Dagiti Saludsod Manipud Kadagiti Managbasa

Maikunatayo kadi a dagiti adipen ti Dios ita nga addaan naindagaan a namnama addaan iti isu met laeng nga espiritu ti Dios a kas iti adda kadagiti Kristiano a napulotan-ti-espiritu?

Saan a kabbaro daytoy a saludsod. Naisalaysayen daytoy iti “Dagiti Saludsod Manipud Kadagiti Managbasa” iti The Watchtower nga Abril 15, 1952. Adun ti nagbalin a Saksi sipud idi, gapuna mabalintay nga usigen ti saludsod ket iti intay panangusig repasuentayo ti nadakamat iti immun-una a material.

Iti kababagasna, ti sungbat ket, wen, mabalin nga umawat dagiti matalek a kakabsat a kameng ti sabsabali a karnero iti nasantuan nga espiritu ti Dios a kas met iti inawat dagiti napulotan.​—Juan 10:16.

Siempre, daytoy dina kaipapanan nga agpapada ti panagtignay ti espiritu iti amin nga indibidual. Lagipenyo dagiti matalek nga adipen idi kasakbayan ti panawen Kristiano, a sigurado nga immawat iti espiritu ti Dios. Buyogen ti pannakabalin manipud iti espiritu, sumagmamano kadakuada ti nangpapatay kadagiti narungsot nga animal, nangagas kadagiti masakit, nangpagungar pay ketdi kadagiti natay. Ken kinasapulanda ti espiritu tapno maisuratda dagiti naipaltiing a libro iti Biblia. (Oc-ocom 13:24, 25; 14:5, 6; 1 Ar-ari 17:17-24; 2 Ar-ari 4:17-37; 5:1-14) Kinuna ti The Watchtower: “Nupay saanda a karaman iti klase napulotan, napnoda iti nasantuan nga espiritu.”

Iti sabali a bangir, usigenyo dagiti lallaki ken babbai idi umuna a siglo a napulotan iti nasantuan nga espiritu, a nagbalin a naespirituan nga annak ti Dios nga addaan nailangitan a namnama. Napulotanda amin, ngem dayta dina kaipapanan a nagbalin nga agpapada ti panagandar ti espiritu kadakuada amin. Nabatad dayta iti 1 Corinto kapitulo 12. Sadiay sinalaysay ni apostol Pablo dagiti sagut ti espiritu. Mabasatayo iti bersikulo 8, 9, ken 11: “Babaen ti espiritu naited iti maysa panagsao iti kinasirib, iti sabali panagsao iti pannakaammo maitunos iti isu met laeng nga espiritu, iti sabali pammati babaen ti isu met laeng nga espiritu, iti sabali sagsagut kadagiti panangpaimbag babaen iti dayta maymaysa nga espiritu. . . . Ngem isuamin dagitoy a panagtignay aramiden ti maymaysa ken isu met laeng nga espiritu, nga agibumbunong iti tumunggal maysa kas iti pagayatanna.”

Makapainteres, saan nga amin a napulotan idi ket naaddaan iti nakaskasdaaw a sagut iti espiritu. Iti 1 Corinto kapitulo 14, dinakamat ni Pablo ti maysa a gimong ti kongregasion a sadiay ti maysa addaan sagut kadagiti pagsasao, ngem awan sadiay ti addaan sagut iti panagipatarus. Nupay kasta, iti immun-una a gundaway, tunggal maysa napasaranda ti pannakapulot iti espiritu. Nainkalintegan kadi a kunaen a ti kabsat nga addaan iti sagut kadagiti pagsasao ket addaan iti ad-adu nga espiritu ngem iti dadduma nga adda sadiay? Saan. Saan a napaidaman dagidiay dadduma a napulotan, a kas ket tay dida matarusan ti Biblia a kas iti daydiay maysa wenno dida kabaelan a sanguen dagiti suot. Nagtignay ti espiritu iti naisangsangayan a wagas iti kabsat a makapagsao kadagiti pagsasao. Kaskasdi, kasapulanna ken ti dadduma pay nga agtalinaed a nasinged ken Jehova ken ‘agtultuloy a mapno iti espiritu,’ kas insurat ni Pablo.​—Efeso 5:18.

No maipanggep kadagidiay natda ita, di pagduaduaan nga immawatda iti espiritu ti Dios. Iti maysa a gundaway nagtignay dayta kadakuada iti naisangsangayan a pamay-an​—iti daydi pannakapulotda ken panagbalinda kas naespirituan nga annak. Kalpasan dayta ‘nagtultuloyda a mapno iti espiritu,’ a tumulong daytoy no ikagumaanda a tarusan ti Biblia a nalawlawag, mangidaulo iti trabaho a panangasaba, wenno maipasango kadagiti suot​—personal man wenno iti organisasion.

Dagiti kameng ti “sabsabali a karnero,” nupay dida napasaran ti nagbalin a napulotan, iti sabali a pamay-an umawatda iti nasantuan nga espiritu. Kinuna ti The Watchtower ti Abril 15, 1952:

“Dagiti ‘sabsabali a karnero’ ita ar-aramidenda ti isu met laeng a trabaho a panangasaba kas ti natda, iti sidong dagiti isu met laeng a narigat a kasasaad, ken mangiparangarang iti isu met laeng a kinamatalek ken kinatarnaw. Mapakanda iti isu met laeng a naespirituan a lamisaan, mangan iti isu met laeng a taraon, gumun-od kadagiti isu met laeng a kinapudno. Tangay mairamanda iti naindagaan a klase, nga addaan naindagaan a namnama ken napasnek nga interes kadagiti banag iti daga, nalabit ad-adda nga interesadoda kadagiti kasuratan maipanggep kadagiti naindagaan a kasasaad iti baro a lubong; bayat a ti napulotan a natda, nga addaan nailangitan a namnama ken napigsa a personal nga interes kadagiti banag maipanggep iti espiritu, nalabit a naregreggetda nga agadal kadagiti kasta a banag iti Sao ti Dios. . . . Ngem agtalinaed ti kinapudno a magun-od ti dua a klase ti agpada a kinapudno ken ti agpada a pannakaawat, ket ti laeng pamay-an ti panagadal ti tunggal indibidual ti mangpatalged iti magun-odda a pannakaawat kadagiti nailangitan ken naindagaan banag. Magun-od ti dua a klase ti agpada a kaadu ti espiritu ti Apo, ken agpada a naitukon ti pannakaammo ken pannakaawat kadakuada a dua, nga addaan iti agpada a gundaway a pananggun-od iti dayta.”