October
Friday, October 1
Jehova gbẹlokotọ fẹ ije rebhe bhi ọne otọ nan ghe, nin ọle da re ahu nọnsọle man bhi egbe ọsi ẹbho ne re ọkhọle rebhe ga ọle.—2 Chron. 16:9.
Jehova wo rẹman ghe ọle gbega ẹbho nesọle ẹlẹnan. Riale: Bhi ọne otọ agbọn nan rebhe, mhan man ẹbho ẹmhọanta ne ribhi Baibo. (Matt. 28:19, 20) Ọne uwedẹ nan mhan rẹ rẹkpa ẹbho daghe ohoghe kẹkẹ nọnsi Esu. Sade Esu sabọmhin nọn, ọle ha rẹ mun ọkpẹnlẹn ọbhi ọne iwẹnna nan, ọkpakinọn, ọle ida sabọ. Bhiriọ, ọ bha khẹke nin mhan ji ofẹn ẹlinmhin ebe ha mun mhan. Ahamiẹn mhan sun rẹkhan iJehova, ẹlinmhin ebe ida sabọ si ikuan egbe ji mhan rẹsẹbhi ighegheghe. Bhiriọ, ọkhẹke nin mhan rebhe mun udu tẹ iJehova, yẹ ha nin ẹlinmhin ebe suan. Mhan ha lu iriọ, mhan ki miẹn erọnmhọn ne bunbun. Sẹyẹ, Esu ida sabọ hiẹ mhan. Ofẹn ẹlinmhin ebe ida yẹ ha mun mhan. Ọne ke okhun nẹ hi, ikolu nin mhan bi Jehova ko mhọnlẹn ki manman deziẹn. James nin odibo da gbẹn yọle: “Uwẹ ha ne Esu suan, ọle ki nẹ zẹ uwẹ obọ. Sikẹ Osẹnobulua, ọle ki yẹ sikẹ ẹ.”—Jas. 4:7, 8. w19.04 24 ¶15; 25 ¶18
Saturday, October 2
Elele, ọle ikpẹ nọn na bhi ẹkpa-ọmọn vae khin.—Ps. 127:3.
Ẹsele nọn na bhi obọ iJehova vae, ọle imọn nesẹ khin. Ẹsọn nọnsẹ nọn nin uwẹ rẹ gbega ele. Be uwẹ ha lu nin uwẹ da sabọ gbega imọn nesẹ bhi obọ eria ne mun ibhokhan riia a? Ọhẹnhẹn, dọnmhegbe luẹ ebi ene mun ibhokhan riia a rẹ lu emhin yẹ. Luẹ ẹmhọn ẹbho ne sabọ mun ibhokhan riia a bi uwedẹ nin ele rẹ lẹlẹ ibhokhan ọbhọ, uwẹ ha gbẹlokotọ bhi egbe ele, bi ẹghe nin ele rẹ lu ọle. (Prov. 22:3; 24:3) Lẹn sẹbhọ ghe, ọria nin ọne obhokhan lẹnlẹn, nin ọle yẹ gba ẹkẹ ọle, ọle kẹ lu ọne ọkhọlọ nan. Ọzeva, ha yi ọria nin ibhokhan nesẹ sabọ ne talọ. (Deut. 6:6, 7; Jas. 1:19) Lẹn sẹbhọ ghe, ofẹn mun obhokhan rẹ tare ghe ọria nanlẹn nowẹ. Ọle sabọ rẹ ha riale ghe, ọria soso ida rẹọ ọle bhọ. Sẹyẹ, asabọmiẹn ghe, ọne ọria nọn nanlẹn nowẹ gbe ofẹn ọle bhi ẹkẹ ghe nin ọle hẹi taman ọria soso. Ahamiẹn ọkhọle taman ẹn ghe, emhin sunu ji ọmọn nọnsẹ, si ọle kẹ egbe, uwẹ ha re ekpẹn-ekpẹn nọọn ọlẹn ọta. Ọzea, man imọn nesẹ emhin. Man ele ebi ele ha lu la ebi ele ha ta sade ọria guanọ nin ọle re obọ so ele bhi uwedẹ nọn bha khẹke. w19.05 13 ¶19-22
Sunday, October 3
Ọrebhe ne mhọn okpẹhio sọnọn iJehova.—Prov. 16:5.
Bezẹle nin ene mhọn okpẹhio da sọnọn iJehova? Ranmhude ene mhọn ọne ikpẹ nan, Esu ele re egbe khọkhọ. Ranmhude okpẹhio nin Esu mhọnlẹn, ọle da taman iJesu, Ọmọn nọnsi Osẹnobulua tobọle, nọn deuhọnmhọnre nanlẹn. (Matt. 4:8, 9; Col. 1:15, 16) Uwedẹ nin ẹbho ne mhọn okpẹhio rẹ lu emhin rẹman ghe emhin uuki ẹwanlẹn ọsi ọne agbọn nan gene khin. (1 Cor. 3:19) Baibo dẹ sabọ rẹkpa mhan ha re ẹlo nọn khẹke rẹ ghe egbe mhan. Baibo bha rẹman ghe emhin ọbe nọn sade mhan hoẹ mhọn egbe mhan. Jesu bhọ taman mhan ghe nin mhan hoẹmhọn ibo mhan beji mhan rẹ hoẹmhọn egbe mhan. Ọnan rẹman ghe ọkhẹke nin mhan hoẹmhọn egbe mhan. (Matt. 19:19) Ọkpakinọn, Baibo bha taman mhan nin mhan ha riale ghe mhan mhẹn gbera ẹbho nekẹle. Baibo yọle: “Hẹi re itẹn-abọ la okpẹhio lu emhin soso. Ọkpakinọn, ha re idegbere lu emhin. Ha riale ghe, ẹbho nekẹle mhẹn gbera uwẹ.”—Phil. 2:3; Rom. 12:3. w19.05 24 ¶13-14
Monday, October 4
Bha hẹi yẹ ha re egbe khọkhọ uwedẹ nin ọne agbọn nan rẹ lu emhin. Ọkpakinọn, bha fi ọkhọle denọ nin bha da sabọ fi egbe denọ sẹsẹsẹ.—Rom. 12:2.
Re ọkhọle nọnsẹ rẹ ria ẹmhọn emhin kẹkẹ nin uwẹ fidenọ bhi iẹnlẹn nọnsẹ, ẹghe nin uwẹ rẹ munhẹn ha luẹ ẹmhọanta ne ribhi Baibo yẹ ha ga iJehova. Ene bunbun bhi ẹwẹ mhan da rẹban emhin ọbe nin ele ka ha lu. (1 Cor. 6:9-11) Mhan yi Jehova obulu nin ọle rẹ rẹkpa mhan rẹ sabọ rẹban emhin ọbe kẹkẹ nin mhan ka ha lu! Ọkpakinọn, ọ bha khẹke nin mhan wo ku obọ bhi egbe ha riale ghe, mhan iyẹẹ mhọn emhin soso nin mhan ha fidenọ bhi iẹnlẹn. Aharẹmiẹn mhan rẹban emhin ebe ne kaka nin mhan ka rẹ ha lu ọkuẹsẹ mhan mianmẹn, ọ sẹ yẹ khẹke nin mhan ha wẹnna kaka nin mhan hẹi fikie dọ ha lu ene emhin. Bhiriọ, emhin eva ha rẹkpa mhan. Ọhẹnhẹn, ọkhẹke nin mhan “hẹi yẹ ha re egbe khọkhọ uwedẹ nin ọne agbọn nan rẹ lu emhin.” Ọzeva, ọkhẹke nin mhan “fi ọkhọle denọ.” Ufidenọ nin Paul tẹmhọnlẹn iyi ọne a gheghe re ikpunun lu. Uwedẹ iẹnlẹn nọnsẹmhan rẹbhe ọkhẹke nin mhan fidenọ. Ebi a re ọle ta nan rẹ fi ọkhọle denọ hi, nan rẹ fi iria-eria nesẹmhan denọ, uwedẹ nin mhan rẹ lu emhin, bi ebi emhin dia mhan yẹ bhi egbe. w19.06 9 ¶4-6
Tuesday, October 5
Eo Jehova, uwẹ hi ọnọn rẹkpa mẹn yẹ ko mẹn udu re.—Ps. 86:17.
Ikolo oga nesẹmhan dẹ sabọ mun mhan ziẹn. Ranmhude, ikolo nesẹmhan deba uwedẹ kẹkẹ nin Jehova rẹ rẹkpa mhan, yẹ ko mhan udu re. Bhi ene ikolo, ọle noo ẹlinmhin nọn khiale nọnsọle, Baibo, bi ene imhan ko ga rẹ mun mhan ziẹn. Mhan miẹn isẹhoa re ha “re izebhudu nin egbe” bhi ikolo oga nesẹmhan. (Rom. 1:11, 12) Obhio mhan ọkpa natiọle Sophia da yọle: “Jehova bi ibhio mẹn bhi ẹkẹ agbotu, ele rẹkpa mẹn rẹ ha ziẹngbe. Emhin kpataki ikolo oga nesẹmhan wo khin rẹji mẹn. Mẹn dọ kere ghe, ahamiẹn mẹn manman zegbere lu iwẹnna itẹmhọn Osẹnobulua, bi iwẹnna kẹkẹ nan lu bhi ẹkẹ agbotu, ọ ki lẹkhẹ nin mẹn rẹ ha ziẹngbe ọnọghọ.” Ahamiẹn mhan ribhi ọnọghọ, ọkhẹke nin mhan yere ghe, arẹmiẹn Jehova dẹ ne ene ọnọghọ kie bhi ẹghe odalo, ọle dẹ rẹkpa mhan khọn ele ẹlẹnan nian. Ọle dẹ re ẹwanlẹn bi ahu nin mhan rẹ sabọ ziẹngbe ọnọghọ kẹkẹ nin mhan miẹn.—Phil. 2:13. w19.06 19 ¶17-18
Wednesday, October 6
Bha ha khian dọ taman ibhio mẹn, nin ele da ha khian iGalilee. Enin ele ha da miẹn mẹn.”—Matt. 28:10.
Emhin ọhẹnhẹn nin Jesu lu ẹghe nin ọle rẹ riọ kpanọ bhi uu hi, ọle da mhanmhanlẹn nin ọle bi edibo nesọle ko miẹn egbe. Bhi enin, ọle da mun iwẹnna kpataki nin ele. A sẹyẹ lu ọne iwẹnna rẹ sẹbhi ẹlẹnan. Jesu da yọle: “Bhiriọ, bha ha khian dọ re ẹbho kiẹn edibo bhi agbaẹbho rebhe, . . . bha ha man ele emhin nin ele re obọ rẹkhan ene emhin rebhe nin mẹn rẹ gbuhi nin bha.” (Matt. 28:19, 20) Jesu guanọ nin edibo nesọle rebhe ha lu iwẹnna itẹmhọn Osẹnobulua. Ọ iyi etuegbe 11 nesọle ọkpa ọle mun ọne iwẹnna nan. Be imhan rẹ lẹn yẹ? Mhan lẹn ọnan ranmhude, ẹghe nin Jesu rẹ je ele ọne uhọnmhunje nan bhi oke nọn ribhi Galilee, ọ iyi etuegbe 11 nesọle ọkpa ha ribhi enin. Yere ghe ọne ẹhi taman ene ikhuo ghe ele dẹ miẹn iJesu bhi Galilee. (Matt. 28:7) Bhiriọ, ọnan rẹman ghe ikhuo yẹ deba ene ha ribhi ọne ikolo nin. w20.01 2-3 ¶1-4
Thursday, October 7
Ibha iribhi ibo ọsi ọne agbọn nan, ọkpakinọn, mẹn zẹ bha sibhi ẹwẹ ọne agbọn nan re, ọle zẹle nin ọne agbọn nan da he bha.—John 15:19.
Jesu taman mhan ebezẹle nin ene ga iJehova nọnsẹn da miẹn ekpokpo. Ọle da tale ghe, ọne agbọn nan dẹ he mhan ranmhude ọ iyi ibo nọnsele mhan ye. Ekpokpo bha rẹman ghe Jehova khọ ẹkẹ mhan. Sokpan, ọ rẹman ghe emhin nọn gbale mhan lu. Eria khọnkhan ida sabọ mun ọkpẹnlẹn ọbhi oga nọnsi Jehova. Ẹbho ne bunbun sẹ dọnmhegbe nin ele lu iriọ, ọkpakinọn ele bha sabọ. Bha ji mhan fẹghe ebe sunu ẹghe nan rẹ ha khọn ọkhọn iHitler. Ọne ẹghe nan, ene gbẹlọghe bhi agbaẹbho ne bunbun da manman ha kpokpo ene ga Osẹnobulua. Ene gbẹloghe bhi Germany, Australia, Canada, bi agbaẹbho ebhebhe da yọle nin ibhio mhan ne ribhi enin hẹi yẹ ga iJehova. Ẹghe nin ọne okhọn rẹ munhẹn bhi 1939, Esali Jehova bhi otọ agbọn rebhe da ha yi, 72,475. Ẹghe nin ọne okhọn ki rẹ kpẹn bhi 1945, ele da dọ bun sẹbhi 156,299. Ranmhude Jehova yẹ ha nan erọnmhọn nin ele bhi ọne ẹghe ekpokpo nan, ele da manman bun gbera eka nin ele ka khin ọkuẹsẹ ọne ekpokpo munhẹn. w19.07 9 ¶4-5
Friday, October 8
Ọnan ẹbho rebhe ha rẹ lẹn ghe edibo nesẹmhẹn bha khin, sade bha mhọn ahoẹmhọn-egbe da egbe.—John 13:35.
Aharẹmiẹn uwẹ isẹ mhọn ọria nin uwẹ man ọle iBaibo, uwedẹ ebhebhe ribhọ nin uwẹ ha rẹ sabọ rẹkpa ẹbho kiẹn edibo. Bhi ọsi ijiẹmhin, uwẹ dẹ sabọ ha gbe obokhian nin ene la vae dọ ha ga iJehova. Uwẹ dẹ yẹ sabọ ha si ele kẹ egbe. Bhiriọ, uwẹ ki rẹkpa ele daghe ghe, Kristiẹn ọsaje mhan khin ranmhude oyẹẹ nọn ribhi ẹwẹ mhan. Aharẹmiẹn ewanniẹn nin uwẹ re ọbhi inọnta bhi ikolo bha tan gbe, ọ dẹ sabọ rẹkpa ene la vae lẹn uwedẹ nọn khẹke nin ele ha rẹ ha re urẹọbhọ nọnsele man. Uwẹ dẹ yẹ sabọ deba ele yo itẹmhọn Osẹnobulua, nin uwẹ da sabọ man ele ebi a rẹ noo iBaibo rẹ ne ẹbho zilo yẹ. Uwẹ a ha lu iriọ, uwẹ ki ha rẹkpa ele rẹ re egbe khọkhọ iJesu. (Luke 10:25-28) Ibhio mhan ne bunbun wo mhọn ẹsọn ne bun bhi obọ. Ọrẹyiriọ, ele sẹ yẹ re ẹghe ọbhi otọ rẹ man ẹbho iBaibo. Ọnan manman re ele ghọnghọn. w19.07 17 ¶11, 13
Saturday, October 9
Imẹn yele emhin rebhe ne ribhi ikeke a. Emhin ne ribhi odalo mẹn ki dọnmhegbe khu ọi.—Phil. 3:13, 14.
Paul bha ji emhin nin ọle sẹ sabọ re iẹnlẹn nọnsọle lu, bi ifiobọdọn nesọle da denọ ọle ẹlo sibhi oga re. Ọle bhọ da yọle ghe, ahamiẹn mhan guanọ nin mhan re ọne unẹ ọsi aribhọ sotọ nọnsẹn, ọkhẹke nin mhan yele emhin ne ribhi ikeke a. Emhin eso nela ha rẹ sabọ re ọle nọghọ iPaul rẹ denọ ẹlo ọbhi elele nin ọle ha miẹn bhi ẹghe odalo? Ọhẹnhẹn, emhin ne bunbun nin ọle ha mhọnlẹn ọkuẹsẹ ọle kiẹn iKristiẹn. Arẹmiẹn ọle mhọn ene emhin nan, ọle da yọle ghe, inian ene emhin “diabe iku bhi ẹlo” nọnsọle. (Phil. 3:3-8) Ọzeva, ekpokpo nin ọle ka ha kpokpo iKristiẹn. Arẹmiẹn ọkhọle nọnsọle wo ha gbe ọle asan ranmhude ọle ka kpokpo iKristiẹn, ọle bha ji ọne ọkhọle da re ọle zobọ bhi oga. Ọzea, emhin ne bunbun nin ọle sẹ lu bhi oga. Paul bha ha riale ghe iwẹnna nin ọle sẹ lu nin Jehova sẹle. Paul rẹ yo ighan, yẹ miẹn oya kẹkẹ bhi egbe, ọle da sẹyẹ wo ha lu eka ne bunbun bhi oga. (2 Cor. 11:23-27) Ọle sẹyẹ ha ga iJehova. Ọkhẹke nin mhan yẹ ha lu iriọ ẹlẹnan. w19.08 3 ¶5
Sunday, October 10
Imẹn je bha dagbare bii ohuan ne ribhi ẹwẹ obidọn.—Matt. 10:16.
Agbaẹbho eso nan da mun idobolo fiọbhi iwẹnna oga nọnsẹmhan, ọle ibhio mhan eso da nyẹnlẹn. Ranmhude ọnan, ibhio mhan ne ribhi enin imhọn isẹhoa rẹ ha tẹmhọn Osẹnobulua na bhi uwa rẹ sẹbhi uwa. Bhiriọ, ele guanọ uwedẹ kẹkẹ nin ele rẹ tẹmhọn Osẹnobulua man ọria. (Matt. 10:17-20) Bhi agbaẹbho ọkpa nan da mun idobolo ọbhi iwẹnna oga nọnsẹmhan, ọfẹotughe ọkpa nọn ribhi enin da tale ghe, nin ibhio mhan ne ribhi enin ha tẹmhọn Osẹnobulua man ene ele ko ribhi azagba-uwa, idiake nọnsele, ibo ele bhi isiku, ibo ele bhi isi iwẹnna, bi imọẹ ele. Bhi ẹkẹ ikpe eva, agbotu ne ribhi ọne agbaẹbho da wo bun ọbhọ. Asabọmiẹn a bha mun idobolo ọbhi iwẹnna oga bhi agbaẹbho nọnsẹ. Ọkpakinọn, mhan dẹ sabọ miẹn emhin kpataki luẹ bhi ijiẹmhin ọsi ibhio mhan ne imhọn isẹhoa rẹ dagbare bhi itẹmhọn Osẹnobulua. Ọkhẹke nin mhan ha guanọ uwedẹ kẹkẹ nin mhan ha rẹ manman ha tẹmhọn Osẹnobulua man ẹbho. Mhan mhọn urẹọbhọ ghe, Jehova dẹ re ahu nin mhan rẹ sẹyẹ ha tẹmhọn ọlẹn man ẹbho, aharẹmiẹn ọ bha lẹkhẹ. (Phil. 2:13) Bhi ọne ẹghe ọkike nan nian, ọkhẹke nin mhan ha lẹn ene emhin ne kiẹn okpemhin nẹ, nin mhan hẹi ji itọn na mhan bhi egbe, nin mhan hẹi kiẹn idobolo rẹji ibhio mhan, bi nin mhan ha mọn ikpẹ ne khiale. Bhiriọ, oyẹẹ nin mhan mhọn ki ha tuẹn okhun. Ọnan ki yẹ re ogẹn ji Aba mhan nin Jehova nọn hoẹmhọn mhan. w19.08 13 ¶17-18
Monday, October 11
Mẹn sẹ daghe igbọn ne hẹn akasi, bi ibhi ojie ne re oẹ khian bọsi igbọn.—Eccl. 10:7.
Ọ iyẹẹ mhan rẹ sikẹ ẹbho nan miẹn ghe ọta nọnsele ọkpa ele guanọ nọn munsẹ. Ọ manman ti mhan bhọ rẹ ha deba ibhio mhan muobọ sade ele mhọn ‘aria-ji-egbe, ahoẹmhọn-egbe, ẹkẹ-ẹjẹjẹ, bi idegbere.’ (1 Pet. 3:8) Ahamiẹn eria ne dia inian ọ yẹẹ mhan rẹ ha sikẹ, ele ki yẹ ha sikẹ mhan sade mhan mhọn idegbere. Idegbere yẹ re iẹnlẹn lẹkhẹ nin mhan. Bhi ọsi ẹmhọanta, asabọmiẹn mhan dẹ ha daghe emhin kẹkẹ bhi iẹnlẹn ne bha dia. Eria ne manman guẹ emhin imiẹn ogẹn nọn khẹke ele ẹghe rebhe. Ọkpakinọn, ẹgheso, ẹbho ne bha manman guẹ emhin ki ha miẹn ogẹn. Solomon da yẹ rẹman ghe ọkhẹke nin mhan ha nyẹnlẹn iẹnlẹn beji mhan rẹ ke ọle re, ghe nin mhan hẹi wo ha khọ ẹkẹ ranmhude ebi iẹnlẹn dia yẹ. (Eccl. 6:9) Ahamiẹn mhan mhọn idegbere, ọ ki lẹkhẹ nin mhan rẹ ha nyẹnlẹn iẹnlẹn beji mhan rẹ ke ọle re, ọ iyi beji mhan riale ọkhẹke nọn dia. w19.09 4-5 ¶9-10
Tuesday, October 12
Ibha nin aba, . . . bha ha re adia bi ibhude nọnsi Jehova rẹ ha bẹẹ [imọn nesẹbha] wanre.—Eph. 6:4.
Ahamiẹn ẹbho ne ribhi ihe, bii aba, degbere nin Jehova, ẹbho ebhebhe ki yẹ miẹn elele bhọ. Aba, ọle iJehova re mundia nọn ha gbẹloghe azagba-uwa. Jehova guanọ nin ọle ha man imọn nesọle emhin, gbega ele, yẹ ha dia ele. (1 Cor. 11:3) Ọkpakinọn, ọnan bha rẹman ghe aba dẹ ha noo ihe nọnsọle beji ọ ghọn ọlẹn. Jehova hi ọnọn mun azagba-uwa gbọ. Bhiriọ, ọle dẹ nọọn ene aba nin ele tare ebi ele rẹ re azagba-uwa nọnsele khian yẹ. (Eph. 3:14, 15) Aba dẹ rẹman ghe ele degbere nin Jehova, sade ele noo ihe nọnsele rẹ lu emhin nọn ti Jehova bhọ. Hẹi ha noo ihe nin Jehova re nin uwẹ bhi uwedẹ nọn bha gba. Ahamiẹn uwẹ fiobọdọn, hẹi ha sin, miẹn adia nin ẹbho re nin uwẹ ọbhi egbe. Uwẹ ha lu iriọ, azagba-uwa nọnsẹ ki wo ha mun ekpẹn nin uwẹ ranmhude idegbere nọnsẹ. Ahamiẹn uwẹ deba azagba-uwa nọnsẹ nan erọnmhọn, taan ọkhọle a man iJehova bhi ọne erọnmhọn. Bhiriọ, ele ki sabọ daghe ọle ghe, Jehova uwẹ mun udu tẹ. Ọnọn ke okhun nẹ hi, ha mun oga nọnsi Jehova kalo gbera emhin rebhe nekẹle bhi iẹnlẹn nọnsẹ. (Deut. 6:6-9) Ijiẹmhin esili nọnsẹ hi emhin nọn ke okhun nẹ nin uwẹ ha sabọ re nin azagba-uwa nọnsẹ. w19.09 15 ¶8; 17 ¶14; 18 ¶16
Wednesday, October 13
Bha gbe obokhian [nin Mark] sade ọle vae.—Col. 4:10.
Mark wo ha re eghọnghọn zegbere rẹ rẹkpa ẹbho. Bhi ọsi ijiẹmhin, ẹghe ribhọ nin ọle rẹ ha rẹkhan iPaul bi Peter beji ele rẹ ha lu iwẹnna oga. Ọle da ha rẹkpa ele dẹ ebale, guanọ eji ele ha dia, yẹ rẹkpa ele lu emhin kẹkẹ. (Acts 13:2-5; 1 Pet. 5:13) Paul da tie iMark ọnọn deba ọle lu ilọnmhọn oga, nọn yẹ re izebhudu nanlẹn. (Col. 4:11, ftn.) Mark da dọ kiẹn ọkpa bhi imọẹ ọsaje nin Paul ha mhọnlẹn. Bhi ọsi ijiẹmhin, ẹghe ọkike nan rẹ mun iPaul khue bhi ighan bhi Rome bhi egbe ukpe 65 C.E., ọle da gbẹn ilẹta nọnzi eva ji Timothy. Bhi ọne ilẹta, Paul da taman iTimothy nin ọle bi Mark ko bu ọle re bhi Rome. (2 Tim. 4:11) Paul wo ha guanọ nin Mark vae dọ rekpa ọle bhi ọne ẹghe ọkakale nan, ranmhude, ẹsọn nin Mark ka miẹn nanlẹn wo ti ọle bhọ. Mark wo ha rẹkpa iPaul bhi uwedẹ ne bunbun. Asabọmiẹn iMark rẹkpa ọle ha dẹ ebale bi emhin nin ọle ha rẹ ha gbẹn ebe. Urẹkpa bi ikoudure nin Paul miẹn zẹle nin ọle da sabọ ziẹngbe ọkakale nin ọle miẹn bhi egbe rẹ sẹbhi ẹghe nan rẹ gbe ọle a. w20.01 11 ¶12-13
Thursday, October 14
Bha bu mẹn re.—Matt. 11:28.
Imhan tobọmhan zẹ ghe mhan dẹ re ẹdagbọn nọnsẹmhan ha lu iwẹnna nin Jehova bi Jesu mun nin mhan. Jesu ji mhan lẹn ghe mhan dẹ miẹn ekpokpo beji mhan ha rẹ ha lu ọne iwẹnna. Ọkpakinọn, mhan mhọnlẹn bhi ọkhọle ghe, Jehova dẹ re ọne ahu nin mhan rẹ ziẹngbe ọnọghọ nọn hi ki rẹ khin. Beji mhan ha rẹ ha ziẹngbe ọnọghọ, iriọ ahu nọnsẹmhan ha rẹ ha do ọbhọ. (Jas. 1:2-4) Ọkhẹke nin mhan yẹ ha mhọnlẹn bhi ọkhọle ghe Jehova dẹ re emhin nin mhan guanọ nin mhan, Jesu dẹ ha gbẹloghe mhan, ibhio mhan nin mhan ko ga dẹ ha re izẹbhudu nin mhan. (Matt. 6:31-33; John 10:14; 1 Thess. 5:11) Edandan iribhọ ghe, ọne okhuo nọn ha khọnmhọn emianmhẹn ọbe wo miẹn ọfure ọne ukpẹdẹ nin Jesu re egbe daan ọlẹn. (Luke 8:43-48) Ọkpakinọn, ahamiẹn ọle zegbere ha re ọkhọle esili wẹnna rẹkhan iJesu, ọne ọfure nin ọle miẹn ọne ukpẹdẹ nin ki ha yi ọsi ighegheghe. Uwẹ be riale ghe ọle gene rẹkhan iJesu? Ahamiẹn ọle zegbere dọ kiẹn odibo nọnsi Jesu, elele nọn khua ki sẹ ọle obọ! Ọle dẹ dọ deba iJesu ha gbẹloghe bhi okhun. Elele nin ọle ha miẹn dẹ manman kpọnọ gbera emhin nọn hi ki rẹ khin nin ọle fi ikeke gbe nin ọle da sabọ ha rẹkhan iJesu. Aharẹmiẹn okhun mhan ha da nyẹnlẹn bhi ighegheghe la ọne otọ nan nọn, ọ ti mhan bhọ ghe Jesu tie mhan nin mhan bu ọle re! w19.09 25 ¶21-22
Friday, October 15
Ẹwanlẹn a re bọn uwa mundia, Ilẹn-otọ-emhin a rẹ gbega ọle.—Prov. 24:3.
David bi ene ha rẹkhan ọlẹn da ha guanọ urẹkpa ẹghe nin ele rẹ ha nẹ bhi obọ iSaul. David da je ẹbho nin ele dọ taman iNabal nin ọle guanọ ebale ne ele. Ofẹn bha mun ele rẹ dọ bhii ọle, ranmhude ele hi ene ha gbega ihuan nesọle bhi ẹkẹ ẹgbo. Ọkpakinọn, ranmhude isiakhan nọnsọle, Nabal bha ka re emhin soso nin ele. Ẹkẹ da wo manman ha khọ iDavid. Bhiriọ ọle da ha guanọ nin ọle gbe iNabal bi ikpea ne re ọle bhi azagba-uwa a. (1 Sam. 25:3-13, 22) Ọkpakinọn, Abigail nin okhuo iNabal da ha yi okhuo nọn wanlan, nọn yẹ manman mhọn-ose. Ọle da re izebhudu nẹ bu iDavid, yẹ diguẹ ha bhii ọle ghe nin ọle hẹi gbe ọdọ ọle bi ikpea ne re ọle bhi azagba-uwa a. Ọle da re ẹwanlẹn taman ọlẹn ghe nin ọle zẹ ọne ẹmhọn obọ nin Jehova. Ọta nọnsi Abigail bi uwedẹ nin ọle rẹ lu emhin da wo rẹso iDavid bhi ọkhọle. David da dọ lẹn sẹbhọ ghe, Jehova je ọle re. (1 Sam. 25:23-28, 32-34) Ikpẹ esili nin Abigail ha mhọnlẹn zẹle nin Jehova da sabọ noo ọle. Iriọ yẹ nọn ẹlẹnan. Ibhio mhan nin ikhuo ne re ẹwanlẹn lu emhin, Jehova dẹ sabọ noo ele rẹ ziẹn azagba-uwa nọnsele bi ibhio mhan bhi ẹkẹ agbotu.—Titus 2:3-5. w19.10 23 ¶10
Saturday, October 16
Ẹbho nesẹmhẹn, bha sibhi ẹwẹ ọle re, ahamiẹn ibha iguanọ nin bha gha bhi olukhọ nọnsọle bi ọkhọbhegbe nọn bu ọle vade.—Rev. 18:4.
Ọkhẹke nin Kristiẹn rebhe ne abọ sibhi oga ohoghe rebhe re sẹsẹsẹ. Asabọmiẹn ọria nin mhan man ọle iBaibo ka ha yo otuẹ ohoghe ọkuẹsẹ ọle munhẹn ha luẹ ẹmhọanta nọn ribhi Baibo. Sẹyẹ, asabọmiẹn ọle wo ha mhọn obọ bhi emhanmhan rebhe ọsi ọne otuẹ, la ọle wo ha re igho rẹ re iyobọ nin ọne otuẹ. Ọkuẹsẹ a re obọ ọbhọ nin ọria nọn sẹ iriọ ha deba mhan bhi itẹmhọn Osẹnobulua, ọkhẹke nin ọle zobọ bhi ilọnmhọn otuẹ ohoghe rebhe nin ọle rẹ ha lu. Ọle ki gbẹn ilẹta ji ọne otuẹ ghe, ọle iyẹ yi ọkpa bhi ẹwẹ ele. Ọ yẹ khẹke nin ọle zobọ bhi otu kẹkẹ nin ọle rẹ deba ne diẹn mun oga ohoghe. Ọ bha khẹke nin Ọsali Jehova re obọ ọbhi iwẹnna nọn diẹn mun oga ohoghe. (2 Cor. 6:14-17) Bezẹle nin mhan da re inian situa bhi ọne ẹmhọn nan? Ranmhude mhan bha guanọ nin mhan ha mhọn obọ bhi ilọnmhọn bi olukhọ ọsi otuẹ ohoghe soso.—Isa. 52:11. w19.10 12 ¶16-17
Sunday, October 17
Jehova mhọn itohan bi ẹkẹ-ẹjẹjẹ . . . Ọle ida wo ha guanọ eji ọria bha da lu nọnsẹn, la re ẹmhọn gbanọ bhi ẹkẹ rẹ ha khian ighegheghe.—Ps. 103:8, 9.
Asabọmiẹn Jeremiah gbẹn ebe 1 Kings bi 2 Kings, bi ebe ọsi Jeremiah bhi Baibo. Edandan iribhọ ghe, ọne ẹsọn nan wo rẹkpa ọle daghe itohan nin Jehova mhọn da mhan nin eria. Bhi ọsi ijiẹmhin, ọle lẹn sẹbhọ ghe, ẹghe nin Ahab nin Ojie rẹ fidenọ, Jehova bha yẹ ji ọrebhe bhi azagba-uwa nọnsọle fuẹn an bhi ẹdagbọn iẹnlẹn nọnsọle. (1 Ki. 21:27-29) Sẹyẹ, ọle lẹn sẹbhọ ghe Manasseh wo lu emhin ọbe nọn khọ gbera ọsi Ahab. Ọrẹyiriọ, Jehova da rẹhunmhan iManasseh ẹghe nin ọle rẹ fidenọ. (2 Ki. 21:16, 17; 2 Chron. 33:10-13) Enan rebhe da wo rẹkpa iJeremiah ha re egbe khọkhọ iJehova. Bhiriọ, ọle da yẹ ha re itohan ne ẹbho lu emhin. Bha ji mhan tẹmhọn ebi Jeremiah rẹ ne iBaruch lu emhin yẹ ẹghe nin Baruch rẹ dua oẹ bhi oga khere. Jeremiah bha ha riale ghe ọmọẹ ọle ida sabọ fidenọ. Sokpan, ọle da dọ taman iBaruch uhọnmhunje nin Jehova je ọle nin ọle dọ taman ọlẹn.—Jer. 45:1-5. w19.11 6 ¶14-15
Monday, October 18
Osẹnobulua ilu emhin nọn bha gba. Ọle ida yele iwẹnna nọnsẹbha a bi oyẹẹ nin bha mhọn da elin nọnsọle.—Heb. 6:10.
Bhi ebe nọnsi Leviticus, mhan da luẹ ghe obhokhan Izrẹl sabọ rẹ lu izọese ọsi ọfure rẹ re ekhuẹnmhẹn nin ọle mhọn da Osẹnobulua man. (Lev. 7:11-13, 16-18) Ọ iyi oko ghe ọle dẹ lu ọne izọese nan, sokpan, ọkhọle nọnsọle ọle ha rẹ tobọle zẹ nin ọle lu ọle. Inian oga nin mhan ga iJehova diabe ọne izọese nan, ranmhude, oga nin mhan ga iJehova, ọle mhan rẹ rẹman ọlẹn ghe mhan mhọn ekhuẹnmhẹn da ọle. Ranmhude ọkhọle rebhe mhan rẹ hoẹmhọn iJehova, ebe mhẹn nẹ nesẹmhan mhan rẹ ga ọle. Ebe ti Jehova bhọ nọn sade ọle daghe ene ga ọle rebhe ga ọle ranmhude oyẹẹ nin ele mhọn da ọle bi uwedẹ nesọle. Ikoudure nọn rẹji mhan ghe, ọ iyi ebi mhan lu ọkpa Jehova daghe, ọle yẹ daghe ebezẹle nin mhan da lu ọle. Bhi ọsi ijiẹmhin, ahamiẹn ranmhude idọmanlẹn, uwẹ isabọ lu eka nin uwẹ ho nin uwẹ lu nin Jehova, lẹn sẹbhọ ghe Jehova daghe idia nin uwẹ ye. Uwẹ sabọ ha riale ghe uwẹ iyẹ mhọn eka nin uwẹ sabọ lu, sokpan, lẹn sẹbhọ ghe Jehova daghe oyẹẹ nọn zẹle uwẹ lu eka nin uwẹ ha sabọ lu nanlẹn. w19.11 22 ¶9; 23 ¶11-12
Tuesday, October 19
Bha vae bhi eje fi ahiẹlẹ a nin bha da koahua khere.—Mark 6:31.
Ọ bha khẹke nin mhan ha re ẹghe rebhe nọnsẹmhan rẹ wẹnna. Solomon nin Ojie tale ghe, emhin rebhe nan lu mhọn ẹghe ọle. Ghe, a mhọn ẹghe nan rẹ re emhin kọ, ẹghe nan rẹ bọn uwa, ẹghe nan rẹ viẹ, ẹghe nan rẹ jẹ ojiẹ, ẹghe nan rẹ gbikhiẹn, bi ẹghe nan rẹ lu emhin nekẹle. (Eccl. 3:1-8) Bhi ọsi ẹmhọanta, emhin kpataki iwẹnna bi ikoahua khin bhi iẹnlẹn nọnsẹmhan. Jesu wo ha re ẹlo nọn khẹke rẹ ghe iwẹnna bi ikoahua. Ẹghe ọkpa, etuegbe nesọle da tẹmhọn Osẹnobulua sẹbhọ ghe, ele bhọ bha miẹn ẹghe rẹ le ebale. Ele ki yo vae, Jesu da taman ele ghe, nin ele vae bhi eje fi ahiẹlẹ a nin ele da koahua khere. (Mark 6:30-34) Arẹmiẹn ẹgheso, Jesu bi edibo nesọle iwo sabọ koahua beji ele mhanmhanlẹn, Jesu lẹnmhin ghe ọkhẹke nin ele ha koahua. Ẹgheso, ọ wo gene khẹke nin mhan ha koahua, la nin mhan ha fi emhanmhan ukpẹdẹ nọnsẹmhan denọ. Ọnan mhan ha miẹn luẹ bhi emhanmhan ọsi Sabbath nin Jehova taman ibhokhan Izrẹl nin ele ha lu uzana-uzana. Arẹmiẹn ọ iyi Uhi nin Jehova nabhi obọ iMoses gbe nin ibhokhan Izrẹl mhan rẹkhan, mhan dẹ miẹn emhin luẹ bhi ebi ọ tale rẹji Sabbath. w19.12 3 ¶6-7
Wednesday, October 20
Bha hẹi ha kpokpo egbe.—Matt. 6:31.
Jehova ve ive ghe, ọle dẹ gbẹloghe ene ga ọle. Ọle ida fi ikeke gbe ọne ive nan. (Ps. 31:1-3) Jehova yẹ lẹn ghe, ọ dẹ manman ba mhan bhi egbe sade ọle bha gbẹloghe mhan ne ribhi azagba-uwa nọnsọle. Ọle ve ive ghe ọle dẹ gbẹloghe mhan bhi uwedẹ oriọn. Ọle da yẹ yọle ghe ọle dẹ ne ebi mhan ha rẹ ha gbẹloghe egbe nin mhan. Emhin soso iribhọ nọn ha re iJehova miẹn ghe ọle bha mun ene ive nan sẹ! (Matt. 6:30-33; 24:45) Mhan ha lẹn ebezẹle nin Jehova da mun ive nesọle sẹ, mhan ki ha mhọn ọne urẹọbhọ ghe ọle dẹ rẹkpa mhan sade mhan bha miẹn igho rẹ gbẹloghe egbe. Bha ji mhan zilo nyan ijiẹmhin ọsi Kristiẹn bhi ore nin ọhẹnhẹn. Ẹghe nin eghian ele rẹ ha kpokpo ene ribhi agbotu nọn ribhi Jerusalem, ọrebhe bhi ọne agbotu “da vẹ kua diọ bhi ije kẹkẹ bhi otọ iJudea bi Samaria. Ene etuegbe ọkpa kẹre.” (Acts 8:1) Ele da nẹ zẹ uwa bi ẹki nesele obọ! Ranmhude ọnan, ele bha yẹ ha miẹn ebi ele ha rẹ gbẹloghe egbe. Ọnan da wo si ọnọghọ nọn khua ji ele. Bhi ẹkẹ ene oya nan, Jehova bha fi ele ehọ a. Ele da sẹyẹ ha re eghọnghọn ga ọle. (Acts 8:4; Heb. 13:5, 6; Jas. 1:2, 3) Jehova wo rẹkpa ene iKristiẹn bhi ore nin ọhẹnhẹn. Ọle dẹ yẹ rẹkpa mhan ẹlẹnan.—Ps. 37:18, 19. w20.01 17-18 ¶14-15
Thursday, October 21
Jehova . . . daghe ene degbere.—Ps. 138:6.
Ẹghe nin David rẹ ha gbẹloghe ihuan nesi aba ọle, ọle da hinmhin ele bhi obọ oduman bi elanmhẹn natiọle ibear. David lẹn sẹbhọ ghe Jehova hi ọnọn rẹkpa ọle lu ọnan. Ọle yẹ lẹn ghe, Jehova hi ọnọn rẹkpa ọle gbe iGoliath fiọbhi otọ, ghe ọ iyi ahu nọnsọle ọle rẹ lu ọle. (1 Sam. 17:37) Sẹyẹ, ọle lẹnmhin ghe iJehova miẹn ọlẹn fan bhi obọ iSaul nin Ojie. (Ebi a gbẹn ọbhi okhun Psalms 18) Sade ọria nọn hianbhegbe ene emhin nan sunu je, ọle ki ha gẹn egbe ọle. Ọkpakinọn, ranmhude ọria nọn mhọn idegbere iDavid khin, ọle da daghe ghe iJehova hi ọnọn rẹkpa ọle bhi iẹnlẹn. Be imhan miẹn luẹ bhi ọnan? Mhan ha bhii Jehova nin ọle rẹkpa mhan, ọkhẹke nin mhan ha gbẹlokotọ nin mhan daghe uwedẹ nin ọle ha rẹ rẹkpa mhan bi ẹghe nin ọle ha rẹ lu ọle. Mhan a ha mhọn idegbere, mhan ki lẹn ghe, mhan imhọn ọne ahu rẹ ha lu emhin rebhe, ghe iJehova hi ọnọn ha rẹkpa mhan lu emhin nin mhan ida sabọ tobọmhan lu. Mhan a ha daghe urẹkpa nọnsi Jehova bhi iẹnlẹn nọnsẹmhan, ikolu nin mhan bi ọle ko mhọnlẹn ki ha ziẹn ọbhọ. w19.12 20 ¶18-19
Friday, October 22
Ene iJehova hoẹmhọnlẹn, ele ọle re adia nan, beji aba yẹ lu rẹji ọmọn nin ẹmhọn ọlẹn ti ọle bhọ.—Prov. 3:12.
Emhin ebhebhe yẹ ribhọ ne re imhan rẹọbhọ ghe, mhan manman ghan bhi ẹlo nọnsi Jehova. Ọle si mhan kẹ egbe yẹ gbẹlokotọ bhi uwedẹ nin mhan rẹ re obọ rẹkhan uhọnmhunje ọsi Agbejele. (John 6:44) Beji mhan rẹ ha sikẹ iJehova, iriọ ọle yẹ rẹ ha sikẹ mhan. (Jas. 4:8) Jehova yẹ re ẹghe bi ahu nọnsọle rẹ man mhan emhin, nin ọle rẹ rẹman mhan ghe, man ghanmhin bhi ẹlo nọnsọle. Ọle lẹn unan ọria nin mhan khin nian bi ọria nin mhan ha sabọ kiẹn bhi ẹghe odalo. Ọle re adia nin mhan ranmhude ọle hoẹmhọn mhan. Enan rebhe wo re imhan rẹọbhọ ghe, mhan wo gene ghan bhi ẹlo nọnsi Jehova! Arẹmiẹn ẹbho eso riale ghe ọria oya iDavid nin Ojie khin, ọle lẹnmhin ghe Jehova hoẹmhọn ọlẹn, ghe ọ dẹ rẹkpa ọle. Ọnan zẹle nin David da sabọ ziẹngbe ọnọghọ nin ọle miẹn bhi egbe. (2 Sam. 16:5-7) Ahamiẹn mhan kuẹlo da ọnọghọ, Jehova dẹ rẹkpa mhan rẹ khọn ele miotọ. (Ps. 18:27-29) Ahamiẹn iJehova re imhan bhi ikeke, emhin soso iribhọ nọn ha sabọ gbe eghọnghọn nin mhan rẹ ga ọle sotọ.—Rom. 8:31. w20.01 15 ¶7-8
Saturday, October 23
Bha ha man ele emhin nin ele re obọ rẹkhan ene emhin rebhe nin mẹn rẹ gbuhi nin bha.—Matt. 28:20.
Ha nan erọnmhọn rẹ munhẹn sade uwẹ man ẹbho iBaibo. Emhin nọn mhẹn nọn sade mhan bha ria ẹghe a gbe ọkuẹsẹ mhan munhẹn ha nan erọnmhọn rẹ tuje iman-emhin Baibo a yẹ rẹ kpẹn ọlẹn. Ọkhẹke nin mhan rẹkpa ọne ọria lẹn ghe, ẹlinmhin nọn khiale ọkpa ha sabọ rẹkpa mhan lẹn otọ iBaibo nọnsẹn. Ibhio mhan eso ki ka tie James 1:5, ọkuẹsẹ ele munhẹn ha deba ẹbho nin ele man ele iBaibo nan erọnmhọn. Ọne Baibo nin yọle: “Ahamiẹn ọria soso bhi ẹwẹ bha guanọ nin ọle ha wanlan, ji ọle ha bhii Osẹnobulua.” Ene ibhio mhan ki nọọn ele yọle, “Be uwẹ ha rẹ sabọ bhii Osẹnobulua yẹ nin ọle re ẹwanlẹn nin uwẹ?” Ọnan sabọ re ọne ọria gene ha guanọ nin ibha ko ha nan erọnmhọn. Man ene uwẹ man ele iBaibo ebi a rẹ nan erọnmhọn yẹ. Ji ele lẹn ghe ọ ti Jehova bhọ sade ele nan erọnmhọn ji ọle. Taman ele ghe, ele dẹ sabọ taan ọkhọle a man iJehova bhi erọnmhọn. Yẹ taman ele ghe, ele dẹ sabọ taman ọlẹn emhin nin ele bhọ ida sabọ taman ọria soso. Bhi ọsi ẹmhọanta, Jehova bhọ lẹn ebe re imhan bhi ọkhọle.—Ps. 139:2-4. w20.01 2 ¶3; 5 ¶11-12
Sunday, October 24
Ọ iyi ebi ọria guanọ la ẹsọn nin ọle miẹn ha zẹ, sọkpan obọ Osẹnobulua nọn mhọn itohan ọ ye.—Rom. 9:16.
Jehova tobọle ha tare ẹghe nin ọle ha rẹ re ẹlinmhin nọn khiale rẹ zẹ ẹbho ne ha deba iJesu gbẹloghe. (Rom. 8:28-30) Ẹghe nin Jesu rẹ riọ kpanọ fo, ọle iJehova rẹ munhẹn ha zẹ ẹbho ne ha deba iJesu gbẹloghe. Asabọmiẹn ghe, Kristiẹn rebhe bhi ore nin ọhẹnhẹn, ọle iJehova zẹle. Ikpe ne bunbun ki gbera, ẹbho eso ne yọle ghe iKristiẹn ele khin, bha ha ga bhi uwedẹ ẹmhọanta. Ọrẹyiriọ, ikpeta ẹbho ne yi Kristiẹn ọsaje sẹyẹ ha ribhọ ẹghenin, nin Jehova re ẹlinmhin nọn khiale rẹ zẹ. Ene iKristiẹn ọsaje nan da diabe iwheat nin Jesu yọle ghe dẹ jẹre bhi ẹwẹ ilunmhun. (Matt. 13:24-30) Rẹ sẹbhi ẹghe ọkike nin mhan ye nan, Jehova yẹ wo zẹ ẹbho ne ha deba usun ọsi 144,000. Bhiriọ, ahamiẹn ghe Osẹnobulua guanọ nin ọle zẹ ẹbho eso sade ọ kẹ khere nin ọne agbọn rẹ kpẹn, ọ bha khẹke nin mhan ha zaka-zunyọn. (Rom. 9:11) Ọkhẹke nin mhan mhọn ẹwanlẹn nin mhan hẹi diabe ene ikpea ne wẹnna, nin Jesu tẹmhọnlẹn bhi ijiẹmhin nin ọle rẹman. Ene ikpea da ha zaka-zunyọn ranmhude uwedẹ nin ebeanlẹn ele rẹ ne ẹbho ne kike vae lu emhin.—Matt. 20:8-15. w20.01 30 ¶14
Monday, October 25
Eguọmhandia nesẹmhẹn dẹ re eghọnghọn so dagbare.—Isa. 65:14.
Jehova guanọ nin azagba-uwa nọnsọle ha ghọnghọn. Mhan mhọn emhin ne bunbun ne ha rẹ mhan ha ghọnghọn ẹlẹnan nian aharẹmiẹn mhan ribhi ọnọghọ. Bhi ọsi ijiẹmhin, ọ ko mhan udu re rẹ lẹn ghe Aba mhan nọn ribhi okhun manman hoẹmhọn mhan. Sẹyẹ, mhan dọ manman lẹn otọ iBaibo. (Jer. 15:16) Sẹyẹ, mhan dọ ha yi ọkpa bhi agbotu ọsi ene ga iJehova, bhi eji ọrebhe da kugbe bii azagba-uwa ọkpa, bhi eji ọrebhe da hoẹmhọn uhi nesọle, bi bhi eji ọrebhe da hoẹmhọn ọdeọde. (Ps. 106:4, 5) Mhan dẹ wo miẹn eghọnghọn ẹghe rebhe ranmhude mhan lẹnmhin ghe, emhin dẹ dia nọnsẹn bhi ẹghe odalo, ghe Jehova dẹ kẹ dọ re Agbejele nọnsọle rẹ ne emhin ebe rebhe sibhi ọne otọ nan re. Ẹghenin, ọne otọ nan ki kiẹn Otọ Ọfubhegbe. Mhan yẹ mhọn ikhuaẹloghe ghe, a dẹ riọ ene yu kpanọ bhi uu nin ele dọ deba mhan ha nyẹnlẹn. (John 5:28, 29) Ẹghe eghọnghọn ọnan da wo ha khin! Ẹghe nọn bha yẹ ree gbe nian, ọrebhe bhi okhun bi ọrebhe bhi ọne otọ nan ki ha re ogẹn ji Aba mhan nin Jehova. w20.02 13 ¶15-16
Tuesday, October 26
Uwẹ tobuwẹ imẹn rahiẹ.—Ps. 51:4.
Ahamiẹn uwẹ lu emhin ebe nọn manman kaka, hẹi gbegue ọle. Ọkhẹke nin uwẹ ka man iJehova bhi erọnmhọn. Bhiriọ, egbe ki fẹkẹ ha fu uwẹ re. Sokpan, ọ iyi erọnmhọn ọkpa uwẹ ha nan sade uwẹ ho nin uwẹ hẹnhẹn ikolu nin uwẹ bi Jehova ko mhọnlẹn. Ọkhẹke nin uwẹ miẹn adia ọbhi egbe. Ẹghe nin Jehova rẹ je iNathan nin akhasẹ bu iDavid, David bha ha sin, ọle bha ha riale ghe olukhọ nin ọle lu bha sẹ emhin soso. Ọle da re ẹjẹje miẹnkue ghe ọ iyi ọdọ iBath-sheba ọkpa ọle rahiẹ, ghe ọle yẹ rahiẹ Osẹnobulua. Ọle da miẹn adia nin Jehova re nanlẹn ọbhi egbe, bhiriọ, Jehova da rẹhunmhan ọlẹn. (2 Sam. 12:10-14) Ahamiẹn mhan lu olukhọ nọn kaka, ọkhẹke nin mhan bu ẹbho nin Jehova rẹ gbẹloghe agbotu dọ taman ele ebi mhan lu. (Jas. 5:14, 15) Ọkhẹke nin mhan hẹi ha sin ẹmhọn. Ahamiẹn mhan re ẹjẹje miẹn adia ọbhi egbe, mhan ki kẹ miẹn eghọnghọn bi ọfure bhi egbe. w20.02 24-25 ¶17-18
Wednesday, October 27
Ikpea igbe ne na bhi agbaẹbho bi urolo kẹkẹ vae ki fiobọ mun . . . ukpọn ọsi obhi Jew yẹ taman ọlẹn yọle: “Mhan ho nin mhan rẹkhan bha, ranmhude mhan họn ghe Osẹnobulua ribhi ẹwẹ bha.”—Zech. 8:23.
Ene “ikpea igbe” mundia nin ene mhọn ikhuaẹloghe rẹ nyẹnlẹn bhi ọne otọ nan. Ele lẹn sẹbhọ ghe Jehova nan erọnmhọn nin enanzẹle, nin ọne “obhi Jew” mundia nan. Bhiriọ, ele da ghe ọle bii ekpẹn nin ele rẹ deba ele ha ga iJehova. Arẹmiẹn mhan ida sabọ lẹn elin ọsi enanzẹle rebhe ne nyẹnlẹn ẹlẹnan, ene mhọn ikhuaẹloghe rẹ nyẹnlẹn bhi ọne otọ nan dẹ sabọ rẹkhan ele. Be ele ha rẹ sabọ lu ọnan yẹ? Ebe ukpẹdẹ ọsi ẹlẹnan rẹkpa mhan wanniẹn ọne inọnta nan. Arẹmiẹn obhi iJew ọne Baibo nan sounun ọlẹn, ọ iyi otuọnkpa ọne “obhi Jew” mundia nan. Be imhan rẹ lẹn yẹ? Ranmhude bhi ọne ulọnlẹn nin, Baibo ki ha tẹmhọn ọne obhi Jew, ọ da yọle, “ibha” ọ da yẹ yọle, “ẹwẹ bha.” Ọnan rẹman ghe, usun ọsi enanzẹle rebhe, ọle ọne “obhi Jew” mundia nan. Ene iJehova bha re ẹlinmhin nọn khiale zẹ bi enanzẹle kugbe ga iJehova. Ọkpakinọn, ele ighe enanzẹle bii ebeanlẹn ele, ranmhude, ele lẹn sẹbhọ ghe Jesu hi Ebeanlẹn nọnsele.—Matt. 23:10. w20.01 26 ¶1-2
Thursday, October 28
Ọnan ẹbho rebhe ha rẹ lẹn ghe edibo nesẹmhẹn bha khin, sade bha mhọn ahoẹmhọn-egbe da egbe.—John 13:35.
Jesu tale ghe, ahamiẹn edibo nesọle re oyẹẹ man egbe beji ọle rẹ re oyẹẹ man ele, ọle ẹbho ha da sabọ lẹn ghe edibo nesọle ele khin. Inian ọ wo gene ha ye rẹ nabhi ore nin ọhẹnhẹn rẹ dọ sẹbhi ẹlẹnan. Ọnan zẹle nọn da khẹke nin mhan ha re oyẹẹ man egbe rẹ sẹbhi ẹghe nọn bha rẹ lẹkhẹ nan rẹ lu iriọ. Nọọn egbe ẹ ọne inọnta nan: ‘Be imẹn ha sabọ miẹn luẹ bhi obọ ibhio mhan ne sabọ wo ha re oyẹẹ man arẹmiẹn ọ bha lẹkhẹ nin ele?’ Ranmhude ọ bha gba nin mhan, ọ nọghọ mhan rẹ ha re oyẹẹ nọn dinmhin man egbe. Ọrẹyiriọ, ọ yẹ khẹke nin mhan ha re egbe khọkhọ iJesu. Jesu taman mhan ebezẹle nọn da khẹke nin mhan ha deba ibhio mhan tẹmhọn ọbhi ekpẹn, aharẹmiẹn ele hi ene khọẹkẹ mhan. (Matt. 5:23, 24) Ọle da yọle ghe, ahamiẹn mhan guanọ nin mhan ha lu ebe yẹẹ Osẹnobulua, ọkhẹke nin mhan ha deba ibhio mhan nyẹnlẹn bhi ọfure. Ọ re iJehova ghọnghọn sade mhan lu eka nin mhan ha sabọ lu rẹ ha deba ibhio mhan ha ribhi ọfure. Jehova ida miẹn oga nọnsẹmhan ọbhi egbe sade mhan re ẹmhọn gbanọ bhi ẹkẹ, la sade mhan bha ka dọ bu ibhio mhan nin mhan ko ta ọne ẹmhọn ọbhi ekpẹn.—1 John 4:20. w20.03 24 ¶1-4
Friday, October 29
Mhan . . . lẹn ọta akhasẹ ọsi ẹmhọanta bi ọta akhasẹ ọsi ohoghe.—1 John 4:6.
Esu, ọle hi aba ohoghe nin Baibo tẹmhọnlẹn. Ẹghe nin Adam bi Eve rẹ ha nyẹnlẹn, ọle Esu rẹ munhẹn ha hiẹ ẹbho. (John 8:44) Eso bhi ohoghe nin Esu rẹ hiẹ ẹbho hi, iman-emhin ohoghe rẹji uu, bi ebe sunu ji ọria sade ọria yu. Ene iman-emhin ohoghe nan zẹle nin ẹbho da lu emhin ne bha diẹn mun iBaibo sade ele tọ olinmhin. Bezẹle nin Esu da sabọ re ẹmhọn uu rẹ hiẹ ẹbho ne bunbun? Esu lẹn sẹbhọ ghe uu iyẹẹ ọria soso, bhiriọ, ọle lẹn ohoghe nin ọle ha ta rẹ hiẹ ẹbho. Osẹnobulua man mhan nin mhan nyẹnlẹn bhi ighegheghe. Ranmhude ọnan, ọ iyẹẹ ọria soso rẹ yu. (Eccl. 3:11) Oghian, ọle uu khin rẹji mhan. (1 Cor. 15:26) Arẹmiẹn Esu rẹ ẹmhọn uu rẹ bha ohoghe nẹga, ene ohoghe bha sẹ sabọ gue ẹmhọanta rẹji uu. Bhi ọsi ẹmhọanta, ẹbho ne bunbun dọ lẹn ebi Baibo tale rẹji eria ne yu bi ikhuaẹloghe nin mhan mhọn rẹji ele. Ele yẹ wo wewe ẹmhọanta nin ele luẹ bhi Baibo nẹga. (Eccl. 9:5, 10; Acts 24:15) Ebi Baibo tale sabọ ko mhan udu re. Ọ yẹ rẹkpa mhan nin mhan hẹi gheghe ha mun ofẹn, la nin mhan hẹi ha kpokpo egbe si emhin soso dẹ sunun ji ẹbho nesẹmhan ne yu. w19.04 14 ¶1; 15 ¶5-6
Saturday, October 30
Bha ha rẹkpa egbe mun ihẹ nọnsi ọdeọde. Bha ha lu iriọ, ibha ki mun uhi nọnsi Kristi sẹ.—Gal. 6:2.
Jehova wo hoẹmhọn ene ga ọle. Rẹ na bhi otọ ha vade ọle rẹ hoẹmhọn ele, ọle dẹ sẹyẹ wo hoẹmhọn ele rẹsẹbhi ighegheghe. Ọle yẹ hoẹmhọn ibhohiẹn nọn gbale. (Ps. 33:5) Bhiriọ, ọkhẹke nin mhan ha mhọn emhin eva bhi ọkhọle. Ene emhin hi: (1) Ọ ba iJehova bhi egbe sade a bha lu ene ga ọle nọnsẹn. (2) Ọle ve ive nin ẹbho nesọle ghe, ọria soso ida wo ha lu ele emhin ọbe rẹ ha khian, ghe, ọle dẹ re oya nin ẹbho ne bha lu ele nọnsẹn. Oyẹẹ zẹle nin Osẹnobulua da gbe uhi nin ọle na bhi obọ iMoses gbe nin ibhokhan Izrẹl. Ọsẹnobulua re ọne Uhi taman ele ghe, nin ele ha lu ẹbho rebhe nọnsẹn, manman nọn ene ibhioguele. (Deut. 10:18) Ọne Uhi nan rẹman ghe oyẹẹ nin Jehova mhọn da ene ga ọle wo manman dinmhin. Ẹghe nan rẹ mun agbotu ọsi Kristiẹn gbọ bhi ukpe 33 C.E., ọle Uhi nin Jehova na bhi obọ iMoses gbe nin ibokhan Izrẹl rẹ kpẹn. Ọnan be rẹman ghe Kristiẹn iyẹ da ha mhọn Uhi nọn ha gbega ele, yẹ ha tuẹn ibhohiẹn nọn gbale okhun bhi ẹwẹ ele? Eye! Uhi ọsọgbọn a ki re nin Kristiẹn. Arẹmiẹn Jesu bha gbẹn uhi kẹkẹ ọbhi otọ nin ene rẹkhan ọlẹn, ọle re adia bi ibhude kẹkẹ nin ele nọn ha gbega ele bhi iẹnlẹn. Emhin rebhe nin Jesu man ẹbho le, ọle “uhi nọnsi Kristi.” w19.05 2 ¶1-3
Sunday, October 31
Osẹnobulua nan na bhi obọ ọle miẹn ikoudure, . . . ko mhan udu re bhi ekpokpo nin mhan hi ki rẹ ha ye.—2 Cor. 1:3, 4.
Rẹ nanbhi ẹghe nan rẹ biẹ mhan ha vade, ọle mhan nin eria rẹ guanọ ikoudure. Sẹyẹ, mhan yẹ mhọn ọne ahu nan rẹ re ikoudure nin ọria ọbhebhe. Bhi ọsi ijiẹmhin, ahamiẹn ọbhokhan kuanlẹn bhi eji ọle da khiẹnlẹn, ọle ki viẹ bu aba ọle la inẹn ọlẹn. Arẹmiẹn ele ida sabọ re ọne itẹ rie bhi ọsi ẹjẹje, ele dẹ sabọ ko ọne ọmọn udu re. Ele sabọ rẹ nọọn ọne ọmọn ebe sunu, gbo amẹn-eviẹ si ọle bhi ẹlo re, yẹ si ọle kẹ egbe ha lẹlẹ ọle. Sẹyẹ, ele ki re ukhunmhun ọbhi ọne itẹ. Ọnan ki re ọne ọmọn huẹan. Ọle bhọ sabọ rẹ kie dọ ha khiẹnlẹn. Ahakizẹbue, ọne itẹ ki rie. Ẹghe eso, ọbalọ ne khọ gbera ọnan, ọle ibhokhan miẹn bhi egbe. Ẹbho mun ibhokhan eso riia a. Asabọmiẹn osukpa ọne emhin ọbe nan sunu ji ele, la igba ne bunbun. Aharẹmiẹn osukpa ọ sunu ji ele la igba ne bunbun, ọbalọ nin ele miẹn bhọ ikẹ fo. Ẹghe eso, a ki mun ọne ọria nọn lu ọle yẹ re oya nanlẹn. Ọkpakinọn, a imiẹn eso mun nin ele le oya ọbhi ebi ele lu. Aharẹmiẹn a re oya nin ọne ọria, ọbalọ nin ọne obhokhan ha miẹn bhọ sabọ sẹyẹ ha kpokpo ọle rẹ sẹbhi ẹghe nin ọle ha rẹ wanre. w19.05 14 ¶1-2