ASH A KONSTELASION

Ti Hebreo a sasao nga ʽAsh ken ʽAʹyish kasta met ti dadduma pay a termino ket maus-usar mainaig iti init, bitbituen, ken langit, ngarud ipasimudaagna a tumukoyda iti maysa a nailangitan a konstelasion. (Kitaenyo ti Job 9:7-9; 38:32, 33.) Iti agdama, imposible nga ipatuldo no ania a konstelasion ti tuktukoyenda ket ngarud nataltalged ti letra-por-letra a panangipatarus iti nagan (kas iti paulo daytoy nga artikulo) imbes nga ipatarus ti Hebreo kadagiti espesipiko a nagan a kas iti “Arcturus” (Gr., Ar·ktouʹros, literal a kaipapananna ti “Mangbambantay iti Oso”) (KJ), wenno “Oso” (RS).

Ti panangtukoy ti Job 38:32 iti Ash kas “siaasibay ti annakna” papigsaenna ti pangibatayan iti panamati nga adda nainaig a konstelasion. Ti konstelasion a masansan unay a maipatpatuldo ket Ursa Major (ti Dakkel nga Oso), addaan iti pito a kangrunaan a bituen iti las-ud dayta, a mabalin a dagita ti “annakna.” Ti napateg a punto iti teksto ket, saan a ti apag-isu a pakabigbigan ti konstelasion, no di ket ti saludsod a naibangon sadiay: “Maiturongmo aya ida?” Inggunamgunam ngarud ni Jehova a Dios ken Job ti sirib ken pannakabalin ti Namarsua, yantangay naan-anay nga imposible ti panangtarawidwid ti tao kadagiti panaggunay dagitoy nagdadakkelan a bituen.