Siguraduem a Natibker ti Pundasion ti Pammatim
IDI nakipagadalka iti Biblia kadagiti Saksi ni Jehova, ania ti nangkombinsir kenka a nabirokamon ti “maysa a pammati” wenno ti maymaysa a pamay-an ti panagdaydayaw nga akseptaren ti Dios? (Efe. 4:4-6) Ti kadi ayat dagiti adipen ni Jehova iti maysa ken maysa? Wenno ti nasayaat a kababalinda? Adu ti mayat nga agbalin a paset ti ili ti Dios gapu ta maiparparikna kadakuada a maipatpategda ken natalged ti riknada. Ekspektarentayo dayta gapu ta ti ayat ken nasayaat a kababalin ti pakabigbigan dagiti pudno a Kristiano.—Juan 13:35; 1 Ped. 2:12.
Kasano no napasaktannaka ti maysa a kabsat wenno nakaaramid iti saan a nasayaat kenka? Kasano met no nakaaramid ti maysa a kabsat iti nadagsen a basol wenno nakababain pay ketdi nga aramid, kas iti naaramid ti lalaki iti kongregasion ti Corinto idi umuna a siglo? (1 Cor. 5:1) No ti pammatim ket nakadepende laeng iti ar-aramiden ti dadduma, saan a natibker dayta. Isu a kasanom a masigurado a natibker ti pundasion ti pammatim?
TI NATIBKER A PUNDASION TI PAMMATI
Mapatibkermo ti pundasion ti pammatim no paunegem ti panagtalekmo kadagiti naammuam a kinapudno iti Biblia. Kasano a kasta? Panunotem daytoy.
Adda idi tiempo nga adu nga adalan ni Jesus ti nangpanaw kenkuana. Apay? Ngamin, naitibkolda idi imbagana a kanenda ti lasagna ken inumenda ti darana. Imbagada: “Makapakigtot ti ibagbagana.” Nariribukanda unay iti imbaga ni Jesus isu a simmardengdan a simmurot kenkuana.—Juan 6:56-60, 66.
Kalpasanna, insaludsod ni Jesus kadagiti apostolna: “Pumanawkay met kadi?” Insungbat ni Pedro: “Apo, sadino koma ti papananmi? Adda kenka ti sasao a makaited iti biag nga agnanayon. Mamatikami ken ammomi a sika ti Nasantuan nga Adipen ti Dios.”—Juan 6:67-69.
Apay a saan a naitibkol ni Pedro ken ti dadduma nga apostol? Gapu ta ti pammatida ket saan a naibatay iti marikriknada. Imbaga ni Pedro: “Mamatikami ken ammomi a sika ti Nasantuan nga Adipen ti Dios.” Ammo dagitoy a matalek nga apostol no ania ti pinatida ken no apay a pinatida dayta. Inkomparada dagiti imbaga ken inaramid ni Jesus iti naammuanda a kinapudno iti Kasuratan, isu a nakombinsirda a ni Jesus ti Mesias. Gapu iti dayta, natibker ti pammatida isu a saanda a naitibkol.
Ania ti isuro dayta kadatayo? Masapul a nabilbileg ti ammotayo ngem iti marikriknatayo. Apay? Ngamin, saan a pulos nga agbaliw dagiti kinapudno iti Biblia a naammuantayo, kas iti nagan ti Dios, ti panggepna, ken ti subbot. Saan a kas dayta iti marikriknatayo nga agbaliw no adda ti maaramid wenno maibaga ti dadduma. Isu a no kombinsidotayo kadagiti kinapudno iti Biblia ken no agtalektayo a kinapudno ti isursuro ti organisasion ni Jehova, saantayto a maitibkol aniaman ti aramiden ti dadduma.
No ti pammatitayo ket nakadepende laeng iti ar-aramiden ti dadduma, saan a natibker ti pundasionna
Siempre, makaparegta ti ayat ken nasayaat a kababalin dagiti kakabsat. Ngem kasano no mangrugin a maupaytayo gapu iti ar-aramiden ti dadduma? Mapatibkertayo ti pammatitayo no paunegentayo ti panagtalektayo kadagiti naammuantayo a kinapudno iti Biblia. Makatulong dayta tapno agtalektayo nga addatayo iti umiso nga organisasion, aniaman ti aramiden ti dadduma.
No inaldaw a basaentayo ti Biblia ken regular nga adalentayo dayta, mapaunegtayo ti panagtalektayo kadagiti kinapudno a naammuantayo iti Biblia. Dayta ti tumulong kadatayo tapno agtalinaedtayo a kombinsido a nabirokantayo ti maymaysa a pamay-an ti panagdaydayaw nga akseptaren ti Dios. Iti kasta, natibker ti pundasion ti pammatitayo ken saan a maan-ano uray ania ti ibagbaga wenno ar-aramiden ti dadduma.—Sal. 16:8; kitaen ti kahon nga “Agtalinaedka iti Umiso a Dalan.”