DRAGON

Manipud iti Griego a draʹkon, a mangiladawan iti makapakullayaw nga ulimaw, kasla serpiente a manangalun-on. Agparang dayta iti 13 a daras iti Biblia ngem iti laeng simboliko unay a libro ti Apocalipsis, ken irepresentarna ni Satanas a Diablo. Isu ti “dakkel a dragon a maris-apuy, nga addaan pito nga ulo ken sangapulo a sara,” nga adda ipusna a mangiguyod iti “kakatlo dagiti bituen ti langit” a maisurot kenkuana, a dagitoy ket immuna a nauyotan nga aglasag kas tattao sakbay ti Layus ket kalpasanna nagbalinda a sairo. (Apo 12:3, 4; Jud 6) Kadua dagitoy a sairo, ni Satanas a Dragon naipalladaw iti kaparanget ti daga manipud langit. “Gapuna naitapuak ti dakkel a dragon, ti kadaanan a serpiente, daydiay naawagan iti Diablo ken Satanas.” (Apo 12:7-9) Iti daytoy naipababa a kasasaad idadanesna ti natda ti “babai” a kukua ti Dios, dagidiay addaan “iti trabaho a panangsaksi.”​—Apo 12:13-17.

Ti kasla dragon a ni Satanas isu met ti mangted iti pannakabalin ken dakkel nga autoridad iti simboliko nga atap nga animal nga addaan iti pito nga ulo ken sangapulo a sara, ket kalpasanna met, isu dinaydayaw dagiti tattao iti “intero a daga.” (Apo 13:2-4) Makitkita met ni Juan iti sirmata a ti aggakgak a kasla tukak nga “ebkas nga impaltiing dagiti sairo,” nga agturong “iti ar-ari iti intero a mapagnaedan a daga,” aggapu iti ngiwat ti Dragon, wenno ni Satanas, kasta met a manipud kadagiti ngiwat “ti atap nga animal” ken “ti ulbod a mammadto.” Ti epekto daytoy ket pannakaurnong dagitoy nga agtuturay ken dagiti mangsupsuporta kadakuada “iti gubat ti naindaklan nga aldaw ti Dios a Mannakabalin-amin . . . iti disso nga iti Hebreo maaw-awagan iti Har–​Magedon [Armagedon].” (Apo 16:13-16) Kalpasan daytoy kadakkelan kadagiti amin a gubat, ti “anghel” a bumaba manipud langit kemmegennanto “ti dragon, ti kadaanan a serpiente, nga isu ti Diablo ken Satanas,” ket parautannanto ken igarangugongna iti sangaribu a tawen.​—Apo 20:1-3; kitaenyo ti SATANAS.