Mọnde, Novẹmba 2
Ahamiẹn ọria soso ribhi ẹwẹ bha nọn guanọ nin ọle ha wanlan, ji ọle wo ha bhii Osẹnobulua nọn re ẹwanlẹn nanlẹn. Osẹnobulua dẹ re nanlẹn, ranmhude ọle manman zẹ emhin bhi obọ, ọle igbe ọria okan.—Jem. 1:5.
Beji ẹmhọn nọn ribhi ebe ukpẹdẹ ọsi ẹlẹnan rẹman, Jehova i re ẹwanlẹn nọnsọle siakhan. Ọle re ọle nin ẹbho ne guanọ ọle. Beji Jemis nin odibo yẹ ta, Jehova ha re ẹwanlẹn nọnsọle nin ọria fo, Ọle i rẹ ọle gbe ọria okan. Ọle bha guanọ nin mhan ji ẹkhọ ha lo mhan rẹ ha bhii ọle nin ọle dia mhan. Bhi ọsi ẹmhọanta, ọle guanọ nin mhan wo ha bhii ọle. (Prov. 2:1-6) Imhan kii? Be bhọ mhan ha rẹ sabọ re egbe khọkhọ Jehova yẹ bhi uwedẹ nin ọle rẹ re ẹwanlẹn nin eria? (Ps. 32:8) Ẹbho nesi Jehova wo mhọn isẹhoa kẹkẹ nin ele rẹ ha man ibhio ele ebi ele lẹnlẹn. Bhi ọsi ijiẹmhin, mhan kẹ wo man ibhio mhan ne la munhẹn ha tẹmhọn Osẹnobulua ebi a rẹ lu ọle yẹ. Ene ewanlẹn wo man ibhio mhan ne zẹ sikẹ ele, bi ibhio mhan nin ikpea ne bha sẹ manman wanre ebi a rẹ miẹnsọn kẹkẹ yẹ bhi agbotu. Sẹyẹ, ibhio mhan ne manman guẹ ebi a rẹ bọn uwa oga yẹ, bi ebi a rẹ re ọle i nọnsẹn yẹ wo dọnmhegbe rẹ ha man ibhio mhan ebi a rẹ lu ọle yẹ. w24.09 28-29 ¶11-12
Tiuzde, Novẹmba 3
Ẹmhọn bha da wo ha ti mhan bhọ.—1 Tẹsẹ. 2:8.
Obhio mhan nin okpea, nin uwẹ rẹ sabọ dọ kiẹn ọwanlẹn, ọkhẹke nin uwẹ “ha yi ọria nin okan ine.” Ọnin hi, ọrebhe bhi agbotu dẹ ha tẹmhọn uwẹ nọnsẹn ranmhude uwedẹ esili nin uwẹ rẹ nyẹnlẹn. Sẹyẹ, ele i da ha tẹmhọn uwẹ khọlọ ranmhude uwedẹ nin uwẹ rẹ nyẹnlẹn. (1 Tim. 3:2) Rẹ deba ọnin, ọkhẹke nin uwẹ “ha yi ọria nin ẹbho tẹmhọnlẹn nọnsẹn bhi ughe.” Ẹbho ne i ga Osẹnobulua sabọ rẹ ha re unun riia uwẹ a ranmhude emhin nin uwẹ rẹọ i, ọkpakinọn, ọ bha khẹke nin ele ha mhọn emhin nin ele ha gene mun mhọn rẹ ha yọle ghe uwẹ i nyẹnlẹn nọnsẹn, la ọria eku uwẹ khin. (Dan. 6:4, 5) Nọọn egbe ẹ, ‘Ibhio mhan bhi agbotu bi ẹbho bhi olele be tẹmhọn mẹn nọnsẹn?’ Ahamiẹn “ọria nin emhin esili yẹẹ” uwẹ khin, uwẹ dẹ ha gbẹlokotọ bhi eji eria da lu nọnsẹn, yẹ khuẹnmhẹn ele bhi ikpẹ esili nin ele rẹman. (Taitọs 1:8) Sẹyẹ, ọ dẹ ha re uwẹ ghọnghọn rẹ ha lu emhin esili nin ẹbho. Uwẹ bhọ dẹ lu ọle nin ele gbera beji ọkhẹke. Bezẹle nọn da manman lu uhọnmhọn emhin nin ene ewanlẹn rẹ ha mhọn ọne ikpẹ nan? Ranmhude ele manman noo ẹghe nọnsele rẹ gbẹloghe ene ibhio mhan, yẹ rẹ miẹn ẹsọn kẹkẹ nan mun nin ele. (1 Pita 5:1-3) Arẹmiẹn ọne ẹsọn nan bha lẹkhẹ, eghọnghọn nin ele miẹn bhọ kpọnọ gbera emhin nọn hi ki rẹ khin nin ele fikekegbe nin ele rẹ sabọ miẹn ọne ẹsọn nan.—Iwẹn. 20:35. w24.11 20-21 ¶3-5
Wẹnẹzde, Novẹmba 4
Ọria nọn lu ẹsele, ọle ha ghọnghọn gbera ọria nan lu ẹsele nan.—Iwẹn. 20:35.
Ene zẹ sikẹ ene ewanlẹn wo miẹn ẹsọn kpataki bhi agbotu. Ẹmhọn ene ikpea nan wo ha ti Pọl nin odibo bhọ. Bhi ọsi ijiẹmhin, bhi ẹghe nin ọle rẹ gbẹn ilẹta ji Kristiẹn ne ha ribhi Filipai, ọle da wo je tuẹ ene zẹ sikẹ ene ewanlẹn bi ene ewanlẹn. (Fil. 1:1) Ibhio mhan nin ikpea wo sọnyẹnmhẹn bhọ rẹ ha ga bhi ihe ọsi ene zẹ sikẹ ene ewanlẹn aharẹmiẹn ele wanre la obhokhan ele khin. Bhi ọsi ijiẹmhin, ikpe 18 Devan ha ye beji a re ọle kiẹn ọkpa bhi ene zẹ sikẹ ene ewanlẹn. Bhi obọ nọnkẹle, obhio mhan nin Luis gbera ikpe 50 beji a re ọle kiẹn ọkpa bhi ene zẹ sikẹ ene ewanlẹn. Be ọ dia Luis bhi egbe yẹ rẹ ha ga bhi ọne ihe? Ọle da yọle: “Ọ wo rẹ mẹn ghọnghọn rẹ ha rẹkpa ibhio mhan bhi ọne uwedẹ nan, manman nọn sade mẹn ria ẹmhọn uwedẹ nin ele sẹ rẹ re oyẹẹ man mẹn.” Inian ọ yẹ wo khin rẹji ibhio mhan ne bunbun ne ga bhi ihe ọsi ene zẹ sikẹ ene ewanlẹn! Ahamiẹn uwẹ mianmẹn fo, ọkpakinọn, uwẹ i sẹ yi ọkpa bhi ene zẹ sikẹ ene ewanlẹn, uwẹ be dẹ sabọ ha mhọnlẹn bhi emhanmhan? w24.11 14 ¶1-3