Sekreto 5
Pennekem ti Naespirituan a Kasapulam
ANIA TI ISURSURO TI BIBLIA? “Naragsak dagidiay sipapanunot iti naespirituan a kasapulanda.”—Mateo 5:3.
ANIA TI KARIT? Adda rinibribu a nagduduma a relihion ket adu kadagitoy ti mangisursuro iti agsisimparat a pamay-an ti panangpennek iti naespirituan a kasapulam. Kasano a maammuam no ania kadagitoy ti mangisursuro iti kinapudno ken ti pudno a mangar-aramid iti pakaay-ayuan ti Dios? Kuna ti dadduma a nalatak nga autor a ti panamati ken panangipaay iti debosion iti Dios ket saan kano a nainkalintegan, ken makadangran pay ketdi. Kastoy ti panangsumario ti magasin a Maclean’s iti panangmatmat ti maysa a nalatak nga ateista: “Daytoy Nakristianuan a kapanunotan nga adda banag a saan a mailawlawag ti siensia ken ti riknatayo . . . pagbalinenna a saan a makapnek ti biagtayo isu nga agannayastayo nga agaramid iti kinaranggas.”
ANIA TI MABALINMO NGA ARAMIDEN? Usigem dagiti ebidensia a talaga nga adda Dios. (Roma 1:20; Hebreo 3:4) Dika ipalubos nga upayennaka ti asinoman tapno maammuam ti sungbat dagiti napapateg a saludsod, kas kadagiti sumaganad: Apay nga addatayo ditoy? Adda kadi biag kalpasan ti ipapatay? Apay a nagadu ti agsagsagaba? Ania ti kalikaguman ti Dios kaniak? Napateg a masarakam ti makapnek a sungbat kadagitoy a saludsod tapno magun-odam ti manayon a pannakapnek.
Nupay kasta, saanmo a patien lattan ti ibaga kenka ti sabsabali. Paregtaennaka ti Sao ti Dios nga usarem ti ‘pannakabalinmo nga agrason’ tapno maammuam a mismo no ania ti makaay-ayo iti Dios. (Roma 12:1, 2) Magunggonaanto dagiti panagreggetmo. No iwayaam ti agadal iti Biblia ken iyaplikarmo ti praktikal a balakadna, maksayan dagiti pagparikutan ken pakaringgoram, ket naragragsakto ti biagmo. Sigurado dayta a kari. Minilion a tattao a nagduduma ti kasasaadda ti nagunggonaanen kadagiti nasursuroda maipapan iti Dios ken kadagiti panggepna. Kas pagarigan, basaem dagiti pudno a salaysay iti panid 18 agingga iti 21 iti daytoy a magasin.
Umuneg ti pammatim iti Dios bayat a mabembenepisiaranka iti panangyaplikarmo kadagiti nainsiriban a balakad ti Biblia. Apay a dimo awaten ti panagadal iti Biblia nga ituktukon dagiti Saksi ni Jehova? No aramidem dayta, nalabit umanamongka kadagiti sasao ni apostol Pablo a nangisurat: “Dayta ket panggun-od iti dakkel a gunggona, daytoy nadiosan a debosion agraman iti pannakapnek.”—1 Timoteo 6:6.
[Ladawan iti panid 8]
Ammuem a mismo no ania ti makaay-ayo iti Dios