Pannakayanak Manen​—Ti Dalan nga Agturong iti Pannakaisalakan?

ANIA ti sungbatyo iti saludsod a, “Nayanakka kadi manen?” Minilion nga agkunkuna a Kristiano iti intero a lubong ti sumungbat iti, “Wen!” Patienda a ti pannakayanak manen ket pakabigbigan ti amin a pudno a Kristiano ken ti kakaisuna a pamay-an wenno dalan nga agturong iti pannakaisalakan. Umanamongda iti panangmatmat dagiti lider ti relihion a kas ken Robert C. Sproul, maysa a teologo a nangisurat: “No saan a mayanak manen ti maysa a tao, . . . isu ket saan a Kristiano.”

Maysakayo kadi kadagidiay mamati a no mayanakkayo manen sigurado ti pannakaisalakanyo? No kasta, awan duadua a kayatyo a tulongan dagiti kakabagian ken gagayyemyo a mangbirok ken magna iti dayta a dalan. Ngem tapno maaramidda dayta, masapul a matarusanda ti nagdumaan ti maysa a nayanak manen ken ti saan. Kasanoyo nga ilawlawag kadakuada ti kaipapanan ti pannakayanak manen?

Adu ti mamati a ti sasao a “mayanak manen” tukoyenna ti maysa a nangaramid iti naimpusuan a kari nga agserbi iti Dios ken ni Kristo, ket iti kasta, arigna a mapagbiag iti naespirituan a pamay-an. Kinapudnona, depinaren ti maysa a diksionario ti indibidual a nayanak manen kas “maysa a Kristiano a nangpabaro wenno nangpatalged iti pammatina, nangnangruna kalpasan ti maysa a karkarna a pasamak a patienna a mainaig iti Dios.”​—Merriam-Webster’s Collegiate Dictionary​—Eleventh Edition.

Masdaawkayo kadi a makaammo a naiduma ti depinasion ti Biblia iti dayta a sasao? Kayatyo kadi a maammuan no ania a talaga ti isursuro ti Sao ti Dios maipapan iti pannakayanak manen? Sigurado a magunggonaankayo no usigenyo a naimbag daytoy a topiko. Apay? Gapu ta ti umiso a pannakatarus iti kaipapanan ti pannakayanak manen apektaranna ti biagyo ken ti namnamaenyo iti masanguanan.

Ania ti Isursuro ti Biblia?

Iti Biblia, ti kakaisuna a nagparangan ti sasao a “mayanak manen” ket iti Juan 3:1-12, a nangdakamat iti makapainteres a pannakisarita ni Jesus iti maysa a relihioso a lider idiay Jerusalem. Mabasayo dayta a salaysay iti naipakuyog a kahon. Basaenyo koma a naimbag dayta.

Iti salaysay, intampok ni Jesus ti sumagmamano nga aspeto ti “baro a pannakayanak.”a Kinapudnona, dayta a pannakisarita ni Jesus tulongannatayo a mangsungbat kadagiti lima a nagpateg a saludsod:

◼ Kasano kapateg ti baro a pannakayanak?

◼ Personal kadi a desision ti pannakayanak manen?

◼ Ania ti panggepna?

◼ Kasano a mayanak manen ti maysa a tao?

◼ Ania a panagbalbaliw iti relasion ti itdenna?

Usigentayo ti tunggal maysa kadagita a saludsod.

[Footnote]

[Kahon/Ladawan iti panid 4]

“Masapul a Mayanakkayo Manen”

“Itan adda maysa a lalaki kadagiti Fariseo, Nicodemo ti naganna, maysa nga agturay kadagiti Judio. Daytoy a tao immay kenkuana iti rabii ket kinunana kenkuana: ‘Rabbi, ammomi a sika kas maysa a mannursuro naggapuka iti Dios; ta awan makaaramid kadagitoy a pagilasinan nga ar-aramidem malaksid no adda kenkuana ti Dios.’ Kas sungbat kinuna kenkuana ni Jesus: ‘Pudno unay kunak kenka, Malaksid no ti asinoman mayanak manen, saanna a mabalin a kitaen ti pagarian ti Dios.’ Kinuna kenkuana ni Nicodemo: ‘Kasano a mayanak ti maysa a tao no lakayen? Mabalinna aya ti sumrek iti aanakan ni inana iti maikadua a daras ket mayanak?’ Simmungbat ni Jesus: ‘Pudno unay kunak kenka, Malaksid no ti asinoman mayanak manipud danum ken espiritu, saanna a mabalin ti sumrek iti pagarian ti Dios. Ti nayanak manipud iti lasag ket lasag, ket ti nayanak manipud iti espiritu ket espiritu. Dika agsiddaaw gapu ta imbagak kenka, Masapul a mayanakkayo manen. Ti angin agpuyupoy iti sadinoman a kayatna, ket mangngegmo ti awerna, ngem saanmo nga ammo no sadino ti paggapuanna ken no sadino ti papananna. Kasta met ti tunggal maysa a nayanak manipud iti espiritu.’ Kas sungbat kinuna kenkuana ni Nicodemo: ‘Kasano a mapasamak dagitoy a banag?’ Kas sungbat kinuna kenkuana ni Jesus: ‘Maysaka aya a mannursuro iti Israel ket kaskasdi a saanmo nga ammo dagitoy a banag? Pudno unay kunak kenka, No ania ti ammomi sawenmi ket no ania ti nakitami saksianmi, ngem saanyo nga awaten ti pangsaksi nga ipaaymi. No imbagak kadakayo ti naindagaan a bambanag ket kaskasdi a saankayo a mamati, kasanonto a mamatikayo no ibagak kadakayo ti nailangitan a bambanag?’”​—Juan 3:1-12.

Ti Baro a Pannakayanak​—Kasano Kapateg?

ITI pannakisaritana ken Nicodemo, impaganetget ni Jesus ti kinapateg ti baro a pannakayanak, wenno pannakayanak manen. Kasano?

Imutektekanyo no kasano nga intampok ni Jesus ti kinapateg ti baro a pannakayanak idi nakisarita ken Nicodemo. Kunana: “Malaksid no ti asinoman mayanak manen, saanna a mabalin a kitaen ti pagarian ti Dios.” (Juan 3:3) Dagiti sasao a “malaksid” ken ‘saan a mabalin’ itampokda ti kinapateg ti baro a pannakayanak. Kas panangyilustrar: No kuna ti maysa, “Malaksid no sumingising ti init, saan a nalawag ti aglawlaw,” kayatna a sawen a naan-anay a kasapulan ti isisingising ti init tapno adda lawag. Umasping iti dayta, ti imbaga ni Jesus a pannakayanak manen ket naan-anay a kasapulan tapno ti maysa makitana ti Pagarian ti Dios.

Tapno maikkat ti panagduadua maipapan iti dayta a topiko, kinuna ni Jesus: “Masapul a mayanakkayo manen.” (Juan 3:7) Sigun ken Jesus, nalawag a kasapulan ti pannakayanak manen tapno ti maysa ket ‘makastrek iti pagarian ti Dios.’​—Juan 3:5.

Yantangay matmatan ni Jesus a nakapatpateg ti pannakayanak manen, nasken a siguraduen dagiti Kristiano nga umiso ti pannakaawatda iti dayta a banag. Kas pagarigan, dagiti kadi Kristiano ti mangikeddeng no mayanakda manen?

[Blurb iti panid 5]

“Malaksid no sumingising ti init, saan a nalawag ti aglawlaw”

Ti Baro a Pannakayanak​—Personal a Desision?

ASINO ti mangikeddeng iti baro a pannakayanak? No ti dadduma a ministro idagadagda kadagiti parokianoda nga agbalinda a nayanak manen a Kristiano, adawenda dagitoy a sasao ni Jesus: “Masapul a mayanakkayo manen.” (Juan 3:7) Dagita a ministro usarenda dagitoy a sasao kas bilin, a kasla ibagbagada, “Masapul a mayanakkayo manen!” Gapuna, ibagbagada nga agpannuray iti tunggal maysa no ikeddengna ti agtulnog kenni Jesus ken mangaramid kadagiti napateg nga addang para iti baro a pannakayanak. Sigun iti dayta a panagrasrason, ti baro a pannakayanak ket personal a desision. Ngem maitunos kadi dayta iti kinuna ni Jesus kenni Nicodemo?

No basaen a naimbag dagiti sasao ni Jesus, maawatantayo a saan a ti tao ti mangikeddeng no isu ket mayanak manen. Apay a maikunatayo dayta? Ti Griego nga ebkas a naipatarus kas “mayanak manen” ket mabalin a maipaulog met kas “rumbeng a mayanak manen manipud ngato.”a Gapuna, sigun iti sabali a patarus, ti baro a pannakayanak ket agtaud “manipud ngato”​—kayatna a sawen, “manipud langit,” wenno “manipud iti Ama.” (Juan 19:11; Santiago 1:17) Wen, ti Dios ti mangikeddeng iti dayta.​—1 Juan 3:9.

No laglagipentayo ti ebkas a “manipud ngato,” saan a narigat a tarusan no apay a saan a ti indibidual ti mangikeddeng no isu ket mayanak manen. Panunotenyo laengen ti pannakaipasngayyo. Dakayo kadi ti nangikeddeng a maipasngaykayo? Siempre saan! Nayanakkayo gapu ken tatangyo. Umasping iti dayta, mabalintayo ti mayanak manen no ikeddeng dayta ti Dios, ti nailangitan nga Amatayo. (Juan 1:13) Gapuna, siuumiso a kinuna ni apostol Pedro: “Bendito koma ti Dios ken Ama ni Apotayo a Jesu-Kristo, ta maitunos iti naindaklan nga asina impaayannatayo iti baro a pannakayanak.”​—1 Pedro 1:3.

Bilin Kadi Dayta?

Mabalin a panunoten ti dadduma, ‘No saan a ti tao ti mangikeddeng no isu ket mayanak manen, apay ngarud nga imbilin ni Jesus: “Masapul a mayanakkayo manen”?’ Nainkalitegan dayta a saludsod. No ngamin bilin dayta, kasla ipapaaramid ni Jesus ti maysa a banag a saantayo a karbengan. Ket saan a nainkalintegan dayta. Ania ngarud ti kayat a sawen ti sasao a masapul a “mayanakkayo manen”?

No usigen a naimbag ti orihinal a lenguahe a nagtaudan dayta a sasao, saan a bilin dayta. Imbes ketdi, naibalikas dagita a sasao tapno mangyallatiw iti impormasion. Iti sabali a pannao, idi kinuna ni Jesus a masapul a “mayanakkayo manen,” mangyal-allatiw laeng iti maysa nga impormasion, saan ket a mangmangted iti bilin. Kinunana: “Masapul a mayanakkayo manipud ngato.”​—Juan 3:7, Modern Young’s Literal Translation.

Kas panangyilustrar iti pagdumaan ti bilin ken panangyallatiw iti impormasion, usigenyo daytoy. Iladawanyo ti maysa a siudad nga addaan iti sumagmamano nga eskuelaan. Maysa kadagita ti nairanta a pageskuelaan dagiti katutubo a naggapu iti lugar nga adayo iti siudad. Maysa nga aldaw, adda agtutubo a saan a katutubo nga umasideg iti prinsipal ti eskuelaan ket ibagana, “Kayatko ti agpasalista ditoy eskuelaanyo.” Ibaga kenkuana ti prinsipal, “Tapno maawatka ditoy, masapul a maysaka a katutubo.” Siempre, saan a bilin ti imbaga ti prinsipal. Saanna nga ibagbaga iti agtutubo a, “Masapul nga agbalinka a katutubo!” Ti prinsipal ket mangyal-allatiw laeng iti impormasion​—no ania ti makalikaguman kadagiti agbalin nga estudiante iti dayta nga eskuelaan. Umasping iti dayta, idi imbaga ni Jesus: “Masapul a mayanakkayo manen,” isu ket mangyal-allatiw laeng iti impormasion​—no ania ti makalikaguman tapno ti maysa ket ‘makastrek iti pagarian ti Dios.’

Dayta a Pagarian ti Dios ket adda pakainaiganna iti sabali pay nga aspeto ti baro a pannakayanak. Mainaig dayta iti saludsod nga, Ania ti panggepna? Makatulong ti panangammo iti sungbat dayta a saludsod tapno maawatan no ania a talaga ti kayat a sawen ti pannakayanak manen.

[Footnote]

[Ladawan iti panid 6]

Ania ti nagpadaan ti baro a pannakayanak ken ti literal a pannakaipasngay?

Ti Baro a Pannakayanak​—Ania ti Panggepna?

PATIEN ti adu a masapul a mayanak manen ti maysa tapno magun-odna ti agnanayon a pannakaisalakan. Ngem imutektekanyo no ania ti kinuna ni Jesus maipapan iti panggep ti baro a pannakayanak. Kinunana: “Malaksid no ti asinoman mayanak manen, saanna a mabalin a kitaen ti pagarian ti Dios.” (Juan 3:3) Gapuna, masapul a mayanak manen ti maysa tapno makastrek iti Pagarian ti Dios, saan a tapno maisalakan. ‘Ngem,’ kuna ti dadduma, ‘saan kadi a ti iseserrek iti Pagarian ken ti pannakaisalakan ket tuktukoyenda ti isu met laeng a gunggona?’ Saan. Tapno makitatayo ti nagdumaanda, usigentayo nga umuna ti kaipapanan ti ebkas a “pagarian ti Dios.”

Ti pagarian ket maysa a gobierno. Ngarud ti ebkas a “pagarian ti Dios” kaipapananna ti “gobierno ti Dios.” Isuro ti Biblia a ni Jesu-Kristo, ti “anak ti tao,” isu ti Ari iti Pagarian ti Dios ken adda kakaduana nga agturay. (Daniel 7:1, 13, 14; Mateo 26:63, 64) Maysa pay, nasirmata ni apostol Juan a dagiti makipagturay ken Kristo ket indibidual a napili “manipud iti tunggal tribu ken pagsasao ken ili ken nasion” ken “agturayda a kas ar-ari iti daga.” (Apocalipsis 5:9, 10; 20:6) Ibaga met ti Sao ti Dios a dagidiay makipagturay kas ar-ari buklenda ti “bassit nga ipastoran” nga agdagup iti 144,000 nga indibidual a “nagatang manipud iti daga.”​—Lucas 12:32; Apocalipsis 14:1, 3.

Sadino ti nakaipasdekan ti Pagarian ti Dios? “Ti pagarian ti Dios” ket maawagan met kas “ti pagarian ti langlangit,” a mangipakita nga idiay langit nga agturay ni Jesus ken dagiti kakaduana nga ar-ari. (Lucas 8:10; Mateo 13:11) Gapuna, ti Pagarian ti Dios ket nailangitan a gobierno a buklen ni Jesu-Kristo ken dagiti kakaduana nga agturay a napili manipud iti sangatauan.

Ania ngarud ti kayat a sawen ni Jesus idi kinunana a masapul a mayanak manen ti maysa tapno ‘makastrek iti pagarian ti Dios’? Ibagbagana a masapul a mayanak manen ti maysa tapno maikari a makipagturay ken Kristo idiay langit. Iti simple a pannao, ti panggep ti baro a pannakayanak ket tapno maisagana ti maysa a limitado a grupo dagiti tattao nga agturay idiay langit.

Kadagiti nausigtayon, nakitatayo a ti baro a pannakayanak ket nagpateg, isaganana ti maysa a grupo dagiti tattao nga agturay idiay langit, ken ti Dios ti nangikeddeng iti dayta. Ngem kasano a mapasamak ti baro a pannakayanak?

[Blurb iti panid 7]

Ti panggep ti baro a pannakayanak ket tapno maisagana ti maysa a limitado a grupo dagiti tattao nga agturay idiay langit

[Ladawan iti panid 7]

Ti Pagarian ti Dios ket buklen ni Jesu-Kristo ken dagiti kakaduana nga agturay a napili manipud iti sangatauan

Ti Baro a Pannakayanak​—Kasano a Mapasamak?

NI Jesus insaritana ken Nicodemo saan laeng a ti kinapateg, makinggapuanan, ken panggep ti baro a pannakayanak no di ket dinakamatna pay no kasano a mapasamak dayta. Kinuna ni Jesus: “Malaksid no ti asinoman mayanak manipud danum ken espiritu, saanna a mabalin ti sumrek iti pagarian ti Dios.” (Juan 3:5) No kasta, ti maysa a tao ket mayanak manen babaen ti danum ken espiritu. Ngem ania ti tuktukoyen ti sasao a “danum ken espiritu”?

“Danum ken Espiritu”​—Ania ti Tuktukoyenda?

Gapu ta nalaing ni Nicodemo iti relihion dagiti Judio, awan duadua nga isu ket pamiliar iti panangusar ti Hebreo a Kasuratan iti termino nga “espiritu ti Dios”​—ti aktibo a puersa ti Dios a mangipaay iti pannakabalin kadagiti tattao a mangibanag kadagiti naisangsangayan nga aramid. (Genesis 41:38; Exodo 31:3; 1 Samuel 10:6) Ngarud, idi inusar ni Jesus ti sao nga “espiritu,” naawatan ni Nicodemo a ti tuktukoyenna ket ti nasantuan nga espiritu, ti aktibo a puersa ti Dios.

Ti ngay danum a tinukoy ni Jesus? Usigenyo dagiti naisurat a pasamak sakbay ken kalpasan unay ti pannakisarita ni Jesus kenni Nicodemo. Ipakita dagitoy a ni Juan a Mammautisar ken dagiti adalan ni Jesus agpapadada a mangbabautisar iti danum. (Juan 1:19, 31; 3:22; 4:1-3) Limmatak idiay Jerusalem ti kasta a bautismo. Gapuna, idi dinakamat ni Jesus ti maipapan iti danum, natarusan ni Nicodemo a tuktukoyen ni Jesus ti panangbautisar iti danum, saan ket a ti mismo a danum.a

Pannakabautisar “iti Nasantuan nga Espiritu”

No ti ‘pannakayanak manipud iti danum’ ket mainaig iti pannakabautisar iti danum, ania ti kaipapanan ti “mayanak manipud . . . espiritu”? Sakbay ti panagsarita da Nicodemo ken Jesus, impakaammo ni Juan a Mammautisar a saan laeng a ti danum ti addaan iti napateg nga akem iti bautismo no di ket uray ti espiritu. Kinunana: “Binautisarankayo iti danum, ngem [ni Jesus] bautisarannakayto iti nasantuan nga espiritu.” (Marcos 1:7, 8) Ti mannurat iti Ebanghelio a ni Marcos dineskribirna ti umuna a gundaway a napasamak ti kasta a bautismo. Insuratna: “Kabayatan dagidiay nga aldaw immay ni Jesus manipud Nazaret ti Galilea ket nabautisaran idiay Jordan babaen ken Juan. Ket dagus nga idi sumangsang-at manipud iti danum nakitana ti langlangit a mabisbisngay, ken, kasla kalapati, ti espiritu a bumabbaba kenkuana.” (Marcos 1:9, 10) Idi naitaneb ni Jesus idiay Jordan, isu ket nabautisaran babaen ti danum. Iti kanito nga immapay kenkuana ti espiritu manipud langit, isu ket nabautisaran iti nasantuan nga espiritu.

Agarup tallo a tawen kalpasan ti bautismona, impanamnama ni Jesus kadagiti adalanna: “Mabautisarankayto iti nasantuan nga espiritu saan nga adu nga aldaw kalpasan daytoy.” (Aramid 1:5) Kaano a napasamak dayta?

Idi aldaw ti Pentecostes 33 K.P., agarup 120 nga adalan ni Jesus ti naguummong iti maysa a pagtaengan idiay Jerusalem. “Pagammuan adda dimteng manipud langit nga ungor a kaasping ti ungor ti bumanesbes a napigsa a puyupoy, ket pinunnona ti intero a balay nga ayanda a pagtugtugawan. Ket nagparang kadakuada ti dildila a kasla iti apuy . . . , ket napnoda amin iti nasantuan nga espiritu.” (Aramid 2:1-4) Iti dayta met la nga aldaw, naidagadag kadagiti dadduma idiay Jerusalem nga agpabautisarda iti danum. Kinuna ni apostol Pedro iti bunggoy: “Agbabawikayo, ket mabautisaran koma ti tunggal maysa kadakayo iti nagan ni Jesu-Kristo maipaay iti pannakapakawan dagiti basolyo, ket awatenyonto ti awan bayadna a sagut ti nasantuan nga espiritu.” Ania ti inaramidda? “Nabautisaran dagidiay naimpusuan a nangabrasa iti saona, ket iti dayta nga aldaw nainayon ti agarup tallo ribu a kararua.”​—Aramid 2:38, 41.

Dua a Kita ti Bautismo

Ania ti ipalgak dagitoy a bautismo maipapan iti baro a pannakayanak? Ipakitada a masapul dagitoy dua a kita ti bautismo tapno mapasamak ti baro a pannakayanak. Imutektekanyo ta nabautisaran nga umuna ni Jesus iti danum. Kalpasanna, immawat iti nasantuan nga espiritu. Umasping iti dayta, dagiti nagkauna nga adalan nabautisaranda nga umuna iti danum (dadduma babaen ken Juan a Mammautisar), ket kalpasanna, inawatda ti nasantuan nga espiritu. (Juan 1:26-36) Kasta met laeng dagiti 3,000 a nakomberte. Umuna a nabautisaranda iti danum sa immawatda iti nasantuan nga espiritu.

Maibatay iti bautismo a napasamak idi Pentecostes 33 K.P., kasano met ngarud a maaramid ti baro a pannakayanak iti kaaldawantayo? Iti isu met laeng a pamay-an a kas iti pannakaaramidna kadagiti apostol ni Jesus ken kadagiti nagkauna nga adalan. Umuna, masapul a pagbabawyan ti maysa dagiti basolna, tallikudanna dagiti dakes nga aramidna, idedikarna ti biagna ken Jehova tapno agdayaw ken agserbi kenkuana, ken agpabautisar iti danum kas publiko a panangipakita iti dedikasionna. Kalpasanna, no isu ket pilien ti Dios a makipagturay iti Pagarianna, mapulotan iti nasantuan nga espiritu. Ti umuna kadagitoy a bautismo (bautismo iti danum) ket ikeddeng ti indibidual; ti maikadua a bautismo (bautismo iti espiritu) ket ikeddeng ti Dios. No ti maysa a tao ket mabautisaran iti danum ken iti espiritu, isu ket nayanak manen.

Apay ngarud nga iti pannakisarita ni Jesus kenni Nicodemo, inusarna ti ebkas a “mayanak manipud danum ken espiritu”? Tapno ipaganetgetna nga adda mapasamak a dakkel a panagbalbaliw kadagidiay mabautisaran iti danum ken espiritu. Ti sumaganad nga artikulo usigenna dayta nga aspeto ti baro a pannakayanak.

[Footnote]

[Ladawan iti panid 9]

Ni Juan binautisaranna iti danum dagiti nagbabawi nga Israelita

Ti Baro a Pannakayanak​—Ania ti Ibanagna?

APAY nga inusar ni Jesus ti ebkas a “mayanak manipud . . . espiritu” idi dinakamatna ti maipapan iti bautismo iti nasantuan nga espiritu? (Juan 3:5) No mausar dayta iti piguratibo a pamay-an, ti sao a “mayanak” kaipapananna “pangrugian,” kas iti ebkas a “pannakayanak ti maysa a nasion.” Gapuna, ti ebkas a “baro a pannakayanak” ipamatmatna ti “baro a pangrugian.” No kasta, ti piguratibo a sasao a “mayanak” ken “baro a pannakayanak” ipaganetgetda a mangrugi ti baro a relasion iti nagbaetan ti Dios ken dagidiay mabautisaran iti nasantuan nga espiritu. Kasano a maipasdek dayta a baro a relasion?

Kas panangilawlawag no kasano nga isagana ti Dios dagiti tattao a makipagturay idiay langit, inusar ni apostol Pablo ti maysa nga ilustrasion mainaig iti biag ti pamilia. Insuratna kadagiti Kristiano idi kaaldawanna a matagiragsakdanto ti “pannakaampon kas annak” ket iti kasta, ibilang ida ti Dios ‘kas annakna.’ (Galacia 4:5; Hebreo 12:7) Makatulong ti urnos ti panagampon tapno maawatantayo no ania a panagbalbaliw ti mapasamak iti maysa nga indibidual no mabautisaran iti nasantuan nga espiritu. Kasano? Usigentayo manen ti ilustrasion maipapan iti agtutubo nga agtarigagay nga agpasalista iti eskuelaan para kadagiti katutubo nga estudiante.

Panagbalbaliw Babaen ti Panagampon

Iti ilustrasion, ti agtutubo ket saan a naawat iti dayta nga eskuelaan gapu ta saan a katutubo. Ita, panunotenyo nga adda napasamak a dakkel a panagbalbaliw. Isu ket legal nga inampon ti maysa nga ama ti katutubo a pamilia. Ania ti epektona dayta iti agtutubo? Bueno, gapu iti pannakaamponna, matagiragsaknan dagiti kalintegan a tagtagiragsaken dagiti katutubo nga estudiante​—agraman ti kalintegan a makapagpasalista iti dayta nga eskuelaan. Ti pannakaamponna ti naan-anay a nangbalbaliw iti masanguananna.

Daytoy ti mangyilustrar no ania ti dakdakkel a kaitungpalanna kadagidiay mangtagiragsak iti baro a pannakayanak. Usigenyo ti sumagmamano a nagpadaanda. Ti agtutubo iti ilustrasion ket maawat iti eskuelaan no maragpatna dagiti kualipikasion​—ti panagbalin a kameng ti katutubo a komunidad. Kaskasdi, saan a makakualipikar iti kabukbukodanna. Umasping iti dayta, dadduma a tattao ti makipagturay iti Pagarian ti Dios, wenno nailangitan a gobierno, no maragpatda ti kualipikasion​—ti ‘pannakayanakda manen.’ Kaskasdi, saanda a maragpat dayta a kualipikasion iti bukodda gapu ta ti baro a pannakayanak ket agpannuray iti Dios.

Ania ti namagbalbaliw iti kasasaad ti agtutubo? Ti legal a proseso ti panagampon. Siempre, dayta a proseso dina binalbaliwan ti kinatao ti agtutubo. Nupay kasta, kalpasan a naragpat dagiti legal a kalikagum ti panagampon, nagbalbaliw ti kasasaad ti agtutubo. Iti kasta, arigna a nayanak manen. Nagbalinen a legal nga anak, a nangted kenkuana iti kalintegan a maawat iti eskuelaan ken agbalin a paset ti pamilia ti ama a nangampon kenkuana.

Umasping iti dayta, balbaliwan ni Jehova ti kasasaad ti grupo dagiti imperpekto a tattao babaen ti panangyussuatna iti legal a proseso tapno maamponna ida a kas annakna. Ni apostol Pablo, a paset dayta a grupo, insuratna kadagiti pada a manamati: “Inawatyo ti espiritu ti pannakaampon kas annak, a babaen iti dayta nga espiritu ipukkawtayo: ‘Abba, Ama!’ Ti mismo nga espiritu mangsaksi a buyogen ti espiritutayo a datayo ket annak ti Dios.” (Roma 8:15, 16) Wen, babaen ti proseso ti panagampon, dagita a Kristiano nagbalinda a paset ti pamilia ti Dios, wenno “annak ti Dios.”​—1 Juan 3:1; 2 Corinto 6:18.

Siempre, dayta a panangampon ti Dios dina balbaliwan ti kinatao dagiti naampon yantangay agtalinaedda nga imperpekto. (1 Juan 1:8) Nupay kasta, kas inlawlawag ni Pablo, agbalbaliw ti kasasaadda kalpasan a maragpat dagiti legal a kalikagum ti panagampon. Malaksid iti dayta, ti espiritu ti Dios ipariknana kadagiti naampon nga annak ti natalged a kombiksion a makipagtaengda ken Kristo idiay langit. (1 Juan 3:2) Dayta a natalged a kombiksion a gapuanan ti nasantuan nga espiritu ti naan-anay a mangbalbaliw iti panangmatmatda iti biag. (2 Corinto 1:21, 22) Wen, arigna a mayanakda manen.

Maipapan kadagiti annak nga inampon ti Dios, kuna ti Biblia: “Isudanto ti papadi ti Dios ken ni Kristo, ket makipagturaydanto kenkuana kas ar-ari iti sangaribu a tawen.” (Apocalipsis 20:6) Makipagturayda ken Kristo kas ar-ari iti Pagarian ti Dios, wenno nailangitan a gobierno. Kinuna ni apostol Pedro kadagiti pada a manamati nga umawatda iti “di agrupsa ken di natulawan ken di agkupas a tawid” a ‘naisagana iti langlangit’ agpaay kadakuada. (1 Pedro 1:3, 4) Anian a nagpateg a tawid!

Nupay kasta, mangpataud iti saludsod daytoy a panagturay. No dagiti mayanak manen ket makipagturay kas ar-ari idiay langit, siasinonto dagiti iturayanda? Mausig dayta a saludsod iti sumaganad nga artikulo.

[Ladawan iti panid 10]

Ania ti kinuna ni Pablo maipapan iti panagampon?