Orọ Ọsosuọ Ro Se Ahwo Kọrint

5 Me yo nọ ọfariẹ-ogbe*+ ọ rrọ udevie rai, oghẹrẹ ọfariẹ-ogbe* nọ a rẹ tubẹ jọ udevie erẹwho na ruẹ dede he, inọ ọzae jọ o mi ọsẹ riẹ aye, aimava a tẹ be rria uwou.+ 2 Kọ onana u bi ru oma mu owhai? Kọ ogbẹrọnọ wha re weri,+ re wha si ọzae nọ o ru oware uyoma nana no udevie rai?+ 3 Dede nọ mẹ rrọ kugbe owhai evaọ ugboma ha, mẹ rrọ kugbe owhai evaọ ẹzi, yọ me brukpe ọzae nọ o ru oware nana no wọhọ ẹsenọ mẹ rrọ kugbe owhai. 4 Nọ wha te kokohọ evaọ odẹ Olori mai Jesu, jẹ riẹ nọ mẹ rrọ kugbe owhai evaọ ẹzi gbe ogaga Olori mai Jesu, 5 wha re siobọno ọzae otiọye na kẹ Setan+ hrọ re wha rọ ere raha ekpehre uruemu na no, re emamọ ẹzi ukoko na o sae gbẹ jariẹ evaọ ẹdẹ Olori na.+

6 Ehaise rai na u woma ha. Kọ wha gbẹ riẹ nọ ẹvi* ọsese o re ru ukulu soso fu?+ 7 Wha gbolo ukulu anwae nọ ẹvi ọ rrọ na kufiẹ, re wha sae jọ ukulu okpokpọ, nọ orọnọ wha kare umuomu na. Keme a rehọ Kristi omogodẹ Ọnyavrẹ+ mai na dhe idhe no.+ 8 Fikiere, wha joma ru ehaa na,+ orọnikọ avọ ukulu anwae nọ ẹvi ọ rrọ họ, hayo ẹvi nọ o dikihẹ kẹ eyoma gbe emuemu hu, rekọ avọ ebrẹdi nọ ọ kare ẹvi nọ o dikihẹ kẹ oruọzewọ* gbe uzẹme.

9 Evaọ ileta mẹ me kere se owhai nọ wha siọ usu ba ẹnya kugbe ahwo nọ a bi gbe-ọfariẹ,* 10 orọnikọ wha rẹ hẹrioma riẹriẹriẹ no ahwo akpọ nana+ nọ a bi gbe-ọfariẹ* hayo ahwo uvou-uthethei hayo enọ i re fru amọfa re hayo egedhọ họ. Keme o tẹ rrọ ere, kiyọ wha re ti no akpọ na no.+ 11 Rekọ enẹna me bi kere se owhai nọ wha siọ usu ba ẹnya kugbe+ ohwo kpobi nọ o se omariẹ oniọvo nọ o bi gbe-ọfariẹ* hayo ọnọ o wo uvou-uthethei+ hayo ọgẹdhọ hayo ọlahwo-eka hayo ọgba-udi+ hayo ọnọ o re fru amọfa re,+ wha tube lele ohwo otiọye na re emu hu. 12 Keme ovẹ u te omẹ nọ me re ro bruoziẹ enọ e rrọ ukoko na ha? Kọ ogbẹrọnọ enọ e rrọ ukoko na wha re bruoziẹ rai, 13 re Ọghẹnẹ o bruoziẹ enọ e rrọ ukoko ho?+ “Wha si ohwo omuomu na no udevie rai.”+