Ipategmo ti Pasetmo Kadagiti Milagro a Mapaspasamak Ita

1-2. (a) Ania ti sumagmamano a milagro a naisurat iti Biblia? (b) Ania ti milagro, ken kasanotayo a makipaset kadagiti milagro nga ar-aramiden ni Jehova ita? (1 Corinto 3:9)

PANUNOTEM nga addaka idi binisngay ni Jehova ti Nalabaga a Baybay tapno makaballasiw dagiti adipenna ket maitarayanda dagiti Egipcio. Nakaskasdaaw la ketdi dayta! Panunotem met nga addakan idi nangpaimbag ni Jesus kadagiti masakit ken nangpagungar kadagiti natay. Sigurado a makaparagsak dayta! Sumagmamano laeng dagita kadagiti milagro a naisurat iti Biblia. Asinoman a nasingpet a tao a makakita kadagiti kasta a milagro ket sigurado a maibagana a ti Dios ti makin-aramid kadagita. (Mat. 15:31) Ngem dagita a milagro ket nabayagen a napasamak. Adda kadi met dagiti milagro a mapaspasamak ita? Wen, adda! Kasano?

² Ti milagro ket maysa a banag wenno pasamak a saan a kaya nga aramiden ti maysa a tao wenno saanna a naan-anay a maawatan. Ni laeng Jehova ti makaaramid iti dayta babaen ti pannakabalinna. Iti daytoy nga artikulo, pagsasaritaantayo ti tallo a milagro nga ar-aramiden ni Jehova ita para iti organisasionna. Maibagatayo a milagro dagita ta ni Jehova laeng ti adda pannakabalinna a mangaramid kadagita. Iti tunggal milagro nga usigentayo, kitaentayo no kasanotayo nga agbalin a ‘katrabahuan’ ni Jehova bayat nga ar-aramidenna dayta.—Basaen ti 1 Corinto 3:9.

TI PANAGRANG-AYTAYO

3. Apay a maibagatayo a nagbalin ti ili ni Jehova kas maysa a “nabileg a nasion”? (Isaias 60:22) (Kitaen met ti ladawan.)

³ Nabayagen nga impadto ni propeta Isaias nga umadu ti bilang dagiti agserserbi ken Jehova iti kaaldawantayo. (Basaen ti Isaias 60:22.) Kasano a matungtungpal dayta a padto? Panunotem daytoy: Idi 1914, agarup 5,000 laeng ti bilang dagiti agserserbi ken Jehova. Ngem sipud iti dayta a tawen, “ti nagbassit” ket nagbalinen a nasurok a siam a milion. Dayta a bilang ket dakdakkel ngem iti populasion ti nasurok a 130 a pagilian! Ita pay laeng a makitatayo ti kasta kaadu a bilang dagiti tattao a mangam-ammo ken mangay-ayat ken Jehova. Ket iti agdama, aggigianda iti 240 a daga. Agpayso a bassit laeng ti bilang dagiti Saksi ni Jehova no ikompara iti dadduma a relihion. Ngem dayta a panagrang-ay ket pammaneknek a matungtungpal ti padto ni Isaias a “ti nagbassit” ket talaga a nagbalinen a maysa a “nabileg a nasion.”

4. Apay a nakaskasdaaaw ti iyaadu dagiti agserserbi ken Jehova?

⁴ Umad-adu ti bilang ti adu a relihion ita gapu ta bumbuniaganda uray dagiti kayyanak pay laeng nga ubbing. Saanda met nga ik-ikkaten iti relihionda dagiti saan a sumursurot kadagiti pagalagadan ti Dios. Ngem saantayo a kasta. Apay? Ngamin, inadaltayo ti Biblia ken iyap-aplikartayo dagiti naadaltayo. Adu pay ketdi kadatayo ti nangaramid iti dadakkel a panagbalbaliw iti panagpampanunot ken tigtignaytayo. (1 Cor. 6:​9-11) Kalpasanna, gapu kadagita nga inaramidtayo, nakualipikartayo a makiraman iti panangasaba tapno awisentayo ti dadduma a makikadua kadatayo iti pudno a panagdaydayaw. Idi agangay, indedikartayo ti biagtayo ken Jehova nga inkaritayo nga aramidentayo ti pagayatanna aniaman ti makalapped. Sa idi kuan, nagpabautisartayo.—Mat. 28:​19, 20.

5. Ania ti imbaga ni Jesus a namnamaen dagiti pasurotna?

⁵ Maibilang a milagro ti panagrang-aytayo gapu ta posible laeng dayta iti tulong ni Jehova. Makita iti imbaga ni Jesus a saan a nalaka ti agbalin nga adalanna. Imbagana: “Asinoman a mayat a sumurot kaniak, tallikudanna koma ti bagina ket bagkatenna ti kayona a pagtutuokan ken agtultuloy a surotennak.” (Mat. 16:24) Kaipapanan dayta a masapul a situtulok dagiti pasurotna nga agrigat wenno uray matay pay ketdi gapu iti pammatida ken Jesus. Kas pagarigan, impakpakauna ni Jesus nga idepensanto dagiti pasurotna ti pammatida iti sanguanan dagiti gobernador ken ar-ari. (Mat. 10:​17, 18) Impakdaarna pay a busorento ida dagiti nabibileg a lider ti relihion. (Juan 16:2) Kasta met, imbaga ni Jesus a para iti dadduma, posible nga idadanesto ida dagiti kapamiliada gapu iti pammatida.—Mat. 10:​34-36.

6. Apay a saan a napasardeng dagiti bumusbusor dagiti Kristiano idi umuna a siglo?

⁶ Pimmayso dagiti imbaga ni Jesus. Naipasango kadagiti nakaro nga ibubusor dagiti Kristiano idi umuna a siglo. Di nagbayag kalpasan a nagsubli ni Jesus idiay langit, pinadas dagiti Judio a lider ti relihion a pasardengen ti trabaho dagiti pasurotna. Inarestoda dagiti apostol ken insaklangda ida iti Sanhedrin, ti kangatuan a korte dagiti Judio. Kayat idi dagiti lider ti relihion a “papatayen” dagiti apostol, ngem pinakdaaran ida ti maysa a Fariseo nga agnagan iti Gamaliel. Imbagana: “Saanyo a pakibiangan dagitoy a lallaki, no di ket baybay-anyo ida. Ta no naggapu iti tao daytoy a panggep wenno trabaho, agsardengto; ngem no naggapu iti Dios, saanyonto a mapasardeng ida. Ta amangan no ti Dios a mismon ti lablabananyo.” (Ara. 5:​33, 34, 38, 39) Ket pimmayso dagita nga imbaga ni Gamaliel. Kalpasan a nawayawayaan dagiti apostol, intultuloy latta ida a binusbusor dagiti lider ti relihion. Ngem simmardeng kadi dagiti matalek nga adalan? Saan! Lallalo ketdi nga immadu ti bilang dagiti Kristiano. (Ara. 6:7) Apay a napasamak dayta? Tinulongan ti Dios dagiti adipenna a makapagibtur, isu a lallalo nga immadu ti bilangda uray no adda ibubusor.—Ara. 1:8.

7. Kasano a tultuladen dagiti adalan ni Jesus ita ti ulidan dagiti Kristiano idi umuna a siglo? (Kitaen met ti kahon a “Rimmang-ay Uray Naidadanes.”)

⁷ Ita, rinibun ti umap-apon iti organisasion ni Jehova uray no ilaklaksid, taltallikudan, wenno idaddadanes ida dagiti kapamiliada, katrabahuan, ken dadduma pay. Apay a pilpilien dagitoy nga adalan a ‘bagkaten ti kayoda a pagtutuokan’? (Mat. 16:24) Gapu ta ay-ayatenda ni Jehova ken agtalekda iti karina nga aywananna ida. Gapu iti dayta, ipapaayan ida ni Jehova iti “bileg a nalablabes ngem iti gagangay” tapno makapagibturda. (2 Cor. 4:​7-9) No busoren ida dagiti kapamiliada, mariknada met ti imbaga ti salmista: “Uray no baybay-andak da amak ken inak, ni Jehova a mismo ti mangaywan kaniak.” (Sal. 27:10) Talaga a maibagatayo a maysa a milagro ti iyaadu ti bilangtayo. Ngamin, uray no kaipapanan dayta ti ibubusor, adu latta ti mangpilpili nga agbalin nga adalan ni Jesus.

8. Ania ti pasettayo iti makitkitatayo ita a milagro maipapan iti panagrang-aytayo?

⁸ Tunggal makiramantayo iti aniaman a pamay-an ti ministerio, makipagtrabtrabahotayo kada Jehova ken Jesus iti milagro a mapaspasamak ita maipapan iti panagrang-aytayo. Tultulongandatayo. Impanamnama ni Jesus kadatayo: “Addaak kadakayo iti amin nga al-aldaw agingga iti panungpalan daytoy a sistema ti bambanag.” (Mat. 28:20) Saan la a dayta. Tultulongandatayo met dagiti anghel bayat a mangaskasabatayo.—Apoc. 14:​6, 7.

TI PANAGKAYKAYSATAYO

9-10. Kasano a matungtungpal ita ti Mikias 2:12?

⁹ Impadto ni propeta Mikias ti sabali pay a milagro a makitkitatayo ita—ti nakaskasdaaw a panagkaykaysa ti ili ti Dios. Impaipadto ti Dios ken Mikias nga addanto dagiti babbai ken lallaki nga ummongen ni Jehova tapno sangsangkamaysa nga agkakadua. (Basaen ti Mikias 2:12.) Kas kaitungpalan dayta a padto, makitkitatayo ita ti ili ti Dios nga agkaykaysa uray no agduduma ti personalidad wenno naggapuanda. Mapadpadasanda ti imbaga ti salmista a ni David: “Kitaenyo! Anian a nagsayaat ken anian a makaay-ayo ti sangsangkatunos a panagkakadua dagiti agkakabsat!”—Sal. 133:1.

¹⁰ Nalawag a makitkitatayo ita ti panagkaykaysatayo nga agkakabsat iti agduduma a pamay-an. Kas pagarigan, sadinoman ti ayantayo, agpapada dagiti naespirituan a taraon a maaw-awattayo kadagiti gimong, asamblea, ken kombension. Abagan-abaga met nga agtitinnulong dagiti Saksi kadagiti proyekto ti panagibangon ken kadagiti pasilidad ti Bethel aniaman ti puli ken nasionalidadda. Ay-ayatentayo ti maysa ken maysa. Saantayo a kas iti dadduma a nabingaybingay gapu iti kultura, kasasaad ti biag, wenno opinion iti politika. Panunotem daytoy: Aniaman a paset ti lubong ti papanantayo, kanayon nga adda mabirokantayo a naayat a kakabsat a tumulong ken mangparegta kadatayo. Ita pay laeng a makakitatayo kadagiti nakaad-adu a tattao manipud iti agduduma a daga ken kultura nga agkaykaysa iti panunot ken aramid.

11. Apay a maibilangtayo a milagro ti panagkaykaysatayo?

¹¹ Maibilang a milagro ti panagkaykaysatayo ta naiduma unay dayta iti mapaspasamak a pannakabingaybingay dagiti tattao. Talaga a makitkitatayo ita a nabingaybingay dagiti tattao iti lubong. Inaldaw a makakitkita ken makangkangngegtayo kadagiti damag maipapan iti panaglalaban, gulo, protesta, panagrebelde, ken gubat. Talaga a makapaladingit a makita a nabingaybingay daytoy a lubong ken saan nga agkaykaysa dagiti tattao. Maitunos dayta iti naipadto iti Biblia a dagiti tattao ket “saan a matalek, . . . saanda a kayat ti makitulag, manangpadakes, awanan panagteppel, nauyong, kagurada ti kinaimbag, traidor, natangken ti uloda, napannakkel.” (2 Tim. 3:​2-4) Ngem uray no “ti intero a lubong ket adda iti pannakabalin daydiay managdakdakes” ken dagiti demoniona, itultuloy latta ti ili ni Jehova ti agkaykaysa. (1 Juan 5:19; Apoc. 12:9) Talaga a maysa a milagro dayta!

12. Kasanotayo a makatulong tapno agtalinaed ti panagkaykaysa ti ili ti Dios?

¹² Adda maitulongtayo tapno agtalinaed ti panagkaykaysa ti ili ni Jehova. Ania dayta? Dumngegtayo a naimbag kadagiti isursuro ni Jehova ken iyaplikartayo dagita. Makatulong dagiti masursurotayo iti Biblia tapno maipakitatayo ti kinaanus, nalaklakatayo a mangpakawan, maliklikantayo ti makiriri, ken agbalintayo a naimbag iti dadduma. (Efe. 4:​2, 31, 32) Laglagipentayo a tunggal palabsentayo ti kamali ti maysa a kapammatiantayo, tunggal lapdantayo ti bagitayo nga agitsismis, ken tunggal pakawanentayo ti kabsattayo, makipagtrabtrabahotayo ken Jehova iti mapaspasamak a milagro ita iti organisasionna.

TI AYATTAYO

13. Kasano nga impakita dagiti Kristiano idi umuna a siglo nga ay-ayatenda ti maysa ken maysa? (Juan 13:35)

¹³ Imbaga ni Jesus a mabigbig dagiti adalanna babaen ti ayat nga ipakpakitada iti maysa ken maysa. (Basaen ti Juan 13:35.) Impakita dagiti Kristiano idi umuna a siglo dayta nga ayat iti nagduduma a pamay-an. Kas pagarigan, inranudda ti adda kadakuada kadagiti agkasapulan. (Ara. 2:​44, 45) Inkararaganda met dagiti maidaddadanes. (Ara. 12:5) Inaywananda dagiti ulila ken balo. (Sant. 1:27) Ken uray no narigat ti biagda, tinulonganda latta ti dadduma pay a Kristiano. (2 Cor. 8:​1-4) Ni Tertullian ket maysa a mannurat idi maikadua a siglo. Insuratna ti imbaga ti dadduma maipapan kadagiti nagkauna a Kristiano. Kunana: “Kitaenyo! . . . Ay-ayatenda ti tunggal maysa [ken] situtulokda a matay para iti maysa ken maysa.”

14. Kasano nga ipakpakita ita ti ili Dios ti ayatda? (Kitaen met dagiti ladawan.)

¹⁴ Kas kadagiti Kristiano idi umuna a siglo, ipakpakita met ita ti ili ti Dios a talaga nga ay-ayatenda ti maysa ken maysa. Ipakpakitatayo met dayta nga ayat uray kadagiti saan nga agdaydayaw ken Jehova. Kasano? Babaen ti trabaho a panangasaba. Ket tapno masuportarantayo dayta a trabaho, mangmangtedtayo met kadagiti donasiontayo. Awan ti mangpilpilit kadatayo a mangaramid iti dayta. Saan met a makidkiddaw kadatayo a mangtedtayo iti apagkapullo. Gapu met iti ayat, tultulongantayo dagiti kakabsat nga agkasapulan.a Malaksid iti dayta, supsuportarantayo met ti dadduma iti naespirituan ken emosional. Maitunos dayta iti balakad ni apostol Pablo. Kunana: “Liwliwaenyo dagiti malidliday, patibkerenyo dagiti nakapuy, agbalinkayo a naanus iti amin a tao.” (1 Tes. 5:14) Talaga a rinegaluannatayo ni Jehova kadagiti kakabsat iti intero a lubong a mangipakpakita iti pudpudno nga ayat iti tunggal maysa ken iti dadduma.

15. Apay a maibagatayo a milagro ti ayattayo iti maysa ken maysa?

¹⁵ Maibilang a milagro ti ayat nga ipakpakita ita ti ili ti Dios gapu ta maipakpakitada dayta uray no managimbubukodan dagiti tattao. Insurat ni apostol Pablo maipapan iti kaaldawantayo a dagiti tattao ‘ay-ayatendanto laeng ti bagbagida, managayat iti kuarta, ken ayatenda ti ragragsak.’ Awan ti ayatda iti Dios ken ‘awan ti ayatda iti padada a tao,’ uray kadagiti mismo a kapamiliada. (2 Tim. 3:​2-4) Impakpakauna met ni Jesus nga agtritrinnaidor ken aggiginnuranto dagiti tattao. Innayonna a “lumamiisto ti ayat ti ad-adu.” (Mat. 24:​10, 12) Panagkunam, mapaspasamak kadin amin dagita ita? Wen! Isu a talaga a maibagatayo a maysa a milagro ti ayat a makitkitatayo iti ili Dios ta nagbalin laeng a posible dayta iti tulong ni Jehova.

16. Kasanotayo a maipakita nga ay-ayatentayo ti maysa ken maysa?

¹⁶ Maipakitatayo nga ay-ayatentayo ti dadduma no naimpusuan a pagyamanantayo ida iti nagsayaat nga ulidanda ken no ikagumaantayo a pagtalinaeden ti nasayaat a relasiontayo kadakuada. (Mar. 9:50) No kanayontayo nga ipakita ti ayattayo, iti man panagsasao ken aramidtayo, mapaneknekantayo a datayo ti ili ti Dios. No aramidentayo dayta, makipagtrabtrabahotayo ken Jehova iti milagro a mapaspasamak ita iti organisasionna.

IPATEGMO TI PASETMO

17. Ania ti pakakombinsiram a talaga nga adda dagiti milagro nga ar-aramiden ni Jehova ita?

¹⁷ Ti panagrang-ay, panagkaykaysa, ken ayat a mapadpadasantayo ita iti organisasion ni Jehova ket pammaneknek a talaga nga adda dagiti milagro nga ar-aramiden ni Jehova iti kaaldawantayo. Uray no adu ti mangbusbusor kadatayo, agtultuloy latta nga umad-adu ti bilangtayo. Uray no nabingaybingay dagiti tattao iti daytoy a lubong iti nagduduma a pamay-an, adda panagkaykaysatayo. Ken uray no agbibiagtayo iti managimbubukodan a lubong, maipakpakitatayo latta ti ayattayo iti Dios ken iti dadduma a pakabigbigantayo kas pudno nga adalan ti Kristo. (Juan 13:34) Ngem saantayo laeng a basta buybuyaen a mapaspasamak dagita a milagro. Adda pasettayo kadagita a milagro ta ‘katrabahuannatayo ti Dios.’—1 Cor. 3:9.

18. Ania ti determinasiontayo gapu kadagiti makitkitatayo a milagro nga ar-aramiden ita ni Jehova?

¹⁸ Iti tengnga daytoy a problemado a lubong, kasla imposible nga adda maysa a grupo dagiti tattao manipud iti agduduma a paset ti lubong nga agtultuloy a rumangrang-ay, agkaykaysa, ken mangipakpakita iti ayat iti maysa ken maysa. Ngem dayta ti eksakto a makitkitatayo ita. Gapu kadagita a milagro, bumilbileg ti panagtalektayo a tungpalento ni Jehova ti amin a karina iti masanguanan. (2 Ped. 3:13) Isu a sapay koma ta determinadotayo a kanayon a mangipateg iti pasettayo kadagiti milagro nga ar-aramiden ita ti Dios!