Inaldaw nga Usarem ti Biagmo a Mangidayaw iti Dios

“ITI bigat ipangngegmo kaniak ti naayat a kinamanangngaasim,” inkararag ni salmista a David ken ni Jehova. “Ipakaammom kaniak ti dalan a rebbeng a pagnaak.” (Sal. 143:8) No agriingka ken agyamanka ken Jehova gapu iti baro nga aldaw, kaslaka kadi ken David nga agkararag ken Jehova tapno iwanwannaka a mangaramid kadagiti pangngeddeng ken iti kasayaatan a tignay? Awan duadua nga ar-aramidem dayta.

Kas nagdedikar nga adipen ni Jehova, ‘uray no mangmangan wenno umin-inum wenno agar-aramidtayo iti aniaman a banag,’ ikagumaantayo nga ‘aramiden ti amin a bambanag a maipaay iti dayag ti Dios.’ (1 Cor. 10:31) Ammotayo a ti wagas ti panagbiagtayo iti inaldaw ket mabalin a pakaidayawan wenno pakaumsian ni Jehova. Laglagipentayo met ti kuna ti Sao ti Dios nga ak-akusaran ni Satanas dagiti kakabsat ni Kristo​—ken kinapudnona, ti amin nga adipen ti Dios ditoy daga​—“iti aldaw ken rabii.” (Apoc. 12:10) Gapuna, determinadotayo a mangipaay iti sungbat kadagiti ulbod nga akusasion ni Satanas ken mangparagsak iti puso ni Jehova babaen ti panangipaay iti sagrado a panagserbi iti nailangitan nga Amatayo iti “aldaw ken rabii.”​—Apoc. 7:15; Prov. 27:11.

Usigentayo ti dua a napateg a pamay-an a mausartayo ti biagtayo iti inaldaw a mangidayaw iti Dios. Ti umuna ramanenna ti panangipasdek kadagiti umiso a prioridad ken ti maikadua, ti panangipakita iti konsiderasion kadagiti sabsabali.

Panangtungpal iti Karitayo

Idi indedikartayo ti biagtayo ken Jehova, inyebkastayo ti naimpusuan a tarigagaytayo nga agserbi kenkuana. Inkaritayo pay ken Jehova a magnatayo iti daldalanna iti “inaldaw-aldaw”​—wen, iti agnanayon. (Sal. 61:5, 8) Kasanotayo ngarud a matungpal dayta a karitayo? Kasanotayo a maipakita ti naimpusuan a panagayattayo ken Jehova iti inaldaw?

Silalawag a dakamaten ti Sao ti Dios dagiti responsabilidad a namnamaen ni Jehova nga itungpaltayo. (Deut. 10:12, 13) Nailista ti sumagmamano iti kahon a napauluan iti “Dagiti Responsabilidad nga Inted ti Dios,” iti panid 22. Amin dagitoy a responsabilidad ket inted ti Dios isu a napategda. Kasanotayo a maikeddeng no ania ti iyun-unatayo no aggiddan nga agkasapulan iti atensiontayo ti dua wenno ad-adu pay a responsabilidad?

Iyun-unatayo ti sagrado a panagserbitayo, a pakairamanan ti panagadal iti Biblia, panagkararag, Nakristianuan a gimong, ken ti ministerio. (Mat. 6:33; Juan 4:34; 1 Ped. 2:9) Ngem malaksid kadagiti naespirituan nga aktibidad, adda pay dadduma a nasken nga itungpaltayo iti tunggal aldaw a kas iti panagsapul iti pagbiag, panageskuela, ken panagtagibalay. Kaskasdi, masapul a pagreggetantayo nga iyurnos ti sekular a trabaho ken dadduma pay nga aktibidad iti pamay-an a dida pagbalinen a segundario ti sagrado a panagserbitayo, kas iti pannakigimong. Kas pagarigan, no planom ti agbakasion, siguraduem a dimo malanganan ti panagbisita ti manangaywan iti sirkito, espesial nga asamblea, asamblea sirkito, wenno kombension distrito. Adda dagiti panawen a mabalintayo a paggigiddanen ti dadduma a responsabilidadtayo. Kas pagarigan, mabalintayo nga aramiden a proyekto ti pamilia ti panagdalus iti Kingdom Hall wenno usarentayo ti oras ti pangngaldaw iti pagtrabahuan wenno eskuelaan tapno mangasaba kadagiti katrabahuan wenno kaeskuelaantayo. Kinapudnona, kadagiti gundaway a kasapulan a mangaramidtayo kadagiti pangngeddeng​—kas iti panagbirok iti panggedan, panagpili iti pageskuelaan wenno gagayyem​—kayattayo a maitunos dayta iti kangrunaan a prioridadtayo iti biag​—ti panagdayaw ken Jehova, ti naayat nga Amatayo.​—Ecl. 12:13.

Mangipakita iti Konsiderasion

Kayat ni Jehova a maseknantayo iti sabsabali ken mangaramidtayo iti naimbag kadakuada. Iti kasumbangirna, itantandudo ni Satanas ti kinamanagimbubukodan. Napno ti lubongna kadagiti ‘managayat iti bagbagida,’ ken “managayat iti ragragsak,” agraman dagidiay ‘agimulmula a maipaay iti lasag.’ (2 Tim. 3:1-5; Gal. 6:8) Adu ti saan a mangikabilangan kadagiti mabalin nga epekto ti tignayda kadagiti sabsabali. Nasaknap ita “dagiti aramid ti lasag.”​—Gal. 5:19-21.

Anian a naiduma ti kababalin dagidiay a gapu iti panangtignay ti nasantuan nga espiritu ni Jehova, ipakpakitada ti ayat, kinamanangngaasi, ken kinaimbag no iti pannakilangenda kadagiti sabsabali! (Gal. 5:22) Ibaga kadatayo ti Sao ti Dios a masapul nga iyun-unatayo dagiti kasapulan ti sabsabali. Gapuna, ipakitatayo a maseknantayo iti maysa ken maysa nupay ditay met koma makibiang kadagiti personal a banag. (1 Cor. 10:24, 33; Fil. 2:3, 4; 1 Ped. 4:15) Ad-adda koma a nakonsiderartayo kadagiti kapammatiantayo. Kaskasdi, ikagumaantayo met a tulongan dagiti saantayo a kapammatian. (Gal. 6:10) Mabalinyo kadi ti mangbirok iti gundaway a mangipakita iti kinamanangngaasi kadagiti sabsabali?​—Kitaenyo ti kahon a “Pakitaam Ida iti Konsiderasion,” iti panid 23.

Ipakitatayo ti konsiderasion saan laeng nga iti espesipiko a tiempo wenno kasasaad. (Gal. 6:2; Efe. 5:2; 1 Tes. 4:9, 10) Imbes ketdi, inaldaw nga agbalintayo nga alerto kadagiti kasasaad ti dadduma ken sidadaan a tumulongtayo kadakuada uray pay saan a kombiniente dayta kadatayo. Kayattayo nga ipaay ti kasayaatan a maitulongtayo​—ti tiempo, material a sanikua, kapadasan, ken siribtayo. Inkari ni Jehova a no naparaburtayo kadagiti dadduma, isu ket naparaburto met kadatayo.​—Prov. 11:25; Luc. 6:38.

Sagrado a Panagserbi iti “Aldaw ken Rabii”

Talaga kadi a posible a makaipaaytayo iti sagrado a panagserbi ken Jehova iti “aldaw ken rabii”? Wen, babaen ti panagbalintayo a regular ken napasnek iti amin nga aspeto ti panagdayawtayo. (Ara. 20:31) Mabalintayo ti agbalin nga okupado iti sagrado a panagserbi babaen ti inaldaw a panagbasa ken panangutob iti Sao ti Dios, panagkararag a di agressat, panangikagumaan a tumabuno iti amin a gimong, ken panangasaba iti amin a posible a gundaway.​—Sal. 1:2; Luc. 2:37; Ara. 4:20; 1 Tes. 3:10; 5:17.

Personal kadi a mangipapaaytayo iti sagrado a panagserbi ken Jehova? No wen, ti tarigagaytayo a mangay-ayo kenkuana ken mangipaay iti sungbat kadagiti akusasion ni Satanas ket agminar iti amin nga aspeto ti inaldaw a panagbiagtayo. Ikagumaantayo nga idaydayaw ni Jehova iti amin nga aramidentayo ken aniaman ti kasasaadtayo. Kayattayo a dagiti prinsipiona ti mangiwanwan iti panagsasao ken panagtigtignaytayo ken kadagiti aramidentayo a desision. Ipakitatayo ti panangipategtayo iti naayat a panangaywan ken panangsaranayna babaen ti naan-anay a panagtalektayo kenkuana ken panangusartayo iti amin a pigsatayo nga agserbi kenkuana. Ken ipangagtayo ti balakad ken disiplinana no malabsingtayo dagiti pagalagadanna gapu iti kinaimperpektotayo.​—Sal. 32:5; 119:97; Prov. 3:25, 26; Col. 3:17; Heb. 6:11, 12.

Itultuloytayo nga usaren ti biagtayo a mangidayaw iti Dios iti inaldaw. No aramidentayo dayta, mabang-arantayo ken matagiragsaktayo ti panangaywan ti naayat a nailangitan nga Amatayo iti agnanayon.​—Mat. 11:29; Apoc. 7:16, 17.

[Kahon/Dagiti Ladawan iti panid 22]

Dagiti Responsabilidad nga Inted ti Dios

• Regular a panagkararag.​—Roma 12:12.

• Panagbasa ken panagadal iti Biblia, ken panangyaplikar kadagita.​—Sal. 1:2; 1 Tim. 4:15.

• Panangidayaw ken Jehova iti kongregasion.​—Sal. 35:18; Heb. 10:24, 25.

• Panangipaay iti material, espiritual, ken emosional a kasapulan dagiti kameng ti pamilia.​—1 Tim. 5:8.

• Panangikasaba iti naimbag a damag ti Pagarian ken panangaramid kadagiti adalan.​—Mat. 24:14; 28:19, 20.

• Panangaywan iti pisikal, espiritual, ken emosional a salun-at, a pakairamanan ti panangyurnos iti makagunggona a paglinglingayan.​—Mar. 6:31; 2 Cor. 7:1; 1 Tim. 4:8, 16.

• Panangibaklay kadagiti annongen iti kongregasion.​—Ara. 20:28; 1 Tim. 3:1.

• Panangmantener iti kasasaad ti pagtaengan ken Kingdom Hall.​—1 Cor. 10:32.

[Kahon/Ladawan iti panid 23]

Pakitaam Ida iti Konsiderasion

• Lakay wenno baket a kabsat.​—Lev. 19:32.

• Maysa nga agsagsagaba iti sakit iti pisikal wenno emosion.​—Prov. 14:21.

• Kakongregasionmo nga agkasapulan unay iti banag a kabaelam nga ipaay.​—Roma 12:13.

• Kameng ti pamiliam.​—1 Tim. 5:4, 8.

• Kapammatian a balo.​—1 Tim. 5:9.

• Nagaget a panglakayen iti kongregasion.​—1 Tes. 5:12, 13; 1 Tim. 5:17.