Patiem Kadi Dagiti Milagro a Nairekord iti Biblia?

SAKBAY a patiem ti maysa a nakaskasdaaw nga estoria, saan aya a masapul a mapagtalkan ti ages-estoria? Ngem saanmo a maibaga a mapagtalkan ti maysa babaen laeng iti wagas a panagestoriana. Makita koma nga umuna iti reputasionna nga isu ket talaga a napudno. No adun a tawen a kanayon a pudno ti ibagbagana ken saan pay a pulos nagul-ulbod kenka, mabalin a patiem ti ibagbagana.

Kasta met no maipapan kadagiti milagro a nairekord iti Biblia. Awan pay ti sibibiag kadatayo idi napasamak dagita. Ngem maibagatayo a pudno ken mapagtalkan ti salaysay ti Biblia. Kasano? Dagitoy ti sumagmamano a mangipakita a mapagtalkan dagiti milagro a naisalaysay iti Biblia.

Adu kadagiti milagro ti nasaksian dagiti tattao. Kaaduanna a nasaksian dagita ti rinibu wenno minilion a tattao. (Exodo 14:21-31; 19:16-19) Sipapanayag a napasamak dagita.

Simple ti pannakaaramid dagiti milagro. Awan dagiti naisangsangayan nga alikamen ken awan dagiti makaallilaw a silaw. Kaaduanna a napasamak dagiti milagro a nairekord iti Biblia iti tiempo a di ninamnama ken kiniddaw dayta dagiti tattao. (Marcos 5:25-29; Lucas 7:11-16) Ipakita dagita a pasamak a ti nangaramid iti milagro dina inranta ti agpabuya.

Ti panggep dagidiay agar-aramid iti milagro ket saan a tapno agpabaknang, maidayaw, wenno maitan-ok. Imbes ketdi, maaramid dayta tapno maidayaw ti Dios. (Juan 11:1-4, 15, 40) Makondenar idi ti asinoman a manggun-od iti kinabaknang babaen kadagiti milagro.​—2 Ar-ari 5:15, 16, 20, 25-27; Aramid 8:18-23.

Ti nadumaduma a milagro a nairekord iti Biblia ipakitana a saan a tattao laeng ti makinggapuanan kadagitoy. Kas pagarigan, nagsardeng ti nadawel a bagyo iti baybay, nagbalin nga arak ti danum, nalapdan ti tudo sa kalpasanna nagtudo, ken naisubli ti panagkita dagiti bulsek. Amin dagita a milagro ken ti dadduma pay ipakitana nga adda nabilbileg a pannakabalin a makin-aramid kadagita.​—1 Ar-ari 17:1-7; 18:41-45; Mateo 8:24-27; Lucas 17:11-19; Juan 2:1-11; 9:1-7.

Dagiti bumusbusor a nakaimatang kadagiti milagro dida kinontra a napasamak dagita. Idi pinagungar ni Jesus ti gayyemna a ni Lazaro, saan a kinontra dagiti bumusbusor a panguluen ti relihion a nagungar ni Lazaro. Apay koma a dida mamati ket uppat nga aldawen a naitabon ni Lazaro? (Juan 11:45-48; 12:9-11) Uray pay ginasgasut a tawen ti napalabasen kalpasan ti ipapatay ni Jesus, bigbigen dagiti Judio a mannurat iti Talmud nga adda pannakabalin ni Jesus. Nagduaduaanda laeng ti nagtaudan ti pannakabalinna. Kasta met, idi naisaklang dagiti adalan ni Jesus iti korte dagiti Judio, ti naisaludsod kadakuada ket: “Babaen iti ania a pannakabalin nga inaramidyo daytoy?” saan ket a “Nagaramidkayo kadi iti milagro?”​—Aramid 4:1-13.

Gapuna, patiem kadi ti kunaen ti Biblia maipapan kadagiti milagro? Kas naammuantayon, nalawag a dagiti salaysay ti Biblia maipapan kadagiti milagro ket talaga a mapagtalkan. Adda pay dadduma a rason a pamatiantayo kadagitoy a salaysay ti Biblia. Kas pagarigan, no isalaysay ti Biblia ti maysa a pasamak, masansan a dakamatenna ti tiempo, lugar, ken ti nagan dagiti tattao a nairaman. Nasdaaw pay dagiti kritiko iti kinaumiso dagiti detalye a naisalaysay iti Biblia. Adun a padto ti Biblia ti natungpal, uray iti kabassitan a detalye. Maysa pay, naglaon ti Biblia iti adu a balakad a makatulong kadagiti tattao no kasanoda a maaddaan iti naragsak a relasion​—aniaman ti edad ken kasasaadda iti biag. Awan kaasping ti balakad a linaon ti Biblia no maipapan iti relasion ti tao.

No awan panagtalekmo iti Biblia, apay a dimo iwayaan nga usigen a naimbag dayta? No ad-adu ti pannakaammom iti Biblia, ad-adda nga agtalekka iti dayta. (Juan 17:17) Mabigbigmonto a makapagtalekka iti ibagbagana kenka maipapan kadagiti milagro a napasamak idi. No patiem dagita a salaysay, adda naimbag a rason nga agtalekka a mapasamak ti ibagbaga ti Biblia maipapan iti masanguanan.

[Ladawan iti panid 7]

Dagiti bumusbusor ken Jesus dida kinontra ti ipapatay ni Lazaro

Dagiti Milagro a Dandanin Mapasamak

ANIA ngata ti mariknam no naammuam nga agdadamo ti doktor a mangaramid iti naselan nga operasion kenka? Mabalin a maamakka. Ngem no ngay espesialista ti doktor a mangopera kenka ken adun ti inaramidna a naballigi nga operasion kadagiti kapadpadam iti kaso? Saan ngata nga ad-adda nga agtalekka a matulongannaka?

Daytoy masakit a lubong a pagbibiagantayo, agkasapulan iti narikut nga “operasion.” Babaen ti Saona, ti Biblia, inkari ni Jehova a Dios a pagbalinennanto a paraiso ti daga. (2 Pedro 3:13) Ngem sakbay dayta, umuna pay a maikkat ti kinadakes. (Salmo 37:9-11; Proverbio 2:21, 22) Masapul a maikkat amin dagiti nakalkaldaang a kasasaad a makitkitatayo sakbay a maisubli ti paraiso. Tapno maaramid dayta, masapul a mapasamak ti literal a milagro!​—Apocalipsis 21:4, 5.

Mamati dagiti Saksi ni Jehova a dandanin matungpal dagita a dadakkel a panagbalbaliw. Apay? Gapu ta dagiti milagro nga inaramid ni Jehova a Dios paneknekanda a kabaelanna a tungpalen ti karina. Idiligmo ti innem laeng a milagro a nairekord iti Biblia kadagiti karina iti masanguanan.

Itultuloymo koma nga ammuen dagiti kari ti Biblia iti masanguanan. Bayat a bumilbileg ti pammatim, bumileg met ti namnamam​—ti namnama nga agbiag iti tiempo a magunggonaanka a mismo kadagiti milagro nga aramiden ni Jehova.

[Kahon/Dagiti Ladawan iti panid 9, 10]

MILAGRO:

PINAKAN NI JESUS TI RINIBU BABAEN ITI SUMAGMAMANO A TINAPAY KEN IKAN.​—MATEO 14:13-21; MARCOS 8:1-9; JUAN 6:1-14.

KARI:

“Ti met laeng daga sigurado nga ipaaynanto ti bungana; ti Dios, a Diostayo, bendisionannatayto.”​—SALMO 67:6.

KAIPAPANANNA KADATAYO:

AWANTON TI AGBISIN.

MILAGRO:

INSUBLI NI JESUS TI PANAGKITA DAGITI BULSEK.​—MATEO 9:27-31; MARCOS 8:22-26.

KARI:

“Maluktanto ti matmata dagidiay bulsek.”​—ISAIAS 35:5.

KAIPAPANANNA KADATAYO:

MAKAKITANTO AMIN A BULSEK.

MILAGRO:

PINAIMBAG NI JESUS DAGIDIAY ADDAAN ITI PISIKAL A DEPEKTO.​—MATEO 11:5, 6; JUAN 5:3-9.

KARI:

“Kumalay-atto daydiay pilay a kas iti panagkalay-at ti kalakian nga ugsa.”​—ISAIAS 35:6.

KAIPAPANANNA KADATAYO:

MAPAIMBAGTO AMIN A PISIKAL A DEPEKTO.

MILAGRO:

INAGASAN NI JESUS TI ADU A KITA TI SAKIT.​—MARCOS 1:32-34; LUCAS 4:40.

KARI:

“Awanto ti agtataeng nga agkuna: ‘Masakitak.’”​—ISAIAS 33:24.

KAIPAPANANNA KADATAYO:

MAIKKATTO AMIN A SAKIT. NASALUN-ATTAYTO AMIN.

MILAGRO:

KINONTROL NI JESUS TI PUERSA TI NAKAPARSUAAN.​—MATEO 8:23-27; LUCAS 8:22-25.

KARI:

“Pudno unay a mangbangondanto iti balbalay ket agnaedda; ket pudno unay nga agmuladanto kadagiti kaubasan ket kanenda ti bungada. Saandanto nga agbannog iti awan kapapay-anna.”​—ISAIAS 65:21, 23.

“Adayokanto iti pannakairurumen​—ta awanto ti pagbutngam​—ken iti aniaman a banag a makapakullayaw, ta saanto nga umasideg kenka.”​—ISAIAS 54:14.

KAIPAPANANNA KADATAYO:

AWANTON DAGITI DIDIGRA.

MILAGRO:

PINAGUNGAR NI JESUS DAGITI NATAY.​—MATEO 9:18-26; LUCAS 7:11-17.

KARI:

“Amin dagidiay adda kadagiti pakalaglagipan a tanem . . . rummuarda.”​—JUAN 5:28, 29.

“Ti baybay inyawatna dagidiay natay nga adda kenkuana, ket ni patay ken ti Hades inyawatda dagidiay natay nga adda kadakuada.”​—APOCALIPSIS 20:13.

KAIPAPANANNA KADATAYO:

MAPAGUNGARTO DAGITI IPATPATEGTAYO.