NAGUNGGAN TI SAIRO

Ti naluganan ken konkontrolen ti maysa a di makita a dakes nga espiritu. Idi tiempo ti Biblia, nadumaduma a pammarigat ti sinagaba dagiti tattao a naluganan iti sairo: adda dagidiay napagbalin nga umel, nabulsek, nagmauyong, ken nagikut iti karkarna a pigsa. Dagidiay a tattao ket nakaay-ay-ay a rinanggasan dagitoy di makita a manangirurumen. (Mt 9:32; 12:22; 17:15; Mr 5:3-5; Lu 8:29; 9:42; 11:14; Ara 19:16) Biktimaenda ti lallaki, babbai, ken ubbing. (Mt 15:22; Mr 5:2) No dadduma, agnanaay ti tuok no ti maysa a tao ket aggigiddan a luganan ti adu a sairo. (Lu 8:2, 30) No maparuaren ti sairo, agsubli ti normal ken nasimbeng a panunot dayta a tao. Adda nagdumaan ti kasasaad nga iti dayta ti maysa ket nagunggan ti sairo ken ti kadawyan a pisikal a sakit, agsipud ta agpada nga inagasan ni Jesus dagita a kita ti an-annayen.​—Mt 8:16; 17:18; Mr 1:32, 34.

Ti sumagmamano kadagiti dadakkel a milagro ni Jesus ramanenna ti panangwayawaya kadagiti tattao a nagunggan iti sairo. Awan gawgaway dagita kenkuana. Ngem saan nga amin ket naragsakan iti panangparuarna kadagiti sairo. Isu inakusaran dagiti Fariseo kas kakappon ti panguluen dagiti sairo, ni Beelzebub, idinto ta iti kinaagpaysuanna, sigun ken Jesus, mismo a kapkaputotan ida ti Diablo. (Mt 9:34; 12:24; Mr 3:22; Lu 11:15; Jn 7:20; 8:44, 48-52) Ammo ni Jesus ti gubuayan ti pannakabalinna a mangabak kadagiti sairo, ket sipapanayag nga impaduyakyakna a dayta ti espiritu ni Jehova. (Mt 12:28; Lu 8:39; 11:20) Dagiti sairo a mismo nabigbigda ti kinasiasino ni Jesus ket inawaganda kas “Anak ti Dios,” “Daydiay Santo ti Dios,” ken “Jesus, Anak ti Kangatuan a Dios.” (Mt 8:29; Mr 1:24; 3:11; 5:7; Lu 4:34, 41; Ara 19:15; San 2:19) Nupay kasta, saan a pulos impalubos ni Jesus a mangsaksida maipaay kenkuana. (Mr 3:12) Iti sabali a bangir, ti lalaki a naruk-atan manipud pannakabalin dagiti sairo naparegta nga ipakaammona kadagiti kabagianna ti ‘amin a bambanag nga inaramid kenkuana ni Jehova.’​—Mr 5:18-20.

Daytoy nga autoridad a mangparuar kadagiti sairo ket inted met ni Jesus kadagiti 12 nga apostolna ken idi agangay kadagiti 70 nga imbaonna, iti kasta babaen iti nagan ni Jesus nabaelanda met nga agasan dagidiay nagunggan iti sairo. (Mt 10:8; Mr 3:15; 6:13; Lu 9:1; 10:17) Uray ti maysa a tao a saan a nasinged a kadua ni Jesus wenno dagiti apostolna nabaelanna a paruaren ti maysa a sairo babaen ti nagan ni Jesus. (Mr 9:38-40; Lu 9:49, 50) Kalpasan ti ipapatay ni Jesus, nagtultuloy a nagikut dagiti apostol iti kastoy a pannakabalin. Binilin ni Pablo ti “maysa a sairo iti panagpadles” a rummuar manipud iti maysa nga adipen a babai, a dayta ti nagpungtotan unay dagiti appona a managayat iti kuarta. (Ara 16:16-19) Ngem idi adda dagiti impostor (ti pito nga annak ni padi Sceva) a nangpadas a mangparuar iti maysa a sairo iti nagan ni “Jesus nga ikaskasaba ni Pablo,” ti tao a nagunggan ti sairo kinemmeg ken kinabkabilna dagitoy a pito ket pinaglamolamona ida.​—Ara 19:13-16.

Ti nadawel ken di maatipa a kababalin dagiti tattao a di nasimbeng ti panagpampanunotda ket masansan a maigapu iti pananglugan kadakuada dagitoy di makita a pasurot ni Satanas. No dadduma, naipadamag a dagiti mannakiuman iti espiritu pinaruarda met dagitoy a sairo, a daytoy ti mangipalagip iti kinuna ni Jesus nga, “Adunto ti agkuna kaniak iti dayta nga aldaw, ‘Apo, Apo, saankami aya a . . . nangparuar kadagiti sairo iti naganmo . . . ?’ Ket kaskasdi nga iti dayta ipudnokto kadakuada: Saankay a pulos am-ammo!” (Mt 7:22, 23) Gapu itoy, rumbeng nga ipangagtayo ti pammatigmaan a, “Managbantaykayo koma,” ken, “Ikapetyo ti naan-anay a kabal manipud iti Dios tapno mabalinanyo ti agtakder a sititibker maibusor kadagiti pangallilaw a pamuspusan ti Diablo” ken dagiti sairona.​—1Pe 5:8; Efe 6:11.