KAPITULO 28

Kasano a Maliklikak ti Agbalin a Homoseksual?

“Idi agtutuboak pay, lablabanak ti panagkursonadak iti padak a lalaki. Iti un-unegko, ammok a saan a normal ti kastoy a rikna.”​—Olef.

“Naminsan wenno naminduan sa a nagbinnisongkami iti gayyemko a babai. Diak ammo no adda tomtomboyko ta agkursonadaak met latta iti lalaki.”​—Sarah.

NO IDILIG iti napalabas a sumagmamano a dekada, adu ti umanamong a saanen a nakababain a pagsasaritaan ti maipapan iti homoseksualidad. Ket awan ti makaitured a mangkontra iti dayta! Ngamin, agbalinka no kua a puntiria ti pammabalaw. Kuna ni Amy nga agtawen iti 16: “Binagaannak ti maysa a babai a no negatibo ti panangmatmatko kadagiti homoseksual, idumdumak met kanon dagiti tattao a sabali ti pulida!”

Yantangay kasla mabalin aminen a banag ita, padpadasenen ti adu nga agtutubo ti makirelasion iti padada a babai wenno lalaki. “Adu a babbai idiay eskuelaanmi ti mangibagbaga a tomboyda, kayatda a padasen ti makiseks iti lalaki ken babai, wenno saan, agus-usiusoda laeng kano maipapan iti sekso,” kuna ni Becky nga agtawen iti 15. Ni Christa, nga agtawen iti 18, kasta met laeng ti nadlawna a mapaspasamak idiay eskuelaanda. Kunana: “Dua kadagiti kaeskuelaak a padak a babai ti aktual a nangawis kaniak a makiseks kadakuada. Sinuratannak pay daydiay maysa tapno damagenna no kayatko a padasen ti makiseks iti padak a babai.”

Gapu ta nakalatlataken ti pannakirelasion iti kasekso, nalabit maisaludsodmo: ‘Talaga kadi a dakes ti agbalin a homoseksual? No ngay agkursonadaak iti kaseksok? Kayat kadi a sawen dayta a bakla wenno tomboyak?’

Ania ti Panangmatmat ti Dios iti Homoseksualidad?

Adu ita, a pakairamanan pay ketdi ti dadduma a papadi, ti mangtagtagilag-an iti isyu maipapan iti homoseksualidad. Ngem nalawag ti kuna ti Sao ti Dios, ti Biblia. Ibagbagana kadatayo a ni Jehova a Dios pinarsuana ti lalaki ken babai ket pinanggepna a dagiti laeng agassawa a lalaki ken babai ti mangtagiragsak iti seksual a panagdenna. (Genesis 1:27, 28; 2:24) Di ngarud pakasdaawan a kondenaren ti Biblia ti homoseksualidad.​—Roma 1:26, 27.

Adda dagiti agkuna a ti Sao ti Dios ket saanen nga agaplikar iti panawentayo. Ngem iti panagkunam, apay ngata a naglakada la nga ibaga ti kasta? Saan ngata a gapu ta ti panangmatmat ti Biblia ket maikontra iti panangmatmatda? Adu ti saan a mamati iti Biblia agsipud ta ti isursurona ket naiduma iti kayatda a patien. Ngem ballikug ti kasta a panangmatmat ket ditay agpaimpluensia iti kasta nga akikid a panagpampanunot!

Ngem kasanon no agkursonadaka iti kaseksom? Kayat kadi a sawen dayta a maysaka a homoseksual? Saan. Laglagipem nga addaka iti “kinalasbang ti kinaagtutubo,” a kabayatan dayta ket mapasaram ti di inggagara a pannakatukay ti seksual a tarigagay. (1 Corinto 7:36) No adda dagiti kanito a maatrakarka iti padam a lalaki wenno babai, di kayat a sawen daytoy a maysaka a homoseksual. Kaaduanna nga agmawmawto met laeng ti kasta a riknam iti panaglabas ti tiempo. Kabayatanna, liklikam ti aniaman nga aramid nga adda pakainaiganna iti homoseksualidad. Kasano?

Ikararagmo ti maipapan iti dayta. Agpakaasika ken Jehova kas iti inaramid ni David: “Sukisokennak, O Dios, ket ammuem ti pusok. Sukimatennak, ket ammuem ti mangrirriribuk a pampanunotko, ket kitaem no adda kaniak ti aniaman a nasaem a dana, ket iturongnak iti dalan ti tiempo a di nakedngan.” (Salmo 139:23, 24) Mapabilegnaka ni Jehova babaen ti talna a “mangringbaw iti isuamin a panunot.” Daytoy ti mabalin a ‘mangsaluad iti pusom ken dagiti pannakabalin ti isipmo’ ken ikkannaka iti “pannakabalin a nalablabes ngem ti gagangay” tapno dinaka maiturayan ti dakes a tarigagaymo.​—Filipos 4:6, 7; 2 Corinto 4:7.

Punnuem ti isipmo kadagiti makapabileg a banag. (Filipos 4:8) Basaem nga inaldaw ti Biblia. Dimo tagibassiten ti pannakabalin dayta a mangimpluensia iti panunot ken pusom nga agpaay iti pagimbagam. (Hebreo 4:12) Kuna ti maysa nga agtutubo a lalaki a ni Jason: “Nagdakkel ti naitulong ti Biblia kaniak, nangruna dagiti teksto a kas iti 1 Corinto 6:9, 10 ken Efeso 5:3. Kada sumken kaniak ti dakes a tarigagay, basaek dagitoy a teksto.”

Liklikam ti pornograpia ken ti aniaman a banag a mangiparparegta iti homoseksualidad. (Colosas 3:5) Adaywam ti aniaman a mangabbukay iti imoral a tarigagay. Ramanen dayta ti pornograpia, dagiti dadduma a pabuya iti telebision wenno pelikula, ken nalabit uray dagiti magasin a mangitampok iti uso wenno iti panagpakuttong a dagiti modelo ket narasay wenno nganngani awan ti kawesda. Ikagumaam ti agpanunot kadagiti positibo a bambanag no umapay ti saan nga umiso a rikriknam. Kuna ti maysa nga agtutubo a lalaki: “Kada sumro ti riknak nga agrayo iti padak a lalaki, utobek ti paboritok a teksto iti Biblia.”

Siempre, adda dagidiay mangibaga nga awan serserbi ti panangaramid kadagita. Basta awatem latta kanon no ania ti kinataom ken no ania ti pagduyosan ti riknam. Ngem kuna ti Biblia nga adda ti nasaysayaat a maaramidam ngem iti dayta! Kas pagarigan, dakamatenna a ti sumagmamano kadagiti nagkauna a Kristiano ket dati a homoseksual ngem nagbalbaliwda. (1 Corinto 6:9-11) Kabaelam met ti agbalbaliw, uray rumusrusing pay laeng dita pusom ti kasta a tarigagay.

Kasanon no sumken latta ti panagkursonadam iti kaseksom? Labanam dayta! Kondenaren ni Jehova dagiti aramid a mainaig iti homoseksualidad. Ngarud, ti maysa a tao a makidangdangadang iti homoseksual a tarigagay ket adda mabalinna nga aramiden​—mabalinna nga ikeddeng ti di agpaituray kadagita a tarigagay.

Kas pagarigan, ipapantayon a ti maysa a tao ket “agannayas nga agpungtot.” (Proverbio 29:22) Mabalin nga ipapasna latta idi ti pungtotna. Ngem idi nagadal iti Biblia, naammuanna a nasken a sursuruenna ti agteppel. Kayat kadi a sawen dayta a saanton a pulos a makapungtot? Saan. Nupay kasta, gapu ta ammonan no ania ti kuna ti Biblia maipapan iti di mamedmedan a pungtot, pagreggetanna a labanan dayta a pagannayasanna.

Umasping dayta iti maysa a tao nga agkursonada iti kaseksona ngem ammonan no ania ti kuna ti Biblia maipapan kadagiti homoseksual nga aramid. Mabalin nga adda dagiti kanito a sumken latta ti dakes a tarigagayna. Ngem no matmatanna ti homoseksualidad sigun iti panangmatmat ni Jehova, maaddaan iti bileg a mangsaranget iti kasta a tarigagay.

Dika Sumuko!

No lablabanam ti panagkursonadam iti kaseksom, nalabit maawatam ti rikna ti maysa nga agtutubo a lalaki, a nagkuna: “Inkagumaak a labanan ti riknak. Nagkararagak ken Jehova tapno dumawat iti tulongna. Binasak ti Biblia. Adda dagiti palawag a nangngegkon maipapan iti dayta. Ngem diak ammo no ania pay ti aramidek.”

Talaga a narigat ti pakidangdangadangam no addaka iti kasta a kasasaad. Awan ti panglakaan a solusion. Nupay kasta, siasinoman nga agtarigagay a mangay-ayo iti Dios ket masapul nga agbiag a maitunos kadagiti moral a pagalagadan ti Dios ken liklikanna dagiti imoral nga aramid, nupay mabalin a nakarigrigat dayta. Dimo liplipatan a maawatan ti Dios ti pannakidangadangmo iti riknam ken kaasianna dagidiay agserserbi kenkuana.a (1 Juan 3:19, 20) Bendisionannaka ti Dios no agtulnogka kadagiti bilinna. Kinapudnona, iti panangsalimetmet kadagiti bilinna, “adda dakkel a gunggona.” (Salmo 19:11) Uray ita pay laeng, matagiragsakmon ti kasayaatan a biag iti daytoy nariribuk a lubong.

Gapuna, agpannurayka iti Dios. Parmekem dagiti dakes a tarigagaymo. (Galacia 6:9) Ikagumaam a ‘pagrurodan ti dakes’ ken ‘kumpetka iti naimbag.’ (Roma 12:9) No dika sumuko, agmawmawto met laeng ti dakes a tarigagaymo. Kangrunaan iti amin, no liklikam dagiti aramid a mainaig iti homoseksualidad, maaddaanka iti namnama nga agbiag nga agnanayon iti nalinteg a baro a lubong ti Dios.

[Footnote]

KANGRUNAAN A TEKSTO

“Sukimatennak, ket ammuem ti mangrirriribuk a pampanunotko, ket kitaem no adda kaniak ti aniaman a nasaem a dana.”​—Salmo 139:23, 24.

BALAKAD

Tapno mapatanormo ti umiso a panangmatmat iti no ania ti makuna a malalaki, adalem ti ehemplo ni Jesus. (1 Pedro 2:21) Isu ti naan-anay a pagtuladan ti pudpudno a kinamalalaki a nabuyogan iti kinaalumamay.

AMMOM KADI . . . ?

Nupay saanmo a naan-anay a makontrol dagiti tarigagaymo, kabaelam a kontrolen dagiti tignaymo. Mabalinmo nga ikeddeng a saan a penken dagiti dakes a tarigagaymo.

DAGITI ARAMIDEK!

No adda mangdamag kaniak no apay a kondenaren ti Biblia ti homoseksualidad, kastoy ti ibagak ․․․․․

No adda mangibaga nga akikid ti panangmatmat ti Biblia, makirinnasonak ket ibagak a ․․․․․

Ti kayatko a saludsoden kadagiti dadakkelko maipapan iti daytoy a banag ket ․․․․․

ANIA TI MAKUNAM?

● Apay a saan nga anamongan ti Dios ti homoseksualidad?

● Ania dagiti praktikal nga addang a mabalinmo nga aramidem tapno saanka a matnag iti silo ti homoseksualidad?

● No tuladem ti panangmatmat ti Dios iti homoseksualidad, kayatna kadi a sawen a kagurguram unayen dagiti homoseksual?

[Blurb iti panid 236]

“Ti tiritir a panangmatmat ti lubong inapektaranna ti panagpampanunotko ket ad-addan a natikawak maipapan iti seksualidadko. Ita, likliklikakon ti aniaman wenno siasinoman a mangiparparegta iti homoseksualidad.”​—Anna

[Ladawan iti panid 233]

Adda pagpilian ti amin nga agtutubo​—akseptarenda ti tiritir a panangmatmat ti lubong maipapan iti seksualidad wenno surotenda ti nangato a moral a pagalagadan a masarakan iti Sao ti Dios