BAN-AW TI KANAL

Maysa a ban-aw wenno pagurnongan iti danum, nalawag nga adda iti abagatan ti Siudad ni David, a dita ti nagsabtan ti Ginget ti Hinnom ken ti Makintengnga a Ginget (Ginget Tyropoeon). (Ne 3:15) Daytoy a ban-aw agparang a naawagan met iti “makimbaba a ban-aw.”​—Isa 22:9.

Ti Masoretiko a teksto iti Nehemias 3:15 awaganna daytoy iti “Ban-aw ti Sela.” Patien ti sumagmamano nga eskolar a ti “Sela” masuktan koma iti “Siloe,” a kaipapananna ti “Agitultulod” ken tumukoy iti maysa a kanal, wenno kalasugan, a mangidanon iti danum iti maysa a ban-aw. (Isa 8:6) Gapuna, nupay ti sumagmamano a bersion ti Biblia saanda nga ipatarus ti “Sela,” ti The Jerusalem Bible ipatarusna ti sao kas “kalasugan a pagurnongan iti danum,” ket iti Baro a Lubong a Patarus naipaulog dayta kas “Ban-aw ti Kanal.”

Adda nasarakan a natda a paspaset ti maysa a kalasugan, wenno kanal, nga agpaabagatan manipud ubbog ti Gihon. Timmaraigid dayta iti agsikkosikko a bakras ti Kidron ken agpatingga iti maysa a kadaanan a pagurnongan iti danum a maaw-awagan ita iti Birket el-Hamra. Adda paspaset ti kanal a naabbongan iti taptapi a bato, ngem agparang nga adda dagiti gutbawna a mabalin a pangalaan iti danum a pangpasayak iti sumagmamano a paset ti ginget. Ti in-inut a panagsalog daytoy a kanal ket mabalin a natukoy iti sasao a “ti dandanum ti Siloe nga agay-ayus a siaalumamay.” (Isa 8:6) Tumutop ti ayan ti Birket el-Hamra iti dinakamat ni Nehemias a nagsaadan ti Ban-aw ti Kanal, iti asideg ti Minuyongan ti Ari ken iti Agdan a sumalog manipud makin-abagatan nga ungto ti Siudad ni David.