Dagiti Misterioso a Nakakabayo iti Apocalipsis

AGBUYBUYAKAYO a nakayawan bayat nga, agtaytayab ti napuskol a buok ken ipus a nakaukrad dagiti abut ti agongna, ti kabayo agtartaray a dumalagudog nga agpababa iti maysa a nabato nga arisadsad. Ti nabaneg a nakakabayo ti kasla nakadekket iti selyana a kasla isut’ paset daytoy agkutkuti, agkuykuyegyeg a lasag ti kabayo.

Bumisbisitakay man iti maysa a pagapunan dagiti baka iti nangato a disso iti Australia, a kagudua ti lubong ti kaadayona, kadagiti katantanapan iti maysa a rancho nga Americano, ti buya iti maysa a nakakabayo nga ammona ti sinakayanna ket talaga a banag a makakayaw. Iti umas-asping iti buyana isu ti kinaranga iti parada dagiti nasanay unay a kabayo ken dagiti nakasakay kadakuada.

Dagiti kakasta a nakakabayo ken ti sinakayanda ti mamagsiddaaw kadakayo. Nupay kasta, dagiti kabayo ken dagiti nakasakay kadakuada a naimatangan ti mannurat iti libro ti Apocalipsis (ti Paltiing) ti makapasiddaaw unay! Pudno a dagitoy misteriosoda a buya!

Surotenyo ti napartak-panagtignayna a salaysay a nakita ti mannurat ti Biblia, ni apostol Juan. Kunana: “Ket kimmitaak ket adtoy ti maysa a kabayo a puraw, ket daydi adda a sisasakay kenkuana adda idi maysa a bai ti panana. Isut’ naikkan iti maysa a balangat, ket rimmuar a sibaballigi tapno agballigi. . . . Ket ti sabali pay a kabayo ti immay, maysa a nalabaga, ket ti sisasakay kenkuana naikkan ti pannakabalin a mangikkat ti talna manipud iti daga, ket pinagpipinnatayna dagiti tattao; isu ti naikkan ti dakkel a kampilan . . . Ket nakitak ti maysa a kabayo a nangisit, ket daydi nagsakay adda kenkuana ti maysa a pagtimbangan iti imana, ket nangngegko ti maysa a timek . . . a kunana: ‘Ti trigo maipaay iti [maysa nga aldaw a sueldo] iti maysa a kasukat, ken ti sebada a tallo a kasukat a maipaay [iti agmalem a sueldo]’ . . . Ket sadiay nakitak ti maysa a kabayo a nabessag, ket daydi nagsakay kenkuana managan iti Patay, ket ti Hades ti sumursurot kenkuana. Ket naikkanda ti pannakabalin a mangituray iti apagkapat iti daga, tapno agpapatayda gapu iti kampilan, bisin, angol, ken kadagiti narungsot nga animal iti daga.”​—Apocalipsis 6:2-8, An American Translation.

Nanipud pay damo a pannakaisurat daytoy a sirmata, ti kaipapananna ti nangriribuken kadagiti di mabilang a managbasa. Aniat’ ireprepresentar daytoy misterioso a kabayo ken dagiti nakasakay kadakuada? Kaano ti panangrugi ti panagsakayda? Ti kadi panagsakayda ti addaan aniaman a kaipapanan iti biag itatta? Nagadun a nagduduma a panangilawlawag ti naitukon no aniat’ ireprepresentar dagiti kabayo ken dagiti nakasakay kadakuada ken kaano a ti panagsakayda, iti kinapudnona, napasamak.

Ti naindaklan a panagduduma isut’ masarakan kadagiti panangilawlawag iti puraw a kabayo ken iti nakasakay kenkuana. Kas pangarigan, inlawlawag ti New Catholic Encyclopedia a ti puraw a kabayo irepresentarna ‘ti panagballigi ti ebanghelio wenno ti imperialismo.’

Idiay libro a Daniel and the Revelation, inted ni Uriah Smith daytoy a panangilawlawag: “Ti puraw a kabayo . . . ket maysa a maibagay nga emblema iti panagballigi ti ebanghelio idi umuna a siglo . . . Ti kinapudaw ti kabayo ipamatmatna ti kinadalus ti pammati iti dayta a panawen.”

Kuna ti The Expositor’s Bible: “Iti sidong ti umuna a nakasakay ti makagapu imbes a ti persona ni Kristo ti naiyam-ammo kadatayo, kadagiti umuna a tukad iti panagballigina, ken addaan iti kari ti masanguanan a panagballigina. . . . Naadaltayo a daytoy a panggep ket adda iti lubong, a daytoy a pagarian ket adda iti tengngatayo, ket dagidiay a mangbusbusor iti dayta ti mapasagto iti pannakaabak.” Nupay kasta, ni Woodrow Kroll, iti The Christian Jew Foundation, pagarupenna a ti nakasakay iti puraw a kabayo ti Antikristo.

Dadduma ti nangisingasing nga addada lima a kabayo ken dagiti nakasakay, saan nga uppat laeng. Gapuna kasanotay nga ammo no ania kadagiti adu a panangilawlawag ti umiso? Kasanotay a makasiguro nga adda ti maysa nga umiso a pannakaawat? Asino a talaga dagitoy misterioso a nakakabayo iti Apocalipsis, ken kaano ti panangrugi ti panagsakayda?