MERODAC

Ti Hebreo a porma maipaay iti Marduk, ti kapatgan a dios ti Babilonia, a ti pannakatnagna naipadto a kagiddanna ti pannakaduprak ti Babilonia.​—Jer 50:2.

Da Merodac-baladan (Isa 39:1) ken Evil-merodac (2Ar 25:27) nga ar-ari ti Babilonia di pagduaduaan a napanagananda iti nagan daytoy a dios. Iti panaglatak ti siudad a Babilonia, gapu iti panamagbalin iti dayta ni Ari Hammurabi kas kabesera ti imperio ti Babilonia, dimmakkel met ti kinapateg ni Merodac. Naipaay kenkuana dagiti galad ti immun-una a didios, ket naikuna a ti papadi ti Babilonia binalbaliwanda dagiti salaysay a nainaig iti mitolohia tapno pagparangen a ni Merodac ti nangpapatay ken Tiamat ken isu ti namarsua iti lubong ken iti tao. Dagiti Babiloniko a teksto iyam-ammoda ni Marduk (Merodac) kas anak ni Ea (ti dios a mamangulo kadagiti elemento iti dandanum), ti asawa ni Sarpanitu, ken ama ni Nebo.

Ti kinaari iti Babilonia asideg ti pannakainaigna iti ladawan ni Merodac nga adda iti templona, ti Esagila, ta saan a naisaad dagiti agtuturay iti Babilonia babaen iti pannakakorona no di ket nagbalinda nga ar-ari babaen ti panangiggemda iti ima ni Merodac. Ti seremonia maulit idi iti tunggal tawen bayat ti piesta ti Baro a Tawen. Uray pay idi tiempo a ti Asiria iturturayanna ti Babilonia, ti ar-ari ti Asiria nakalikaguman a mapanda iti siudad ti Babilonia tunggal tawen maipaay iti piesta ti Baro a Tawen ken pagbalinenda a legal ti kalinteganda iti trono babaen ti panangiggemda iti ima ni Merodac.

Mainaig iti pannakarba ti Babilonia, ni Jeremias a mammadto impadtona a ni Merodac ‘mapagkullayaw.’ Pimmudno daytoy idi a ni Merodac saanna a nabaelan a taginayonen ti kinatan-ok ti Babilonia kas Kabilgan a Turay iti Lubong, ket yantangay sabsabali a didiosen ti pagdaydayawan idi dagiti nangparmek iti Babilonia, nagbalinen a di natalged ti masanguananna, a napnuan iti panagsidduker.​—Jer 50:2; kitaenyo ti BEL; DIDIOS KEN DIDIOSA (Dagiti Didiosen ti Babilonia).