuda dagiti saksina. Naisurat met kadakuada ti nagan ti baro a Jerusalem, ti nailangitan a siudad a bumabanto manipud langit, kayatna a sawen, dumanonto ti naayat a turayna iti intero a matalek a sangatauan. (Apocalipsis 21:9-14) Maammuanto met amin dagiti Kristiano a karnero ditoy daga a dagitoy napulotan nga agballigi ket makipagili iti Pagarian, ti nailangitan a Jerusalem.—Salmo 87:5, 6; Mateo 25:33, 34; Filipos 3:20; Hebreo 12:22.

24. Ania ti irepresentar ti baro a nagan ni Jesus, ken kasano a maisurat dayta kadagiti matalek a napulotan a Kristiano?

²⁴ Kamaudiananna, maisurat kadagiti napulotan nga agballigi ti baro a nagan ni Jesus. Tuktukoyen daytoy ti baro a saad ni Jesus ken dagiti naisangsangayan a pribilehio nga inted ni Jehova kenkuana. (Filipos 2:9-11; Apocalipsis 19:12) Awan ti sabali a makaammo iti dayta a nagan, iti anag nga awanen ti sabali pay a makapasar kadagita wenno pakaitalkan dagita a pribilehio. Nupay kasta, inton isurat ni Jesus ti naganna kadagiti matalek a kakabsatna, sumrekdanto iti nasinged a pannakirelasion kenkuana iti dayta nailangitan a disso ken makiramandanto pay kadagiti pribilehiona. (Lucas 22:29, 30) Di pakasdaawan nga inngudo ni Jesus ti mensahena kadagiti napulotan babaen ti panangulitna iti balakad a: “Daydiay addaan lapayag denggenna koma ti kunaen ti espiritu kadagiti kongregasion.”—Apocalipsis 3:13.

25. Kasano a mayaplikar ti tunggal Kristiano ita ti prinsipio iti balakad ni Jesus iti kongregasion idiay Filadelfia?

²⁵ Anian a makapabileg unay dayta a mensahe kadagiti matalek a Kristiano sadi Filadelfia! Ket sigurado a nagpateg ti masursuro iti dayta ti klase Juan ita, kabayatan ti aldaw ti Apo. Ngem dagiti prinsipio a linaonna ket napateg iti tunggal Kristiano, napulotan man wenno kameng dagiti sabsabali a karnero. (Juan 10:16) Nasayaat nga itultuloy ti tunggal maysa kadatayo ti mangpataud iti bunga ti Pagarian kas kadagidi Kristiano idiay Filadelfia. Uray kaskasano addaantay amin iti bassit a pannakabalin. Adda amin maaramidantayo iti panagserbitayo ken Jehova. Usarentay koma daytoy a pannakabalin! No maipapan kadagiti kanayonan a pribilehio a mainaig iti Pagarian, alertotayo koma a sumrek iti aniaman a ruangan a silulukat kadatayo. Mabalintay pay ketdi nga ikararag ken Jehova a luktanna ti kasta a ruangan. (Colosas 4:2, 3) Bayat a sursurotentayo ti ulidan ni Jesus iti panagibtur ken pampaneknekantayo a napudnotayo iti naganna, ipakpakitatayo nga addaantayo iti lapayag a madadaan a dumngeg iti ibagbaga ti nasantuan nga espiritu ti Dios kadagiti kongregasion.

[Dagiti Footnote]

[Kahon iti panid 63]

Panangtulong iti Adu nga Agruknoy

Kadagiti 144,000 a napulotan nga agtawid iti nailangitan a Pagarian, agparang nga adda pay nakurang a 9,000 a natda iti klase Juan a di pay nakaturpos iti panagbiagda ditoy daga. Maigiddato iti dayta, nasuroken a 6,600,000 ti bilang ti dakkel a bunggoy. (Apocalipsis 7:4, 9) Ania ti nakatulong iti daytoy dakkel nga irarang-ay? Dakkel ti naitulong dagiti nadumaduma nga eskuelaan nga imatmatonan dagiti Saksi ni Jehova. Dagitoy nga eskuelaan dagiti Saksi ket naiduma unay kadagiti seminario ti Kakristianuan a mangisursuro kadagiti nailubongan a pilosopia ken mangum-umsi iti Biblia. Dagitoy nga eskuelaan itukitda ti nauneg a pammati iti Sao ti Dios. Ipakita dagitoy no kasano a praktikal a mayaplikar ti Biblia no maipapan iti nadalus, nadayaw a wagas ti panagbiag ken ti dedikado a panagserbi iti Dios. Iti intero a lubong sipud idi 1943, maikonkondukta iti tunggal kongregasion dagiti Saksi ni Jehova kadagiti Kingdom Hall-da ti Teokratiko nga Eskuelaan ti Panagministro. Minilion dagiti tumabtabuno iti daytoy nga eskuelaan iti kada lawas, a sursurotenda ti nagkaykaysa a programa a panangisuro iti Biblia.

Sipud idi 1959, mangikonkondukta met dagiti Saksi ni Jehova iti Kingdom Ministry School a pakasanayan dagiti panglakayen ken ministerial nga adipen iti kongregasion. Ket sipud idi 1977, ginasut a kakabsat a lallaki ken babbai ti nasanayen iti Pioneer Service School. Addaan dagitoy a kakabsat iti pudno nga espiritu a kas kadagiti taga-Filadelfia, nga agserserbi ken ni Jehova iti amin a tiempo iti trabaho a panangasaba. Idi 1987, nairugi ti Ministerial Training School a pakasanayan dagiti lallaki a Saksi para kadagiti naisangsangayan nga annongen iti sangalubongan a tay-ak.

Ti Naisangsangayan kadagiti eskuelaan nga imatmatonan dagiti Saksi ni Jehova ket ti Watchtower Bible School of Gilead. Sipud idi 1943, dua a grupo dagiti estudiante iti gistay kada tawen ti agturturpos iti daytoy nga eskuelaan dagiti misionero, a masarakan idiay New York State. No gupgopen, nasuroken a 7,000 a ministro ni Jehova ti nasanay iti daytoy nga eskuelaan tapno agserbida kas misionero kadagiti sabali a pagilian. Nasuroken a sangagasut a pagilian ti nakaibaonan dagiti nagturpos, ket nausarda a mangilukat iti trabaho mainaig iti Pagarian iti adu kadagita a pagilian. Kalpasan ti agarup 60 a tawen, ti dadduma kadagidi immuna a misionero ket agserserbi pay laeng iti nakaibaonanda, a kabimbinnuligda dagiti kabbaro a misionero a mangidur-as iti sangalubongan a panagsaknap ti organisasion ni Jehova. Anian a nakaskasdaaw a panagsaknap daytoy!

[Tsart iti panid 64]

Idi 1919 linuktan ti agturturayen nga ari a ni Jesus ti maysa a ruangan ti oportunidad para iti Nakristianuan a serbisio. Umad-adu dagiti dedikado a Kristiano a mangap-aprobetsar iti daytoy nga oportunidad.

Pagilian Dagiti Amin-

a Nadanon Kristiano a Tiempo

ti Pana- Nakiraman iti a Mana-

Tawen ngaskasaba Panangasabae ngaskasabaf

1918 14 3,868 591

1928 32 23,988 1,883

1938 52 47,143 4,112

1948 96 230,532 8,994

1958 175 717,088 23,772

1968 200 1,155,826 63,871

1978 205 2,086,698 115,389

1988 212 3,430,926 455,561

1998 233 5,544,059 698,781

2005 235 6,390,022 843,234

[Dagiti Footnote]

[Tsart iti panid 65]

Naimpusuan ti trabaho dagiti Saksi ni Jehova. Kas pagarigan, usigem dagiti oras a binusbosda iti panangasaba ken panangisuro ken ti nagadu a libre a panangyadal iti Biblia nga ikonkonduktada iti pagtaengan dagiti tattao.

Nabusbos nga Oras Naikondukta a

iti Panangasaba Panangyadal iti Biblia

(Dagup iti (Binulan a

Tawen Makatawen) Promedio)

1918 19,116 Di Nairekord

1928 2,866,164 Di Nairekord

1938 10,572,086 Di Nairekord

1948 49,832,205 130,281

1958 110,390,944 508,320

1968 208,666,762 977,503

1978 307,272,262 1,257,084

1988 785,521,697 3,237,160

1998 1,186,666,708 4,302,852

2005 1,278,235,504 6,061,534

[Ladawan iti panid 59]

Maysa a tulbek dagiti Romano idi umuna a siglo