No Kasano nga Impadto ni Daniel ti Panagparang ti Mesias

NAGBIAG ni propeta Daniel nasurok a 500 a tawen sakbay ti pannakayanak ni Jesus. Nupay kasta, ni Jehova adda impalgakna ken ni Daniel a tumulong a mangipakita no kaano a napulotan wenno nadutokan ni Jesus kas Mesias, wenno Kristo. Naikuna ken ni Daniel: “Rebbeng nga ammuem ken maaddaanka iti pannakatarus a manipud iruruar ti sao a mangisubli ken mangbangon manen iti Jerusalem agingga iti Mesias a Panguluen, addanto pito a lawas, kasta met innem a pulo ket dua a lawas.”​—Daniel 9:25.

Tapno maammuam no kaano a nagparang ti Mesias, masapul nga ammuentayo nga umuna no kaano a mangrugi ti panawen a palabsen agingga iti panagparang ti Mesias. Sigun iti padto, mangrugi dayta “manipud iruruar ti sao a mangisubli ken mangbangon manen iti Jerusalem.” Kaano a ‘nairuar ti sao’? Sigun iti mannurat iti Biblia a ni Nehemias, naibilin ti pannakabangon manen dagiti bakud ti Jerusalem “iti maikaduapulo a tawen ni Artaxerxes nga ari.” (Nehemias 2:1, 5-8) Pasingkedan dagiti historiador a ti umuna a tawen ti panagturay ni Artaxerxes ket idi 474 K.K.P. No kasta, ti maika-20 a tawen ti panagturayna ket idi 455 K.K.P. Idi ngarud 455 K.K.P. a nangrugi a matungpal ti padto ni Daniel maipapan iti Mesias.

Ipakita ti libro a Daniel ti kapaut ti panawen a palabsen agingga iti panagparang ti “Mesias a Panguluen.” Dinakamat ti padto ti “pito a lawas, kasta met innem a pulo ket dua a lawas”​—agdagup iti 69 a lawas. Kasano ti kapaut daytoy a panawen? Kuna ti adu a patarus ti Biblia a dagitoy ket saan a lawas a buklen ti sagpipito nga aldaw, no di ket lawas ti tawtawen. Kayatna a sawen, pito a tawen ti kaibatogan ti tunggal lawas. Gagangay kadagiti nagkauna a Judio ti maipapan iti lawas ti tawtawen, wenno sagpipito a tawen. Kas pagarigan, ngilinenda idi ti Sabbath iti kada maikapito a tawen. (Exodo 23:10, 11) Gapuna, ti naipadto a 69 a lawas ket mamin-69 a pito a tawen, wenno agdagup iti 483 a tawen.

Agbilang laengen ti aramidentayo. No agbilangtayo manipud 455 K.K.P., agpatingga ti 483 a tawen iti 29 K.P. Dayta ti eksakto a tawen a pannakabautisar ken panagbalin ni Jesus a Mesias!a (Lucas 3:1, 2, 21, 22) Saan aya a nakaskasdaaw dayta a kaitungpalan ti padto ti Biblia?