Kapitulo 15

“Siasino ti Maikari a Mangukrad iti Lukot?”

 1. Ania ti mapaspasamak itan iti sirmata ni Juan?

NADAYAG! NAKAAM-AMAK! Kasta ti makatukay-rikna a sirmata maipapan iti trono ni Jehova nga adda iti tengnga dagiti pagsilawan nga apuy, kerubin, 24 a panglakayen, ken ti simmarming a baybay. Ngem ania ti sumaruno a makitam, Juan? Impamaysa ni Juan ti panangmatmatna iti mismo a sentro daytoy nailangitan nga eksena. Kinunana: “Ket nakitak iti makannawan nga ima Daydiay situtugaw iti trono ti maysa a lukot a nasuratan iti uneg ken iti ruar, siiirut a naselioan iti pito a selio. Ket nakitak ti maysa a napigsa nga anghel a mangiwarwaragawag buyogen ti natbag a timek: ‘Siasino ti maikari a mangukrad iti lukot ken mangwarwar kadagiti seliona?’ Ngem awan uray maysa idiay langit wenno iti rabaw ti daga wenno iti uneg ti daga ti makabalin a mangukrad iti lukot wenno kumita iti unegna. Ket nagsangitak iti napalalo agsipud ta awan maysa a nasarakan a maikari a mangukrad iti lukot wenno kumita iti unegna.”—Apocalipsis 5:1-4.

2, 3. (a) Apay a magagaran ni Juan nga adda koma masarakan a mangukrad iti lukot, ngem ania ti kasla manamnama iti dayta? (b) Iti tiempotayo, ania ti segseggaan dagiti napulotan nga adipen ti Dios?

² Ni Jehova a mismo, ti Soberano nga Apo iti intero a sangaparsuaan, ti mangyaw-awat iti dayta a lukot. Napno la ketdi dayta kadagiti napateg nga impormasion gapu ta nasuratan iti agsumbangir. Magagarantayo unayen. Ania ti linaon ti lukot? Lagipentayo ti awis ni Jehova ken Juan: “Umulika ditoy, ket ipakitak kenka ti bambanag a masapul a maaramid.” (Apocalipsis 4:1) Buyogen ti panangsegga, magagarantayo a mangammo kadagita a banag. Ngem anian ta nakair-irut ti pannakalukot ti pagbasaan sa natimbrean iti pito a selio!

³ Adda kadi masarakan ti napigsa nga anghel a maikari a mangukrad iti lukot? Sigun iti Kingdom Interlinear, ti lukot ket adda “iti makannawan nga ima” ni Jehova. Ipasimudaag daytoy a ti lukot ket iyaw-awat ti silulukat a dakulapna. Ngem agparang nga idiay man langit wenno ditoy daga, awan ti maikari nga umawat ken mangukrad iti dayta a lukot. Uray pay iti uneg ti daga, kadagiti natayen a matalek nga adipen ti Dios, awan ti asinoman a maikari iti daytoy a natan-ok a dayaw. Di ngarud pakasdaawan a nakadkadlaw ti panagleddaang ni Juan! Nalabit dinan maammuan dagiti “bambanag a masapul a maaramid.” Iti kaaldawantayo, segseggaan met dagiti napulotan nga adipen ti Dios ti panangipaay ni Jehova iti lawag ken kinapudno maipapan iti Apocalipsis. In-inut nga aramidenna daytoy iti naikeddeng a tiempo a pannakatungpal ti padto, tapno maidalanna ti ilina nga agturong iti “naindaklan a pakaisalakanan.”—Salmo 43:3, 5.

Daydiay Maikari

 4. (a) Siasino ti nasarakan a maikari a mangukrad iti lukot ken manglukat kadagiti seliona? (b) Ania a gunggona ken pribilehio ti sagsagrapen ita ti klase Juan ken dagiti kakaduada?

⁴ Wen, adda maysa a maikari a mangukrad iti lukot! Insalaysay ni Juan: “Ngem kuna kaniak ti maysa kadagiti panglakayen: ‘Sumardengka nga agsangit. Adtoy! Ti Leon a nagtaud iti tribu ni Juda, ti ramut ni David, nagballigi tapno ukradenna ti lukot ken ti pito a seliona.’” (Apocalipsis 5:5) Gapuna, punasem dagiti luam, Juan! Ti klase Juan ken dagiti nasungdo a kakaduada ita ket adu a tawen a nagibtur met kadagiti nakaro a suot bayat a siaanus nga agur-urayda iti pannakalawlawag. Anian a makaliwliwa a gunggona ti pannakatarustayo iti sirmata, ken anian a pribilehio ti pannakiramantayo iti pannakatungpalna babaen ti panangiwaragawagtayo iti mensahena kadagiti sabsabali!

 5. (a) Ania ti naipadto maipapan ken Juda, ken sadino ti nagturayan dagiti kaputotan ni Juda? (b) Siasino ti Silo?

⁵ Ah, “ti Leon a nagtaud iti tribu ni Juda”! Kabesado ni Juan ti impadto ni Jacob, a kapuonan dagiti Judio, maipapan iti maikapat nga anakna a ni Juda: “Ni Juda maysa nga urbon a leon. Manipud iti inanupan, anakko, pudno unay a sumang-atkanto. Isu nagrukob, nagunnat a kas leon ket, kas maysa a leon, siasino ti makaitured a mangriing kenkuana? Ti setro saanto a sumina ken Juda, uray ti sarukod ti komandante iti baet dagiti sakana, agingga nga umay ti Silo; ket isunto ti pagpaayan ti panagtulnog dagiti ili.” (Genesis 49:9, 10) Agtaud ken Juda ti naarian a kapuonan ti ili ti Dios. Mangrugi ken David, bin-ig a kaputotan ni Juda dagiti ari a nagturay idiay Jerusalem agingga a dinadael dagiti taga-Babilonia dayta a siudad. Ngem awan kadakuada ti Silo nga impadto ni Jacob. “Isu a Makin[kalintegan] iti Dayta” ti kayat a sawen ti Silo. Ti tuktukoyen ti padto isu ni Jesus, ti permanente a makinkukua iti Pagarian ni David.—Ezequiel 21:25-27; Lucas 1:32, 33; Apocalipsis 19:16.

 6. Kasano a ni Jesus ket “saringit” ni Jesse ken “ramut ni David”?

⁶ Nailasin a dagus ni Juan no siasino ti nadakamat a “ramut ni David.” Naipadto a ti naikari a Mesias ket maawagan kas “saringit manipud iti pungdol ni Jesse [nga ama ni Ari David] . . . maysa a tarubong” ken “ti ramut ni Jesse a sitatakder kas maysa a pagilasinan a maipaay iti il-ili.” (Isaias 11:1, 10) Ni Jesus ket saringit ni Jesse gapu ta nayanak iti naarian a kapuonan ni David nga anak ni Jesse. Maysa pay, kas ramut ni Jesse, isu Daydiay namagrusing iti dinastia ni David, nga impaayanna dayta iti biag ken isu pay ti mangsussustiner iti dayta iti agnanayon.—2 Samuel 7:16.

 7. Apay a maikari ni Jesus nga umawat iti lukot manipud iti ima Daydiay situtugaw iti trono?

⁷ Kas perpekto a tao, ni Jesus ti kangrunaan a nagserbi ken ni Jehova buyogen ti kinasungdo ken iti sidong dagiti nakasasaem a suot. Naan-anay a nasungbatanna ti karit ni Satanas. (Proverbio 27:11) Gapuna, iti daydi rabii sakbay ti ipapatayna kas daton, naikunana, “Pinarmekko ti lubong.” (Juan 16:33) Dayta ti gapuna a ni Jehova intalekna ken ni napagungar a Jesus ti “isuamin nga autoridad . . . idiay langit ken ditoy daga.” Kadagiti amin nga adipen ti Dios, ni laeng Jesus ti maikari nga umawat iti lukot tapno ipakaammona ti nakapatpateg a mensahe a linaonna.—Mateo 28:18.

 8. (a) No maipapan iti Pagarian, apay a maikari ni Jesus? (b) Apay a maitutop a maysa kadagiti 24 a panglakayen ti mangipalgak ken Juan no siasino ti maikari a mangukrad iti lukot?

⁸ Pudno a maikari ni Jesus a mangukrad iti lukot. Isu ket naisaaden kas Ari iti Mesianiko a Pagarian ti Dios sipud pay idi 1914. Adu ti ipalgak dayta a lukot maipapan iti Pagarian ken no ania ti ibanagna. Idi adda ni Jesus ditoy daga, simamatalek a sinaksianna ti kinapudno maipapan iti Pagarian. (Juan 18:36, 37) Sinuruanna dagiti pasurotna nga ikararagda ti iyaay ti Pagarian. (Mateo 6:9, 10) Inyussuatna ti pannakaikasaba ti naimbag a damag ti Pagarian idi nangrugi ti panawen dagiti Kristiano ken impadtona a dumteng iti kangitingitanna dayta a trabaho a panangasaba iti panawen ti panungpalan. (Mateo 4:23; Marcos 13:10) Maitutop met a maysa kadagiti 24 a panglakayen ti mangipalgak ken Juan a ni Jesus ti manglukat kadagiti selio. Apay? Gapu ta situtugaw dagitoy a panglakayen kadagiti trono ken nakakoronada kas kakadua ni Kristo a makipagtawid iti Pagarianna.—Roma 8:17; Apocalipsis 4:4.

‘Ti Kordero a Napapatay’

 9. Imbes a leon, ania ti nakita ni Juan nga agtaktakder “iti nagtengngaan ti trono,” ken kasano ti panangdeskribirna iti dayta?

⁹ Inturong ni Juan ti imatangna iti daytoy a “Leon a nagtaud iti tribu ni Juda.” Ngem anian a nakaskasdaaw! Naidumduma a simboliko a langa ti nagparang: “Ket nakitak nga agtaktakder iti nagtengngaan ti trono ken ti uppat a sibibiag a parsua ken iti tengnga dagiti panglakayen ti maysa a kordero a kasla napapatay, nga addaan iti pito a sara ken pito a mata, a dagiti mata kaipapananda ti pito nga espiritu ti Dios a naibaon iti intero a daga.”—Apocalipsis 5:6.

10. Siasino ti “kordero” a nakita ni Juan, ken apay a maitutop dayta a termino?

¹⁰ Adda kordero iti mismo a tengnga, iti abay ti trono a napalikmutan kadagiti uppat a sibibiag a parsua ken dagiti 24 a panglakayen! Awan duadua a nailasin a dagus ni Juan daytoy a kordero kas “ti Leon a nagtaud iti tribu ni Juda” ken “ti ramut ni David.” Ammona a, nasurok nga 60 a tawen sakbayna, ni Jesus ket inyam-ammo ni Juan a Mammautisar kadagidi umim-imatang a Judio kas “ti Kordero ti Dios a mangikkat iti basol ti lubong!” (Juan 1:29) Nagtalinaed ni Jesus a di natulawan ti lubong iti intero a panagbiagna ditoy daga—kas iti kordero nga awan pakapilawanna—tapno maidatonna ti awanan basol a biagna kas sakripisio agpaay iti sangatauan.—1 Corinto 5:7; Hebreo 7:26.

11. Apay a saan a panangipababa ti pannakailadawan ni naipadayag a Jesus kas “maysa a kordero a kasla napapatay”?

¹¹ Maysa kadi a panangtagibassit wenno panangipababa ti pannakailadawan ni naipadayag a Jesus kas “maysa a kordero a kasla napapatay”? Saan a pulos! Ti panagtalinaed ni Jesus a matalek agingga ken patay ket dakkel a pannakaabak para ken Satanas ken dakkel a balligi para ken Jehova a Dios. Ti kastoy a pannakadeskribir ni Jesus nabatad nga iladawanna ti panangparmekna iti lubong ni Satanas ken ipalagipna ti napalalo a panagayat da Jehova ken Jesus iti sangatauan. (Juan 3:16; 15:13; idiligmo ti Colosas 2:15.) No kasta, ni Jesus ti naikari a Bin-i a kualipikado unay a mangukrad iti lukot.—Genesis 3:15.

12. Ania ti iladladawan dagiti pito a sara ti Kordero?

¹² Ania pay ti mangnayon iti apresasiontayo iti daytoy a “kordero”? Adda pito a sarana. Iti Biblia, pannakabalin wenno autoridad ti masansan nga isimbolo dagiti sara, ket ti pito ipasimudaagna ti kinanaan-anay. (Idiligmo ti 1 Samuel 2:1, 10; Salmo 112:9; 148:14.) No kasta, dagiti pito a sara ti Kordero iladawanda ti kinanaan-anay ti pannakabalin nga intalek ni Jehova ken ni Jesus. Isu ket “adayo a nangatngato ngem iti tunggal gobierno ken autoridad ken pannakabalin ken kinaapo ken iti tunggal nagan a naipanagan, saan laeng nga iti daytoy a sistema ti bambanag, no di ket kasta met iti daydiay umayto.” (Efeso 1:20-23; 1 Pedro 3:22) Naaddaan ni Jesus iti naisangsangayan nga autoridad, ti autoridad a mangituray manipud pay idi 1914, idi isu ket insaad ni Jehova kas nailangitan nga Ari.—Salmo 2:6.

13. (a) Ania ti iladladawan dagiti pito a mata ti Kordero? (b) Ania ti inaramid ti Kordero?

¹³ Maysa pay, naan-anay a napno ni Jesus iti nasantuan nga espiritu, kas iladawan dagiti pito a mata ti Kordero, a “kaipapananda ti pito nga espiritu ti Dios.” Ni Jesus ti maysa a maus-usar a kalasugan tapno ti agtigtignay nga aktibo a puersa ni Jehova ket naan-anay nga agayus kadagiti adipenna ditoy daga. (Tito 3:6) Babaen iti daytoy nga espiritu, nabatad a makitana manipud langit ti mapaspasamak ditoy daga. Addaan ni Jesus iti naan-anay a pannakaawat a kas ken Amana. Awan ti makalisi iti imatangna. (Idiligmo ti Salmo 11:4; Zacarias 4:10.) Nalawag a daytoy nga Anak—a nagtalinaed a natarnaw ken nangparmek iti lubong; ti Leon iti tribu ni Juda; ti ramut ni David; daydiay nangidaton iti biagna gapu iti sangatauan; daydiay addaan iti naan-anay nga autoridad ken naipaayan iti naan-anay a nasantuan nga espiritu, ken addaan iti naan-anay a pannakaawat a naggapu ken Jehova a Dios—wen, isu ket maikari unay nga umawat iti lukot manipud iti ima ni Jehova. Bumdeng kadi nga umawat iti daytoy nga annongen nga agserbi iti natan-ok nga organisasion ni Jehova? Saan! Imbes ketdi, “napan ken dagus nga innalana dayta [ti lukot] manipud iti makannawan nga ima Daydiay situtugaw iti trono.” (Apocalipsis 5:7) Anian a nagsayaat nga ulidan iti kinatulok!

Dagiti Kanta a Pammadayaw

14. (a) Ania ti reaksion dagiti uppat a sibibiag a parsua ken dagiti 24 a panglakayen idi innala ni Jesus ti lukot? (b) Kasano a ti impormasion nga inawat ni Juan maipapan kadagiti 24 a panglakayen pasingkedanna ti kinasiasino ken ti saadda?

¹⁴ Ania ti reaksion dagidiay dadduma nga adda iti sanguanan ti trono ni Jehova? “Ket idi innalana ti lukot, ti uppat a sibibiag a parsua ken ti duapulo ket uppat a panglakayen nagruknoyda iti sanguanan ti Kordero, nga addaanda tunggal maysa iti arpa ken nabalitokan a malmalukong a napno iti insienso, ket ti insienso kaipapananna ti karkararag dagiti sasanto.” (Apocalipsis 5:8) Kas kadagiti uppat a sibibiag a parsua a kerubin nga adda iti sanguanan ti trono ti Dios, dagiti 24 a panglakayen nagruknoyda ken Jesus kas panangbigbig iti autoridadna. Ngem dagitoy laeng a panglakayen ti addaan kadagiti arpa ken malukong a napno iti insienso.a Ken isuda laeng ti agkankanta iti baro a kanta. (Apocalipsis 5:9) Kaarngida ngarud dagiti 144,000 a kameng ti nasantuan nga “Israel ti Dios,” nga addaan met kadagiti arpa ken agkankanta iti baro a kanta. (Galacia 6:16; Colosas 1:12; Apocalipsis 7:3-8; 14:1-4) Maysa pay, naipakita dagiti 24 a panglakayen a mangtungtungpal iti nailangitan, napadian nga annong, nga inladawan dagiti padi iti nagkauna nga Israel a mangpupuor idi iti insienso maipaay ken Jehova iti tabernakulo—maysa nga annong a nagpatingga ditoy daga idi inikkat ti Dios ti Mosaiko a Linteg babaen ti panangilansana iti dayta iti kayo a pagtutuokan ni Jesus. (Colosas 2:14) Ania ti masursurotayo kadagitoy? Ipakitana a dagiti napulotan a nagballigi ar-aramidenda ti kangrunaan nga annongenda kas ‘papadi ti Dios ken ni Kristo, a makipagturayda kenkuana kas ar-ari iti sangaribu a tawen.’—Apocalipsis 20:6.

15. (a) Iti Israel, siasino laeng ti makastrek iti Kasasantuan a paset ti tabernakulo? (b) Para iti nangato a padi, apay a biag wenno ipapatay ti kaipapanan ti panangpuorna iti insienso sakbay a sumrek iti Kasasantuan?

¹⁵ Iti nagkauna nga Israel, ti laeng nangato a padi ti makastrek iti Kasasantuan iti sango ti simboliko a presensia ni Jehova. Para kenkuana, biag wenno ipapatay ti kaipapanan ti panangawit iti insienso. Kuna ti linteg ni Jehova: “[Ni Aaron] masapul nga alaenna ti pagikkan ti apuy a napno kadagiti sumsumged a beggang ti apuy manipud iti altar iti sanguanan ni Jehova, ket dagiti lukong ti dua nga imana napno iti napino a napabanglo nga insienso, ket masapul nga iyegna ida iti uneg ti kortina. Masapul met nga ikabilna ti insienso iti apuy iti sanguanan ni Jehova, ket ti ulep ti insienso masapul nga abbungotanna ti kalub ti Lakasa, nga adda iti rabaw ti Pammaneknek, tapno isu saan a matay.” (Levitico 16:12, 13) Sa la makastrek ti nangato a padi iti Kasasantuan no mangpuor iti insienso.

16. (a) Iti Nakristianuan a sistema ti bambanag, siasino ti makastrek iti Kasasantuan? (b) Apay a masapul nga ‘agpuor iti insienso’ dagiti napulotan a Kristiano?

¹⁶ Iti Nakristianuan a sistema ti bambanag, saan laeng a ti Nangato a Padi a ni Jesu-Kristo (ti iladladawan ti nangato a padi iti nagkauna nga Israel) no di pay ket dagiti 144,000 a katulongan a papadi ti makastrek iti mismo nga ayan ni Jehova idiay langit (ti iladladawan ti Kasasantuan a paset ti tabernakulo). (Hebreo 10:19-23) Kas inladawan dagiti 24 a panglakayen, makastrek laeng dagitoy a padi iti Kasasantuan no ‘agpuorda iti insienso,’ kayatna a sawen, naynay nga agidatonda kadagiti kararag ken araraw ken ni Jehova.—Hebreo 5:7; Judas 20, 21; idiligmo ti Salmo 141:2.

Baro a Kanta

17. (a) Ania a baro a kanta ti kankantaen dagiti 24 a panglakayen? (b) Ania ti masansan a nakausaran ti ebkas a “baro a kanta” iti Biblia?

¹⁷ Ita mangngeganen ti naayug a kanta. Ti Kordero ti kinantaan dagiti padi a kaduana, dagiti 24 a panglakayen: “Ket kankantaenda ti maysa a baro a kanta, a kunkunada: ‘Maikarika a mangala iti lukot ken manglukat kadagiti seliona, agsipud ta napapatayka ket babaen iti daram nanggatangka iti tattao maipaay iti Dios manipud iti tunggal tribu ken pagsasao ken ili ken nasion.’” (Apocalipsis 5:9) Namin-adu a nausar ti ebkas a “baro a kanta” iti Biblia ken masansan a tuktukoyenna ti panangidayaw ken ni Jehova gapu iti nakaskasdaaw a panangispalna. (Salmo 96:1; 98:1; 144:9) Baro ti kanta gapu ta ti agkankanta mabalinnan nga iwaragawag dagiti dadduma pay a nakaskasdaaw nga aramid ni Jehova ken iyebkas ti napabaro nga apresasion iti nadayag a naganna.

18. Apay a dagiti 24 a panglakayen idaydayawda ni Jesus babaen ti baro a kantada?

¹⁸ Nupay kasta, ti baro a kanta ket kankantaen dagiti 24 a panglakayen iti sanguanan ni Jesus imbes nga iti sanguanan ni Jehova. Ngem awan dumana dayta. Idaydayawda ni Jesus, kas Anak ti Dios, gapu kadagiti baro a banag nga inaramidna agpaay kadakuada. Isu ti nangibabaet iti baro a tulag babaen ti darana ket gapu iti dayta naipasngay ti baro a nasion kas naisangsangayan a sanikua ni Jehova. (Roma 2:28, 29; 1 Corinto 11:25; Hebreo 7:18-25) Nagduduma a nasion ti naggapuan dagiti kameng daytoy baro a naespirituan a nasion, ngem pinagkaykaysa ida ni Jesus iti maymaysa a kongregasion kas maysa a nasion.—Isaias 26:2; 1 Pedro 2:9, 10.

19. (a) Ania a bendision ti saan a nagun-odan ti natural nga Israel gapu iti saanda a panagtalinaed a matalek? (b) Ania a bendision ti tagiragsaken ti baro a nasion ni Jehova?

¹⁹ Idi binuangay ni Jehova dagiti Israelita kas maysa a nasion idi kaaldawan ni Moises, nakitulag kadakuada ken inkarina nga agbalindanto a pagarian dagiti padi iti saklangna no salimetmetanda dayta a tulag. (Exodo 19:5, 6) Saan a nagmatalek dagidi nga Israelita ket pulos a saan a natungpal kadakuada dayta a kari. Iti sabali a bangir, nagtalinaed a matalek ti baro a nasion a nabuangay babaen ti baro a tulag nga imbabaet ni Jesus. Dagiti ngarud kamengna iturayanda ti daga kas ar-ari ken agserbida pay kas papadi, a tulonganda dagiti nalinteg panagpuspusona a tattao a makikappia ken Jehova. (Colosas 1:20) Maitunos dayta iti adda a nayebkas iti baro a kanta: “Ket pinagbalinmo ida a kas pagarian ken papadi iti Diostayo, ket agturayda a kas ar-ari iti daga.” (Apocalipsis 5:10) Anian a rag-o dagiti 24 a panglakayen a mangkankanta iti baro a kanta a pammadayaw ken ni naipadayag a Jesus!

Ti Nailangitan a Koro

20. Ania a kanta a pammadayaw iti Kordero ti mangmangngegan itan?

²⁰ Ania ti reaksion ti dadduma pay kadagiti umariwekwek a buyot ti nailangitan nga organisasion ni Jehova iti daytoy a baro a kanta? Naragsakan ni Juan a nakaimatang iti naimpusuan a pannakidanggayda: “Ket nakitak, ket nangngegko ti timek ti adu nga anghel iti aglawlaw ti trono ken dagiti sibibiag a parsua ken dagiti panglakayen, ket ti bilangda linaklaksa a laksa ken rinibu a ribu, a kunkunada buyogen iti natbag a timek: ‘Ti Kordero a napapatay ket maikari nga umawat iti pannakabalin ken kinabaknang ken sirib ken bileg ken dayaw ken dayag ken bendision.’” (Apocalipsis 5:11, 12) Anian a makatukay a kanta a pagdayaw!

21. Ti kadi pannakaidayaw ti Kordero kissayanna ti kinasoberano wenno saad ni Jehova? Ilawlawagmo.

²¹ Kayatna kadi a sawen a ni Jesus sinuktannan ni Jehova a Dios ket amin a parsua agdayawdan kenkuana imbes nga iti Amana? Adayo a kasta! Imbes ketdi, daytoy a kanta a pammadayaw ket maitunos iti insurat ni apostol Pablo: “[Ni Jesus] intan-ok ti Dios iti nangatngato a saad ket siaasi nga inikkanna iti nagan a nangatngato ngem iti tunggal sabali pay a nagan, tapno iti nagan ni Jesus agparintumeng koma ti tunggal tumeng dagidiay adda sadi langit ken dagidiay adda ditoy daga ken dagidiay adda iti uneg ti daga, ket sipapanayag a bigbigen koma ti tunggal dila a ni Jesu-Kristo ket Apo iti dayag ti Dios nga Ama.” (Filipos 2:9-11) Naitan-ok ni Jesus gapu iti panangrisutna iti kangrunaan nga isyu iti imatang ti sangaparsuaan—ti pannakaalangon ti kalintegan ni Jehova kas soberano. Anian a pakaidayawan daytoy ni Amana!

Pumigpigsa a Himno

22. Iti ania a himno a makidangdanggay dagiti timek ditoy daga?

²² Iti eksena a dineskribir ni Juan, agkankanta dagiti buyot idiay langit iti makaay-ayo a pammadayaw ken Jesus kas panangbigbigda iti kinamatalek ken autoridadna idiay langit. Iti daytoy a banag, adda met dagiti timek ditoy daga a makidangdanggay kadakuada bayat a makiramramanda a mangidayaw iti Ama ken ti Anak. No kasano a pakaidayawan dagiti nagannak ti magapuanan ti anakda, kasta met a ti kinasungdo ni Jesus ket nasayaat ti epektona iti sangaparsuaan nga agpaay iti “dayag ti Dios nga Ama.” Gapuna, intuloy a kinuna ni Juan: “Ket tunggal parsua nga adda idiay langit ken iti rabaw ti daga ken iti uneg ti daga ken iti baybay, ken amin a bambanag nga adda kadakuada, nangngegko a kunkunada: ‘Iti Daydiay situtugaw iti trono ken iti Kordero maadda koma ti bendision ken ti dayaw ken ti dayag ken ti pannakabalin iti agnanayon ken awan inggana.’”—Apocalipsis 5:13.

23, 24. (a) Ania ti mangipasimudaag no kaano a nangrugi ti himno idiay langit, ken no kaano met ditoy daga? (b) Kasano a pimmigsa dayta a himno iti panaglabas dagiti tawen?

²³ Kaano a mangngegan daytoy a nangayed a himno? Idi rugrugi ti aldaw ti Apo. Kalpasan a naitapuak ni Satanas ken dagiti demoniona manipud langit, “tunggal parsua nga adda idiay langit” nagkaykaysada a nangkanta iti daytoy a kanta a pammadayaw. Ket kas ipakita ti rekord, manipud idi 1919 umadu nga umadu dagiti tattao ditoy daga a manginaynayon iti timekda a mangidaydayaw ken ni Jehova. Sumagmamano a ribu laeng idi ti bilangda, ngem idi tawen 2005 nasurokdan nga innem a milion.b Kalpasan a madadael ti sistema ni Satanas ditoy daga, “tunggal parsua . . . iti rabaw ti daga” agkantanto kadagiti pagdaydayaw ken ni Jehova ken iti Anakna. Iti tiempo nga inkeddeng ni Jehova, mapagungarto dagiti riniwriw a natay, ket “tunggal parsua . . . iti uneg ti daga” nga adda iti lagip ti Dios maaddaandanto iti gundaway a makidanggay a mangkanta iti himno.

²⁴ Uray pay itan, “manipud iti ungto ti daga . . . iti baybay ken . . . isla,” ti baro a kanta ket kankantaenen ti minilion a naitimpuyog iti sangalubongan nga organisasion ni Jehova. (Isaias 42:10; Salmo 150:1-6) Magtengto ti tampok daytoy a naragsak a panagdayaw inton agngudo ti Milenio, inton perpekton ti sangatauan. Kalpasanna, madadaelton ti kadaanan a serpiente ken ti kangrunaan a manangallilaw a ni Satanas, kas naan-anay a kaitungpalan ti Genesis 3:15, ket iti naballigi a tampokna, agkaykaysanto nga agkanta ti amin a sibibiag a parsua, espiritu man wenno tattao: “Iti Daydiay situtugaw iti trono ken iti Kordero maadda koma ti bendision ken ti dayaw ken ti dayag ken ti pannakabalin iti agnanayon ken awan inggana.” Awanton ti naiduma a timek iti intero nga uniberso.

25. (a) Ti pannakabasatayo iti salaysay ni Juan maipapan iti sapasap a himno tignayennatayo a mangaramid iti ania? (b) Ania a nagsayaat nga ulidan ti impaay kadatayo dagiti uppat a sibibiag a parsua ken dagiti 24 a panglakayen iti ngudo ti sirmata?

²⁵ Anian a nagragsakto dayta a tiempo! Awan duadua a dagiti dineskribir ni Juan lapunosenna ti pusotayo iti rag-o ken tignayennatayo a makidanggay kadagiti nailangitan a buyot nga agkanta a naimpusuan kadagiti pagdaydayaw ken ni Jehova a Dios ken ni Jesu-Kristo. Ad-adda kadi a determinadotayo ita a mangitultuloy kadagiti nasayaat nga aramidtayo? No aramidentayo ti kasta, manamnamatayo nga iti tulong ni Jehova, addanto sadiay ti tunggal maysa kadatayo a makidanggay iti dayta a sapasap a koro a pagdayaw inton dumteng ti naragsak a tampokna. Nabatad a naan-anay nga agtutunos dagiti uppat a sibibiag a parsua a kerubin ken dagiti napagungar a napulotan a Kristiano, ta nagngudo ti sirmata kadagitoy a sasao: “Ket kinunkuna ti uppat a sibibiag a parsua: ‘Amen!’ ket nagruknoy dagiti panglakayen ket nagdaydayawda.”—Apocalipsis 5:14.

26. Nasken nga ipakitatayo ti pammati iti ania, ket ti Kordero nakasaganan a mangaramid iti ania?

²⁶ Kenka a patpatgenmi nga agbasbasa, sapay koma ta ipakitam ti pammatim iti daton ti Kordero—‘daydiay maikari’—ket mabendisionanto ti panangikagumaam nga agdayaw ken agserbi ken ni Jehova—“Daydiay situtugaw iti trono.” Bay-am a tulongannaka ti klase Juan ita bayat nga ipapaayna ti kasapulan nga “abasto [a naespirituan] a taraon iti umiso a tiempo.” (Lucas 12:42) Ngem adtoy! Nakasaganan ti Kordero a manglukat kadagiti pito a selio. Ania dagiti makapagagar a palgaak nga agur-uray kadatayo?

[Dagiti Footnote]

[Ladawan iti panid 86]