O rẹ ginẹ da gaga nọ ohwo jọ o te kienyẹ omai. (Ọtausi. 7:7) Makọ oke anwae dede, u wo idibo Jihova jọ nọ o kẹ uye gaga nọ a ruẹ okienyẹ nọ ọ jọ otọ gbe eware iyoma efa nọ e be via. Ahwo wọhọ Job avọ Habakọk. (Job 6:2, 3; Hab. 1:1-3) Dede nọ a te kienyẹ ohwo o rẹ da gaga, ma rẹ yọroma re ma gbe ru oware ugheghẹ hẹ, keme oyena u re ru eware yoma ga viere. Nọ eware i te bi woma kẹ ahwo oyoma, o rẹ lẹliẹ omai roro nọ u fo re ma lahiẹ oma ru oware uwoma ha. Oware utioye o via kẹ ọso-ilezi jọ re. Nọ ọ ruẹ nọ eware i bi woma kẹ ahwo omuomu vi ahwo owoma, ọ tẹ ta nọ: “Ahwo nana họ ahwo omuomu nọ eware e rrọ lọlọhọ kẹ ẹsikpobi na.” (Ol. 73:12) O kẹ riẹ uye gaga nọ ọ ruẹ nọ ahwo oyoma ọvo eware i bi woma kẹ. Ọ ta nọ: “Nọ mẹ jẹ daoma wo otoriẹ riẹ, o tẹ jẹ kẹ omẹ uye.”—Ol. 73:14, 16. w24.11 3 ¶5-7

Ma rẹ kẹ Jihova oruaro fikinọ ma be kẹe adhẹẹ gaga. Eware buobu e vọ riẹ nọ e rẹ lẹliẹ omai kẹ Jihova adhẹẹ. Ọjọ họ, ogaga riẹ u wo umuo ho. (Ol. 96:4-7) Ere ọvo ho, who te rri eware nọ ọ ma, whọ rẹ nwane ruẹ nọ o wo areghẹ gaga. Ọye ọ ma omai re, yọ ọ be sẹro uzuazọ mai. (Evia. 4:11) O re ru oware nọ o gba ẹsikpobi. (Evia. 15:4) Oware kpobi nọ ọ gwọlọ ru, o re ru ei. Yọ ọ tẹ ya eyaa no, ọ rẹ se iẹe ba erugba ha. (Jos. 23:14) Kọ enana kpobi e wha riẹ ze nọ Jerimaya ọruẹaro na ọ rọ ta ẹme jọ kpahe Jihova. Anọ: “Evaọ udevie ahwo kpobi nọ i wo areghẹ evaọ erẹwho na gbe evaọ udevie ekwotọ-ivie na kpobi, ohwo ọvo nọ ọ wọhọ owhẹ ọ rrọ vievie he.” (Jeri. 10:6, 7) Jihova Ọsẹ obọ odhiwu mai na o gine te Ọghẹnẹ nọ ma rẹ kẹ adhẹẹ. Rekọ orọnọ adhẹẹ ọvo ma rẹ kẹ Jihova ha. Ma you rie re keme o wo uruemu nọ o rẹ lẹliẹ omai kẹle iẹe. Maero na, ma rẹ kẹ Jihova oruaro fikinọ ma you rie gaga. w25.01 3 ¶5-6

Ahwo nọ a be wọso Ọghẹnẹ a rẹ gwọlọ ru re ma rri emamọ eware nọ ukoko Ọghẹnẹ o bi ru wọhọ ikpehre eware. Joma kẹ oriruo jọ. Ma jọ Ebaibol wuhrẹ nọ Jihova ọ gwọlọ nọ ahwo nọ a be gọe kpobi a rẹ jọ fuafo tẹtẹtẹ. A re ru ikpehre eware he. A vẹ jẹ gọe oghẹrẹ nọ ọ gwọlọ. Ọ ta nọ ohwo jọ o te bi ru oware uyoma, yọ ọ gwọlọ kurẹriẹ hẹ, jọ a si ei no ukoko na no. (1 Kọr. 5:11, 12; 6:9, 10) Nwanọ epanọ Ikereakere na e ta na ma bi ru. Rekọ ahwo nọ a mukpahe ukoko na a be ta nọ ekpehre oware ma bi ru na, izi mai e ga hrọ, ma re gu ahwo ẹdhọ, ma re mukpahe ahwo. Ma rẹ riẹ ohwo nọ ọ be lẹliẹ ae ta ikpehre eme nana kpahe omai na. Setan Ẹdhọ na ọye ọ be lẹliẹ ae gu erue fihọ omai uzou na. Setan họ “ọsẹ ọrue.” (Jọn 8:44; Emu. 3:1-5) Kọ ẹvẹ o gbe gu erue kpahe ukoko Jihova ha? Ọye o bi gele ahwo nọ a rrọ abọ riẹ uzou họ re a wọ eku họ omai uzou na. w24.04 10-11 ¶13-14