Ti Dakkel a Bunggoy ti Sabsabali a Karnero Idaydayawda ti Dios ken ni Kristo

 1. Ania ti epekto iti maysa nga agtutubo ti maysa a palawag iti kombension idi 1935?

ADDA agtutubo a lalaki nga agtawen iti 18 a nagbautisar idi 1926. Dagiti nagannakna ket Estudiante ti Biblia, kas awag idi kadagiti Saksi ni Jehova. Adda tallo nga annakda a lallaki ken dua a babbai a pinadakkelda nga agserbi ken Jehova a Dios ken mangtulad ken Jesu-Kristo. Kas ar-aramiden ti amin nga Estudiante ti Biblia idi, daytoy a napasnek nga agtutubo ket tinawen a mangan iti tinapay ken uminum iti arak bayat ti Pangrabii ti Apo. Nupay kasta, interamente a nagbalbaliw ti panangmatmatna gapu iti napateg a palawag a napauluan “Ti Dakkel nga Umariwekwek.” Impalawag dayta ni J. F. Rutherford idi 1935 iti maysa a kombension idiay Washington, D.C., U.S.A. Ania ti naammuanda iti dayta a kombension?

 2. Ania a makaparagsak a kinapudno ti naipakaammo iti palawag ni Brother Rutherford?

² Inlawlawag ni Brother Rutherford no siasino ti mangbukel iti “dakkel nga umariwekwek,” wenno “dakkel a bunggoy,” a nadakamat iti Apocalipsis 7:9. Agingga idi, naipagarup a ti dakkel a bunggoy ket maikadua a grupo ti tattao a mapan idiay langit ngem saanda unay a naregta. Inusar ni Brother Rutherford ti Kasuratan a mangilawlawag a ti dakkel a bunggoy ket saan a napili nga agbiag idiay langit, no di ket isuda ti sabsabali a karnerob ni Kristo a makalasat iti “dakkel a rigat” ken agbiag nga agnanayon ditoy daga. (Apoc. 7:14) Inkari ni Jesus: “Adda pay sabsabali a karnerok, nga awan iti daytoy a pagaponan; masapul nga iyaponko met ida, ket denggendanto ti timekko. Agbalindanto a maymaysa nga arban nga aywanan ti maymaysa a pastor.” (Juan 10:16) Dagitoy nga arig karnero ket isuda dagiti matalek a Saksi ni Jehova nga adda namnamada nga agbiag nga agnanayon iti Paraiso a daga. (Mat. 25:31-33, 46) Kitaentayo no kasano a daytoy a baro a pannakaawat iti kinapudno ti nangbalbaliw iti biag ti adu nga adipen ni Jehova, a pakairamanan dayta a kabsat nga agtawen idi iti 18.—Sal. 97:11; Prov. 4:18.

3-4. Iti kombension idi 1935, ania ti naamiris ti rinibu maipapan iti namnamada, ken apay?

³ Iti dayta a kombension, magagaran dagiti immatender idi insaludsod ti ispiker: “Di la mabalin a tumakder amin dagidiay addaan namnama nga agbiag nga agnanayon ditoy daga?” Sigun iti maysa a nakasaksi, timmakder ti nasurok a kagudua ti agarup 20,000 nga immatender. Kalpasanna, imbaga ni Brother Rutherford: “Kitaenyo! Ti dakkel a bunggoy!” Napasarunuan dayta iti napigsa ken naragsak a panagriaw. Naamiris dagidiay timmakder a saanda a napili nga agbiag idiay langit. Ammoda a saanda a napulotan iti espiritu ti Dios. Iti simmaruno nga aldaw ti kombension, 840 ti nagpabautisar kas Saksi, ket sabsabali a karnero ti kaaduan kadakuada.

⁴ Kalpasan dayta a palawag, ti agtutubo a nadakamat itay ken ti rinibu pay insardengdan ti mangan iti tinapay ken uminum iti arak iti Pangrabii ti Apo. Adda kabsat a sipapakumbaba a nangyebkas iti rikrikna ti adu. Kinunana: “Ti Memorial idi 1935 ti kaudian a pannangan ken iyiinumko kadagiti emblema. Nabigbigko a saan nga inusar ni Jehova ti nasantuan nga espirituna tapno ikkannak iti namnama nga agbiag idiay langit. Imbes ketdi, adda namnamak nga agbiag ditoy daga ken tumulongto a mamagbalin iti dayta a paraiso.” (Roma 8:16, 17; 2 Cor. 1:21, 22) Sipud idin, nagtultuloy nga immadu ti dakkel a bunggoy ken tultulonganda ti napulotan a natda.c

 5. Ania ti panangmatmat ni Jehova kadagidiay simmardeng a mangan ken uminum kadagiti emblema ti Memorial?

⁵ Ania ti panangmatmat ni Jehova kadagidiay simmardeng a mangan ken uminum kadagiti emblema ti Memorial kalpasan ti 1935? Ken kasano ngay no ti maysa a bautisado a Saksi ita ket mangmangan iti tinapay ken umin-inum iti arak bayat ti Pangrabii ti Apo ngem maamirisna inton agangay nga isu ket saan a napulotan? (1 Cor. 11:28) Adda dadduma a mangmangan ken umin-inum iti emblema gapu ta saanda a naawatan ti namnamada. Ngem no sipapasnek a bigbigenda ti kamalida, sumardengdan a mangan ken uminum kadagiti emblema, ken itultuloyda ti simamatalek nga agserbi ken Jehova, sigurado nga ibilangna ida a paset ti sabsabali a karnero. Uray no saandan a mangan iti tinapay ken uminum iti arak, umatenderda latta iti Memorial ta apresiarenda unay ti inaramid ni Jehova ken ni Jesus para kadakuada.

 6. Ania ti imbilin ni Jesus nga aramiden dagiti anghel?

⁶ Nakaas-asidegen ti dakkel a rigat. Makaparegta ngarud no repasuentayo ti dadduma pay nga ibaga ti Apocalipsis kapitulo 7 maipapan kadagiti napulotan a Kristiano ken iti dakkel a bunggoy ti sabsabali a karnero. Imbilin ni Jesus kadagiti anghel nga itultuloyda nga igawid ti uppat nga angin ti pannakadadael. Sada laeng ibulos dagita nga angin ditoy daga inton naselioanen ti amin a napulotan a Kristiano, kayatna a sawen, inton ikeddengen ni Jehova a talaga a matalekda. (Apoc. 7:1-4) Kas gunggona iti kinamatalek dagiti napulotan a kakabsat ni Kristo, agbalindanto nga ar-ari ken papadi a kaduana idiay langit. (Apoc. 20:6) Amin a mangbukel iti nailangitan a paset ti pamilia ti Dios ket magagaranto a makakita iti panangawat ti 144,000 a napulotan iti nailangitan a gunggonada.

 7. Iti Apocalipsis 7:9, 10, siasino dagiti nakita ni Juan iti sirmata, ken ania ti ar-aramidenda? (Kitaen ti ladawan iti akkub.)

⁷ Kalpasan a dinakamat ni Juan ti maipapan iti 144,000 nga ar-ari ken papadi, adda makapagagar a nakitana, ti “dakkel a bunggoy” a nakalasat iti Armagedon. Saan a kas iti umuna a grupo, daytoy a maikadua a grupo ket dakdakkel ken awan ti eksakto a bilangda. (Basaen ti Apocalipsis 7:9, 10.) “Nakabadoda iti puraw,” a mangipakita a pinagtalinaedda ti bagida nga “awanan rugit” iti lubong ni Satanas ken nagtalinaedda a napudno iti Dios ken ni Kristo. (Sant. 1:27) Ipukpukkawda a naisalakanda gapu iti inaramid ni Jehova ken ni Jesus, ti Kordero ti Dios. Nakaiggemda met iti bulbulong ti palma, a mangipakita a siraragsak a bigbigenda ni Jesus kas Ari a dinutokan ni Jehova.—Idilig ti Juan 12:12, 13.

 8. Ania ti ibaga kadatayo ti Apocalipsis 7:11, 12 maipapan iti nailangitan a pamilia ni Jehova?

⁸ Basaen ti Apocalipsis 7:11, 12. Ania ti reaksion dagiti adda idiay langit? Nakita ni Juan ti intero a nailangitan a pamilia ni Jehova a nakaragragsak idi nagparang ti dakkel a bunggoy ken indaydayawda ti Dios. Maragsakanto ti nailangitan a pamilia ni Jehova a makakita iti kaitungpalan daytoy a sirmata inton makalasat a sibibiag ti dakkel a bunggoy manipud iti dakkel a rigat.

 9. Sigun iti Apocalipsis 7:13-15, ania ti ar-aramiden ita ti dakkel a bunggoy?

⁹ Basaen ti Apocalipsis 7:13-15. Impadamag ni Juan a ti dakkel a bunggoy “linabaanda dagiti badoda ken pinapudawda iti dara ti Kordero.” Kaipapanan dayta a nadalus ti konsiensiada ken nalinteg ti takderda iti imatang ni Jehova. (Isa. 1:18) Dedikado ken bautisadoda a Kristiano, a mangipakpakita iti nabileg a pammatida iti daton a subbot ni Jesus ken addaanda iti relasion ken Jehova. (Juan 3:36; 1 Ped. 3:21) Gapu iti dayta, kualipikadoda nga agtakder iti sanguanan ti trono ti Dios ken mangipaay kenkuana iti “sagrado a panagserbi iti aldaw ken rabii” iti naindagaan a paraangan ti naespirituan a templona. Uray ita, sireregta nga ar-aramidenda ti ad-adu a paset ti trabaho a panangikasaba iti Pagarian ken panagaramid iti adalan. Iyun-unada met ti interes ti Pagarian ti Dios ngem iti bagida.—Mat. 6:33; 24:14; 28:19, 20.

10. Ania ti naipasigurado iti dakkel a bunggoy, ken ania a kari ti makitadanto a matungpal?

¹⁰ Ti dakkel a bunggoy a makalasat iti dakkel a rigat masiguradoda nga agtultuloy nga aywanan ida ti Dios, ta “Daydiay situtugaw iti trono iyukradnanto kadakuada ti toldana.” Matungpalto met laengen ti kari a nabayagen nga ur-urayen ti sabsabali a karnero: Ti Dios “punasennanto ti amin a lua kadagiti matada, ken awanton ni patay. Awanto metten ti panagladingit wenno panagsangit wenno ut-ot.”—Apoc. 21:3, 4.

11-12. (a) Ania dagiti bendision nga ibaga ti Apocalipsis 7:16, 17 para iti dakkel a bunggoy? (b) Ania ti mabalin nga aramiden ti sabsabali a karnero no Memorial, ken apay?

¹¹ Basaen ti Apocalipsis 7:16, 17. Dadduma nga adipen ni Jehova ket mabisbisin ita gapu ta kurang ti kuartada a paggatang iti taraon wenno gapu iti resulta dagiti riribuk wenno gubat. Dadduma ket nakabalud met gapu iti pammatida. Nupay kasta, maragsakan dagidiay paset ti dakkel a bunggoy a makaammo nga inton malasatanda ti pannakadadael daytoy dakes a sistema ti bambanag, kanayonton nga addaanda iti aglaplapusanan a pisikal ken naespirituan a taraon. Inton madadaelen ti sistema ti bambanag ni Satanas, maisalakanto ti dakkel a bunggoy iti “makasinit” a pungtot ni Jehova nga ibukbokna kadagiti nasion. Kalpasan ti dakkel a rigat, dagitoy a nakalasat ket iturongto ni Jesus iti “dandanum ti biag,” kayatna a sawen, tulonganna ida a maaddaan iti biag nga agnanayon. Panunotem laengen: Nagpaiduma ti namnama ti dakkel a bunggoy. Iti binilion a nagbiag ditoy daga, mabalin a saandanton a pulos a matay!—Juan 11:26.

¹² Nagsayaat ti namnama ti sabsabali a karnero a pagyamyamananda ken Jehova ken ni Jesus! Saanda man a napili nga agbiag idiay langit, ngem dina kayat a sawen a saanda unay a napateg ken Jehova. Dagiti napulotan ken ti sabsabali a karnero ket maidaydayawda ti Dios ken ni Kristo. Maysa a pamay-an a maaramidanda dayta ket babaen ti iyaatenderda iti Pangrabii ti Apo.

13-14. Apay a masapul nga umatender ti amin iti Memorial ti ipapatay ni Kristo?

¹³ Iti nabiit pay a tawtawen, agarup 1 iti kada 1,000 nga immatender iti Memorial ket nangan iti tinapay ken imminum iti arak. Iti kaaduan a kongregasion, awan ti nangan iti tinapay ken imminum iti arak bayat ti Memorial. Kaaduan nga umat-atender ket addaan iti naindagaan a namnama. Apay ngarud nga umatenderda iti Pangrabii ti Apo? No kasano nga umatender dagiti tattao iti kasar ti gayyemda ta kayatda nga ipakita ti ayat ken suportada, umatender met ti sabsabali a karnero iti Memorial ta kayatda nga ipakita ti ayat ken suportada ken Kristo ken kadagiti napulotan. Umatenderda pay tapno ipakitada ti apresasionda iti daton ni Jesus a malaglagip iti Memorial. Gapu iti dayta a daton, posible nga agbiagdanto nga agnanayon ditoy daga.

¹⁴ Ti maysa pay a napateg a rason no apay nga umatender ti sabsabali a karnero iti Memorial ket tapno agtulnogda iti bilin ni Jesus. Idi inrugi ni Jesus dayta nga espesial a pangrabii a kaduana dagiti matalek nga apostolna, imbagana kadakuada: “Itultuloyyo nga aramiden daytoy kas panglaglagip kaniak.” (1 Cor. 11:23-26) Gapu iti dayta, itultuloyda nga atenderan ti Pangrabii ti Apo agingga nga adda pay la napulotan a sibibiag ditoy daga. Kinapudnona, ti sabsabali a karnero aw-awisenda ti amin nga umatender a kaduada iti Memorial.

15. Kasanotayo nga idaydayaw ti Dios ken ni Kristo bayat ti Memorial?

¹⁵ Bayat ti Memorial, adda gundawaytayo a mangidaydayaw iti Dios ken ni Kristo babaen ti kanta ken kararag. Ti palawag ita a tawen ket: “Apresiarem ti Inaramid ti Dios ken ni Kristo Para Kenka!” Daytanto ti mangpauneg iti panagyamantayo ken Jehova ken ni Kristo. Bayat a maipaspasa dagiti emblema, maipalagip kadatayo ti isimbolo dagita—ti lasag ken dara ni Jesus. Maipalagip nga impalubos ni Jehova a matay ti Anakna para kadatayo, tapno maaddaantayo iti biag. (Mat. 20:28) Kayat ti amin a mangipatpateg iti nailangitan nga Amatayo ken iti Anakna ti umatender iti Memorial.

16. Kadagiti ania a pamay-an nga agpada dagiti napulotan ken ti sabsabali a karnero?

¹⁶ Para iti Dios, awan ti nagdumaan dagiti napulotan ken ti sabsabali a karnero. Agpada a napateg kenkuana dagita a grupo. Ngamin, maymaysa a biag ti imbayadna—ti biag ti patpatgenna nga Anak—tapno masubbot dagiti napulotan ken ti sabsabali a karnero. Ti la nagdumaan dagita a grupo ket dagiti namnamada. Masapul nga agtalinaedda amin a matalek iti Dios ken iti Kristo. (Sal. 31:23) Ken laglagipentayo nga agpapada ti panagtignay ti espiritu ti Dios kadatayo amin. Kayatna a sawen, ipaay ni Jehova ti nasantuan nga espirituna iti tunggal maysa sigun iti kasapulanda.

17. Ania ti segseggaan dagiti napulotan a natda?

¹⁷ Dagiti napulotan a Kristiano ket saan a nayanak nga addaan iti nailangitan a namnama. Masapul nga imula dayta ti Dios iti pusoda. Pampanunotenda dayta a namnama, ikarkararagda dayta, ken magagarandan nga umawat iti gunggonada idiay langit. Saanda nga ammo no anianto ti bagida inton addadan idiay langit. (Fil. 3:20, 21; 1 Juan 3:2) Nupay kasta, segseggaanda a makita ni Jehova, ni Jesus, dagiti anghel, ken ti dadduma pay a napulotan. Magagarandan a makikadua kadakuada iti nailangitan a Pagarian.

18. Ania dagiti segseggaan ti sabsabali a karnero?

¹⁸ Segseggaan ti sabsabali a karnero ti agbiag nga agnanayon ditoy daga a normal a kayat dagiti tattao. (Ecl. 3:11) Segseggaanda ti aldaw inton tumulongdan a mamagbalin a paraiso iti intero a planeta a Daga. Ur-urayenda ti aldaw inton mabalindan ti agbangon iti bukodda a balay, agmula iti bukodda a hardin, ken mangpadakkel iti annakda nga addaan iti perpekto a salun-at. (Isa. 65:21-23) Segseggaanda a pasiaren ti daga—dagiti bantay, kabakiran, ken baybay—ken adalen ti nakaad-adu a parsua ni Jehova. Kangrunaan iti amin, maragsakanda a makaammo nga agtultuloyto a suminged ti pannakigayyemda ken Jehova.

19. Ania ti nagsayaat nga aramiden ti tunggal maysa kadatayo bayat ti Memorial, ken kaano a maangay dayta ita a tawen?

¹⁹ Impaayan ni Jehova ti tunggal dedikado nga adipenna iti nagsayaat a namnama iti masanguanan. (Jer. 29:11) Ti Memorial ti ipapatay ni Kristo ket nagsayaat a gundaway ti tunggal maysa kadatayo a mangidaydayaw iti Dios ken ni Kristo gapu iti inaramidda para kadatayo tapno agbiagtayo iti agnanayon. Sigurado a ti Memorial ti kapatgan nga okasion para kadagiti pudno a Kristiano. Maangayto dayta kalpasan ti ilelennek ti init inton Sabado, Marso 27, 2021. Ita a tawen, adu ti siwayawaya a makaatender iti daytoy napateg nga okasion. Adda met dagiti mangselebrar iti daytoy nga okasion uray no mabusbusorda wenno addada iti pagbaludan. Bayat a kumitanto ni Jehova, ni Jesus, ken ti nailangitan a paset ti pamilia ti Dios, sapay koma ta siraragsak ti tunggal kongregasion, grupo, ken indibidual a mangselebrar iti Memorial!