EGIPTO, NAAPRES A GINGET TI

Ti atiddog a ginget wenno baw-ang nga agpaay a pagilasinan iti makin-abagatan a laud a beddeng nga intuding ti Dios agpaay iti Naikari a Daga, awan sabali, “ti daga ti Canaan.” (Nu 34:2, 5; 1Ar 8:65; Isa 27:12) Nupay daytoy a naapres a ginget ket awan iti Egipto, ti sakup dayta a nasion nalawag a dimmanon agingga iti dayta a disso, nalabit iti sumagmamano a tiempo. (2Ar 24:7) Ti napaababa a termino a “naapres a ginget” (a naaramat iti pannakailadawan dagiti beddeng ti daga ti Israel iti sirmata ni Ezequiel) ket nalawag a tumukoy iti daytoy met laeng a baw-ang.—Eze 47:19; 48:28.

Ti naapres a ginget ti Egipto ket kadawyan a maikunkuna nga isu ti Wadi el-ʽArish, a mangrugi nasurok a 200 km (125 mi) manipud uneg ti Peninsula ti Sinai, iti asideg ti Jebel et-Tih. Aglayon dayta iti amianan agingga a sumabet iti Baybay Mediteraneo iti ili ti el-ʽArish (Rhinocolura), agarup 150 km (90 mi) iti daya ti Port Said. Bayat ti kalgaw, maysa laeng dayta a namaga a lansad. Nupay kasta, bayat ti panagtutudo, no adu a waig ti agayus sadiay, agbalin ti Wadi el-ʽArish a dakkel a naapres nga ayus nga aglippias ti danum kadagiti igidna, a kabaelanna pay a paruten ti kaykayo ken iyanudna dagita iti nadawel nga agusna. Nalabit daytoy ti makagapu no apay a naawagan kas “ti karayan ti Egipto” iti listaan dagiti pagbeddengan ti Naikari a Daga iti Genesis 15:18.—Nupay kasta, kitaenyo ti SIHOR.