Salsaludsod Dagiti Agbasbasa

Kasanotayo a tarusan ti tinawen a report ti serbisio?

Tunggal tawen, segseggaantayo ti report ti serbisio a naipablaak iti Tinawen a Libro. Makaparagsak a makita ti maar-aramidan ti ili ni Jehova maipapan iti sangalubongan a panangasaba ken panangisuro. Ngem tapno ad-adda a mabenipisiarantayo iti report, masapul nga umiso ti pannakatarustayo kadagiti nailista a numero. Usigentayo ti dadduma a pagarigan.

Tawen serbisio. Mangrugi daytoy iti Setiembre ti agdama a tawen agingga iti Agosto ti sumaruno a tawen. Ti linaon ti Tinawen a Libro ket report iti napalabas a tawen. Gapuna, ti linaon ti 2011 Tinawen a Libro ket ti report ti 2010 a tawen serbisio a mangrugi iti Setiembre 1, 2009 agingga iti Agosto 31, 2010.

Kangatuan a bilang dagiti agibumbunannag ken promedio nga agibumbunannag. Ramanenna dagiti bautisado ken di bautisado a Saksi ni Jehova a kualipikado a mangikasaba iti Pagarian. Ti “kangatuan a bilang dagiti agibumbunannag” ket bilang dagiti nagreport iti aniaman a bulan ti tawen serbisio ken mabalin a karaman dagiti naladaw a report a saan a naireport iti napalabas a bulan. Isu a mabalin a mamindua a mabilang ti dadduma nga agibumbunannag. Ngem saan a karaman dagiti agibumbunannag a saan a nakapagreport. Ipakita daytoy a nagpateg ti regular ken nasapa a panagreport ti tunggal agibumbunannag. Ti “promedio nga agibumbunannag” ket bilang dagiti regular nga agrepreport iti kada bulan.

Dagup ti oras. Sigun iti 2011 Tinawen a Libro, nakabusbos dagiti Saksi ni Jehova iti nasurok a 1.6 a bilion nga oras iti tay-ak. Ngem saan a karaman iti dayta ti amin nga oras a busbusbosentayo nga agdayaw, kas iti panagipastor, pannakigimong, personal a panagadal iti Biblia, ken panagutob.

Nausar a kuarta. Bayat ti 2010 a tawen serbisio, nakagasto dagiti Saksi ni Jehova iti nasurok a $155 milion para iti kasapulan dagiti special pioneer, misionero, ken agdaldaliasat a manangaywan. Ngem saan a karaman iti dayta ti nagastos iti pannakayimprenta dagiti naibatay-Biblia a publikasion ken iti kasapulan ti nasurok a 20,000 a Bethelite nga agserserbi kadagiti sanga nga opisina iti intero a lubong.

Nakiraman iti Memorial. Bilang daytoy dagiti bautisado a nakiraman iti emblema ti Memorial iti intero a lubong. Dagup kadi daytoy ti bilang dagiti napulotan ditoy daga? Saan. Adda sumagmamano a rason nga ipagarup ti dadduma a nailangitan ti namnamada. Mabalin a maigapu dayta iti dati a patpatienda wenno adda mental wenno emosional a sakitda. Ditay ngarud ammo ti eksakto a bilang dagiti napulotan ditoy daga; ken ditay met kasapulan nga ammuen. Awan ti listaan ti Bagi a Manarawidwid kadagiti amin a makiramraman iti emblema ti Memorial.a

Ti ammotayo ket addanto pay la sumagmamano a napulotan nga “adipen ti Diostayo” ditoy daga inton mapalusposan dagiti makadadael nga angin iti dakkel a rigat. (Apoc. 7:1-3) Agingga a di pay dumteng dayta, idadauluan dagiti napulotan ti panangasaba ken panangisuro. Ipakita ti tinawen a report no ania ti ar-aramiden ti ili ni Jehova iti intero a lubong mainaig iti kapatgan a trabaho iti pakasaritaan ti tao.

[Footnote]