Sukimatem ti Kasuratan iti Inaldaw

1-2. (a) Ania dagiti libro nga impablaak ti organisasion ni Jehova iti napalabas, ken apay? (b) Pakasarakantayo itan iti teksto iti inaldaw?

IDI 1905, nangipablaak ti organisasion ni Jehova iti libro a napauluan Daily Heavenly Manna for the Household of Faith. Naglaon daytoy a publikasion kadagiti agduduma a teksto ken komento manipud iti Zion’s Watch Tower. Mabalin nga agpili dagiti kakabsat iti basaen ken usigenda a teksto iti kada aldaw iti makatawen. Ngem nagtultuloy laeng nga inusarda dayta agingga idi 1927. Nainayon ngamin idin dagiti teksto ken komento iti Year Book.a Gapu ta tinawen a maipabpablaak dayta a libro, inaldawen nga agduduma a teksto ken komento ti mausig dagiti kakabsat.

² Idi 1986, mabasan ti teksto iti inaldaw iti bokleta a maawagan Panangsukimat Kadagiti Kasuratan iti Inaldaw. Maipabpablaak itan daytoy a publikasion iti nasurok a 300 a lengguahe. Masarakan met ti teksto iti inaldaw iti home page ti app a JW Library^®, Watchtower ONLINE A LIBRARIA (wol.jw.org), ken iti Watchtower Library.

3. Apay a mabalin a narigat a regular nga usigen ti teksto iti inaldaw, ken ania ti pagsasaritaantayo iti daytoy nga artikulo?

³ Nakaad-adu dagiti masapul nga aramidentayo iti inaldaw. Isu a dadduma kadatayo ti marigatan a mangusig iti teksto iti kada aldaw. Isu nga iti daytoy nga artikulo, sungbatantayo ti tallo a saludsod: Ania a nagsayaat nga ulidan iti Biblia ti mangparegta kadatayo a mangusig iti teksto iti kada aldaw? Apay a nagpateg nga usigentayo ti teksto iti kada aldaw? Ken kasanotayo a maaramid dayta?

NAGSAYAAT NGA ULIDAN ITI BIBLIA

4. Ania a kababalin ti impakita dagiti taga-Berea idi kinasabaan ida ni apostol Pablo? (Aramid 17:​10, 11)

⁴ Ipakita ti pannakatema a tekstotayo ti kababalin ti maysa a grupo dagiti Judio a dimngeg ken apostol Pablo idi mangaskasaba iti siudad ti Berea idiay Macedonia. (Basaen ti Aramid 17:​10, 11.) Dimngeg a naimbag dagiti taga-Berea gapu ta kayatda ti makasursuro. Ibaga ti Biblia a ‘nagsayaat ti panagpampanunotda’ ken ‘inawatda ti sao’ nga inkasaba ni Pablo. Inkomparada dagiti ibagbaga ni Pablo iti mabasada iti Kasuratan isu a napaneknekanda a kinapudno dagiti isursuro ni Pablo. Kasta met ti ar-aramidentayo no dumdumngegtayo iti maysa a palawag kadagiti gimong, asamblea, wenno kombension. Isursurottayo a basaen ti Bibliatayo bayat a basbasaen ti ispiker ti maysa a teksto. Isu a masiguradotayo a kinapudno ti maisursuro kadatayo.

5. Ania ti naitulong kadagiti taga-Berea ti inaldaw a panangsukimatda iti Kasuratan?

⁵ ‘Adu a taga-Berea ti nagbalin a manamati.’ (Ara. 17:12) Ngem bigla nga adda timmaud a problema. Napan dagiti Judio a taga-Tesalonica iti Berea “tapno sugsoganda dagiti tattao a bumusor” kadakuada ken kadagiti baro a nasursuroda. (Ara. 17:13) Ngem saan a nagbuteng dagiti baro a manamati a taga-Berea. Apay? Inaldaw ngamin a sinukimatda ti Kasuratan. Nakatulong dayta kadakuada tapno kombinsidoda a nasarakanda ti kinapudno ken tapno agtalinaedda a matalek. Kasta met laeng kadatayo. No inaldaw nga usigentayo ti Kasuratan, makatulong dayta kadatayo tapno agtalinaedtayo a matalek uray no maipasangotayo kadagiti narigat a kasasaad.

APAY A NAGPATEG NGA USIGENTAYO TI TEKSTO ITI KADA ALDAW?

6. Apay a nagpateg nga usigentayo ti teksto iti kada aldaw? (Kitaen ti kahon a “Dagiti Pagarigan iti Biblia iti Inaldaw a Panagdaydayaw.”)

⁶ Gapu ta makatulong dayta tapno maipamaysatayo ti panunottayo ken Jehova ken iti panagdaydayawtayo. Ni Jehova ti Diostayo, isu a maikari laeng isuna a pangipaayantayo iti atension ken iti panagdaydayawtayo. Ay-ayatennatayo met ken kayatnatayo a maaddaan iti biag nga agnanayon. (Juan 3:16) Ipakita dagiti pagarigan iti Biblia a maragsakan ni Jehova no inaldaw nga agdaydayawtayo kenkuana. Nakita ti adu a kakabsat a no usigenda ti teksto iti kada aldaw, makatulong dayta tapno matignayda met nga agkararag, agbasa iti Biblia, ken agutob.

7-8. Ania ti dadduma pay a rason nga usigentayo ti teksto iti kada aldaw? (Efeso 5:​15, 16)

⁷ Gapu ta nagsayaat dayta a pangusarantayo iti tiempotayo. (Basaen ti Efeso 5:​15, 16.) Nagsayaat a mangiwayatayo iti sumagmamano a minuto iti kada aldaw tapno agsursurotayo maipapan iti panagpampanunot ti naayat nga Amatayo. Awanen ti nasaysayaat pay a pangusarantayo iti tiempotayo no di dayta.

⁸ Gapu ta makatulong dayta tapno kayatayo a sanguen dagiti problema iti kada aldaw. Imbaga ni Jesus nga “adda bukod a problema ti tunggal aldaw.” (Mat. 6:34) Ket talaga nga agpaypayso dayta ta inaldaw a maipaspasangotayo kadagiti problema. Ngem impasigurado met ni Jesus nga ammo ni Jehova ti problema a pakaipaspasanguantayo ken ti eksakto a tulong a kasapulantayo. (Mat. 6:​25-32) No usigentayo ti teksto iti kada aldaw, mas agpokustayo iti tulong nga ipapaay ni Jehova ngem kadagiti problema a pakaipaspasanguantayo. (Sal. 68:19; 1 Ped. 5:​6, 7) Kasta ti napadasan ti maysa a sister nga agtawen iti 19. Makonkonsiensia gapu iti basol a naaramidna iti napalabas ken agduadua no pinakawanen ni Jehova. Isu nga inkararagna ken Jehova a tulonganna a makombinsir a napakawanen ti basolna. Kalpasan a nagkararag, binasana ti teksto iti dayta nga aldaw. Ket eksakto a ti teksto ket Salmo 86:5 a kunana: “Naimbagka ken sisasaganaka a mangpakawan, O Jehova; aglaplapusanan ti napudno nga ayatmo kadagiti umaw-awag kenka.” Imbaga ti sister: “Dagus a limmag-an ti riknak. Agyamyamanak unay ken Apo Jehova ta impalagipna nga ay-ayatennak iti tiempo a kasapulak unay dayta. Manipud idin, sigsiguraduek a mabasak ti teksto iti kada aldaw.”

9. Kasano a nakatulong kadagiti kakabsat idiay Ukraine ti panangusig iti teksto iti kada aldaw?

⁹ Masansan nga ipalagip ti teksto iti kada aldaw nga ‘agtalektayo ken Jehova’ no adda problematayo. (Prov. 3:​5, 6) Kas pagarigan, idi nangrugi ti gubat ti Russia ken Ukraine, ti teksto iti dayta nga aldaw ket Isaias 30:15 a kunana: “Napigsakayo no agtalinaedkayo a kalmado ken no agtalekkayo.” Dayta a bersikulo ti nangpabileg kadagiti kakabsattayo idiay Ukraine. Kas pagarigan, imbaga ti brother nga agnagan iti Eduard: “Dayta a teksto ti nangpabileg iti pakinakemmi. Uray la limmag-an ti barukongmi. Binasami dayta ken baketko iti dayta nga agsapa. Kalpasan a nagkararagkami, kimmalma ti riknami.” Imbaga met ti sister a ni Svitlana: “Nagdakkel ti naitulong kadakami ti Isaias 30:15. Idi kumarkaro ti gubat, dayta ti pinampanunot ken inut-utobmi.”

10. Apay a kasapulantayo ti tured, ken kasanotayo a mas mapabileg pay dayta? (Josue 1:​6-9) (Kitaen met dagiti ladawan.)

¹⁰ Gapu ta pabilgen dayta ti determinasiontayo nga agtalinaed a matalek ken Jehova. Kasapulantayo ti tured tapno agtalinaedtayo a naiduma kadagiti kaeskuelaantayo ken katrabahuantayo, tapno mairanudtayo ti kinapudno, ken tapno makapagmatalektayo uray adda ibubusor. Kasta idi ti inaramid ni Josue. Idi nadutokan a mangidaulo iti nasion ti Israel, namitlo nga imbaga kenkuana ni Jehova a papigsaenna ti pakinakemna ken bumileg. Ket tapno ad-adda pay a tumured ni Josue, imbilin met kenkuana ni Jehova nga inaldaw a basaenna ti libro ti Linteg. (Basaen ti Josue 1:​6-9.) Ania ti masursurotayo? No usigentayo ti teksto ken basaentayo ti Biblia iti kada aldaw, makatulong dayta kadatayo tapno nabilegtayo latta ken agtalinaedtayo a matalek ken Jehova.

11. Kasano a makatulong ti panangusigtayo iti teksto tapno rumang-aytayo iti naespirituan?

¹¹ Gapu ta makatulong dayta tapno rumang-aytayo iti naespirituan. Idi agtutubo ni Timoteo, imbaga ni Pablo nga itultuloyna ti rumang-ay iti panagsao, kababalin, ayat, pammati, ken kinadalus. (1 Tim. 4:​12, 15) No usigentayo ti teksto iti kada aldaw, makatulong dayta tapno makitatayo no kasanotayo a rumang-ay kas naespirituan a tao. Ti naespirituan a tao ket daydiay mangikagkagumaan a mangtulad iti panagpampanunot ni Jehova ken daydiay mangikagkagumaan a mangparagsak kenkuana ken agbiag maitunos kadagiti pagalagadanna.—Roma 8:​5, 6.

12. Ania dagiti mabalin a pakausaran dagiti nataengan iti naespirituan a lallaki ken babbai, ken ania ti makatulong kadatayo tapno nakasaganatayo nga agpausar kadagita nga asaynment?

¹² Gapu ta makatulong dayta tapno nakasaganatayo kadagiti asaynment iti organisasion ni Jehova iti masanguanan. Nakaad-adu dagiti trabaho a masapul a maaramid iti organisasion ni Jehova. Isu a kasapulan dagiti nataengan iti naespirituan a lallaki ken babbai a tumulong kadagita a trabaho. Kasapulantayo dagiti agserbi kas payunir ken misionero. Kasapulantayo met dagiti tumulong iti Bethel, iti konstruksion, ken kadagiti remote translation office. Kasapulantayo dagiti makabael ken napakumbaba nga agtutubo a lallaki nga agserbinto kas ministerial nga adipen, panglakayen, ken manangaywan iti sirkito. Kayat ni Jehova a dagiti mangidaulo iti organisasionna ket dagidiay mapangnamnamaan ken responsable a brother nga ammoda no kasano nga iyaplikar dagiti prinsipio ti Biblia. (Deut. 1:​13-15) Isu a no pagbalinem a paset ti naespirituan a rutinam ti panangusig iti teksto iti kada aldaw, makatulong dayta tapno masursurom dagiti prinsipio ti Biblia ken nakasaganaka nga agpausar kadagiti kanayonan nga asaynment.

KASANOM NGA USIGEN TI TEKSTO?

13. Ania ti maysa a pamay-an tapno mausigmo ti teksto?

¹³ Kasanom nga usigen ti teksto iti kada aldaw? Iti intero a lubong, sakbay nga agtrabaho dagiti kakabsat iti Bethel, usigenda nga umuna ti teksto iti dayta nga aldaw. Rugianda dayta iti ababa ngem naimpusuan a kararag ken Jehova. Mabalinmo met nga aramiden dayta. Agkararagka nga umuna iti ababa tapno tulongannaka ni Jehova a makasursuro iti teksto nga usigem. (Sant. 1:5) Kalpasanna, basaemon ti teksto ken ti komento. Sa isaludsodmo dagitoy iti bagim: ‘Kasano a makatulong daytoy a teksto tapno bumileg ti pammatik? Ania ti nasursurok iti daytoy a teksto maipapan ken Jehova a mangpasinged kaniak kenkuana? Kasano a makatulong kaniak daytoy a teksto ita nga aldaw?’ No kaduam met dagiti kapamiliam wenno gagayyemmo, pagsasaritaanyo dayta a teksto sa ibagayo dagiti nagustuanyo ken nakaparegtaanyo. (Roma 1:12) Nakita ti dadduma a kakabsat a no mangpanunotda iti tallo wenno uppat a sasao maipapan iti punto ti teksto iti dayta nga aldaw, nalaklakada a malagip dayta iti agmalmalem.

14-15. Ania pay ti mabalintayo nga aramiden, ken ania ti makatulong tapno malaglagiptayo ti teksto?

¹⁴ Ania pay ti mabalinmo nga aramiden tapno ad-adu pay ti masursurom iti teksto iti kada aldaw? Mabalinmo nga aramiden ti maysa wenno ad-adu pay kadagitoy a suhestion: (1) Ugedam wenno i-highlight-mo dagiti kangrunaan a punto iti komento ti Pagwanawanan ken utobem dagita. (2) Basaem dagiti naisitar a teksto iti komento. (3) Basaem ti intero a kapitulo ti Biblia a nakaalaan ti teksto. (4) Kitaem ti Giya iti Panagsukimat Para Kadagiti Saksi ni Jehova wenno dagiti study note iti Biblia tapno ad-adu pay ti masursurom. (5) Basaem dagiti parapo ti maadal nga artikulo a nakaalaan ti komento. No selpon wenno dadduma pay a gadyet ti us-usarem, maluktam ti maadal nga artikulo a nakaalaan ti komento no pindutem ti reperensia iti ngudo ti komento.b

¹⁵ Imbaga ti sister a ni Mackenzie nga agtawen iti 19 ti makatultulong kenkuana tapno malagipna ti teksto: “No nayonak ti tiempok a mangusig iti teksto iti kada aldaw, uray lima a minuto laeng, saanak no kua nga agdardaras a mangbasa ken mangutob iti teksto ken iti komento ti Pagwanawanan. Isu a nalaklakak a malagip dagiti punto a nasursurok.”

16. Kaanoyo nga usigen ti teksto?

¹⁶ Kaanoyo nga usigen ti teksto? Pilienyo ti kasayaatan a tiempo a mabasayo a sangapamiliaan ti teksto. Dadduma ti mangaramid iti dayta sakbay wenno kalpasan ti pammigat. Dadduma met ket sakbay nga itulodda dagiti annakda iti eskuelaan. Ken tapno saanda a malipatan ti agteksto, mangikabkabilda kadagiti nayimprenta a kopia ti Panangsukimat iti Kasuratan iti Inaldaw iti lugar a nalakada a makita. Siempre, no adda diyo mapakpakadaan a pasamak, mabalinyo nga usigen ti teksto iti dayta nga aldaw iti sabali nga oras.

17-18. Apay a nasayaat a mangyeskediultayo iti espesipiko nga oras iti panangbasa iti teksto, ken ania ti makatulong tapno maaramidtayo dayta iti inaldaw? (Kitaen met dagiti ladawan.)

¹⁷ Apay a nasayaat a mangyeskediultayo iti espesipiko nga oras iti panangbasa iti teksto? No ngamin saanmo nga aramiden dayta, baka saankanton a makapagteksto. Imbaga ti brother nga agnagan John nga agtawen iti 16: “No saanmo nga unaen ti agteksto iti kada aldaw, baka malipatamton nga aramiden dayta.” Imbaga met ti sister a ni Sierra nga agtawen iti 25: “Kada agsapa, ikagkagumaak a ti umuna nga aramidek ket basaek ti teksto sakbay pay a rugiak ti nagadu a trabahok.” Imbaga met ti brother a ni Rogelio nga agtawen iti 21: “Mangikabkabilak iti reminder wenno alarm iti selponko a mangipalagip kaniak nga agtekstoakon.”

¹⁸ Iramanmo iti eskediulmo iti kada aldaw ti panagbasam iti teksto ken ikagumaam a suroten dayta. Dimo ipalubos nga adda ti manglapped kenka a mangaramid iti dayta. Imbaga ti sister a ni Isabelle nga agtawen iti 19: “Basaem ti teksto sakbay nga adda ti sabali nga aramidem wenno kitaem iti selponmo. Ngem no madlawmo nga adda ti sabali a kitakitaem iti selponmo no basbasaem ti teksto, baka namaymayat no agusarka iti nayimprenta a kopia ti pagtekstuan.” Imbaga met ti sister nga agnagan iti Olivia nga agtawen iti 19: “Makatultulong kaniak no adda kaduak nga agteksto, kas koma dagiti kapamiliak wenno gagayyemko. No ngamin adda kaduak wenno mangipalagip kaniak, nalaklakak a masurot ti eskediulko.”

TULONGANYO DAGITI ANNAKYO A MANGSUKIMAT ITI KASURATAN ITI KADA ALDAW

19. Apay a nagpateg a masursuro dagiti ubbing a basaen ti teksto iti kada aldaw? Mangted iti pagarigan. (Filipos 1:​9, 10)

¹⁹ Nagannak, no iyugaliyo nga inaldaw nga usigen ti teksto a sangapamiliaan, mairuamto dagiti annakyo a mangaramid iti dayta agingga a dadakkeldan. Uray no ubbing pay dagiti annakyo ken saanda unay a maawatan ti kaipapanan ti teksto, makatulongto kadakuada ti rutinayo inton agangay. Panunotem daytoy: No inaldaw a masibugan ti maysa a bassit a mula, posible nga agbalinto dayta a dakkel a kayo. Kasta met, no inaldaw nga usigenyo ti teksto ken ti komento uray iti sumagmamano laeng a minuto, posible a dumakkelto ti pammati dagiti annakyo.—Basaen ti Filipos 1:​9, 10.

20. Apay a nagpateg nga inaldaw a mangantayo iti naespirituan a taraon?

²⁰ Imbaga ni Jesus: “Saan laeng a tinapay ti pagbiag ti tao, no di ket ti tunggal sao nga aggapu ken Jehova.” (Mat. 4:4) Siempre, saantayo la ketdi a kayat ti saan a mangan iti agmalmalem. Isu nga ad-adda pay koma a saantayo a kayat a lumabas ti maysa nga aldaw a saantayo a mangan iti naespirituan a taraon. Ngamin, nakadepende iti dayta ti biagtayo. Isu a nagpateg nga aramidentayo ti ibagbaga ti Biblia: Sukimatem ti Kasuratan iti inaldaw!