Matulongandaka Dagiti Pudno a Gagayyem nga Agmatalek ken Jehova

1. Para iti adu, ania ti kaipapanan ti panaggagayyem?

KAYATTAYO amin ti agtalinaed a matalek ken Jehova. Ngem saan a kanayon a nalaka dayta. Ngamin, masapul a labanantayo dagiti dakes nga impluensia ti lubong. Saantayo a kayat a tuladen ti panangmatmatda no maipapan iti panaggagayyem. Kas pagarigan, para iti dadduma, okey laeng uray no saanda a nasinged kadagiti gagayyemda, basta adu ti gagayyemda. Adu met nga agtutubo ti umas-asideg laeng kadagiti kaedadda no kasapulanda ti tulong wenno balakad. Panagkuna met ti dadduma, saanda a kasapulan ti gayyem ta kaykayatda ti agmaymaysa. Ngem para ngata kada Jehova ken Jesus, ania ti kaipapanan ti panaggagayyem?

2. (a) Kasano nga impakita ni Jesus a napateg kenkuana ti maaddaan iti pudno a gagayyem? (b) Sigun iti Eclesiastes 4:​9-12, ania ti maitulong dagiti pudno a gagayyem?

² Kayat ni Jehova a maaddaantayo kadagiti gagayyem a tumulong kadatayo nga agtalinaed a matalek nga agserbi kenkuana. Kasta a klase ti gagayyem ti pinili ti Anakna a ni Jesus. Sakbay a natay ni Jesus, imbagana maipapan kadagiti matalek nga apostolna: “Nagtalinaedkayo a matalek kaniak bayat a maipaspasangoak kadagiti pannubok.” Imbilangna ida kas pudno a gagayyem. (Luc. 22:28; Juan 15:15) Ti pudno a gayyem ket daydiay saannaka a pampanawan. Daydiay adda iti abaymo, saan laeng a no naragsakka, no di ket uray no “adda rigat.” (Prov. 17:17) Ibaga ti Eclesiastes 4:​9-12a a dagiti pudno a gagayyem papigsaendaka ken liwliwaendaka. (Basaen.) Tulongandaka met ken paregtaendaka. No ‘kaduatayo’ dagiti kasta a gagayyem, matulongandatayo tapno kayatayo a labanan ti aniaman a mangdadael iti espiritualidadtayo. Ken no ‘kaduatayo’ ida a mangaramid kadagiti naespirituan nga aktibidad, maaddaantayo iti makapnek a biag. Ngem saan la a dayta. Maaddaantayo pay kadagiti pudno a gagayyem nga agpaut iti agnanayon.

3. Ania ti usigentayo iti daytoy nga artikulo?

³ No maysaka nga agtutubo, kasano a makatulong dagiti pudno a gagayyem tapno agtalinaedka a matalek ken Jehova? Apay a maibilangmo dagiti nagannakmo ken ti dadduma a kakabsat a nataengan iti naespirituan kas pudno a gagayyem? Tapno masungbatan dagita, usigentayo ti ulidan ni propeta Daniel. Kitaentayo no kasanona a nakaya a sanguen dagiti narigat a situasion. Kitaentayo met no kasano a tinulongan ti kasingedan a Gayyemna a ni Jehova, uray idi agmaymaysa isuna.

DAGITI PUDNO A GAGAYYEM MATULONGANDAKA TAPNO PILIEM TI AGSERBI KEN JEHOVA

4. Ania dagiti narigat a situasion a nakaipasanguan ni Daniel idi agtutubo pay laeng?

⁴ Dimmakkel ni Daniel iti panawen a nakarigrigat ti kasasaad ti ili ti Dios. Nagsardengen nga agserbi ken Jehova ti adu nga Israelita a taga-Juda. Isu nga idi 620 B.C.E., impalubos ni Jehova a sakupen ti ari ti Babilonia a ni Nabucodonosor ti Juda. (Dan. 1:2) Iti dayta a tiempo, posible nga agtutubo pay laeng idi ni Daniel. Ket kalpasan ti agarup tallo a tawen, naipan idiay Babilonia tapno masanay nga agserbi iti ari. (Dan. 1:​3-6) Isu nga agtutubo pay laeng ni Daniel, nayadayo isunan iti pamiliana ken iti lugar a dimmakkelanna.

5-6. Siasino dagiti posible a timmulong ken Daniel tapno pilienna ti agserbi ken Jehova?

⁵ Ania ti nangisagana ken Daniel tapno kayana a sanguen dagiti narigat a situasion idiay Babilonia? Ibaga ti Biblia nga ‘inkeddengna’ a suroten dagiti linteg ti Dios. (Dan. 1:8) Isu nga adda la ketdi nangisuro ken Daniel kadagiti linteg ti Dios ken timmulong kenkuana tapno pilienna ti agserbi ken Jehova idi agtutubo pay. Dagiti ngata nagannakna? Makapainteres ta ti kaipapanan ti naganna ket “Ti Ukomko Isu ti Dios.” Ipakita dayta a kayat dagiti nagannak ni Daniel nga agserbi isuna ken Jehova ken surotenna ti panangiwanwanna.—Deut. 6:​6, 7.

⁶ Mabalin a nakasursuro met ni Daniel iti nagsayaat nga ulidan ni propeta Jeremias. Apay a maibagatayo dayta? Nayanak ni Daniel kalpasan a dinutokan ni Jehova ni Jeremias kas propetana idi 647 B.C.E. (Jer. 1:2) Ket masansan nga impakaammo ni Jeremias dagiti mensahe ni Jehova kadagiti naggapu iti pamilia ti ari ken kadagiti natan-ok a tattao. Mabalin a karaman iti dayta ti pamilia ni Daniel. (Jer. 1:​17, 18; Dan. 1:​3, 6) Saantay met ketdi a masigurado a nagbalin nga aggayyem da Jeremias ken Daniel. Ngem masiguradotayo nga uray idi agtutubo pay laeng ni Daniel, ammonan dagiti padto ni Jeremias. Ken uray idi lakayen, inad-adalna latta dagita. (Jer. 25:11; 29:10; Dan. 9:​1, 2) Nakasursuro la ketdi ni Daniel ken Jeremias no kasano ti agbalin a natured ken agtalinaed a matalek uray no napalawlawan kadagiti tattao a saan nga agserserbi ken Jehova.

7-8. Kasano a matulongan dagiti nagannak ken ti dadduma pay a Kristiano a nataengan iti naespirituan dagiti agtutubo tapno agtalinaedda a matalek ken Jehova?

⁷ Masiguradotayo a napalikmutan ni Daniel iti nasayaat nga impluensia kas kadagiti nagannakna, ni propeta Jeremias, ken ti dadduma pay a matalek nga agserserbi idi ken Jehova. Awan duadua a tinulonganda isuna a maaddaan iti nadekket a personal a relasion ken Jehova.

⁸ Ita, posible nga agbalin met a nasayaat nga impluensia dagiti nagannak kadagiti annakda. No maysaka a nagannak, mabalinmo nga isaludsod dagitoy: ‘Nakasagana kadin dagiti annakko a mangidepensa iti pammatida no masubok ti neutral a takderda? Kayada ngatan a labanan dagiti sulisog idiay eskuelaan ken iti online? Maitakderandanto kadin ti pammatida inton dakkel a rigat?’ Nagannak, tulonganyo dagiti annakyo a mangpauneg iti ayat ken panagtalekda ken Jehova. Kasano? Kanayon koma a kasaritayo ida maipapan kadagiti naespirituan a bambanag. Isuroyo met ida no kasano ti agkomento ken makipaset kadagiti gimong, ken makikaduakayo kadakuada iti ministerio. Kas ken Jeremias a nasayaat ti impluensiana ken Daniel, mabalintayo met ti agbalin a nasayaat nga impluensia kadagiti agtutubo. Isu nga iwayaantayo ti makikadua kadakuada ken gayyementayo ida.

DAGITI PUDNO A GAGAYYEM MATULONGANDAKA NO MAIPASANGOKA ITI SULISOG

9. Ania a delikado a situasion ti nakaipasanguan ni Daniel ken ti dadduma pay nga agtutubo a Hebreo?

⁹ Idi addan idiay Babilonia ni Daniel ken ti dadduma pay nga agtutubo a Hebreo, naipasangoda kadagiti sulisog a saanda pay a pulos napadpadasan. Apagsangpetda idiay, dagus a pinadas ida nga impluensiaan dagiti Babilonio nga agpanunot ken agtignay a kas kadakuada. Masapul met a masanayda nga agserbi iti ari. Ngem ti rigatna, bayat ti pannakasanayda, maipasangodanto kadagiti situasion a posible a mangsubok iti kinamatalekda ken Jehova.

10. Ania ti umuna a nangsubok iti kinamatalek dagiti agtutubo a Judio?

¹⁰ Kasla simple laeng met ti umuna a nangsubok iti kinamatalekda. Imbilin ti ari ken Daniel ken iti dadduma pay nga agtutubo a Judio a no ania ti kankanenna, isu met ti kanenda. Ngem karaman iti dayta dagiti makan a maibilang a narugit sigun iti Mosaiko a Linteg. (Dan. 1:​5, 8) Mabalin koma nga inrasonda: ‘Bassit la a banag daytoy! Adipenkami laeng. Ania koma ti maaramidanmi? Alangan met a sukirenmi ti ari! Baka makapungtot ket parigatennakami!’ Isu a masapul nga agdesisionda idi no ania ti aramidenda.

11. Kasanotay a maibaga a nasayaat dagiti gagayyem a pinili ni Daniel? (Kitaen met ti ladawan.)

¹¹ Adu dagiti agtutubo a Judio a nakaawat iti pannakasanay idiay Babilonia. Ngem uppat laeng ti ibaga ti Biblia a nagtalinaed a matalek ken Jehova. Asinoda? Isuda da Daniel, Sidrak, Mesak, ken Abednego. Nagtitinnulong dagitoy nga uppat nga aggagayyem tapno malabananda ti sulisog ken tapno agtalinaedda a matalek. Nagkedkedda amin a mangan iti taraon ti ari ket pinaneknekanda a napudnoda ken Jehova. Isu a naparagsakda ni Jehova, ket agtultuloy a tinulonganna ida.—Dan. 1:​6-12, 17.

12. Kasano a makatulong dagiti pudno a gagayyem tapno malabanam dagiti sulisog?

¹² No maysaka nga agtutubo, adda kadi dagiti gundaway a pilpilitendaka ti dadduma a mangaramid iti kagura ni Jehova? Napadasan dayta ni Daniel ken dagiti gagayyemna. Ngem nagtitinnulongda tapno makaaramidda iti husto a desision. Ania ti masursurom kadakuada? Piliem a gagayyem dagidiay determinado nga agtalinaed a matalek ken Jehova ken ikagumaam a labanan ti impluensia daytoy a lubong. (1 Juan 2:​15-17) Makatulong dagiti pudno a gagayyem tapno agtalinaedka a matalek uray kadagiti ‘babassit’ a banag ken tapno bendisionan ken tulongannaka ni Jehova. (Luc. 16:10) Ket ammom, no agtalinaedka a matalek ken Jehova uray kadagiti “simple” laeng a situasion, makatulongto dayta tapno kayam a sanguen dagiti narigrigatto pay a situasion.

DAGITI PUDNO A GAGAYYEM MATULONGANDAKA NGA AGTALEK KEN JEHOVA URAY KADAGITI NARIGAT A SITUASION

13. Ania a narigat a situasion ti nakaipasanguan ni Daniel ken dagiti gagayyemna?

¹³ Matulongandaka dagiti pudno a gagayyem tapno agtalekka ken Jehova uray kadagiti narigat a situasion. Kasta ti inaramid ni Daniel ken dagiti gagayyemna. Panunotem daytoy. Adda idi natagtagainep ni Ari Nabucodonosor a nangburibor unay kenkuana. Ita, kayatna a maammuan no ania ti kaipapanan dayta a tagtagainepna. Isu nga ania ti inaramidna? Pinaayabanna ti amin a salamangkero a papadi ken dagiti mangkukulam iti Babilonia. Ngem daytoy ti kayat ti ari. Masapul nga ibagada nga umuna no ania ti tagtagainepna, sadanto ibaga no ania ti kaipapanan dayta. Ngem no pampanunoten, kasla imposible a maaramid dayta ti asinoman! (Dan. 2:​3, 9-11) Permi ti pungtot ti ari ta awan man la ti nakaibaga iti tagtagainepna. Isu nga imbilinna a mapapatay ti amin a masirib a lallaki iti Babilonia. Ti rigatna, karaman dita ni Daniel ken dagiti gagayyemna. Ania ngaruden ti inaramidda?

14. Kasano a nagtitinnulong dagiti agtutubo a Hebreo? (Kitaen met dagiti ladawan.)

¹⁴ Sitataktika nga inasitgan ni Daniel ti ari ket dimmawat iti gundaway tapno maibagana ti maipapan iti tagtagainepna. Kalpasanna, inasitgan ni Daniel dagiti gagayyemna. Ibaga ti salaysay ti simmaruno a napasamak: ‘Kiniddawna nga ikararagda ti asi ti Dios ti langit maipapan iti daytoy a palimed, tapno saanda a mairaman a mapapatay.’ (Dan. 2:18) Pinatgan ni Jehova dagiti naimpusuan a kararagda. Impalgakna ken Daniel ti tagtagainep ti ari ken ti kaipapanan dayta. Ti resultana? Saan a nairaman ni Daniel ken dagiti gagayyemna a napapatay. Ken saan la a dayta. Inikkan met ida ti ari kadagiti nangato a saad idiay Babilonia.—Dan. 2:​19, 47-49.

15. Ania dagiti masursurotayo iti daytoy a salaysay? (Galacia 6:2)

¹⁵ Nagadu ti masursurotayo iti daytoy a salaysay. Umuna, saantayo a solsoluen dagiti problematayo. Ditay koma ipalubos a ti pride wenno kinamanagbabain ti manglapped kadatayo nga agpatulong iti dadduma. Maikadua, ditay koma bumdeng a mangkiddaw iti dadduma nga ikararagandatayo. (2 Cor. 1:11) Panunotentayo ti pannakabalin ni Jehova a mangsungbat kadagiti kararagtayo ken iti kararag ti dadduma. Isuna ti “Managdengngeg iti kararag” ket matulongannatayo tapno malagtotayo uray dagiti kasla bantay a problematayo. (Sal. 65:2; Efe. 3:20) No dagiti gagayyemtayo ket dagidiay agserserbi ken Jehova, mapabileg ken matulongandatayo tapno kayatayo a sanguen dagiti naririgat a situasion.—Basaen ti Galacia 6:2.

TI PUDNO A GAYYEM A MABALINTAYO A PAGTARAYAN ITI AMIN A SITUASION

16. Ania a problema ti nakaipasanguan ni Daniel idi lakayen?

¹⁶ Adda ti maysa a pudno a Gayyem a mabalintayo a pagtarayan no kasapulantayo ti tulong, daydiay gayyem a kanayon a tumulong kenka uray no awan ti kaduam wenno uray no agmaymaysaka. Asino? Ni Jehova. Sublianantayo ni Daniel. Lakay idi isunan ta agtawenen iti nasurok a 90. Adda manen naipasango kenkuana a baro a narigat a situasion a posible a mangsubok iti kinamatalekna ken Jehova. Iti dayta a tiempo, ti mangiturturay idi iti Babilonia ket dagiti Medo ken Persiano. Ti ari a pagserserbian idi ni Daniel ket ni Ari Dario. Ita, adda dagiti opisial ni Ari Dario a permi ti imonda ken Daniel gapu iti nangato a saadna. Isu nga implanoda no kasanoda a mapapatay. Kinombinsirda ti ari a mangipaulog iti linteg a mangiparit iti asinoman nga agkararag iti asinoman a dios malaksid ti ari. Ngem siempre, kas iti ammotayon, awan ti nakalapped ken Daniel nga agkararag ken Jehova, isu a naipisok iti rukib dagiti leon. No kitaentayo, kasla agmaymaysa isunan sadiay ta awan metten ti gayyemna a mabalinna a pagpatulongan. Ngem aguray! Talaga kadi nga agmaymaysa isuna?—Dan. 6:​4-16.

17. Sigun iti Daniel 6:​19-23, kasano a nakatulong ken Daniel ti nadekket a relasionna ken Jehova?

¹⁷ Ibaga kadatayo ti Daniel 6:​19-23 a saan a nagmaymaysa ni Daniel. (Basaen.) Idi adda isuna iti rukib dagiti leon, tinulongan ti kabilgan a Gayyem, ni Jehova. Babaen ti maysa nga anghel, simimilagro nga insalakanna ni Daniel manipud kadagiti leon. Kabigatanna, napan ti ari iti asideg ti rukib. Idi kuan, impukkaw ni Daniel iti ari: “Nangibaon ti Diosko iti anghelna a nangkaem iti ngiwat dagiti leon, . . . ta ammona nga inosenteak.” (Dan. 6:22) Talaga a saan a pulos kimmapuy ti pammati ni Daniel iti kasingedan a Gayyemna, ni Jehova. Timmured uray idi agngangabiten ti biagna.

18. Apay a nakapatpateg nga agbalintayo a gayyem ni Jehova, ken kasanotayo a maaramid dayta? (Kitaen met dagiti ladawan ken ti kahon a “Ni Jehova—Ti Ama, Dios, ken Gayyemtayo.”)

¹⁸ Mabalin nga addaka met kadagiti situasion a mariknam a kasla naisinaka kadagiti kapamiliam wenno gagayyemmo. Baka ti asaynmentmo ket iti adayo a lugar wenno naiputputong a teritoria. Baka adda dagiti panagbalbaliw iti biagmo, kas koma no immakarka iti pagyanan, kimmapuyen ti salun-atmo ken pigsam, wenno naibaludka pay ketdi. No addaka iti kasta a situasion, baka malidayanka wenno mariknam a kasla agmaymaysakan. Ngem nagpateg a laglagipentayo nga agingga a gayyemtayo ni Jehova, saantayonto a pulos agmaymaysa. Ikarkari ni Jehova a protektaran ken asikasuennatayo. Sadinoman ti ayantayo, adda sadiay ni Jehova. (Sal. 139:​7-10) Isu nga agtalekka a makitkitanaka ni Jehova ken nikaanoman dinakanto pulos baybay-an.

AGGAGAYYEM ITI AGNANAYON

19. Apay a masapul a maaddaantayo itan iti pudno a gagayyem? (1 Tesalonica 5:​2, 11)

¹⁹ Nakapatpateg a maaddaantayo itan iti pudno a gagayyem. Apay? Makatulongda tapno makaaramidtayo kadagiti nainsiriban a desision bayat nga umas-asideg ti “aldaw ni Jehova.” Pabilgenda ti determinasiontayo tapno saantayo a sumuksuko. (Basaen ti 1 Tesalonica 5:​2, 11.) Gapu ta ammo ni apostol Pedro nga “asidegen ti panungpalan ti amin a banag,” insuratna: “Kangrunaan iti amin, nauneg koma ti ayatyo iti maysa ken maysa.”—1 Ped. 4:​7, 8.

20. Ania a klase ti gagayyem ti kayattayo a pilien, ken ania ti resultana no aramidentayo dayta?

²⁰ Regalo ni Jehova dagiti pudno a gagayyem. Ket ad-adda a kasapulantayo ida ita. Isu a kas ken Daniel, birokentayo koma dagiti pudno a gagayyem. Birokem iti kongregasionyo dagiti kas ken Jeremias a tumulong ken mangparegta kenka. Dagiti koma pakisingedam ket dagiti gagayyem a mangpabileg iti determinasionmo nga agtalinaed a matalek ken Jehova. Dika koma mabain nga agkiddaw iti dadduma nga ikararagandaka, no kasapulan. Ken kangrunaan iti amin, laglagipem no asino ti kasayaatan a Gayyemmo, ti best Friend-mo, ni Jehova. Isuna ti kakaisuna a gayyem a dinto pulos mangpanaw kenka. (Heb. 13:5) Iti tulong ni Jehova, makapagtitinnulongtayo a mangsango iti aniaman a pakasuotantayo ita ken maaddaantayo kadagiti pudno a gagayyem nga agpaut iti agnanayon.