ASTORET

Diosa dagiti Canaanita, naibilang nga asawa ni Baal. Masansan a nairepresentar ni Astoret kas lamolamo a babai nga addaan iti nakaal-alas ken dakkel unay a mabagbagi. Adu a nagduduma a tattao idi ugma ti nagdaydayaw iti daytoy a diosa, ket gagangay a naaramat ti nagduduma a porma ti nagan nga Astoret. Ti Griego a nagan ket Astarte. Kadagiti Filisteo, nabatad a naibilang ni Astoret kas diosa ti gubat, kas ipasimudaag ti pannakaikabil ti kabal ni Ari Saul iti templo dagiti ladawan ni Astoret idi naabak daytoy nga ari. (1Sm 31:10) Ngem nalawag a ni Astoret ket kangrunaanna a diosa ti kinabunga. Ti kalatakan a paset ti panagdaydayaw kenkuana ket dagiti seksual a panagragragsak kadagiti templo wenno nangato a disso a nairanta iti panagdaydayaw ken Baal, a sadiay a nagserbi dagiti balangkantis a lallaki ken babbai.​—Kitaenyo ti CANAAN, CANAANITA Num. 2 (Panangparmek ti Israel iti Canaan).

Posible nga addan idiay Canaan ti panagdaydayaw ken Astoret idi tiempo ni Abraham, ta naawagan iti “Asterot-carnaim” ti maysa kadagiti siudad sadiay. (Ge 14:5) Nadakamat met iti Kasuratan ti siudad ti Astarot, ti pagnanaedan ti higante nga Ari Og ti Basan. Ipasimudaag ti naganna a daytoy a siudad ket mabalin a sentro idi ti panagdaydayaw ken Astoret.​—De 1:4; Jos 9:10; 12:4.

Ti pangmaymaysa a porma nga ʽash·toʹreth (Astoret) ket damo nga agparang iti Biblia mainaig iti panagapostata ni Ari Solomon bayat ti maudi a paset ti panagturayna. Iti daydi a tiempo a nangrugi dagiti Israelita nga agdaydayaw ken Astoret a diosa dagiti Sidonio. (1Ar 11:5, 33) Ti sabali pay a nagparangan ti pangmaymaysa a porma ket mainaig iti panangrebba ni Ari Josias kadagiti nangato a disso nga imbangon ni Solomon maipaay ken Astoret ken iti dadduma pay a didiosen. (2Ar 23:13) Ti pangadu a porma nga ʽash·ta·rohthʹ (“dagiti ladawan ni Astoret,” NW; “dagiti Astarte,” AT) nalabit tumukoy kadagiti ladawan wenno simbolo daytoy a pagano a diosa.​—Uk 2:13; 10:6; 1Sm 7:3, 4.