SIRMATA

Buya wenno eksena a naiparang iti panunot ti maysa a tao iti aldaw wenno iti rabii, kadawyanna a babaen kadagiti karkarna a pamay-an, ket ti umaw-awat iti sirmata no dadduma adda iti pannakaimayeng wenno agtagtagainep. (Ara 10:3; Ge 46:2) Masansan a narigat a pagminaren ti pagdumaan dagiti sirmata ken dagiti tagtagainep a nadeskribir iti Biblia, ket no dadduma aggidgiddan a mapasamak dagitoy.

No ti maysa a tao umawat iti sirmata manipud iti Dios bayat a siririing, agparang a ti ladawan ket maimaldit iti sipupuot a panunot. Inton agangay, daydiay immawat mabalinna a lagipen ken deskribiren wenno ilanad ti sirmata iti bukodna a sasao. Ti sumagmamano a tattao, kas kada Daniel ken Nabucodonosor, naaddaanda met kadagiti ‘sirmata iti rabii.’ Agparang a naimaldit dagitoy iti sipupuot a panunot bayat a matmaturog ti umaw-awat.

Pannakaimayeng. No dadduma, ti espiritu ti Dios mabalbalin a mangimaldit iti maysa a ladawan ti panggep ti Dios wenno iti maysa a sirmata iti panunot ti maysa a tao bayat ti pannakaimayengna, maysa a kasasaad ti nauneg a panangipamaysa iti panunot wenno maysa a kasasaad a kasla matmaturog. Iti Kristiano a Kasuratan, ti Griego a sao a naipatarus a “pannakaimayeng” ket ekʹsta·sis. Literal a nadepinar kas pannakaipanaw wenno pannakayakar ti maysa a banag manipud iti nakaisaadanna, ket addaan iti piguratibo nga ideya a pannakaikkat ti panunot manipud normal a kasasaadna. Ti maysa a tao a simamayeng ket saan a sipupuot iti mapaspasamak iti literal nga aglikmutna, ket madadaan nga umawat iti sirmata.​—Ara 22:17, 18.

Pammasiguro iti Nadibinuan a Parabur. Ti sumagmamano a sirmata manipud iti Dios impalgakda kadagiti adipen ni Jehova ti wagas a pannakilangenna kadakuada ken impaayanna ida iti pammasiguro iti nadibinuan a parabur. Ti sao ni Jehova dimteng ken Abram (Abraham) iti maysa a sirmata, ket naipasigurado iti patriarka: “Dika agbuteng, Abram. Maysaak a kalasag maipaay kenka. Ti gunggonam dakkelto unay.” (Ge 15:1) Kalpasan dayta, nangaramid ni Jehova iti tulag ken Abraham. (Ge 15:2-21) Sumagmamano a tawen kalpasanna, ti Dios nagsao ken Jacob kadagiti sirmata iti rabii, nga imbagana kenkuana a saan nga agbuteng a sumalog idiay Egipto, ta sadiay isu pagbalinento ti Dios a maysa a dakkel a nasion ket inton agangay pasang-atennanto manipud iti dayta a daga.​—Ge 46:1-4; idiligyo ti 2Sm 7:1-17; 1Cr 17:1-15.

Panangiwanwan iti Pannakaipatungpal ti Nadibinuan a Panggep. Ti sumagmamano a sirmata manipud iti Dios impaayanna dagiti immawat kadagita iti pannakaiwanwan tapno maaramidda ti pagayatan ni Jehova. Kalpasan a ti naipadayag a ni Jesu-Kristo nagparang ken Saulo a taga Tarso, ni Saulo, nupay temporario a nabulsek, naaddaan iti sirmata nga iti dayta nakitana ti maysa a lalaki a managan Ananias a nangipatay kenkuana iti im-imana tapno maisubli ti panagkitana. Kasta met a babaen iti sirmata, naibilin ken Ananias a mapan iti mismo a balay nga ayan idi ni Saulo idiay Damasco.​—Ara 9:1-19.

Idiay Cesarea idi 36 K.P., ti napeklan a Gentil a ni Cornelio immawat iti sirmata nga iti dayta imbaga kenkuana ti maysa nga anghel a paayabanna ni Simon Pedro idiay Joppe. (Ara 10:1-8) Idiay Joppe, naimayeng ni Pedro ket naaddaan iti sirmata nga iti dayta nakitana a bumabbaba manipud langit ti maysa a pagkargaan a naglaon iti nadumaduma a narugit a parsua. Babaen iti daytoy, naibaga iti apostol a saanna koma nga ibilang a natulawan ti bambanag a dinalusanen ti Dios. Daytoy ti nangisagana ken Pedro a mangirussuat iti trabaho a panangikasaba iti naimbag a damag kadagiti di nakugit a Gentil.​—Ara 10:9-23; 11:5-12.

Ti panangiwanwan ti Dios iti trabaho a panangasaba naipaay met ken Pablo babaen kadagiti sirmata. Idiay Troas, bayat ti maikadua a panagdaliasat ni Pablo kas misionero, naaddaan ti apostol iti maysa a sirmata iti rabii maipapan iti maysa a lalaki a taga Macedonia a nangipakpakaasi: “Umallatiwka iti Macedonia ket tulongannakami.” (Ara 16:8-12) Idi agangay, ti apostol naaddaan manen iti maysa a mangipanamnama a sirmata iti rabii, nga iti dayta nagsao kenkuana ti Apo. Kas resultana, ti apostol nagtalinaed idiay Corinto iti maysa a tawen ken innem a bulan, a nangisursuro iti Sao ti Dios.​—Ara 18:8-11.

Padto. Naimpadtuan ti sumagmamano a sirmata manipud iti Dios wenno naipaay dagita tapno daydiay immawat makabalan a mangipaay iti kayulogan dagiti padto a nayallatiw kadagiti sirmata ken tagtagainep. Ni mammadto Daniel “naaddaan iti pannakaawat kadagiti amin a kita ti sirmata ken tagtagainep.” (Da 1:17) “Iti sirmata iti rabii,” ti Dios impalgakna ken Daniel ti linaon ken kaipapanan ti tagtagainep ni Ari Nabucodonosor maipapan iti nagdakkelan a ladawan a mangiladladawan kadagiti pannakabalin ti lubong.​—Da 2:19, 28; idiligyo ti Da 4:5, 10, 13, 20-22.

Iti naimpadtuan a tagtagainep ken ‘kadagiti sirmata bayat ti rabii,’ nakita ni Daniel ti uppat a nakadakdakkel nga an-animal a sumangsang-at manipud iti baybay, mangipamatmat a ti uppat nga “ari” tumakderda manipud iti daga. (Da 7:1-3, 17) Naaddaan met ti mammadto iti pribilehio a makaimatang iti sirmata “ti maysa a kasla anak ti tao” a gumunggun-od iti panagturay, dayaw, ken pagarian manipud iti Kadaanan iti Al-aldaw.​—Da 7:13, 14.

Dagiti sirmata manipud iti Dios ket inawat met dagiti mannurat ti Biblia a kas kada Isaias (1:1; 6:1-13), Amos (7:1-9, 12; 8:1, 2), ken Ezequiel (1:1). Ti naipaltiing a naimpadtuan a deklarasion ni Abdias maibusor iti Edom ket manglukat iti sasao a: “Ti sirmata ni Abdias.” (Abd 1) “Ti sirmata ni Nahum” aglaon iti pammakdaar maibusor iti Nineve.​—Na 1:1.

Ti libro ti Apocalipsis aglaon iti agsasaganad a sirmata a nakita ni lakayen nga apostol Juan. Mayanatup ti Griego a nagan ti libro, A·po·kaʹly·psis, kaipapananna ti “Panangilukais” wenno “Panangibutaktak,” ta ti Apocalipsis lukaisanna ti bambanag, nga ibutaktakna ti adu a pasamak iti adayo pay a masanguanan, iti labes ti tiempo a pannakaputar dayta.​—Apo 1:1, Rbi8 ftn.

Ulbod a Sirmata. Sakbay ti pannakadadael ti Jerusalem idi 607 K.K.P., dagiti ulbod a mammadto iti dayta a siudad sinaoda “ti sirmata ti bukodda a puso,” a dagiti mensaheda saan a nagtaud ken Jehova. (Jer 23:16) Yantangay awananda iti sirmata manipud ken Jehova, awanan pateg ti nasirmatada. (Un 2:9, 14) Agsipud ta saan a kinapudno ti sinaoda ken ‘nagsirmatada iti ulbod,’ bimmusor kadakuada ni Jehova.​—Eze 13.

Naipadto nga Addanto Dagiti Makakita Kadagiti Sirmata. Maigidiat kadagiti ulbod a sirmata ken mainayon kadagiti inted-Dios a sirmata a naibinsabinsan, ni Joel ket pinaltiingan ti Dios a mangipadto, iti sidong ti impluensia ti espiritu ti Dios, a dagiti agtutubo a lallaki “makakitadanto kadagiti sirmata.” (Joe 2:28) Impakita ni Pedro nga adda kaitungpalan daytoy a padto iti aldaw ti Pentecostes idi 33 K.P., idi a ti nasantuan nga espiritu naited kadagiti pasurot ni Jesu-Kristo ket namilagruan nga indeklarada ti “natan-ok a bambanag ti Dios” iti adu a pagsasao.​—Ara 2:1-4, 11, 15-17.