No Kasano ti Agbalin a Naanus

“Inaldaw a masubok ti kinaanus ti agassawa. Mabalin a saan a problema ti kinaanus no awan asawam, ngem napateg dayta iti panagballigi ti panagassawa.”​—John.

• Apay a masapul a naanuska?

• Kasanom a maipakita ti kinaanus?

• “Napateg ti kinaanus”

Apay a masapul a naanuska?

• No agassawakayon, makitamon dagiti pagkapuyan ti asawam.

  “No nabayagkayon nga agassawa, ad-addan a ti saanmo a magustuan a kababalin ti asawam ti makitkitam. No mapasamak dayta, nalakakan a masursuron.”—Jessena.

• No awan aanusam, makapagsaoka iti dimo pinampanunot.

  “Masansan a maibagak lattan ti marikriknak uray saan koma a rumbeng. No naan-anusak, makapagpanunotak no masapul nga agsaoak wenno saan.”—Carmen.

  Kuna ti Biblia: “Ti ayat ket naanus.” (1 Corinto 13:4) Rumbeng laeng a naanus ti dua a tao a mangay-ayat iti maysa ken maysa. Ngem saan a kanayon a kasta. Kuna ni John a nadakamat itay: “Kas iti aniaman a nasayaat a kualidad, nalaka a mapukaw ti aanusan. Kasapulan ti panagregget tapno agbalinka a naan-anus.”

Kasanom a maipakita ti kinaanus?

• No adda mapasamak a mangsubok iti aanusam.

  Kas pagarigan: Adda naibaga ti asawam a saan a nasayaat. Ti dagus a reaksionmo ket bumales.

  Prinsipio ti Biblia: “Saanka nga alisto nga agpungtot, ta ti panagpungtot ket marka ti maag.”—Eclesiastes 7:9, footnote.

  No kasano nga ipakita ti kinaanus: Agpanunotka sakbay a sumungbatka. Panunotem nga awan ti intension ti asawam a mangpasakit kenka. Kuna ti libro a Fighting for Your Marriage: “Kaaduanna a sabali ti panangipapantayo iti imbaga ti asawatayo ngem iti talaga a kayatna a sawen.”

  

  Uray no pagpungpungtotennaka ti asawam, agkalma ti kasasaad no aganus ken agteppelka. “Maiddep ti apuy no awan ti sungrod,” kuna ti Biblia.—Proverbio 26:20.

  “No masuronkan ken baketmo, panunotem no apay nga inayatmo ken dagus a mangaramidka iti nasayaat kenkuana.”—Ethan.

  Panunotem:

  • Ania ti aramidem no adda maibaga wenno maaramid ti asawam a saan a nasayaat?

  • Kasanoka nga agbalin a naan-anus no mapasamak manen dayta?

• No adda maulit-ulit a problema a mangsubok iti aanusam.

  Kas pagarigan: Kanayon a maladaw ti asawam ken masuronkan a mangur-uray kenkuana.

  Prinsipio ti Biblia: “Itultuloyyo ti agiinnanus ken situtulok nga agpipinnakawan.”—Colosas 3:13.

  No kasano nga ipakita ti kinaanus: Panunotem ti pagsayaatan ti relasionyo imbes a ti pagsayaatam laeng. Isaludsodmo iti bagim, ‘No makapungtotak, makatulong kadi iti relasionmi wenno saan?’ Laglagipem met a “mamin-adu a maitibkoltayo amin.” (Santiago 3:2) Kayatna a sawen nga adda met dagiti bambanag a parang-ayem.

  “No dadduma, naan-anusak iti maysa a gayyem ngem iti asawak. Gapu siguro ta kanayon a kaduak ti asawak ken makitkitak dagiti pagkuranganna. Ngem ti kinaanus ket maysa nga aspeto ti ayat—tanda dayta ti respeto—isu a napateg dayta iti relasionmi kas agassawa.”—Nia.

  Panunotem:

  • Naanuska kadi no agkamali ti asawam?

  • Kasanoka nga agbalin a naan-anus iti masanguanan?