Naisaludsodmo kadin dagita iti bagim? No wen, saanka nga agmaymaysa. Pampanunoten dagiti tattao iti intero a lubong dagiti napapateg a saludsod iti biag. Masarakam kadi dagiti sungbat?

“Wen,” kuna ti minilion a tattao! Apay? Nasarakanda iti Biblia dagiti makapnek a sungbat dagiti saludsodda. Kayatmo kadi a maammuan no ania ti kuna ti Biblia? No kasta, mabalin a kayatmo ti magunggonaan iti libre a panagadal iti Biblia nga ituktukon dagiti Saksi ni Jehova.a

Agpayso a no maipapan iti panagadal iti Biblia, adda agkuna: “Awan panawenko.” “Narigat dayta.” “Diak maipasigurado.” Ngem kayat ti dadduma nga ammuen ti isursuro ti Biblia. Kitaem ti sumagmamano a pagarigan:

• “Mapmapanak kadagiti simbaan dagiti Katoliko ken Protestante, iti templo dagiti Sikh, ken iti monasterio dagiti Budista. Nagadalak pay iti teolohia iti maysa nga unibersidad. Ngem saan a nasungbatan ti adu a saludsodko maipapan iti Dios. Kalpasanna, adda Saksi ni Jehova nga immay iti pagtaenganmi. Napnekak kadagiti sungbatna a naibatay iti Biblia isu nga immanamongak a mayadalan iti Biblia.”​—Gill, England.

• “Adu ti saludsodko iti biag, ngem diak napnek kadagiti sungbat ti pastormi. Nupay kasta, nasungbatan dagita ti maysa a Saksi ni Jehova babaen ti Biblia. Idi dinamagna no kayatko a maammuan ti ad-adu pay, dagus nga immanamongak.”​—Koffi, Benin.

• “Kayatko a maammuan ti kasasaad dagiti natay. Mamatiak a mabalinda a dangran dagiti sibibiag, ngem kayatko a maammuan no ania ti kuna ti Biblia. Isu a nakipagadalak iti Biblia iti gayyemko a Saksi.”​—José, Brazil.

• “Pinadasko a basaen ti Biblia ngem diak maaw-awatan. Kalpasanna, immay dagiti Saksi ni Jehova ket inlawlawagda a naimbag ti dadduma a padto iti Biblia. Kayatko a maammuan ti ad-adu pay.”​—Dennize, Mexico.

• “Pinampanunotko no pudpudno met laeng a maseknan ti Dios kaniak. Isu a nagkararagak iti Dios a nadakamat iti Biblia. Kabigatanna, addada Saksi a nagtuktok iti ridawko, ket immanamongak a makipagadal iti Biblia kadakuada.”​—Anju, Nepal.

Ipalagip dagita a kapadasan dagiti sasao ni Jesus: “Naragsak dagidiay sipapanunot iti naespirituan a kasapulanda.” (Mateo 5:3) Wen, adda nainkasigudan a tarigagay dagiti tattao nga agdayaw iti Dios. Ti laeng Dios ti makapennek iti dayta, ken ipapaayna dayta babaen ti Saona, ti Biblia.

Gapuna, kasano ti panagadal iti Biblia? Ania ti maitulong dayta kenka? Masungbatan dagitoy iti sumaganad nga artikulo.

Nalatak dagiti Saksi ni Jehova iti intero a lubong gapu iti panangasabada iti publiko. Ngem ammom kadi a mangikonkonduktakami met iti programa a panagadal iti Biblia iti intero a lubong?

Idi 2014, nasurok a 8,000,000 a Saksi iti 240 a pagilian ti nangikondukta iti gistay 9,500,000 a panangyadal iti Biblia iti kada bulan.a Ad-adu nga amang ti bilang dagiti agad-adal iti Biblia ngem iti populasion ti tunggal maysa kadagiti 140 a pagilian!

Tapno maitungpal daytoy a panangisuro, tinawen a mangipabpablaak dagiti Saksi ni Jehova iti agarup maysa ket kagudua a bilion a Biblia, libro, magasin, ken dadduma pay a katulongan iti panangyadal iti Biblia​—iti agarup 700 a lengguahe! Gapu iti daytoy di maartapan a panagipablaak, maadal dagiti tattao ti Biblia iti lengguahe a kayatda.

SUNGBAT DAGITI MASANSAN A MAISALUDSOD MAIPAPAN ITI PROGRAMA A PANAGADAL ITI BIBLIA

Kasano ti panagadal iti Biblia?

Mangpilikami iti nadumaduma a topiko iti Biblia ken usigenmi dagiti nainaig a teksto. Kas pagarigan, sungbatan ti Biblia dagiti saludsod a kas iti: Asino ti Dios? Ania a kita a persona ti Dios? Adda kadi naganna? Sadino ti pagnanaedanna? Mabalintay kadi ti suminged kenkuana? Ngem ti problema ket no ania a paset ti Biblia ti pakasarakantayo kadagiti sungbat.

Tapno matulongan dagiti tattao a mangbirok kadagiti sungbat, masansan nga us-usarenmi ti 224 ti panidna a libro nga Ania a Talaga ti Isursuro ti Biblia?b Nadisenio daytoy a mangtulong kadagiti tattao a mangtarus kadagiti kangrunaan a sursuro ti Biblia. Ramanenna dagiti topiko maipapan iti Dios, Jesu-Kristo, panagsagaba ti tao, panagungar, kararag, ken dadduma pay.

Kaano ken sadino a maaramid ti panagadal?

Maaramid ti panagadal iti oras ken lugar a kombeniente kenka.

Kasano kapaut ti tunggal panagadal?

Adu ti mangilatlatang iti maysa nga oras wenno nasursurok pay iti kada lawas a mangadal iti Biblia. Ngem mabalin nga agbaliw ti kapaut dayta, depende iti eskediulmo. Dadduma a panagadal ket agpaut laeng iti 10 wenno 15 a minuto iti kada lawas.

Mano ti bayadan iti panagadal?

Libre ti panagadal agraman dagiti publikasion a maadal. Maitunos daytoy iti imbilin ni Jesus kadagiti adalanna: “Inawatyo nga awan bayadna, itedyo nga awan bayadna.”​—Mateo 10:8.

Kasano kapaut ti programa a panagadal?

Agdepende dayta kenka. Adda 19 a maadal a topiko iti libro nga Ania a Talaga ti Isursuro ti Biblia? Mabalinmo nga adalen ti amin wenno aniaman kadagita a topiko iti kapartak a kombeniente kenka.

Masapul kadi nga agbalinak a maysa a Saksi ni Jehova?

Saan. Raemenmi ti kalintegan ti tunggal maysa nga agpili no ania ti patienna. Ngem dagidiay makaadal kadagiti kangrunaan a sursuro ti Biblia makaaramidda iti umiso a desision.

Pakasarakak kadagiti kanayonan nga impormasion?

Mangipapaay ti Web site a jw.org iti umiso nga impormasion maipapan kadagiti patpatien ken aktibidad dagiti Saksi ni Jehova.

Kasanoak a makapagkiddaw iti panagadal iti Biblia?

• 

  Agkiddawka online iti www.jw.org/ilo.

• Agsuratka iti adres nga adda iti panid 2 daytoy a magasin.